SUƐI LEBOLII 8
Mi Ebilaham Nda Sela Tuɛi Mɛlɛka Diom
Chiee bɛndu pilɛ wa Babɛl ikɛi diolaŋ aa Ɔɔ. Wanaa wa loŋ nda, mɛlɛkaa yɛ yiaa ndaa piɛi ni, o cho Chɛhowa le. Kɛ finya pilɛ wa Ɔɔ, Chɛhowa kinɛi ndoo piɛi ni. Diola ndɔlaŋ aa Ebilaham.
Mi Chɛhowa dimul Ebilaham aa: ‘Faŋaŋ o numndo chiee, ma mɛi wanaa numnda, ma kuɛ o lɛŋnde ya cho num chɔm ndeŋ niŋ.’ Mi Mɛlɛka dimul ndu aa: ‘I cho tosa mi waŋnda kui tau o num niŋ, nduyɛ mi tosal wanaa bɔɔbɔɔ sɔɔŋ kɛndɔŋ o lɛŋndeŋ choo kpou le sabu numndo.’
Ebilaham ndoo sina pɛŋ fondaŋ Chɛhowa ndoo dimul ndu le kɔlaŋ ndo le. Kɛ mbo tiindaŋ o Chɛhowa niŋ. Le hei, mi Ebilaham, Sela laa ndɔ, Tɛlua finya ndɔ, a Lɔtu tooŋgoo ndɔ chua nyɛm ndaŋ, ma kandu kɔlaŋ naa Chɛhowa dimul Ebilaham nda. Nduyɛ tiŋndo pila ndoo bandu ni.
Mɛɛ Ebilaham a yuŋgu ndɔɔ fuuluu o lɛŋnde Chɛhowa ndoo yeema nda ma wa leŋ niŋ, o wa niŋ wɔsilaŋ 75. Lɛŋnde leŋ nda veelu ni aa Kenaŋ. Loŋ Mɛlɛka soo naa Ebilaham chua ni, mbo dimul ndu aa: ‘Lɛŋnde ŋ cho leŋ chɔɔ leŋ kpou, I cho leŋ chuauwaa numnda ke.’ Kɛ Ebilaham nda Sela ndaa yuuwa niŋ. Nduyɛ, ndaa vilu chua le. Vɛɛ Chɛhowa wa yɛ nyɛ o dimul nda wo tosa?
“Laalaŋndo tosa ni mi Ebilaham tuɛi Mɛlɛka diom, . . . le kɔlaŋ o fondaŋ o chua buŋgɛi le ndu kioo wo. Mi che bɛɛ ndoo sina naa ndoo nɔ le kɔlaŋ nda le, kɛ mbo kua.”—Hibuluiya 11:8