Mɛɛ Chɛlɛkpiaa Siŋga Nɔɔ Yɛ

Violɔŋ chɛlɛkpɔɔ huŋ a nyaaloo a kalaŋndo le finyaa a kalaa. Maa kalaŋ chuauwaa sɛnɛi, mi kɔndɔfillo bii nya le chɔɔ maa la cho teleŋndo, a kpaaya nyaa o pum soliŋndo kpeku le chɛlɛkpɛ nyaa mandaa. Lɔma lahɔllaŋ, a siŋgaŋndaŋ o yiyaŋnda nyalaŋ niŋ tosa mi chaŋyɛi nyɛi o nɔɔ niŋ kandu kpekesiaŋndo. Lelaŋ, num a wana nya cho o nɔɔ niŋndo nɔ mila tosa yɛlɛmiaalaŋ le chɛlɛkpɛ nyaa, a nɔ nyaa mandaa. Vɛɛ sila Baabuiyo mala yɛ nya le bahawɛilaŋ ndaŋ solioo?

1 LA SINA PƐŊGU MƐƐ CHƐLƐKPƆƆ SIŊGA YOOMU NYAA YƐ

NYƐ BAABUIYO DIMI WO: “Kaalaa nɔ biuwɔŋndo a kɛndɛi.” Nduyɛ, kaalaa lenduŋ ko kɔl le dɛnɛ ndɔ kɛndɔɔ suee le. O tuulu kɔl chɔ chɔ le.” (1 Kɔliŋtiaŋ 13:​4, 5) Tonya icho ni maa kala chua sɛnɛiyo nɔ kuee mbo mulul chɛlɛkpɛ ndɔɔ hɔlla. Kɛ mi pɔnɔ num kandu yiyaŋndo maa a buulaŋ lɛ a ndu le. Lelaŋ, puɛɛnuŋ te. Ndu bɛɛ a nɔ ma mulul ndu hɔlla. Biunuŋ, nduyɛ ma nɔ kɛndɛi. O hei niŋ, pɔnɔ num cho chɔ maa a yeema ndu. Nduyɛ, maa ndu bɛɛ cho num ndu malaa mandaa.

Nya piaanduaa bɛɛ, la ke laandaa nyaa bɛɛleŋ, kani fondole, a nɔ dialuŋ kala maa waŋ piaanduaa le. (1 Pitɛ 3:​7) Sina pɛŋgu maa laanum nɔ mbo soliŋ kpaaya ndɔɔ kpeku tau le chɛlɛkpɔɔ. Kalaŋ sɛnɛi cheleŋ o sɔla hoo ni le chɛlɛkpɔɔ mandaa. Nduyɛ, hei tosa lepum mbo buulaŋ, mbo saŋga, ɔɔ, mbo tambu kɔl. Lepum, mbo tuulu pɛŋ kɔl a num. Kɛ, num muli a kɔl tuu le. Kanifuule, “wana cho dɛɛ le tumboo wo o bɛnda mbo hiau wana nɔ yoomuaŋ ndo.” (Pɔlɔwaa 16:​32) Chɔm sinalapɛŋgoo, nduyɛ ma ke laanum mala o yeema wo.—Pɔlɔwaa 14:​29.

NYƐ Ŋ NƆ MA TOSA WO:

• Finyaa: Mala laanum chɛlɛkpɔɔ biyɔɔ o wa bɛɛ ichɔl. Dɔɔniaa teleŋ ŋ chua le nyɛm cheleŋ tosaa wo le mɛɛ ŋ looku ma nɔ teleŋndo tau le laanum a chɛlɛkpɛ numndo yɛ

• Kalla waa: Te pɔnɔ num yeema pɛ le num malaa chɛlɛkpɔɔ biyɔɔ, ɔɔ le nyɛ cheleŋ tosaa, kɛɛ le. Te o chiee tosa le, pɛɛsa ndu le. Chɔm ndu a lebɛɛ mɛɛ o nɔ mbo tosa yɛ

2 LA KINDI CHAŊYƐI NYƐI POŊ

NYƐ BAABUIYO DIMI WO: “A cho simnɔŋ dialle i pilɛ.” (Chɛnɛsee 2:​24) Mi che bɛɛ naa la sɔla wana sɛnɛiyo o yuŋgoo niŋ, la kɛsiŋ o kɔl maa “dialle i pilɛ” nya cho wɔ ni. La kindiŋ o nɛi o nɛi niŋ le mi chaŋyɛi nyɛi wa ikala poŋ.

Laanduaa, la chɔm balika melaa le mala piaanduaa nyaa cho nya wo. Diomnda ŋ cho dimilaŋ la cho mɛɛ ŋ “siŋgi naa pauwo yɛ.” (Pɔlɔwaa 12:​18) Num pɔnɔɔ, dimul laanum mɛɛ kpɛ ŋ kaala ndu yɛ, nduyɛ mɛɛ o cho wana sɔvɛ num o hɔl lɛ. Chandu ndu le mɛɛ o cho yuŋgoo chaa biyɔɔ yɛ.—Pɔlɔwaa 31:​10, 28.

“Wana o wana, o cho ko suɛi mala num num pilɛ kpe ve le ŋ tosa le. Nyɛ mala chaaŋaa numnda wo ndu ŋ tosa ni.” (1 Kɔliŋtiaŋ 10:​24) Tosa nyɛ bɛnda wo lɔɔlɔɔ o wana nya cho o nɔɔ niŋndo lo. Pɔnɔɔ a lanɔɔ, la chua teleŋndo le suukaŋndo, chandaŋndo, nduyɛ mila yaŋaŋ nilaŋ. Kɛɛ laanum ɔɔ pɔnɔ num chiɛiniŋ te. Sina yeemaŋ wana nya cho o nɔɔ niŋndo. Baabuiyo dimi aa, “Pɔnɔɔ a lanɔɔ vellaa velle, la nɔ mila kɛyaŋ chiɛiniŋ te mɛɛ dɔɔ mbo va chɛlaŋ nya.” (1 Kɔliŋtiaŋ 7:​3-5) Lelaŋ, la suukaŋ o hei choo nyɛkɛndɛi nyapila tɛɛŋ. Biuwɔŋ nyaa, a sinalapɛŋgu nyaa kindi chaŋyɛi nyɛi poŋ.

NYƐ Ŋ NƆ MA TOSA WO

• La puɛɛnuŋ le teleŋndo nɔɔ le nya ŋiɔɔŋ kpe le

• Tosal wana nya cho o nɔɔ niŋndo kɛndɔŋ pɔm pɔmbɔŋ le mbo yiyaŋ maa a kaala ndu

3 CHƐLƐKPƐ NYAA PƐƐKOO

NYƐ BAABUIYO DIMI WO: “Chɔŋ o boondii ŋ wa chuaambɔ ve ma pɛɛku num sɔɔŋ cho o yau Mɛlɛkaa niŋ ndoŋ, ma sina muŋ. Diomnda laŋ la nɔla mi la ke num kɔl kaloo o chɔm num nɛiyo le pioŋɔɔ sɔlaa sanaa” wo ni. (2 Timoti 3:​15) La kɛɛsiaa nyɛ nya nɔ mila wa chɛlɛkpɛ nyaa pɛɛkoo wo. O nɔ suliŋnda kɛndɛlaŋ le pɛɛkoo, tuupa bɛɛ mbo veluŋ. Teleŋ o wa wɔ o demboo niŋndo, mbo sina diomnde numndeŋ, a yiyaŋnda numndaŋ. Veelul ndu diomndaŋ teleŋ o cho wɔ o lende wo. Mi che bɛɛ naa o nɔla mbo sina diomnda ŋ cho veeloo laŋ lapɛŋgu le, kɛ koŋ mala mi ndu bɛɛ tuei diomndaŋ veeloo yeela teleŋ o cho sulɔɔ kaasoŋnɔ wo.

Yiyaŋ naa maa chɛlɛkpɛ numndo cho wɔ o lende le ndu pɛɛkoo a Mɛlɛka okɔɔ le. Tosa mbo tuei num piɛiyo o Chɛhowa lo. (Ditɔnɔmii 11:​19) Te la wa pɛ pisultaŋ diompilɛ, chɔm ndu nyɛm Mɛlɛka toosiaa woŋ. (Sam 78:​3, 4) Mɛɛ o hindu fau, lende ko o cha kaala ŋ nɔ le Chɛhowa wo ni. Nduyɛ, koŋ cho ndu nyindɔɔ ni mi ndu bɛɛ nɔ kaala Chɛhowaa.

NYƐ Ŋ NƆ MA TOSA WO:

• Piɛi le taasioo le chɛlɛkpɛ numndo pɛɛkoo

• Miŋgi sondoo o sɔɔŋ kulloŋ choo le mbo kandu pɛɛkoo teleŋ o cho wɔ o pɔmbɔ wo