Le Yɛɛ La Bii Dunyɛi Le Fulasɛiniŋ Chiisu Wo Le?

Choola Waŋnda Nyiinduu Naa Laŋ

Choolaŋ: Sabu Seiyaa Chɛhowaa bii fulasɛiniŋ Chiisu wo le wo cho ni, a cho ŋKilisiɔŋ te.

Tonyaa: Ŋ laalaŋ maa Chiisu Kiliti baŋa naa ni. Nduyɛ, ŋ kindiŋ kpoke le “taamasi” ndɔɔ tolɔɔ kɔɔli—Pitɛ Tasoo 2:21; Luku 2:11.

Choolaŋ: La laalaŋ maa Chiisu fula o sɛiyo niŋ te.

Tonyaa: Ŋ laalaŋ o fulasɛiniŋ Chiisu wo niŋ; ŋ sina maa le ma nɔ laalaŋndo o Chiisu niŋ, mɛɛ ma laalaŋ maa o fula o sɛiyo niŋ. Nduyɛ, ŋ dimul waŋnda maa Chiisu fula o sɛiyo niŋ o baala naa dimiaa yooŋgu kɛndɛ Mɛlɛka wo niŋ.—Kɔliŋtiaŋ Tasoo 15:3, 4, 12-15.

Choolaŋ: La buulaŋ bɛɛ maa nyaale bɔɔ bɔɔ cho chuauwaa nyaa hiouwɔŋndo o paaleŋ ndeŋ choo le.

Tonyaa: Ŋ kaala chuauwaa naa—ŋ yɔŋguŋ naapila le nda pɛɛkoo a le nda malaa ma wa a nyaale.—Taitɔɔ 2:4.

Le yɛɛ Seiyaa Chɛhowaa bii fulasɛiniŋ Chiisu wo le?

• Baabuiyo dimul naa kposoŋ le duŋyɛi fulasɛiniŋ Chiisu ve biyɔɔ le.

• Chiisu dimi maa naŋ Loonuŋ a piɔm ndɔɔ kinɛi, o cho a fulasɛiniŋ ndɔɔ le. Wɔsi o wɔsi, ŋ loonuŋ a piɔm Chiisu wo okɔɔ a teleŋ Chiisu bii ndu sindɛ wo.—Luku 22:19, 20.

• Ŋ laalaŋ maa dunyɛi le fulasɛiniŋ Chiisu wo fula o naamula wanaa sina Mɛlɛka le wa niŋ, lelaŋ, Mɛlɛka kuisiŋ ndi o kɔl. Mɛlɛka yeema naa miŋ ke ndu “piɛile naaleŋ kpou,” nduyɛ, suɛi pila nɛi ndu ni te o yɔŋ pɛ miŋ muuliaŋ piɛile naaleŋ a naamula o kuisiŋ o kɔl taŋ.—Ɛsodɔɔ 20:5; Masaa Tasiaa 18:21, “New World Translation”.

Ŋ laalaŋ maa kɛɛ naŋ kɛɛ hoo le dunyɛi fulasɛiniŋ Chiisu ve biyɔɔ wo bɛndɛ, kanifuule, nyɛ Baabuiyo dimi wo naŋ cho tolɔɔ kɔɔli ni. Baabuiyo dɛɛniaa naa le miŋ “soliŋ taasi naa a kɔlkalula naalaŋ kpeku” o cho naamula waŋnda chieeya tolɔɔ kɔɔli le. (Talelaŋ 3:21; Maatiu 15:3) Te waŋnda nyuna naa pɛ le sabu naŋ bii dunyɛi hei le wo, ŋ naŋ kɔl le nda dimullo nyɛ naŋ laalaŋndo. Ŋ pɛɛsa wanaa cho dunyɛi hei biyɔɔ wa le. Ŋ ke wana o wana bɛɛleŋ le chuaŋ chua nda tosa wo.—Pitɛ Tasoo 3:15.