Suaŋsuaŋaa 12

TOFAWƆ komɔɔla puaa haa cho kɔlaŋ ndaŋ. Nuawɔ se kpɔŋgbɔtiiyaŋ kpɔŋjɔ bɛndoo. Laŋgbaa nda ŋiɔɔŋ kpulukuu cho kɔlaŋ a maŋ o lachoŋgu ni. Nuawɔ vɛlɛ fikiiyaŋ maa la piyɛi, a komɔɔla cheleŋ maa masiau. Kuɛɛnɛ nda fula yɛ a komɔɔla kɛndɛlaŋ ndaŋ? O lɛŋnde Kenaŋndeŋ niŋ nda fula a laŋ ni. Loonuŋ maa o lɛŋnde Kenaŋndeŋ niŋ fɛŋ Ebilaham, Aisaki a Chekɔpu wa o chaltaŋ ni. Kɛ mɛɛ yima bɛnduaŋ ma del loŋ, mi Chekɔpu faŋaŋ ndoŋ a yuŋgu ndɔɔ ma kua Ichipi. Mɛɛ chɔŋ a boondii keŋ mbo huŋ bii a teleŋ Muuse sim Isɔluɛitiiya lachi le miiŋgoo Kenaŋ pila wo, ndoo wa niŋ le wɔsilaŋ 216. Mɛɛ ma fuuluu o fonda pum o pollo niŋ diolaŋ aa Kedɛɛsi.

Wanaa wɔɔŋnda pila wa Kenaŋ ni. Le hei, mi Muuse viam suaŋsuaŋnda 12. Mbo dimul nda aa: ‘Lakɔ mɛɛndaŋ mɛɛ kpɛ waŋnda cho loŋ yɛ, nduyɛ mɛɛ kpɛ nda nɔ yoomuaŋ yɛ. Lakɔ mɛɛndaŋ vɛlɛ lɛŋndeŋ te le naŋ pɛ tɔlɔɔlaŋ. Te la wa pɛ hunɔɔ, la tosa a sabu mila hiŋ a komɔɔlaŋ latiŋ.’

Mɛɛ suaŋsuaŋnda miiŋgu Kedɛɛsi, mi a ŋiɔɔŋ dimul Muuse aa: ‘Kpooko, lɛŋnde kɛndɛ ni.’ Le sinaa maa le naŋ, ma chɔm Muuse komɔɔla nda hiŋ ndaŋ. Kɛ mi suaŋsuaŋaa tɔa dimi aa: ‘Ɛɛ hɛɛ, wanaa cho loŋ nda a nɔ bɔɔ yoomuaŋ, nduyɛ a choŋnuŋ a bɛndu heu. Te ŋ dimi pɛ maa ŋ cho nda lakɔ lɛŋnde leŋ puu o ba, a cho naa diu kpou.’

Mɛɛ Isɔluɛitiiya tuei hei, mi sioonde bii nda tau. Ma dimi aa: ‘Ndoo bɛnda bɔɔ mi naŋ vi Ichipi, te koŋ te o pollo hoo niŋ naŋ. Te ŋ kɔ simul nda pɛ a chɔulabaa, a cho naa diu kpou. Okoŋ, ma biu biu laandaa naa a chuauwaa naa. La ŋ hɛliŋ simlachinɔ cheleŋ o Muuse kɔɔli, mi ŋ miiŋguŋ Ichipi!’

Kɛ suaŋsuaŋnda wa a ŋiɔɔŋ a ndaa tiindaŋ o Jɛhowa niŋnda, nduyɛ ma wa kindiŋndo le waŋnda kɔltaŋ dɛɛniaa. Diola ndalaŋ lacho Chɔɔsuaa a Kelɛbi ni. Ma dimul waŋnda aa: ‘La yɔŋ isiooŋ te. Jɛhowa cho a naa latulu. O cho wa suɛi tɛtɛlɛ le naa, le lɛŋnde leŋ puuwo.’ Kɛ mbɔ, nilaŋ bɛɛ a yeŋ nda pɛŋ te. Ma yeema pɛŋ le Chɔɔsuaa a Kelɛbi diyɔɔ.

Mi hei tɛɛmbuu Jɛhowa kɔllo tau, okoŋ mbo dimul Muuse aa: ‘Wana o wana, chɔŋ o wɔsilaŋ 20 mbo kua kɛ, o pilɛ bɛɛ luei o lɛŋnde Kenaŋndeŋ niŋ te. A che kpɛsɛkɛɛ kaamaala ya tosa Ichipi a o pollo niŋndaŋ, kɛ a koŋ kpou, a tiindaŋ ya le. Le hei, a cho lo o pollo hoo niŋ le wɔsilaŋ 40 tei mi wana mɛɛlaa kpɔŋ vi. Chɔɔsuaa nda Kelɛbi kinɛi cho luɛiyɔɔ o lɛŋnde Kenaŋndeŋ niŋ ni.’