BUŊGƐI 17

Vɛɛ Buɛiyaa Ibuŋgaa Mala yɛ Naa?

Buɛi kelaa choo wo cho bɔŋaŋ wali pollo biyɔɔ a waŋnda — Kundaa le wali pollo

Buɛi kelaa choo wo cho waŋnda yooŋgu kɛndɛ Mɛlɛkaa dimullo — Wali pollo

Buɛi kelaa choo wo cho bɔŋaŋndo biyɔɔ a bɛnduaa kundaa — Bɔŋaŋ bɛnduaa kundaa

O Baabuiyo niŋ, yaula maKilikiilaŋ la soo tau a Banabaa okɔɔ vɛlɛ a kiilanɔɔ Pɔɔl. Waŋnda haa, buɛiyaa kelaa choo wa nda wa ni. Mi ndaa kuɛ kundala yɛ yɛlaŋ yilɔɔ sindɛ. Le yɛɛ ndaa tosa yɛ hei? Kanifuule, ndaa buulaŋ bɔɔ a chaaŋaa ndaa wanaa laalaŋnda. Mi Pɔɔl dimi maa o yeema mbo ‘miiŋgu mbo kɔ yil wanaa laalaŋnda’ le sinaa mɛɛ nda cho hiouwɔɔ lachi a laalaŋ ndaa yɛ. Mbo chɛl le kɔlaŋ kilolaŋ tau, le mbo kɔ kindi chaaŋaa nduaa wanaa laalaŋnda poŋ. (Walta Wanaa Chiisuaa 15:36) Yeemɛi pilɛi keŋ kpe buɛiyaa kelaa choo wa hau bɛɛ nɔ ni.

Buɛiyaa ibuŋgaa ke naa kɔl dɛɛniaa. O kundala Seiyaa Chɛhowaa niŋ kpou, buɛi ibuŋgaa kua yilɔɔ lediiŋ o wɔsioo niŋ. Kunda o kunda o kuɛ yilɔɔ pɛ, lɔɔ opilɛ o chii ni. Miŋ sɔla tɔnɔɔ tau o sɔɔŋ paandu hiou nda choo woŋ, vɛlɛ a laandaa ndaa te o yɔŋ pɛ ma nɔ lanɔ. Ma kindiŋ tau le sinaa bɛnduaa vɛlɛ a chuaambuaa vellaa velle. Nduyɛ, a cho a yɔŋgaŋ a kɔllo kpou le kɔlaŋ naa ndaa o wali pollo niŋ, vɛlɛ a naa liilaa o pɛɛku la Baabuila naalaŋ. Mi buɛiyaa ibuŋgaa haa a bɛnduaa kundaa kuɛ o chiɛila Seiyaa Chɛhowaa le nda kɔllo dɛɛniaa. Sɔɔŋ nda yɔŋgu o bɔŋaŋnda naalaŋ o lɔɔ bɛŋgu wo ŋ dɛɛniaa naa kɔllo. Ŋ nda yɔŋgu. o bɔŋaŋnda bɛndaŋndo bɛɛ, ŋ dɛɛniaa naa kɔllo tau.—Walta Wanaa Chiisuaa 15:35.

Buɛiyaa ibuŋgaa nɔ yeemɛi o naa niŋ fau. Nda kpou nɔ yeemɛi le ma che kundala wanaa laalaŋnda hiouwɔɔ lachi a hɛnaŋ Mɛlɛkaa tosaa. Ma chal nda bɛnduaa kundaa vɛlɛ a buɛiyaa malalaŋnda. Te a chal pɛ, a tofa naa nda tosa hiouwɔɔ lachioo wa, nduyɛ ma chɔm nda nyɛkɛndɛi mɛɛ nda nɔ ma bii kalaŋnda cho nda choo o kundaa niŋndaŋ yɛ. Ma mala kɔɔfaa mɛɛ nda looku fulamakɔɔli kɛndɔɔ sɔla o wali pollo niŋ yɛ. A nɔ yeemɛi tau le sinaa a wanaa sɛnɛiya okɔɔ, vɛlɛ a tueiyɔɔ hiouwɔɔ lachi nda cho tosaa wo. Puaapiliaa haa kinɛi, le yeemɛi nɛi nda ‘yɔŋguŋ ndapila ni le wallo a naa hɔlaa tulu.’ (Kɔliŋtiaŋ Diiŋ Ndɔɔ 8:23) Ŋ tuulaŋ tamasi nda laalaŋndo a mɛɛ nda yɔŋguŋ ndapila le hɛnaŋ Mɛlɛkaa tosaa yɛ.—Hibuluiya 13:7

Le sabu yɛɛ buɛiyaa ibuŋgaa kua yɛ yilɔɔ o kundalaŋ niŋ?
Tɔnɔ yɛɛ num sɔla yɛ o yilɔɔ ndaa?