Samiɔŋ Wa o Kɛndɔɔ Tosaa Lɔɔ Lɔɔ

Chɔŋ a teleŋ Samiɔŋ wa chuaambɔ pɔmbɔ wo, o wa o maaŋ Chɛhowaa niŋ. Loŋ o wa wallo ni. Nduyɛ, loŋ waŋnda ndaa kua Mɛlɛka piɛiyo ni. A sina pa mɛɛ Samiɔŋ looku lakɔ o maaŋ Chɛhowaa niŋ yɛ? Ŋ pɛɛku wɔ fɛɛŋ a Hana kala ndɔ okɔɔ.

Hana ndoo vilu chua le. Kɛ ndoo yeema bɔɔ violɔɔ. Le hei, mbo nyɔɔlu Chɛhowa o piɛileŋ niŋ le mbo mala ndu. Mbo chua buŋgɛi maa te Chɛhowa mala ndu pɛ mbo velu poo, o cho ndu yɔŋgɔɔ o maaŋ ndɔɔ niŋ mbo kɔ wa wallo loŋ. Mi Chɛhowa muli piɛile ndɔ leŋ, mbo vialu poo. Mbo ke ndu diolaŋ aa Samiɔŋ. Hana ndoo yeema mbo lo o buŋgɛi o chua ve choo. Mɛɛ Samiɔŋ wa wɔsilaŋ la yaa a la hiɔɔlu tɛɛŋ, mbo yɔŋgu ndu o maaŋ Chɛhowaa niŋ le mbo kɔ piɛi ndu loŋ.

Wana wa masaa le wanaa ndaa soli salaa o maaŋ Mɛlɛkaa niŋndo wa Ilai ni. Puaa nduaa ŋiɔɔŋ nda bɛɛ, loŋ ndaa tosa wallo ni. Kɛsiŋ o kɔl maa o maaŋ Mɛlɛka wo niŋ ndaa kua Mɛlɛka piɛiyo ni. Nduyɛ, waŋnda nɔ ma tosa sɔɔŋ kɛndɔŋ loŋ. Kɛ sɔɔŋ wɔɔŋndoŋ pila chuauwaa Ilaiya ndaa tosa ni. Mi Samiɔŋ cha nyɛ nda wa tosaa wo. Baa Samiɔŋ ndoo tosa pa sɔɔŋ wɔɔŋndoŋ maa chuauwaa Ilaiya?—Sako bɛɛ. Sɔɔŋ kɛndɔŋ ndoo tosa lɔɔ lɔɔ ni a mɛɛ wanaa velu ndu wa pɛɛku ndu yɛ.

Yɛɛ num yiyaŋ yɛ maa Ilai ndoo tosal puaa nduaa ŋiɔɔŋ nda haa?— Ndoo nɔ mi ndoo sila nda. Nduyɛ, mi ndoo kuuna nda wallo tosaa o chiɛi Mɛlɛkaa niŋ. Kɛ Ilai tosa keŋ kposoŋ te. Le hei, mi Chɛhowa duaunuŋ tumbe a ndu vɛlɛ a puaa nduaa ŋiɔɔŋ nda. Mi Chɛhowa dimi le nda nyɛpalaa tuisioo choo.

Samiɔŋ wa o luaaŋ ichɔl pilɛ, mbo tuɛi waŋndo ndu veeloo aa, ‘Samiɔŋ!’ Mbo kua a kiltaŋ naa Ilai cha. Kɛ mi Ilai dimul ndu aa, ‘O cho ya le veelu num te.’ Mi i yɔŋnuŋ vɛlɛ le diiŋ o hoo kɔɔli. Mɛɛ o yaa ndɔɔ yɔŋnuŋ niŋ, mi Ilai dimul Samiɔŋ maa te o tuei niŋ pɛ diomndo vɛlɛ, o dimi aa, ‘Soo Chɛhowa, I cho num nilaŋ yaŋɔɔ.’ Lende kinɛi Samiɔŋ tosa ni. Okoŋ, mi Chɛhowa dimul Samiɔŋ aa, ‘Dimul Ilai maa I cho yuŋgu ndɔɔ nyɛpalaa tuisi choo le sɔɔŋ wɔɔŋ nda tosa woŋ.’ A yiyaŋ pa maa I wa bɛɛŋ bɛɛŋ le mi Samiɔŋ ndoo dimul Ilai yooŋgoo hoo?—O ve bɛɛŋ bɛɛŋ te. Kɛ mi che bɛɛ naa siooŋnde wa Samiɔŋ le Ilai yooŋgoo hoo dimullo, mbo tosa nyɛ Chɛhowa dimul ndu wo. Mi nyɛ Chɛhowa dimul ndu wo yɔŋnuŋ a mɛɛ o dimi yɛ. Ma dii puaa ŋiɔɔŋaa Ilaiya. Mi Ilai pila bɛɛ mɛɛlu wu.

Samiɔŋ kɛsul naa bɔɔ tamasi kɛndɔɔ. Mi che bɛɛ mbo cha waŋnda sɔɔŋ wɔɔŋndoŋ tosaa, kɛ o tul nda kɔɔli le. Num yɛ, a cho pa tamasi Samiɔŋndo tolɔɔ kɔɔli le sɔɔŋ kɛndɔŋ tosaa? Te a tosa hei pɛ, a cho Chɛhowa vɛlɛ a wanaa velu numnda kɔllo nɛŋi.