O Kaala Bɔɔ Chuaambuaa Pɔmbuaa

NUAWƆ mɛɛ Chiisu kɔɔmiaŋ poombɔ pɔmbɔɔ naŋ yɛ. Hali num a chɛl lekɛndɛi maa Chiisu kaala bɔɔ chuaambuaa pɔmbuaa. Buɛiyaa nduaa cho ndu haa tofaa ni. Yɛɛ Chiisu cho yɛ nda dimullo? Ŋ yaasiaŋndɔ.

Chiisu nda buɛiyaa nduaa laŋga fula suŋ suŋ o tiŋ le villo niŋ. Mɛɛ nda wa hunɔɔ, mi buɛiyaa nduaa kei diomndaŋ hiŋaŋ o nɛi. Mɛɛ nda fuuluu, mi Chiisu nyuna nda aa: ‘O yɛɛ choo nya wa yɛ diomndaŋ hiŋaŋndo?’ Chiisu sina le nyɛ nda wa diomndaŋ hiŋaŋndo wo. Kɛ o nyuna nda le mbo sina te a dimul ndu niŋ pɛ.

Buɛiyaa nduaa mulul ndu le. Kanifuule, a wa diomndaŋ hiŋaŋndo le wana cho wa wana bɛndoo nda tɛɛŋndo. Buɛiyaa nduaa apum ndaa yeema ma wa wanaa sɔwɛ a tuaa choo. Vɛɛ Chiisu cho yɛ nda niko dimul maa yeemɛi le waa wana bɛndu a tuaa choo i niŋ te?

Mɛɛ o veelu poombɔ pɔmbɔɔ, mbo simi ndu nda lachi kpede. Mbo lo loŋ mbo dimul nda aa: ‘I yeema nya mila sina hei maa mɛɛ mila simnuŋ maa chuaambuaa pɔmbuaa. Te o cho koŋ te, la luei o masale Mɛlɛkaleŋ niŋ te. Wana o wana simnuŋ pɛ maa poombɔ pɔmbɔɔ hoo, mɛɛ ndu cho wana bɛndoo o masale Mɛlɛkaleŋ niŋ ni.’ A sina le nyɛ Chiisu dimi naa wo?

Chuaambuaa pɔmbuaa buulaŋ le waa wanaa bɛndu le. A buulaŋ vɛlɛ pɛŋ le waa chaaŋaa ndaa choo a sɔwɛ le. Nyɛ koŋ buɛiyaa nduaa nɔ ma wa maa Chuaambuaa pɔmbuaa. A nɔ ma wa diomndaŋ hiŋaŋndo le wana cho wana sɔwɛ ɔɔ wana bɛndu wo le.

A boondii pum vɛlɛ, mi Chiisu chɔm mɛɛ kpɛ o kaala chuaambuaa pɔmbuaa yɛ. Mɛɛ paŋgoŋ hiou ŋtiŋ, mi waŋnda wa hunɔɔ a chuaambuaa pɔmbuaa le ma che Chiisu. Okoŋ, mi buɛiyaa nduaa wa nda kuunaa. Kɛ mi Chiisu dimul buɛiyaa nduaa aa: ‘La kuuna nda le, la mal chuaambuaa ma hiŋ naa ya cha. Le wanaa cho maa nda wa masale Mɛlɛkaleŋ le cho ni.’ Mɛɛ mi Chiisu chua chuaambuaa o balaŋ choo okoŋ mbo duau nda sala. O cho suɛi kɛndɛ le sinaa maa Chiisu kaala chuaambuaa pɔmbuaa le?