Wali Yɛɛ Buɛiyaa Malalaŋnda o Kunda Lekilisiɔŋndo Niŋ Tosa Yɛ?

Baabuiyo soo a waŋnda kundalaŋ latiɔɔŋ okɔɔ. Waŋnda haa chua kalandaŋ o kundala leKilisiɔŋndaŋ niŋ ni. ‘Wanaa cho chilaŋ chuaa wa a buɛiyaa malalaŋnda.’ (Filipiaŋnda 1:1) O kundala Seiyaa Chɛhowaa niŋ kpou, puaapiliaa suu waa naa cho leniŋ. Wali yɛɛ buɛiyaa malalaŋnda haa tosa yɛ le tɔnɔ naa?

Nda mala bɛnduaa kundaa ni. Wanaa cho a kala poŋ o chaŋyɛi niŋ a Mɛlɛka wa buɛiyaa malalaŋnda haa cho ni. Apum feleŋguaa nda cho ni. Apum yɛ kaasoŋnda. Kɛ a koŋ kpou, ŋ nɔ miŋ tiindaŋ nda kanifuule a cho yekeŋ le baala ndaa tosaa. Nda tosa a sabu ni mi walta sɔwɛlaŋ lapum la tosaŋ o kunda leKilisiɔŋndo niŋ. Lepum, ma siŋgafila waltaŋ ndaŋ. Wali nda tosa wo ke bɛnduaa kundaa teleŋndo, le kunda wanaa laalaŋaa Mɛlɛkaa mandaa vɛlɛa nda pɛɛkoo.

Walta nda tosalaŋ kpou la huŋ a tɔnɔɔ o kunda leKilisiɔŋ­ndo niŋ. Wali buɛiyaa malalaŋnda haa apum, le waŋnda naa chalaa chɔmndo o Toŋgo leMasaa niŋ. Apum, le maasii mala naa le chondoŋ solioo wo waa lehɔl. Apum, le waŋnda yaulaŋ kioo o Toŋgo leMasaa niŋ. Apum yɛ, le nyɛsɔlaa del o kɔfoo niŋndo poonyiaa o yau choo. Apum, le waŋnda o kundaa niŋ chɔmndo naa nda nɔ le pilichioo wa. A wou vɛlɛ balaŋ le Toŋgo leMasaa toosiaa nyɛkɛndɛi. Bɛnduaa kundaa viam nda vɛlɛ lepum le wanaa yuwɛiya o kundaa niŋ malaa. Te o yɔŋ pɛ mi buɛiyaa malalaŋnda tosa wali o wali nda dimul nda, bɛɛleŋ pila nda sɔla o kundaa niŋ ni.—Timoti Tasoo 3:13.

A nɔ ma kɛsi tamasi kɛndɔɔ maa ŋKilisiɔŋ. Le suliŋnda ndala kɛndɛlaŋ nda hɛli nda ni le waa buɛiyaa malalaŋnda. Te a yɔŋgu pɛ suɛi nyɛkɛndɛi o bɔŋaŋnda naalaŋ, ma kindi laalaŋnda naalaŋ poŋ. A chɔɔlu naa yoomuaŋ ke te a sim pɛ wali ­pilichiaa lachi. Buɛiyaa malalaŋnda haa cho o diompilɛ niŋ a bɛnduaa kundaa. Diompilɔɔ hoo huŋ a kɔl nyuloo vɛlɛ a nyaaloo o kundaa niŋ. (Ɛfisiaŋnda 4:16) O chilaŋ niŋ, mi nda bɛɛ suiliŋ le waa bɛnduaa kundaa.

• Wanaa suu maa vɛɛ buɛiyaa malalaŋnda cho yɛ?

• Vɛɛ buɛiyaa malalaŋnda haa mala yɛ kundaa le hiouwɔɔ lachi kɛndɔɔ tosaa?