1922 Nyɛ Yɔŋnuŋ O Wɔsioo Hoo Niŋndo

“MIŊ SƆLA TAASIOO LE SƆƆŊ PUM TOSAA”

Mɛɛ yooŋgu kɛndɔɔ wa dimiŋndo fau yɛ, lende koni waŋnda ndaa chɔm yeemɛi le yaula naalaŋ sɔlaa ni. Mi che bɛɛ puaapiliaa wa o Bɛtɛɛl Bulukiliŋ nda wa yaulaŋ toosiaa, kɛ fondaŋ wali bɛndu pilɛ ndaa tiindaŋ ni le laŋ solioo o pei choo. Nduyɛ, nyɛsɔlaa ndaa paawa ni. Kɛ a teleŋ pum, le paŋguŋ bɔɔbɔɔ puaapiliaa ve yaulaŋ sɔla le. Mi hei paaliaŋ wali dimiaa yooŋgu kɛndɔɔ tau. Le hei, mi Ŋgɔɔ Lutafɔɔ nyuna Luaabɔɔ Matɛŋ, puaapilɛnɔ wa fondaŋ wali koŋ chilaŋndo le sinaa te kɔɔnaa tiu pɛ ba le mbo wa yaulaŋ solioo o pei choo.

Mi Ŋgɔɔ Matɛŋ dimi aa: “Taasi kɛndɔɔ pila cho koŋ ni. Kɛ la nɔ mi la nɔ maasii wana poonyiaa o pei choo wo, nyɛ duau pei naapilɛ wo, a nyɛ soli ndi wo.” Mi puaapiliaa you fondaa o 18 Kɔŋkɔ Situit o Bulukiliŋ niŋ, nduyɛ ma piandu nyɛm ndaa hauba woŋ.

O cho wana o wana le ndoo naŋ kɔl a hei le. Teleŋ pilɛ, mi wana wa chilaŋ le fondaŋ wali puaapiliaa ndaa soli yaulaŋ o pei choo wo, kua fondaŋ sɛnɛi puaapiliaa ndaa toosiaa wo tofaa. Mbo dimi aa: “La nɔ nyɛm waliŋ kɛndɛ kɛndɔŋ naŋ tau. Kɛ, nya kpou wana o wana chiee muŋ soliŋndo kpeku le. Tuupa mi la chua paŋgoŋ ŋɔmpum, nyɛ o nyɛ cho naŋ cho tambu.”

Mi Ŋgɔɔ Matɛŋ dimi aa: “Taasioo wa o nyɛ o dimi wo niŋ. Kɛ wali Masanɔɔ cho hoo ni, nduyɛ o cho wa a naa latulu.” Nyɛ Ŋgɔɔ Matɛŋ dimi wo wa tonya. Nyɔɔ viu bɛɛ le, ma kandu yaulaŋ 2,000 solioo o paaleŋ niŋ.

WAŊNDA O WAALAŊ NIŊ YOOŊGU KƐNDƆƆ DIMULLO O ALAADIOO CHOO

Mi che bɛɛ wanaa Chɛhowaa wa yaulaŋ solioo o pei choo a ba nda, kɛ ma kandu vɛlɛ alaadioo soliŋndo kpeku le yooŋgu kɛndɔɔ dimioo. O Kuɛɛndoo choo ipalaa, Doŋdoŋndo 26, 1922, mi Ŋgɔɔ Lutafɔɔ yɔŋgu suɛi o alaadioo choo le teleŋ tasoo. Suɛi ndoo yɔŋgu ve ndii nɔ suɛi lebolle aa: “Wanaa Cho Hau Yoomu o Miiliɔŋndaŋ Niŋnda a Vi lɛ Niŋ Te.” O alaadi wa Lɔs Aŋgɛlɛs, o Kalifooniaa Amɛlika niŋndo choo o yɔŋgu ndi ni.

Wanaa yaŋ suɛi hei nilaŋ nda ndaa wa le 25,000. Mi wanaa bɔɔbɔɔ yɔŋ yaula balika melaalaŋ le suɛi nda tuei ye. Mi wana pilɛ o waŋnda haa tɛɛŋ fulaa Saŋta Ana, Kalifooniaa, diolaŋ Wilad Asifɔɔd, chandu Ŋgɔɔ Lutafɔɔ tau le suɛi kɔl dɛɛniaa ndoo yɔŋgu ve. Mbo dimul ndu aa: “Paale ŋ yɔŋgu suɛi keŋ nde, wanaa yaa o naalo chiɛɛniŋ wa a naa. Le hei, naŋ tiu niŋ ba le ndi nilaŋ yaŋɔɔ le. Hali ndoo wa bɛɛ aa naa ikɛi num oo yɔŋgu ndi ni. Kɛ alaadioo mala naa ni le ndi tueiyɔɔ.”

Ma hiau lachi a sɔɔŋ yɔŋgoo o alaadioo choo. O wɔsi 1922 mɛɛlulaŋ, mi Bandu Mɛŋgɛlaa dimi maa “waŋnda le 300,000 tuei yooŋgu kɛndɔɔ o alaadioo choo ni.”

Mi hei dɛɛniaa Sukuuwaa Pɛɛkaa Baabuiya kɔllo tau. Nduyɛ, ma kɛɛsiaa le fondaŋ alaadioo taŋgullo o lɛŋnde ibuŋgaleŋ Statɛŋ. Fondaŋndo hoo cho landaŋ a Bɛtɛɛl Bulukiliŋ te. Mi ndaa soliŋ niŋ alaadioo hoo WBBR kpeku, le yooŋgu kɛndɔɔ pɛŋgɛlaa.

“ADV”

Yondaa wa o Bandu Mɛŋgɛlaa le Kooŋndo 15, 1922 niŋ maa, bɔŋaŋ bɛndoo cho biinɔŋ Sida Pɔiŋ Ohayo, chɔŋ Tapioo 5 haaa 13, 1922. Sukuuwa Pɛɛkaa Baabuiya wa a kɔl kɛndɛ tau mɛɛ nda chuuŋgiaŋ Sida Pɔiŋ le bɔŋaŋndo hoo.

Mɛɛ Ŋgɔɔ Lutafɔɔ wa wanaa kuɛ o bɔŋaŋ koŋ nda achaa hunɔɔ wo dimullo, mbo dimi aa: “I nɔ tiindaŋndo maa, Masanɔɔ cho . . . bɔŋaŋndo hoo sala dɔwɔɔ. Nduyɛ yooŋgu kɛndɔɔ cho dimiŋ o chieeŋndo choo mbo hiou maa paandu.” Mi wanaa yɔŋgu sɔɔŋ o bɔŋaŋ koŋ nda dɛɛniaa wana o wana le yooŋgu kɛndɔɔ dimioo.

O Chimɛiyo choo Tapioo 8, mi waŋnda le 8,000 pia o chiɛi bɛndoo niŋ. Nduyɛ a wa a yeemɛi kpeekpei le suɛi Ŋgɔɔ Lutafɔɔ ve nilaŋ yaŋɔɔ. Ndaa nɔ tiindaŋndo maa Ŋgɔɔ Lutafɔɔ wa nda chɔm nyɛ chomultaŋ ndaŋ “ADV” simndo. Chomultaŋ ndaŋ la wa la poonyiaa o yau veelaa choo. Naapum mɛɛ nda wa kɔlaŋ o fondaŋnda ndalaŋ le challe, ma cha nyɔɔ choo choo o fondaŋ biŋndo wa wo o kumbaa. Mi Atɔ Kluas fulaa Tusa, Okilahoma, o Amɛlika niŋ, kua o bɔŋaŋndo hoo. Nduyɛ mbo nuuviaa fondaŋ chalaa, naa o tiuba mbo tuei nyɛkɛndɛiya. Kanifuule, a teleŋ koŋ, bulu suaa ve le diomndo solioo nyɛkɛndɛi le.

Mi wana kumbi bɔŋaŋndo wo dimi maa wana o wana hiŋ pɛ o yaaŋgɛiyo, o nɔ mbo luɛi o fondaŋ bɔŋaŋndo a teleŋ Ŋgɔɔ Lutafɔɔ cho wa suɛi yɔŋgoo wo le, yɔŋii o paaliaŋ acheleŋnda. A lɔɔ 9:​30 idiiyo, mi Ŋgɔɔ Lutafɔɔ kandu suɛi nduɛi yɔŋgoo. A diomda Chiisu dimi o Maatiu 4:​17 niŋndaŋ o kandu ni. Mbo dimi aa: “Masale Mɛlɛkaleŋ le cho niŋ kpɛɛluŋ.” Mɛɛ o wa suɛi a mɛɛ waŋnda chieeya looku niŋ ma tuei a yooŋgu kɛndɔɔ hoo okɔɔ yɛ, mbo dimi aa: “Mi Chiisu pila dimi maa, o boondii nduɛi niŋ, o cho wanaa nduaa chuuŋgiaa, nduyɛ mbo hɛli wanaa cho lo lechoo wo chɔmndo o ndu lo wa.”

Ŋgɔɔ Klaus wa ichali o chiɛi Ŋgɔɔ Lutafɔɔ wa suɛi yɔŋgoo wo niŋ. Mbo dimi aa: “Ŋ wa nilaŋ yaŋɔɔ yekeŋ o nyɛ Ŋgɔɔ Lutafɔɔ wa dimioo wo.” Kɛ nyɔɔ viu bɛɛ le, mi Ŋgɔɔ Klaus del a naa. Nduyɛ ndoo nɔ mbo kuɛ o bɛɛ. Kɛ o wa kiisaŋndo kanifuule, ndoo sina maa te o fula pɛ, a ve lɛ ndu chɛlɔɔ mbo miiŋgu le.

Mɛɛ o fula, nyɔɔ viu le, mbo kandu sinaŋndo nyɛkɛndɛi. Mbo dimi maa mbo miiŋgu pila naa Ŋgɔɔ Lutafɔɔ wa suɛi yɔŋgoo wa. Nduyɛ mɛɛ o wa chiɛi bɛndu koŋ sɔɔŋguuwo ikɛi, mbo tuɛi waŋnda balaŋ tiɔmɔɔ. Mi keŋ tosa mbo chɔɔlu yeemɛi nɔ le luɛiyɔɔ. Mbo kɛɛsiaa maa o cho siou suɛi keŋ nilaŋ yaŋɔɔ, o yɔŋ bɛɛ mbo hel o kaa, okoŋ mbo tol chiɛiniŋ. Ŋgɔɔ Klaus wa wɔsilaŋ 23 a teleŋ koŋ, nduyɛ mbo nuuviaa nɛilaŋ mbo hel o kaa. Fondaŋ wa o kaa le tolɔɔ o chiɛi bɛndu koŋ niŋndo wa o kumbiaa. Nduyɛ mɛɛ o fuuluu o fondaŋ koŋ, mbo cha maa, o tiuba mbo tuei nyɛkɛndɛi.

Kɛ o cho ko Atɔ le wa choo choo loŋ te. Chaaŋaa nduaa apum wa niŋ loŋ. Mi chaaŋ ndɔ pilɛ diolaŋ Filaŋki Chɔŋsiŋ kua o ndu lo mbo nyuna ndu aa: “A nɔ muɛi pɔmbuɛi o ba?”

Mi Atɔ muli aa: “Ei.”

Mi Filaŋki dimi aa: “Mɛɛ ŋ sɔla mulioo le piɛile naaleŋ.” Mbo dimul Atɔ aa: “Nyɛ ŋ cho hoo chɔɔ wo, poonyiaa cho o ndu kɔɔli. Lelaŋ yaŋ nilaŋ yekeŋ. Te a tuei dɔɔ pɛ mi Wana Kialaa Ŋyamaaa dimi aa: ‘La yonda, la yonda,’ a kelu nyɛ kumbu poonyiaa koŋndo.”

Le hei, mi Atɔ bii muɛi o ba. Nduyɛ, ndu nda chaaŋaa nduaa wa a bɛɛndiaŋ le nyɛ koŋ kiolɔɔ te ndaa tuei dɔɔ pɛ diomnda nda dimul nda laŋ. Nyɔɔ viu bɛɛ le, mi Ŋgɔɔ Lutafɔɔ fuuluu o mɛɛlula suɛi nduɛi. Nduyɛ naapum mbo dimi a dialuŋ fulaa aa: “La lo o laalaŋ nyaa choo, nduyɛ mi la wa seiyaa tonyaa le Masanɔɔ. La nɔ dialuŋ fulaŋ le seileŋ timbioo haaa mi nyɛ o nyɛ a Babilɔŋ okɔɔ sɔla tambei. La dimi yooŋgoo hoo ba o ba fee. Chieeŋndo nɔ mbo sina maa Chɛhowa cho Mɛlɛka ni, nduyɛ maa Chiisu Kiliti cho Masa hiou masaa, a Masanɔ hiou kpaayaa kpou wo ni. Teleŋ sɔviɔɔ cho hoo ni mbo hiau teleŋ kɛ kɛ. La nua Masaa o masaleŋ choo! Nya cho wanaa dimi yooŋgoo a ndu okɔɔ wa ni. Lelaŋ, la yonda, la yonda, la yonda a Masaa vɛlɛ a Masale ndɔleŋ okɔɔ!”

Mi Atɔ dimi maa, mi ndu nda chaaŋaa nduaa kialu nyɛ koŋ, okoŋ mi nyɛ koŋ tual lɛŋ dɛɛ. Chomultaŋ ndaŋ “ADV” wa la poonyiaa o yau veelaa choo, nduyɛ laa chɛlaŋ a nyɛ wa o poonyiaa o nyɛ koŋ kɔɔli wo. Poonyiaa wa o nyɛ koŋ kɔɔli wo wa ni aa: “Advertise the King and Kingdom.” Laŋ la sim ni aa, “La yonda a Masaa vɛlɛ a Masale ndɔleŋ okɔɔ!”

WALI SƆVƐ SƆVIƆƆ CHO HOO NI

Mi bɔŋaŋ bɛndu biinuŋ Sida Pɔiŋndo mala puaapiliaa le ma handu kɔllo o wali sɔvɛ sɔviɔɔ choo. Ndu cho yɛ wali dimiaa yooŋgu kɛndɔɔ a Masale Mɛlɛkaleŋ okɔɔ ni. Nduyɛ, wanaa ndaa yɔŋguŋ a kɔllo kpou wa wa a kɔl kɛndɛ tau. Mi kɔɔfanɔ pilɛ o teleŋ koŋ niŋ fulaa Okilahoma, Amɛlika poonyiaa aa: “O tanda waŋnda ndaa luam suɛɛnde wo niŋ naŋ kua yooŋgu kɛndɔɔ dimioo ni. Nduyɛ bala fondolaŋ la wa tau o fondaŋ koŋ.” Mbo dimi maa, lepum te waŋnda ndaa tuei pɛ yooŋgu kɛndɛ wa o yaula “Tiondoo!” niŋndo, mi ndaa tusi mɛmiaŋ kpasu kpasu. Mbo mɛɛlu dimi aa: “I wa bɔɔ suɛi kɛndɛ le waŋnda haa kɔltaŋ dɛɛniaa.”

Mi Sukuuwaa Pɛɛkaa Baabuiyaa kaŋ cha mɛɛ diomnda Chiisu dimi o Luku 10:​2 niŋndaŋ la wa choŋ choŋ yɛ. Mbo dimi loŋ aa: “Chiɛi vesa tau le kouwɔɔ, kɛ wanaa kuauwaa bɔɔ cho le.” Mɛɛ wɔsi koŋ wa chuwɔɔ, ma kɛɛsiaŋ o kɔl le yooŋgoo dimioo a Masaleŋ okɔɔ ba o ba fee o chieeŋndo choo, mbo hiou maa paandu.