Chɛfitaa Chua Buŋgɛi

ACHUA niŋ pa buŋgɛi ma cha ndi ikala le loo lechoo? Lende i yɔŋnuŋ a po cho hoo o fotueiyo hoo niŋndo ni. A kɔl tambɛi koŋ o cho naa ni. Wana kɔl sikpa kialaa ŋyamaa Isɔluɛi o cho ni. Diola ndɔlaŋ aa Chɛfita.

Chɛfita wa niŋ achal teleŋ Isɔluɛitiiya kɛɛ Jɛhowa piɛiyo wo. Ma luɛinuŋ vɛlɛ ŋwɔɔŋndoŋ tosaa. Lelaŋ mi Jɛhowa bɛɛ chɛl le mi waŋnda Amɔŋ saaŋgiaa nda. Mi Isɔluɛitiiya mɛli dɔɔ vɛlɛ yeelaŋ o Jɛhowa lo aa: ‘Ŋ tosa hakioo a num. Yandii, mala naa fɔ!’

Ma bii dɔɔ nyɛiye le sɔɔŋ wɔɔŋ ndaa tosa woŋ. Ma muliŋ bɛɛ vɛlɛ Jɛhowa piɛiyo. Okoŋ mi Jɛhowa mala nda vɛlɛ.

Mɛɛ mi waŋnda hɛli Chɛfita le Amɔnaitiiyaa wɔɔŋnda haa chɔulabaa. Chɛfita yeema bɔɔ mi Jɛhowa mala ndu chɔulabaa hoo. Le hei, mbo chua buŋgɛi o Jɛhowa lo aa: ‘Te o yɔŋ pɛ ma mala ya mi tiu Amɔnaitiiya ba, o miiŋgu nuu, wana tase cho fula o ya lo chiɛiniŋ le ya demullo wo, mɛɛ ndu ya cho num ke ni.’

Jɛhowa wa nilaŋ yaŋɔɔ o buŋgɛi Chɛfita chua o ndulo ve. Okoŋ mbo mala ndu mbo yam chɔuwo. Mɛɛ Chɛfita miiŋgu chiee, a sina pa wana tase demul ndu wo? Chuale ndɔle laandu le pilɛ kpe o velu leŋ. Mbo mɛliŋ yeelaŋ choo kpeleŋ aa: ‘Kpokoo ya chuaŋndo! Nuawɔ kɔl tambɛi ŋ chuu ya wo se. Kɛ I chii niŋ buŋgɛi chua o Jɛhowa lo, nduyɛ I feŋaŋ niŋ lechoo le.’

O taselaŋ, mi chua Chɛfitaa tambu kɔl mɛɛ o sina ndi naa. Kanifuule, o nɔ mbo mɛi finya ndɔ, a chaaŋaa nduaa. Nduyɛ, le teleŋ o cho wa achallo kpou, o nɔ mbo wa Jɛhowa biiloo o maaŋ ndɔɔ niŋ Sialɔ. Kɛ mbo dimul finya ndɔ aa: ‘Te a yii pɛ kpemaa a Jɛhowa, mɛɛ ma lo lechoo.’

Mɛɛ mi chua Chɛfitaa kua Sialɔ. Le teleŋ o wa yoomu wo kpou, loŋ o wa Jɛhowa biiloo o maaŋ ndɔɔ niŋ ni. Wɔsi o wɔsi, mi waŋ laanduaa Isɔluɛi ndaa kuɛ ndu yilɔɔ le palɛi ihiɔɔlu. Mi ndaa chal ma dɔu balta yeelɛilaŋ pila. Mi waŋnda kaala chua Chɛfitaa tau le mɛɛ o wa buɛi kɛndɛ Jɛhowaa yɛ.