Puaambuaa Hiɔɔluaa Babilɔŋ

MASAA Nɛbukanɛɛsa kuɛŋnuŋ a wanaa sinaa yauwa Isɔluɛi kpou Babilɔŋ. Mɛɛ o kuɛ a nda, mbo hɛli puaa naŋ naŋɔɔ lahɔllo nduyɛ, ma nɔ kɔlkaloo wa nda tɛɛŋ. A hiɔɔlu o wanaa o hɛli kaŋnda tɛɛŋ cho puaambuaa ŋ cho haa chɔɔ naŋnda ni. O a hiɔɔluaa haa tɛɛŋ, Daniɛl cho opilɛ. A yaa wa piliaa, naa Babiloniaŋnda ndaa veelu nda ni aa: Sedaaki, Misiaki a Bɛniŋgo.

Mi Nɛbukanɛɛsa tuu le nda pɛɛkoo le ma wa baalaa tosaa o chiɛi ndɔ lemasaa niŋ. Te a pɛɛku nda pɛ le wɔsioŋ ŋgaa, o hɛli niko kpeekpei a hiou kɔlkaloo wa nda tɛɛŋ, le ndu malaa bahawɛilaŋ lapum solioo. Kɛ teleŋ nda cho nda wa pɛɛkoo wo, masaa yeema nda ma wa kpeŋkpeleŋ o kɛndiaa niŋ. Lelaŋ, mbo dimul buɛiyaa nduaa le ma wa nda nyɛdiaa sɔwɛ a muɛima sɔwɛ ndu a yuŋgu ndɔɔ kollaŋ kio.

Apinaasi cho hoo ni, masa buɛiyaa Nɛbukanɛɛsaa. A sina pa nyɛ Daniɛl cho ndu dimullo wo? Daniɛl cho ndu dimullo maa o yeema mbo de nyɛdiaa masaa dia wo le. Mi Apinaasi luɛi o kɔl landɛiyo niŋ. Mbo dimi aa: ‘Masaa chii chɔm nyɛ nya nɔ mila de wo, a muɛima nya nɔ mila kollaŋ. Te la ve kpeŋkpeleŋ o kɛndiaa niŋ maa a tuaa le, o cho ya diyɔɔ.’

Okoŋ mi Daniɛl kua naa wana Apinaasi dimul le mbo wa ndu a chaaŋaa nduaa yaa wa lehɔlla cha, mbo dimul ndu aa: ‘Yandii, nuawɔ naa le palɛi tɔ. Wa naa kpaŋja kuumbaa a mɛŋma kolaŋ kio. Te palɛi tɔ ve hiou pɛ, a tuu naa a wanaa cho nyɛdiaa masaa dio wa, a nua le wanaa hiou wa nyɛkɛndɛi ya.’

Mi wana wa nda hɔlteŋ ndo chɛl le hei tosaa. Mɛɛ palɛi tɔ ve chuu, Daniɛl a chaaŋaa nduaa yaa wa ndaa nɔ dialuŋ kɛndɔŋ mbo hiau a wa nyɛdiaa masaa dio wa. Okoŋ mi wana wa nda hɔlteŋndo chɛl le ma hiou lachi a dio nyɛdiaa nda wa koŋ dio o palɛi tɔ ve hei bɛŋgu ve. A di lɛ nyɛdiaa masaa wa yɔŋgoo wo le.

Mɛɛ wɔsiŋ ŋgaa woŋ chuu, ma yaa nda kpede o Nɛbukanɛɛsa lo. Mɛɛ masaa chii nda nyuuniaa kpede, mbo cha maa Daniɛl a chaaŋaa nduaa yaa wa hiou kɔlkalu kpou. Lelaŋ, mbo chua nda le ma wa baalaa o chiɛi ndɔ lemasaa niŋ. Nduyɛ, nyɛ o nyɛ masaa nyuna pɛ Daniɛl, Sedaaki, Misiaki a Bɛniŋgo, te koŋ te mbo yoo nda bahawɛi kala kalaa, a sina ndu tɔ a lediiŋ mbo hiau mɛɛ wanaa nduaa soliaa salaa a laŋgbaa nduaa taasiaa sina yɛ.