O Chiɛi Choo Choo Wo Niŋ

CHƆŊ a faŋaŋ ndaa o pembii Ɔlifi ve choo, palɛi iŋiiŋ ndii hiou niŋ ni. O Chimɛi laboloo choo ichɔllo, mi Chiisu nda buɛiyaa nduaa 12 nda huŋ o chiɛi choo choo wo hoo niŋ. Le nyɛdiaa loonaŋndo dio a hiouwɔɔ choo wo okɔɔ nda hiŋ naŋ ni. Chuda Isikaliɔɔ ŋ cha koŋ kɔŋndaŋ nda naa ni. O cho kɔlaŋ wanaa soli salaa o Mɛlɛka lo wa dimullo a mɛɛ nda looku ma bii Chiisu yɛ.

Tuupa ma huŋ nanuŋ, Chuda Isikaliɔɔ kuɛ fɛŋ o wanaa soliaa salaa lo. Mbo kɔ nyuna nda aa: ‘Te I mala nya pɛ mila bii Chiisu, o yɛɛnɛ nya ke yɛ ya?’ Ma mulul ndu aa: ‘Kaniŋ humboŋ beleyaa naŋ cho num ke ni.’ Kɔlalaŋ Chuda Isikaliɔɔ cho naa o ndalo ni, le mbo chɔm nda nɛiyo naa Chiisu cho wa. O cho suɛi wɔɔŋnde pila le cho hei le?

Mɛɛ nda chii nyɛdiaa loonaŋndo dio a hiouwɔɔ choo wo okɔɔ, mi Chiisu kandu vɛlɛ nyɛdiaa teŋgeŋndo dio nda buɛiyaa nduaa. Mbo yɔŋgu buɛiyaa nduaa beediiyo, okoŋ mbo dimi aa: ‘La bii la dio, kanifuule, hoo sim le sɔŋgɔ dialuŋ nuŋ ni. Muŋ cho ŋ yɔŋgaŋ le nya ni.’ Mbo chua vɛlɛ taalaa a muɛiyaŋ leniŋ mbo ke nda. Mbo dimul nda aa: ‘La bii la kol, kanifuule maŋ ma sim le sɔŋgɔ kooma niaŋ ni. Maŋ ya cho tala le nya ni.’ Baabuiyo veelu nyɛdiaa hoo aa: ‘Nyɛdiaa ichɔllo le loonɔŋndo a Salamanɔɔ Chiisu.’

Teleŋ Isɔluɛitiiya wa Ichipi wo, mi maalikɛinɔ Mɛlɛkaa huŋ diu violɔɔ tase Ichiptiaŋnda kpou o chiɛila ndalaŋ niŋ. Kɛ Isɔluɛitiiya nda, o diu violɔɔ nda tase le. Le mɛɛ maalikɛinɔ Mɛlɛkaa hiou chiɛila ndalaŋ choo yɛ, le saboo hoo Isɔluɛitiiya ndaa dia nyɛdiaa loonaŋndo a hiouwɔɔ choo wo okɔɔ ni. Chiisu yeema buɛiyaa nduaa ma loonuŋ a ndu okɔɔ, le mɛɛ o yɔŋgu yoomu ndɔɔ le nda yɛ. Nyɛ koŋ o dimul nda ni maa wɔsi o wɔsi, a nɔ ma bii bɔŋaŋndo hoo le loonɔŋndo a ndu okɔɔ.

Mɛɛ nda chii nyɛdiaa hoo dio, mi Chiisu dimul buɛiyaa nduaa le ma wa a kɔl sikpaa. Nduyɛ, ma wa a kala kpoke o laalaŋndo niŋ. O mɛɛlulaŋ kpɔŋ, ma soli chondoŋ o Mɛlɛka lo, mɛɛ ma piɔl. Nyumndaŋ ma wa niŋ kpiŋgbi. Naapum a ditɛɛŋndo. Kuɛɛ nda kuɛ yɛ? Ŋ nuaŋnuŋndɔ naa nda kuɛ wa.