Buŋgɛi Chɛfita Chua Ve

Mi Isɔluɛiya mal vɛlɛ Chɛhowa piɛiyo, ma muliŋ mɛlɛkaa lachoowaa sooluuwo. Mɛɛ Amɔnaitiiya chiŋalaŋ Isɔluɛiya a sɔŋgɔɔ, mɛlɛkaa ndaa lachoowaa tosa nyɛ o nyɛ le nda mala le. Mi Isɔluɛiya luɛi vɛlɛ o saŋgaa niŋ le wɔsila bɔɔbɔɔ. O mɛɛlulaŋ kpɔŋ, ma dimul Chɛhowa aa: ‘Ŋ tosa hakioo a num. Yandii, chiindiaa naa yaamɔɔwaa naa o ba.’ Mi Isɔluɛiya tɛɛmbuu piɔmaa ndaa, ma muliŋ vɛlɛ Chɛhowa piɛiyo. Chɛhowa ndoo yeema nda ma hiou lachi a saŋgaa le.

Wana chɔuwo Chɛfita wa ni. Nduyɛ mi Chɛhowa hɛli ndu le mbo sim Isɔluɛiya lachi, ma kɔ sɔŋga Amɔnaitiiya. Mbo piɛi o Chɛhowa lo aa: ‘Te a mala naa pɛ miŋ tiu waŋnda haa ba, nduyɛ mi miiŋgu o ya lo, I chua buŋgɛi maa wana tase cho fula o ya lo chiɛiniŋ le ya demullo wo, I cho num ndu ke.’ Mi Chɛhowa yaŋ nilaŋ o piɛile Chɛfita leŋ, nduyɛ mbo mala ndu mbo yam chɔuwo.

Mɛɛ Chɛfita miiŋgu o ndu lo, wana tase fula o ndu lo chiɛiniŋ le ndu kɔlaŋ demullo wo wa chua ndɔɔ ni. Ndupilɛ kpe ndoo nɔ ni. O wa kɔlaŋ a nyɛchaa lɔɔ, nduyɛ mbo wa yolaŋ. Yɛɛ Chɛfita ndoo nɔ yɛ mbo tosa? Mbo loonuŋ a buŋgɛi o chua ve. Mbo dimi aa: ‘Kpokoo chua nuu, a tusi ya nyɛpalaa choo fɔ! I chuel Chɛhowa buŋgɛi. Le loo o lediom, I nɔ mi kuɛ a num o tɛndii Mɛlɛkaa Silɔɔ, le ma kɔ wa wallo tosaa loŋ le ndu.’ Kɛ mi chua ndɔɔ dimul ndu aa: ‘Kɛkɛ, te a chii niŋ pɛ Chɛhowa buŋgɛi chuel, mɛɛ tosa nyɛ ŋ dimi wo. Nyɛ ya yeema ma tosal la kinɛiyo cho ni, mal la mi kuɛ o pemboŋ choo le paŋgoŋ ŋ muuŋ naa chaaŋaa niaa laanduaa, okoŋ mi kuɛ Silɔɔ.’ O tɛndii Mɛlɛkaa chua Chɛfita wo lo Mɛlɛka wallo tosallo ni haaa a yoomu ndɔɔ mɛɛlulaŋ. Iwɔsi o iwɔsi, mi chaaŋaa nduaa ndaa kuɛ Silɔɔ le ndu yilɔɔ.