BUŊGƐI 6

Yɛɛ Cho yɛ Sabu Mɛlɛkaa le Chieeŋndo Hoo?

MƐLƐKA toosiaa chieeŋndo hoo o kɛndɛ le mi waŋchieeya wa achal lechoo. Diom Mɛlɛkaa dimi aa, “Mɛlɛka Yaawɛɛ, ndu nɔ fondaŋndaŋ choo choo ni, kɛ chieeŋndo ndu mbo ke naa ŋwaŋnda chiee.”—Sam 115:16.

Tuupa mi Mɛlɛka toosiaa wana pɔnɔ tasoo Adama, mbo kialu buŋgɛi nyɛɛmbɔ o chieeŋndo choo mbo tual kpele kɛndɔɔ o fondaŋndo diolaŋ aa Idɛŋ. Diom Mɛlɛkaa dimi maa naa pioo Yufiluatii a Tikilisi (Hedikɛl) kanduŋ nda wa Idɛŋ ni.a Wana che pɛ maa naa paaleŋ le chaŋnda o lɛŋnde nda veelu niŋ hau aa Tɔki leŋ niŋ, kpeloo Idɛŋ wa ni. A tonya kpeekpei, o chieeŋndo choo kpeloo Idɛŋ wa ni!

Mɛɛ Mɛlɛka toosiaa Adama, mbo kɛsi ndu o kpeloo niŋ Idɛŋ “le mbo wa wallo leniŋ nduyɛ, mbo wa ndu mandaa.” (Chɛnɛsee 2:15) Mɛɛ nyɔɔ viou tiŋ, mi Mɛlɛka toosiaa wana lanɔɔ le Adama diolaŋ Ifi. Mi Mɛlɛka dimul nda aa, “La violu chuauwa mi la kuii mi la pɛ o chieeŋndo choo, nduyɛ mi chieeŋndo wa nya o ba bɛŋgu.” (Chɛnɛsee 1:28) A tonya, Mɛlɛka “toosiaa ndu [chieeŋndo] le mbo wa fonda lakasi lakasi le. Kɛ o toosiaa ndu le mi waŋnda chieeya a wa leniŋ.”—Aisaya 45:18.

Kɛ mi Adama nda Ifi kɛɛ Mɛlɛka diikɔŋndo ma tɛɛmbuu sawa ndɔɔ a hɔlaa vesɛi sɛɛŋ. Okoŋ, mi Mɛlɛka soli nda o kpeloo niŋ Idɛŋ. Mi kpele hɛnɛkiɔɔ lo pɛ. Nduyɛ mi kpundɛ haki Adama tosa hoo wo tiu silɔ. Diom Mɛlɛkaa dimi aa, “Wana pilɛ kpe tosa ni mi yɔŋ wɔɔŋndo huŋ o chieeŋndo niŋ, nduyɛ mi yɔŋ wɔɔŋndo huŋ a piɔmndo. O koŋ, mi piɔmndo huŋ le ŋwaŋnda chiee kpou, kani fuule, ŋwaŋnda chiee kpou a tosa yɔŋ wɔɔŋndo.”—Luomaŋnda 5:12.

Baa Chɛhowaa puɛɛnuŋ a sabu ndɔɔ le mi chieeŋndo wa kpele hɛnɛkiɔɔ nduyɛ mi waŋchieeya wa achal lechoo a nyaaloo? Sako bɛɛ! Mɛlɛka dimi aa, “Mɛɛ lende koni i cho a diomnda nilaŋ ni . . . la miiŋgu ya o ibuŋ mi la kɛɛ nyɛ tosa le. Tosaa la tosa nyɛ ya I kɛɛsiaa le tosaa wo ni, nduyɛ nyɛ o nyɛ ya I vem ndaŋ le tosaa pɛ, tosaa la tosa ni, mi nyɛ o nyɛ kuɛ o kɛndɛ.” (Aisaya 55:11) Kpele Hɛnɛkiɔɔ cho vɛlɛ miiŋgu o chieeŋndo choo!

Vɛɛ yoomoo wa yɛ niŋ o Kpele Hɛnɛkiɔɔ niŋ? Tofawɔ nyɛ Diom Mɛlɛkaa dimi maa o yɔŋnuŋ niŋndo o pei ŋiiŋ cho lachi ve choo.

a Chɛnɛsee 2:10-14 dimi aa, “Mi Mɛlɛka tosa mi pioo hini kpalaŋ o kpeloo hoo niŋ Idɛŋ, le ndu pɔɔliaa. Mɛɛ pioo hoo o kelu Idɛŋ tɛɛŋ, mbo piɔu lɛuwoŋ o kpeloo hoo niŋ sala hiɔɔlu. Lɛuvii tasei diolaŋ aa, Pisiɔŋ. . . . Lɛuvii diiŋ nduɛi diolaŋ aa Kihɔŋ. . . . Lɛuvii yaa nduɛi diolaŋ aa, Tikilisi [ɔɔ, Hedikɛl]. . . . Lɛuvii hiɔɔluei diolaŋ aa, Yufiluatii.” Fondaŋ peela tiɔɔŋnda taselaŋ la wa wo nduyɛ a mɛɛ la wa yɛ, a chɔm a laŋ okɔɔ le.

Kpele Hɛnɛkɛ Cho Hunɔɔ Wa o Chieeŋndo Choo Wo

Waŋvilɛiya cho vɛlɛ miiŋgu yoomu: “Teleŋ cho fuuluu mi wanaa vilɛiya kpou a tuei diom ndɔɔ o koŋ, ma fula o sɛilaŋ niŋ.”—Chɔŋ 5:28, 29.

Yuwɛi, namtaleŋ, ɔɔ piɔmndo cho lɛ wa le: “Waŋndo bɛɛ dimi niŋ maa nyɛ waa nuaa o cho ndu nɛi le.” (Aisaya 33:24) Mɛlɛka “cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa.”—Sɔɔŋ Chɔɔmaŋndoŋ 21:4.

Nyɛdiaa kɛndɔɔ cho wa o hɔbɛi: Mɛlɛka cho “tosa mi tɔlɔɔlaŋ la naŋ o chiɔɔŋ naaŋ niŋ tau tau. Mɛlɛka, o cho Mɛlɛka naa wo, o dɔu naa sala.”—Sam 67:6.

Chiɛila kɛndɛlaŋ a wali kɔl hiniaa: “Waŋnda a taŋgul niŋ chiɛila ndalaŋ . . . mi ndapila a wanuŋ o chiɛila ndalaŋ niŋ. Wanaa niaa ya I hɛli wa, a wanuŋ niŋ ndoŋ, nduyɛ ma de walta ndala nda tosalaŋ tɔnɔ, le teleŋ vilɛi.”—Aisaya 65:21, 22.

Chɔuwo, sawa tɛɛmbaa, ɔɔ sɔŋgɔlaŋ la cho lɛ wa le: Chɛhowa “cho tosa mi chɔulaŋ la chuu ba o ba fee o chieeŋndo choo.” (Sam 46:9) “Wanaa dɛnɛ wɔɔŋnda kinɛi, a cho . . . hunɔɔ faŋaŋ o lɛŋndeŋ ndeŋ niŋ bau.”—Pulɔwaa 2:22.