Chɛhowa Ke Isɔluɛiya Sawalaŋ

NAAPUM o wa niŋ paŋgoŋ ŋmuuŋ fula Isɔluɛitiiya Ichipi ma huŋ o pembii Sainai ve. Pembei hei ndaa veelu vɛlɛ ni aa Holɛb. O fonda pilɔɔ hoo kpe Jɛhowa ndoo soo naa Muuse chua o bɔɔ wa ŋɔɔ wo niŋ ni. Loŋ waŋnda haa fuuluu ni ma chal tiŋ waali.

Waŋnda wa niko chumndo o pembei bɛŋgu, mi Muuse hel o pembei choo. Mɛɛ o hel o pembei choo, mi Jɛhowa dimul ndu maa O yeema mi Isɔluɛitiiya diikuŋ ndu, okoŋ Mbo siiŋguu nda wanaa nduaa sɔwɛ. Mɛɛ Muuse tol pembei, mbo dounuŋ Isɔluɛitiiya kona a nyɛ o nyɛ Jɛhowa dimul ndu. Mi waŋnda haa lo okoŋ ma dimi maa a cho diikɔŋ Jɛhowa, kanifuule a yeema ma simnuŋ wanaa ndɔ.

Mɛɛ mi Jɛhowa tosa suɛi kaamɛi ipum. Mbo tosa mi kumnde kinduŋ o pembei choo, nduyɛ mi taŋndaŋ ma wa deŋioo. Mbo muliŋ vɛlɛ mbo suaa o wanaa kalaa lo aa: ‘Ya cho Jɛhowa Mɛlɛka nyaa ni. Ya soli nya o lɛŋnde Ichipileŋ niŋ ni.’ Okoŋ mbo dimul nda aa: ‘La sooluu mɛlɛkaa cheleŋ te pa, mɛɛ ya mila piɛi.’

Mi Mɛlɛka ke vɛlɛ Isɔluɛitiiya sawalaŋ la ŋɔmahiɔɔlu. Sioonde wa waŋnda haa tau. Ma dimul Muuse aa: ‘Num soo o naalo, kanifuule sioonde cho naa bɔɔ. Te Mɛlɛka pila lo suɛi o naalo pɛ, ŋ cho wu.’

Okoŋ kɔɔli mi Jɛhowa dimul Muuse aa: ‘Huŋ komal la o pembei choo. I cho num ke sawala nilaŋ le mi waŋnda diikuŋ, la ya poonyiaa o pouta yɛndɛla tiɔŋndaŋ choo laŋ.’ Mɛɛ mi Muuse hel vɛlɛ o pembei choo. O wa loŋ le palɛi 40 a nyumndaŋ 40.

Mɛlɛka ndoo nɔ sawalaŋ tau tau le wanaa nduaa. Mi Muuse poonyiaa sawalaŋ kpou. Mi Mɛlɛka yɔŋgu vɛlɛ Muuse pouta yɛndɛla tiɔŋndaŋ. O pouta yɛndɛla tiɔŋndaŋ choo Mɛlɛka pila poonyiaa sawala tɔla o soo o waŋnda lo laŋ ni.

Sawala tɔlaŋ ndaŋ lacho bɔɔ nyɛ sɔwɛ. Kɛ sawala cheleŋnda o ke Isɔluɛitiiya laŋ bɛɛ la cho nyɛ sɔwɛ. O sawala cheleŋ ndaŋ tɛɛŋ, o pilɛ cho hoo ni: ‘A nɔ ma kaala Jɛhowa Mɛlɛka numndo a kɔl numndo kpou, a yiyaŋ numndo kpou, a yoomu numndo kpou, vɛlɛa yoomuma numndaŋ kpou.’ O pilɔɔ cho hoo ni: ‘A nɔ ma kaala wanaa cheleŋ mɛɛ ŋ kaala num pila yɛ.’ Mi Chiisu Kiliti, Po Mɛlɛkaa dimi maa o sawala Jɛhowa yɔŋgu Isɔluɛitiiya laŋ tɛɛŋ, sawala tiɔŋndaŋ ndaŋ la hiou kpou. Ŋ nɔ le hunɔɔ pɛɛkoo sɔɔŋ bɔɔ bɔɔ a Po Mɛlɛkaa hoo okɔɔ vɛlɛa pɛɛkula ndɔlaŋ.