A Wa Niŋ Paandu Kɔɔfanɔ Lɔɔlɔɔ Wo?
1. Dikeŋnaŋ kuɛɛ wanaa bɔɔbɔɔ cho yɛ tueiyɔɔ yeela, kɛ yɛɛ yɔŋnuŋ yɛ waŋnda apum?
1 O cho niŋ le wɔsila bɔɔbɔɔ waŋnda o waalaŋ niŋ a cho a yɔŋgaŋ o wali Mɛlɛkaa niŋ lɔɔlɔɔ wa a cho dikeŋnaŋndo hoo tueiyɔɔ yeela le “waŋnda pɛɛkoo a nda yooŋgu kɛndɔɔ chɔmndo.” (Walta Wanaa Chiisuaa 5:42) Waŋnda apum mal niŋ kɔɔfale lɔɔlɔɔleŋ le sabulaŋ yɛ yɛ. Te kɔɔfanɔ lɔɔlɔɔ wo ŋ wa paandu ni, a tofa niŋ te sɔɔŋ siŋgaŋ niŋ le ma kandu vɛlɛ kɔɔfaleŋ?
2. Le yɛɛ wanaa tosa paandu kɔɔfaleŋnda nɔ yɛ ma tofa siŋgaŋnda ndalaŋ suŋsuŋ?
2 Sɔɔŋ Siŋgaŋndoŋ. Naapum bahawɛi tosa teleŋ koŋ ma mal kɔɔfaleŋndo cho lɛ le. Le tamaseliiyo, Kɔɔfaa lɔɔlɔɔ wa ndaa tosa havɛilaŋ (lɛɛlɛlaŋ) 90 ipaŋgu o ipaŋgu fee. Naapum num aa tiuba ma fuuluu havɛilaŋ ndaŋ te okoŋ, ma mal. Kɛ suŋsuŋ niŋ, kɔɔfaa lɔɔlɔɔ wa tosa havɛilaŋ 70 ipaŋgu o ipaŋgu fee. Vɛ, o ve o bɛndaa ma kandu vɛlɛ kɔɔfaleŋ te? Baa wali ŋ tosa wo ɔɔ kalaŋnda yuŋgu numndo la dɔɔniaŋ niŋ chɔŋ a teleŋ ŋ mal kɔɔfaleŋndo? Mi ndepilɛnɔ mal kɔɔfaleŋ le mɛɛ ndoo nɔ kɛndiaa sɔvɛ le yɛ, kandu vɛlɛ kɔɔfaleŋ, o wa niŋ wɔsilaŋ 89. Ndoo hiou wɔsioo opilɛ ndepilɛnɔɔ hoo kue o lapita niŋ te. Mbo yiyaŋ maa kɛndiaa ndɔɔ mala ndu niŋ mbo tosa vɛlɛ kɔɔfaleŋ.
3. Vɛɛ wanaa cho o yuŋgoo niŋnda mala yɛ mi waŋndo opilɛ nda tɛɛŋ tosa kɔɔfaleŋ?
3 Naapum a tosa lekɔɔfa paandu le, kɛ mi wana wa kɔɔfaleŋ tosaa o yuŋgu numndo niŋndo mal le finyaa ɔɔ kala yuwɛiyo mandaa. (1 Timo. 5:4, 8) Te o wa lende pɛ, num ɔɔ wanaa cho o yuŋgoo niŋnda mala ndu mbo miiŋgu vɛlɛ kɔɔfaleŋ. Le hei tosaa, o bɛnda mi wanaa cho o yuŋgoo niŋnda kpou suukaŋ a ndi okɔɔ. (Pulɔ. 15:22) Te wanaa cho o yuŋgoo niŋnda chɛlaŋ pɛ mi waŋndo opilɛ nda tɛɛŋ wa kɔɔfaleŋ tosaa, a cho chɔ maa suɛi sɔvɛi pila keŋ cho ni.
4. Te a nɔla ma tosa kɔɔfaleŋ suŋsuŋ te, yɛɛ ŋ nɔ yɛ ma tosa?
4 Wa a kɔl tambɛi le mɛɛ bahawɛila numndaŋ suŋsuŋ la chɛl num ma kandu vɛlɛ kɔɔfaleŋ tosaa yɛ le. Yeemɛi numnde le hei tosaa nɛŋi Chɛhowa kɔllo tau. (2 Kɔliŋ. 8:12) Soliŋ kɔlkalula ŋ sɔla paandu o kɔɔfaleŋ niŋndo kpeku o wali pollo niŋ. Dɔu bahawɛi numndo o piɛileŋ niŋ nduyɛ, ma wa o bɛɛndiaŋ teleŋ o teleŋ le bahawɛila numndaŋ yɛlɛmiaa. (Chɔŋ Tasoo 5:14) Naapum teleŋ fuuluu niŋ, mi Chɛhowa kumbul num vɛlɛ dioo “le wali kɛndɛ kɛndɔɔ hoo tosaa” okoŋ, ma tuei vɛlɛ wali lekɔɔfaa yeela!—1 Kɔliŋ. 16:9.