Soliŋ Yau Yooŋgu Kɛndɔɔ Kpeku le Waŋnda Pɛɛkoo
1. Vɛɛ yau Yooŋgu Kɛndɔɔ cho yɛ o toosiaŋ?
1 A mɛɛ naŋ yaasiaa o Yau Wali Naa leMasaa niŋ o Suɛɛsɔɔ niŋ yɛ, o kɔfu nyɛm waliŋ kpeekpei naŋ pɛɛku waŋnda woŋ tɛɛŋ, yau Yooŋgu Kɛndɛ Chɛŋ O Mɛlɛka Lo Wo! cho opilɛ. Bolii Baabuiye cho i poonyiaa o yauwo hoo niŋ. Kɛ le wana chiɛiyo malaa mbo pɛɛku nyɛ dimiŋ o bolii Baabuiye hei niŋndo, mɛɛ mi la nua nya ndu latulu o Baabuiyo niŋ. Mi che bɛɛ yaula bɔɔbɔɔ naŋ pɛɛku waŋnda laŋ la cho la toosiaŋ maa te waŋndo wa diomndaŋ veeloo leniŋ pɛ, ndupila tiuba mbo bii bila. Kɛ yauwo hoo ndu toosiaŋ maa mɛɛ mi waŋndo sɔla fɛŋ wana pɛɛku ndu wo malaŋ o bii ndu bila. Lelaŋ, te ŋ ke waŋndo yauwo hoo pɛ, ŋ kindiŋ miŋ chɔm wana koŋ mɛɛ naŋ pɛɛku Baabuiyo a waŋnda yɛ le mi wana koŋ che le sabu o bɛnda mbo pɛɛku sɔɔŋ kɛndɛŋ cho o Baauiyo niŋndo.—Maa. 13:44.
2. Vɛɛ naŋ soliŋ yɛ yau Yooŋgu Kɛndɔɔ kpeku o kɔla taselaŋ?
2 O Kɔla Taselaŋ. Naapum a dimi naa aa, “I hiŋ o nyalo kanifuule wanaa bɔɔbɔɔ cho buulaŋndo a chila chieeŋndo hoo okɔɔ. A laalaŋ pa maa sɔɔŋ cho hau yɔŋnɔŋndo o chieeŋndo choo wo ŋ cho hunɔɔ siŋgaŋ? [Chum mbo muli.] Baabuiyo nɔ yooŋgu kɛndɛ ke naa tiindaŋndo wo. Nuawɔ nyunala Baabuiyo mulilaŋ latiŋ.” Ke wana chiɛiyo yauwo, okoŋ ma dimul ndu le mbo nua o yauwo kɔɔ mbo hɛli nyuna o yeema mi la suukaŋ choo wo. Chɔm ndu mɛɛ naŋ tosa pɛɛkoo a waŋnda yɛ o pɛl tase cho o buŋgɛi keŋ niŋndo. Nɛi cheleŋ cho vɛlɛ ni, a nyuna wana chiɛiyo nyuna pilaŋ ndu kɔllo wo o buŋgɛi numpila hɛli ve niŋ okoŋ, a chɔm ndu mɛɛ yau koŋ mala ndu mbo saaluŋ muli Baabuiyo yɛ. Te viduei cho pɛ jw.org a buŋgɛi keŋ okɔɔ, mi wanaa dimiaa yooŋgu kɛndiaa apum chɔm ndu teleŋ nda wa suɛi o waŋndo lo wo.
3. Tɛɛsiaa mɛɛ wana tosa pɛɛku Baabuiyo o yau Yooŋgu Kɛndɔɔ niŋ yɛ.
3 Vɛɛ Ŋ Tosa yɛ Pɛɛku Baabuiyo a Yauwo Hoo? (1) Veelu nyunala nɔ poonyiaa tiŋioo diki diki wo o nɛi wana chiɛiyo bii suɛi kulle bila wo niŋ. (2) Veelu diomndaŋ le pɛl nyuna koŋ. (3) Nua bolii Baabui nda yɛɛmbuu ve, okoŋ ma soliŋ kpeku a nyunala mala ndu mbo sina mɛɛ bolii Baabui keŋ muli nyuna koŋ yɛ. (4) Te pɛl cheleŋ wa pɛ o nyuna koŋ bɛŋgu, soliŋ vɛlɛ nɛi 2 a 3 kpeku. Te vidueiyo chɛllaŋ pɛ a nyunaa nduyɛ ma chɔmndɔ ndu wana chiɛiyo le, kindiŋ ma tosa hei teleŋ nya cho wa suukaŋndo wo. (5) Mɛɛlulaŋ kpɔŋ, nyuna vɛlɛ wana chiɛiyo nyuna poonyiaa diki diki ŋ nyuna o tasela ndɔɔ wo le sinaa te o bii ndu pɛ bila nyɛkɛndɛi.
4. Yɛɛ cho yɛ naa mala miŋ soliŋ nyɛ wali kɛndɔɔ hoo kpeku nyɛkɛndɛi?
4 Pɛɛku sɔɔŋ cho o nyɛ wallo hoo niŋndo nyɛkɛndɛi. Soliŋ ndu kpeku lɔɔlɔɔ a teleŋ o bɛnda wo. Tuupa ma kuɛ o pɛɛku kɛ kɛ, yiyaŋ fɛŋ a wana ŋ cho pɛɛkoo wo. Pɛɛku bolii Baabui cho o buŋgɛi keŋ niŋnde le ndu malaa mbo bii bila nyɛkɛndɛi. (Pulɔ. 15:28; Walta. 17:2, 3) Te a sina pɛ mɛɛ ŋ soliŋ yauwo hoo kpeku nyɛkɛndɛi o wali pollo niŋ yɛ, a cho chɔ kɛsɛ maa nyɛ wali kɛndɔɔ pila o cho ni le ndu soliŋndo kpeku le waŋnda tonyaa pɛɛkoo!