Yooŋgu Kɛndɛ yɛɛ cho yɛ a Piɛiye Okɔɔ?

1. Baa piɛiye kpou naŋ ni?

O piɛiye niŋ kpou, wanaa kɛndiaa cho. I cho yooŋgu kɛndɛ le sinaa maa Mɛlɛka cho nda chɔɔ nduyɛ o buulaŋ a nda. I cho suɛi kɔl tambɛi le sinaa maa simlachiaa cho hau waŋnda yɔŋ wɔɔŋndo tosallo o piɛiye hei niŋ. (Kɔliŋtiaŋ Diiŋ Ndɔɔ 4:​3, 4; 11:13-​15) A mɛɛ chiɛi lakona chieeŋndo dimi yɛ, piɛiye pum luei hau balaŋ o delɔɔ choo wo niŋ, diuwaŋ lekaa wo, a chuaambuaa ŋwɔɔŋndoŋ tosallo. Nuawɔ sɔɔŋ kɔl tambɛi se! Sɔɔŋ muŋ tɛɛmbuu hau wanaa kɛndiaa cho o piɛiye hei niŋ nda kɔl.​—Nuawɔ Maatiu 24:3-5, 11, 12.

Teŋgeŋ kuɛɛ cho yɛ piɛile tonyaleŋ tɛɛŋ a le lachoowaleŋ? Piɛile tonyaleŋ le saŋgala Mɛlɛka, kɛ piɛile lachoowaleŋ le tɛɛmbuu Mɛlɛka kɔl. Nyɛ cho o Baabuiyo niŋ te wo le pɛɛku waŋnda ni. Ndu cho ni, pɛɛku lachoowaa a Mɛlɛka vɛlɛ a waŋvilɛiya okɔɔ. Kɛ Chɛhowa yeema mi waŋnda pɛɛku tonyaa a ndu okɔɔ.​—Nuawɔ Luomaŋnda 6:23; Timoti Tasoo 2:​3-5.

2. Yooŋgu kɛndɛ yɛɛ cho yɛ a piɛiye okɔɔ?

Ŋ cho a nyaale maa a nɔla Mɛlɛka hui a piɛiye hei le. O hini kɔl a piɛiyii handuŋ kaala ndɔɔ o kɔl kɛ ma wa le chieeŋ Setanaa hoo wo le. (Chemisi 4:4) Diom Mɛlɛkaa veelu piɛiyii lachoowɛi kpou aa ‘Babilɔŋ Tɔɔ Bɛndoo.’ Chiee bɛndoo pila Babilɔŋ wa o sindɔɔ niŋ ni. Mɛɛ Mɛŋma Koŋgi Bɛnduaŋ ma hiou o palɛi Nuuwa ve niŋ, Babilɔŋ fɛŋ piɛiyii lachoowɛi kanduŋ. Mɛlɛka cho suŋ hunɔɔ tɛɛmbuu piɛiyii cho hau waŋnda huiyo ma wa nda nyɛpalaa tusioo choo wa.​—Nuawɔ Sɔɔŋ Chɔɔmaŋndoŋ 17:1, 2, 5, 16, 17; 18:8.

Yooŋgu kɛndɔɔ cho wɔ tau. Wanaa sanaa cho haa a saŋnaŋ o piɛiyii lachoowɛi niŋnda, Chɛhowa puɛɛnuŋ a nda le. Tonya o cho nda pɛɛkoo o Baabuiyo niŋndo cho waŋnda haa nanɔɔ diompilɛ o kɔɔna ndɔɔ niŋ ni.​—Nuawɔ Chɔŋ 6:45.

3. Yɛɛ wanaa sanaa wa nɔ yɛ ma tosa?

Chɛhowa buulaŋ a wanaa kaala tonyaa a sandeiya. O dimul nda maa a fula o piɛiyii lachoowɛi niŋ. Wana o wana kaala pɛ Mɛlɛka, mɛɛ o nɔ mbo chɛl le fulaa halikpeŋ mbo nɛŋi Mɛlɛka kɔl.​—Nuawɔ Sɔɔŋ Chɔɔmaŋndoŋ 18:4.

O sindɔɔ niŋ, mɛɛ waŋnda tuei yooŋgu kɛndɛ buɛiyaa Chiisuaa wa dimioo wo, ma kɔmaŋ ndu a nyaale. Ma pɛɛku sɔɔŋ sɛnɛiyoŋ a Chɛhowa okɔɔ. Mi koŋ ke nda nyaaloo o yoomu ndaa niŋ vɛlɛ a tiindaŋndo. Taamasi kɛndɔɔ pila waŋnda haa kɛsi ni. Le mɛɛ nda kɔmaŋ yooŋgu kɛndɔɔ a nyaale yɛ, o hei niŋ ma kɛsiŋ Chɛhowa lachi o yoomula ndalaŋ niŋ.​—Nuawɔ Tɛsaloniaŋ Tasoo 1: ​8, 9; 2: ​13.

Wana o wana chɛl pɛ le fulaa o piɛile lachoowaleŋ niŋ mbo huŋ sina Chɛhowa, Chɛhowa naŋ bɔɔ kɔl a wana koŋ. Te o yɔŋ pɛ ma chɛl veelu Chɛhowaa, a wa o chaŋyɛi niŋ nya ndu, chaaŋaa numaa laalaŋaa ŋ cho komalla bɛɛ cho num kaala tau, nduyɛ ma huŋ sɔla yoomu fafɛɛŋndo o chilaŋ niŋ.​—Nuawɔ Maki 10:29, 30; Kɔliŋtiaŋ Diiŋ Ndɔɔ 6:​17, 18.

4. Vɛɛ Mɛlɛka cho yɛ hunɔɔ a nyaaloo ba o ba fee?

I cho yooŋgu kɛndɛ le tueiyɔɔ maa Mɛlɛka cho hunɔɔ kɔl ndɔ tuuwo tusi piɛiyii lachoowɛi choo. Koŋ cho tosa mi saŋga piɛiye hei cho waŋnda tusioo choo wo chuu. O cho vɛlɛ tosa fɛɛŋ fɛɛŋ bɛɛ piɛiyii lachoowɛi hei hiŋ lɛ waŋnda hɔlla le. I puusiaa lɛ niŋ waŋnda le. Wanaa cho kinda wa wa niŋ o diompilɛ niŋ le Mɛlɛka tonyaa saŋgalaa.​—Nuawɔ Sɔɔŋ Chɔɔmaŋndoŋ 18:20, 21; 21:​3, 4.