Nyɛdiaa Ichɔl Chiisu Mɛɛlu Dio Wo

Mi Chuuwa ndaa bii Bɔŋaŋ Hiouwɔɔ Choo Wo iwɔsi o iwɔsi, a paŋgii Nisaŋ nde 14. Bɔŋaŋndo hoo ndoo yiyalaŋ nda ni a mɛɛ Chɛhowa piŋi nda o chɛleŋ niŋ Ichipi, nduyɛ mbo kua a nda o Lɛŋnde o Dimi le Nda Kioo Leŋ niŋ yɛ. A wɔsii 33 o boondii Chiisu ve niŋ, mi Chiisu nda kiilaa nduaa bii Bɔŋaŋ Hiouwɔɔ Choo Wo o chiɛi choo choo wo niŋ Chulusalɛm. Mɛɛ nda wa nyɛdiaa hoo dioo, mi Chiisu dimul nda aa: ‘Wana pilɛ o nya tɛɛŋ cho ya pisi.’ Mi kɔndɔfillo bii kiilaa nduaa. Okoŋ ma nyuna Chiisu aa: ‘Nɛɛnɛ cho yɛ wana koŋ?’ Mi Chiisu dimul nda aa: ‘Wana ya cho beediiyo hoo ke wo.’ Okoŋ, mi Chiisu chua beediiyo mbo ke Chuda Isikaliɔɔ. O lepilɛ niŋ kpe, mi Chuda chaŋ mbo fulaŋ.

Mi Chiisu piɛi, mbo yimi yimi beediiyo, nduyɛ mbo ke kiilaa lo loŋ nda. Mbo dimul nda aa: ‘La dio beediiyo hoo. Ndu sim le dialuŋ nuŋ ni. Muŋ ya cho hunɔɔ yɔŋgu ni le nya.’ Okoŋ mbo piɛi vɛlɛ o muɛiyaŋ choo, mbo ke kiilaa nduaa. Mbo dimul nda aa: ‘La kol muɛiyaŋ maŋ. Maŋ ma sim le kooma niaŋ ni. Maŋ ya cho hunɔɔ yɔŋgu ni le halikpeŋ mi waŋnda sɔla malɔɔ hakioo le hakila ndalaŋ. I chuel nya buŋgɛi maa, la cho wa a ya latulu o masaleŋ choo o choo choo niŋ. La wa hei tosaa iwɔsi o iwɔsi le loonɔŋndo a ya.’ Buɛiyaa Chiisu wa cho hiouwɔɔ lachi a bɔŋaŋndo hoo biyɔɔ iwɔsi o iwɔsi a paale yɔŋgaŋndeŋ. Bɔŋaŋndo hoo nda veelu ni aa Nyɛdiaa Ichɔl Masanɔɔ.

Mɛɛ nda chii nyɛdiaa dioo, mi kiilaa kandu diomndaŋ hiŋaŋndo le wana hiou wa wana sɔvɛ nda tɛɛŋ ndo. Kɛ mi Chiisu dimul nda aa: ‘Wana o wana chuaŋnuŋ pɛ maa poombɔ pɔmbɔ, nduyɛ maa o cho wana sɔvɛ le, mɛɛ ndu cho wana bɛndoo nya tɛɛŋ ni.’

‘Chaaŋaa niaa nya cho ni. I dimul nya nyɛ o nyɛ Finya nuu ndoo yeema ya mi dimul nya. O teleŋ biŋgi bɛŋgu, I cho miiŋgɔŋ choo choo naa Finya nuu chua. La cho wɔ lo nanuŋ. Nduyɛ waŋnda cho sina maa buɛiyaa niaa nya cho ni, te la kaaliaŋ pɛ vellaa velle. La nɔ mi la kaaliaŋ vellaa velle, mɛɛ ya kaala nya yɛ.’

O mɛɛlulaŋ kpɔŋ, mi Chiisu piɛi o Chɛhowa lo le mbo manda buɛiyaa nduaa. Mbo nyɔɔlu Chɛhowa le mbo mala nda ma hiou lachi a wallo tosaa diompilɛ o kɔl nyulu niŋ. Mbo piɛi le mi diola Chɛhowa laŋ la wa la diandaa. Mi Chiisu a kiilaa nduaa soli chondoŋ le Chɛhowa saŋgalaa, okoŋ ma fulaŋ. Teleŋndo wa niŋ kpɛɛluŋ le mi ndaa bii Chiisu.