Mi Chɛhowa Veelu Ndu aa ‘Chaaŋ Nuu’

1, 2. (a) Vɛɛ naŋ looku yɛ sina maa waŋchieeya nɔla ma simnuŋ chaaŋaa Mɛlɛkaa? (b) Yɛɛ naŋ cho yɛ yaasiaa o buŋgɛi hei niŋ?

Ŋ YEEMA kaalaa, chɔŋ a teleŋ naŋ veluŋndo mbo kɔ bii a teleŋ naŋ wu wo. Waŋchieeya yeema chaŋyaŋ kpɛɛluŋ kaala nda woŋ, nduyɛ o cho ko kaala mɛmɛlɛsɛɛ wo le. Kɛ I hiou kpou ve cho ni, ŋ yeema mi Chɛhowa kaala naa. Wanaa bɔɔbɔɔ laalaŋ maa waŋchieeya nɔla ma nɔ chaŋyɛi kpɛɛluŋnde a Mɛlɛka le kanifuule, ŋ chi ndu le nduyɛ o nɔ bɔɔ kpaayaa. Kɛ naŋ sina tonyaa!

² Baabuiyo dimi maa mi waŋchieeya simnuŋ chaaŋaa Mɛlɛkaa. Ŋ nɔ miŋ pɛɛku tamaseliila waŋnda haa. Le sabu yɛɛ? Kanifuule, chaŋyɛi a Mɛlɛka cho kpeleŋ sɔvɛ naŋ nɔ kuee miŋ nɔ o yoomu naa niŋndo ni. Lelaŋ, ŋ yaasiaŋndɔ tamaselii Ebilahamndo. (Nuawɔ Chemisi 2:​23.) Vɛɛ o looku yɛ simnɔŋ chaaŋ o Mɛlɛka? O tiindaŋndo choo chaŋyɛi Ebilahamnde nda Mɛlɛka tɛɛŋ ndii tɔlnuŋ ni. Nduyɛ waŋnda sina maa ndu cho finyaa le wanaa dɔu tiindaŋndo o Mɛlɛka niŋnda kpou ni. (Luomaŋnda 4:​11) Te a wa pɛ tamaselii Ebilahamndo yaasiaa, nyunaŋndɔ aa, ‘Vɛɛ ya tuallɛ tiindaŋ Ebilahamndo kɔɔli le chaŋyɛi nii kindioo naa Chɛhowa tɛɛŋ?’

VƐƐ EBILAHAM LOOKU YƐ SIMNƆŊ CHAAŊ O CHƐHOWA?

3, 4. (a) Tɛɛsiaa wɔ nyɛ wa dɔɔ tɔɔndaŋ kala kala Ebilahamndo le tiindaŋ ndɔɔ wo. (b) Le yɛɛ Ebilaham ndoo chɛllɛ lɛ le Aisaki salaa solioo?

³ Yiyaŋndɔ maa Ebilaham nɔ wɔsilaŋ le 125 mbo wa pembei helɔɔ dɛɛsu dɛɛsu.^[1] (Tofa diomnda chɔɔlaalaŋ.) Aisaki po ndɔ ndoo nɔ wɔsilaŋ 25 wo wa ndu kɔlaŋ kɔɔli. Aisaki wa kɔlaŋ a yɔmnde, nduyɛ mi Ebilaham wa kɔlaŋ a muɛi a nyɛm ndaa hau ba le yiŋndeŋ mɛndullo woŋ. Kɔla laŋ laa hiou Ebilaham pala kpou o yoomu ndɔɔ niŋ. Kɛ o cho le mɛɛ o wa o yuwɛi yɛ le. Ndoo nɔ wɔ dialuŋ kalaŋ tau. Le mɛɛ Chɛhowa dimul ndu le po ndɔɔ salaa solioo yɛ kɔla laŋ la pala ndu ni!​—⁠Chɛnɛsee 22:​1-8.

⁴ O kpeekpei niŋ, tɔɔndaŋ bɛndoo pila wa hoo le tiindaŋ Ebilahamndo ni. Waŋnda apum dimi maa, dɛnɛ wɔɔŋndo Mɛlɛka ndoo tosal Ebilaham le ndu dimullo mbo soli po ndɔɔ sala ni. Nduyɛ mi acheleŋnda dimi maa yeemɛi Ebilaham chɔm le po ndɔɔ solioo sala ve chɔm maa ndoo nɔ kaala le ndu le. Le mɛɛ waŋnda nɔ tiindaŋ o Mɛlɛka niŋ te yɛ nda cho sɔɔŋ waa naa dimioo ni. Nduyɛ a sina nyɛ cho tiindaŋ kpeekpeiyo cho wo le ɔɔ a mɛɛ o tosa wallo yɛ le. (Kɔliŋtiaŋ Tasoo 2:​14-16) Kɛ o cho diikɔŋ sumɛi le Ebilaham ndoo diikuŋ Mɛlɛka le, koŋ cho ni, o yiyaŋ fɛŋ te mbo diikuŋ ndu. Le mɛɛ Ebilaham ndoo nɔ tiindaŋ kpeekpeiyo yɛ o diikuŋ Mɛlɛka ni. Mi Ebilaham sina maa Chɛhowa bii kɔllo mbo dimul ndu le tosaa nyɛ tɛɛmbuu ndu kɔllo lefafɛɛŋndo le. Mbo sina maa te o diikuŋ pɛ Chɛhowa, o cho ndu salaa dɔuwɔɔ a po ndɔ kaalaa. Yɛɛ Ebilaham ndoo yeema yɛ le tiindaŋ kala kala waa lende sɔlaa? Ndoo yeema kɔl kaloo a sinapɛŋgoo.

5. Vɛɛ Ebilaham looku yɛ pɛɛku a Chɛhowa okɔɔ, nduyɛ vɛɛ kɔl kalu o sɔla koŋndo mala yɛ ndu?

⁵ Kɔl Kaloo. O chiee bɛndu ndoo nɔ diolaŋ Ɔɔ wo Ebilaham sul ni. Mɛlɛkaa lachoowaa wanaa wa loŋ nda ndaa sooluu ni, nduyɛ finya ndɔ bɛɛ. (Chɔɔsuaa 24:​2) Lelaŋ, vɛɛ Ebilaham looku yɛ pɛɛku a Chɛhowa okɔɔ? Baabuiyo dimi maa po Nuuwa wo Siɛm, wanayɛi Ebilahamnde o wa ni. Nduyɛ Siɛm wa wɔ yoomu mi Ebilaham fuuluu wɔsilaŋ 150. Wana ndoo nɔ tiindaŋndo o kala kala wo Siɛm wa ni. Nduyɛ wana che pɛ maa mbo dimul Ebilaham a Chɛhowa okɔɔ. Ŋ sina kpeekpei le, kɛ ŋ dimi maa lende Ebilaham looku sina a Chɛhowa okɔɔ ni. Nyɛ Ebilaham pɛɛku koŋndo tosa ni mbo kaala Chɛhowa. Nduyɛ kɔl kalu o sɔla koŋndo mala ndu ni mbo taŋgul tiindaŋ ndɔɔ.

6, 7. Vɛɛ sɔɔŋ yɔŋnuŋ Ebilaham ndoŋ kindi yɛ tiindaŋ ndɔɔ?

⁶ Sinapɛŋgoo. Vɛɛ Ebilaham looku yɛ sinapɛŋgoo sɔla o mala ndu mbo kindi tiindaŋ ndɔɔ o Chɛhowa niŋndo? Apum dimi maa a nyɛ wa num o kɔllo okɔɔ ŋ yiyaŋ ni, nduyɛ yiyaŋ koŋ nyindu num ni ma tosa nyɛ. Nyɛ Ebilaham pɛɛku a Mɛlɛka okɔɔ wo pilaŋ ndu kɔllo ni. Nduyɛ, keŋ tosa ni mbo nɔ bɛɛle yiŋgoloŋ ndeŋ le ‘Mɛlɛka Yaawɛɛ, o cho le kpou wo, o toosiaa choo choo a chieeŋndo wo.’ (Chɛnɛsee 14:​22) Baabuiyo veelu bɛɛle bɛndule waa naa aa ‘tuisiŋndo Mɛlɛka o ba bɛŋgu.’ (Hibuluiya 5:​7) Le miŋ sɔɔŋguu Mɛlɛka ikɛi kpɛɛluŋ o chaŋyɛi niŋ, ŋ nɔ miŋ tuisiŋ ndu o ba bɛŋgu. (Sam 25:​14) Suiliŋ koŋ nyindu Ebilaham ni le Chɛhowa diikɔŋndo.

⁷ Mi Mɛlɛka dimul Ebilaham nda Sela le ma mal chiee ndaa Ɔɔ ma kuɛ o lɛŋnde cheleŋ niŋ. A ve lɛ ŋchuaambɔ le, nduyɛ ndaa nɔ ma wa o tɛndiilaŋ niŋ tei a yoomu ndaa mɛɛlulaŋ. Mi che bɛɛ naa mi Ebilaham sina maa kpundɛlaŋ la cho wa, kɛ mbo kɛɛsiaŋ o kɔl le Chɛhowa diikɔŋndo. Mi Mɛlɛka duau ndu sala le diikɔŋ ndɔɔ, nduyɛ mbo manda ndu. Le tamaseliiyo, mɛɛ nda poonda lanɔ kɛndɛ Ebilahamndo Sela, nduyɛ ma yeema le Ebilaham kalaa diyɔɔ, mi Chɛhowa kiindiaa ndu nda Sela laandɔ nduyɛ o cho ko lepilɛ le. (Chɛnɛsee 12:​10-20; 20:​2-7, 10-12, 17, 18) Sɔɔŋ yɔŋnuŋ muŋndoŋ tosa ni mi tiindaŋ Ebilahamndo chɔɔlu kalu poŋ.

8. Vɛɛ naŋ sɔla yɛ kɔl kaloo a sinapɛŋgoo o tosa mi chaŋyɛi nɛi kendu naa Chɛhowaa tɛɛŋndo?

⁸ Ŋ nɔla pa miŋ sɔɔŋguu Chɛhowa ikɛi kpɛɛluŋ o chaŋyɛi niŋ? Ei, ŋ nɔla kɛsɛ! Maa Ebilaham, ŋ nɔ miŋ pɛɛku a Chɛhowa okɔɔ. Nduyɛ naa bɛɛ sɔla kɔl kaloo a sinapɛŋgu naŋ yeema wo. Hau, ŋ nɔ kɔl kaloo a sinapɛŋgoo mbo hiau Ebilaham. (Daaniɛɛ 12:​4; Luomaŋnda 11:​33) Kɔl kaloo cho tau o Baabuiyo niŋ a ‘Wana toosiaa choo choo a chieeŋndo wo’ okɔɔ. Nyɛ naŋ pɛɛku wo tosa miŋ kaala Chɛhowa nduyɛ mbo mala naa miŋ nɔ bɛɛle yiŋgoloŋ ndeŋ le ndu. Kaalaa hoo a bɛɛle naŋ nɔ le ndu leŋ nyindu naa ni miŋ diikuŋ ndu. Te ŋ tosa pɛ lende, ŋ cho chɔ mɛɛ o manda naa nduyɛ mbo dɔu naa sala yɛ. Nduyɛ hei ke naa sinapɛŋgu kindi tiindaŋ naa poŋ ndo. Te ŋ piɛi pɛ Chɛhowa a kɔl naa kpou, ŋ cho sɔla kɔl hiniaa, kɔl nyuloo, a kɔl kɛndɔɔ. (Sam 34:​8; Pulɔwaa 10:​22) Mɛɛ naŋ sɔla kɔl kaloo a sinapɛŋgoo fau, lende koni chaŋyɛi nɛi naa Chɛhowaa tɛɛŋ chɔɔlu kalu ni.

MƐƐ EBILAHAM NDOO BII CHAŊYƐI NDUƐI NDA MƐLƐKA TƐƐŊ YƐ

9, 10. (a) Yɛɛ yeemaŋ yɛ le mi chaŋyɛi kendu poŋ? (b) Yɛɛ chɔm yɛ maa mi Ebilaham bii chaŋyɛi nduɛi nda Chɛhowa tɛɛŋ nyɛkɛndɛi?

⁹ Chaŋyɛi kpɛɛluŋnde cho ko maa nyɛ baa kalaa. (Nuawɔ Pulɔwaa 17:​17, NW.) O cho mɛɛ ŋ piandu naa sani baa kala kalaa ma kɛsi ndu chiɛɛniŋ le mi chiɛiyo naŋ yɛ le. Kɛ o cho ko mɛɛ bil lapeeŋge kɛndɔɔ cho naa yɛ, o yeema mɛŋndaŋ lɔɔlɔɔ le puiyo nyɛkɛndɛiyo. Mi Ebilaham bii chaŋyɛi wa ndu tɛɛŋ nda Chɛhowa ve nyɛkɛndɛi. Vɛɛ o looku yɛ keŋ tosa?

¹⁰ Mi Ebilaham hiau lachi a tuisiŋndo Mɛlɛka o ba bɛŋgu nduyɛ a ndu diikɔŋndo. Le tamaseliiyo, mɛɛ o kuɛ Kenaŋ nda yuŋgu ndɔɔ vɛlɛ a buɛiyaa nduaa, mbo hiau lachi a Chɛhowa chɛlɔɔ le mbo chɔm ndu nɛiyo o kɛɛsiaalaŋ tosaa niŋ, la bɛndu ni la pɔmbɔ ni. Wɔsioo opilɛ tuupa mi Aisaki vialuŋ, teleŋ Ebilaham wa wɔsioŋ 99 wo, mi Chɛhowa dimul ndu le mbo hivi puaa o ndulo chiɛɛniŋ kpou o chiɛɛ kɔɔli. Ebilaham ndoo kiisaŋ pa a Chɛhowa ɔɔ mbo nuuviaa nɛilaŋ le halikpeŋ o tosa nyɛ nda dimul ndu wo le? Sako. Mbo tiindaŋ o Chɛhowa niŋ nduyɛ o paale leŋ choo, mbo “tosa mɛɛ Mɛlɛka dimul ndu yɛ.”​—⁠Chɛnɛsee 17:​10-14, 23.

11. Le yɛɛ Ebilaham ndoo buulaŋ yɛ le Sodɔm a Komoolua, nduyɛ vɛɛ Chɛhowa mala yɛ ndu?

¹¹ Le mɛɛ Ebilaham ndoo diikuŋ Chɛhowa lɔɔlɔɔ o wa bɛɛ o sɔɔŋ taaniŋndoŋ choo yɛ, mi chaŋyɛi ndɛi chɔɔlu kalu poŋ. Mbo yiyaŋ maa o tiuba mbo soo o Chɛhowa lo a nyɛ o nyɛ fee okɔɔ. Nduyɛ mi ndoo nyuna pɛŋ Chɛhowa le malaa te ndoo komal pɛ nyuuniaala kendu muli laŋ. Le tamaseliiyo, mɛɛ Chɛhowa dimi maa o cho tɛɛmbuu Sodɔm a Komoolua, mi Ebilaham buulaŋ. Le yɛɛ? Siooŋnde wa ndu maa wanaa cho sakpo wa cho piɔmndo sɔla nda wanaa dɛnɛ wɔɔŋnda latulu. Kɛlɛŋgaa le Lɔtu tooŋgoo ndɔ a wanaa nduaa o wa buulaŋndo ni. Nduyɛ Sodɔm nda wa ni. Mi Ebilaham tiindaŋ o Chɛhowa niŋ, “yamanɔɔ le chieeŋndo kpou.” Nduyɛ mbo suaa o Chɛhowa lo a lebɛɛ a buulaŋnda ndɔlaŋ okɔɔ. Mi Chɛhowa biunuŋ Ebilaham chaaŋ ndɔ nduyɛ mbo tuiinuŋ ndu inyiɛɛ. Mi Chɛhowa tɛɛsiaa maa, o yɔŋ bɛɛ mbo hiŋ a kpundɔɔ, o cho wanaa cho sakpo wa nuuviaa nduyɛ mbo piŋi nda.​—⁠Chɛnɛsee 18:​22-33.

12, 13. (a) Vɛɛ kɔl kaloo a sinapɛŋgoo mɛɛlu yɛ Ebilaham mala? (b) Yɛɛ chɔm yɛ maa Ebilaham ndoo nɔ tiindaŋndo o Chɛhowa niŋ?

¹² I cho kpendekele maa kɔl kaloo a sinapɛŋgu Ebilaham sɔla wo mala ndu ni le chaŋyɛi nduɛi kɛsioo ikala poŋ nda Chɛhowa tɛɛŋ. Lelaŋ, mɛɛ Chɛhowa dimul Ebilaham okoŋ kɔɔli le po ndɔɔ solioo sala, mbo sina maa le lɔɔlɔɔ Chɛhowa wa ndu biunɔŋndo, tuiinɔŋndo inyiɛɛ, maa Mɛlɛka wana tiindaŋndo o cho ni, nduyɛ o nɔla mbo piŋi ndu. Ebilaham ndoo nɔ tiindaŋndo kɛsɛ maa Chɛhowa ndoo simnuŋ wana dɛnɛ wɔɔŋ ɔɔ wana kɔl tuu o lepilɛ niŋ kpe le! Le yɛɛ naŋ dimi yɛ lende?

¹³ Tuupa mi Ebilaham faŋaŋ buɛiyaa nduaa ikɛi, mbo dimi aa, “La chum naa pɔɔ nanuŋ a sofɛlɔɔ. Ŋ cho laŋ nda, naa poombɔɔ, mi ŋ kɔ sooluu Mɛlɛka loŋ. Te ŋ chii pɛ, ŋ cho miiŋgu nanuŋ naa nya chua.” (Chɛnɛsee 22:​5, naapila piimiaa ndu diki diki ni) Yɛɛ Ebilaham ndoo yiyaŋ yɛ? Baa choolaŋ o wa dimioo le miiŋgoo nda Aisaki ni, mɛɛ o sina maa o cho lakɔ ndu salaa soli? Sako bɛɛ. Baabuiyo dimi maa Chɛhowa ndoo nɔla mbo miŋgi Aisaki yoomu. (Nuawɔ Hibuluiya 11:​19.) Ebilaham ndoo sina maa teleŋ ndu nda Sela wa a yuwɛiyo, Chɛhowa ke nda kpaayaa ni le poo violɔɔ. (Hibuluiya 11:​11, 12, 18) Lelaŋ, mbo sina maa nyɛ o nyɛ cho mi Chɛhowa bumba ndu tosa le. Ebilaham ndoo sina nyɛ wa yɔŋnɔŋ o paale leŋ choo wo le. Kɛ ndoo nɔ tiindaŋndo maa te Chɛhowa yeema pɛ, o nɔla mbo soli po ndɔɔ o sɛiyo niŋ le halikpeŋ mbo peelu sɔɔŋ o dimul ndu woŋ. Lelaŋ Baabuiyo veelu Ebilaham ni maa ‘finyaa le wanaa dɔu tiindaŋndo o Mɛlɛka niŋnda.’

14. Simulta kuɛɛ ŋ nɔ yɛ o Chɛhowa piɛiyo niŋ, nduyɛ vɛɛ tamasi Ebilahamndo mala yɛ num?

¹⁴ Chɛhowa dimul naa hau le chuauwaa naa solioo sala le. Kɛ mbo dimul naa le sawala ndɔlaŋ diikɔŋndo. Teleŋndaŋ lapum, ŋ sina le sabu naŋ diikuŋ sawalaŋ ndaŋndo le, ɔɔ miŋ ndi ikala le laŋ diikɔŋndo. Kani bɛɛ a yiyaŋ niŋ lende? Apum che ndi ikala le yooŋgu kɛndɛ lemasaa dimioo. Kɛlɛŋgaa siɔmbulaŋ nda nɔ ni ɔɔ ma che ndi ikala le suɛi o wanaa nda sina le wa lo. Apum nɔ siooŋnde le waa teŋgeŋ o fondaŋ nda baalaa ɔɔ o sukuu. (Ɛsɔdɔɔ 23:​2; Tɛsaloniaŋ Tasoo 2:​2) Te o wa pɛ ma dimul num le nyɛ ŋ nɔla le wo tosaa, yiyaŋ a tamasi kɛndɛ Ebilaham kɛsul naa a tiindaŋndo okɔɔ vɛlɛ a kɔl sikpaa nɔɔ wo. Te o wa pɛ miŋ yiyaŋ a tamaseliila waŋpiaanduaa a waŋlaanduaa ndaa dɔu tiindaŋndo o Mɛlɛka niŋnda okɔɔ, i nɔla mii nyindu naa le tamasi ndaa tolɔɔ kɔɔli, nduyɛ miŋ sɔɔŋguu Chɛhowa chaaŋ naa ikɛi kpɛɛluŋ.​—⁠Hibuluiya 12:​1, 2.

CHAŊYƐI HUŊ A SALALAŊ NDE

15. Le yɛɛ naŋ laalaŋ yɛ maa Ebilaham ndoo tembu kɔl le Chɛhowa diikɔŋndo le?

¹⁵ Baa mi Ebilaham tambu kɔl le mɛɛ o diikuŋ sawala Chɛhowalaŋ yɛ? Baabuiyo dimi maa “mi Ebilaham yuwa kudɛɛ, malaŋ o wu.” (Chɛnɛsee 25:​8) Mɛɛ Ebilaham wa wɔsilaŋ 175, mbo yiyaŋ dɔɔ mɛɛ kpɛ o viou achal mbo tuɛi yoomu ndɔɔ yeela yɛ. Le sabu yɛɛ? Kanifuule, chaŋyɛi nduɛi wa nyɛ sɔvɛ lɔɔlɔɔ nda Chɛhowa tɛɛŋ. Kɛ te Baabuiyo dimul naa pɛ maa mi Ebilaham “yuwa kudɛɛ,” hoo chɔm naa maa ndoo nɔ iyeema le waa achal o chilaŋ niŋ te le.

16. Nyaale kuɛɛ Ebilaham cho yɛ dɔunɔŋ o Kpele Hɛnɛkiɔɔ niŋ?

¹⁶ Baabuiyo dimi maa mi Ebilaham “wa chumndo le chiee bɛndu Mɛlɛka kelu mbo taŋgul lo, chiee taŋguluŋ o kala kala nduyɛ, mbo wa le fɛɛŋ a fɛɛŋ ndo.” (Hibuluiya 11:​10) Ebilaham ndoo laalaŋ maa paale wa niŋ mbo che chiee koŋ. Chiee koŋ cho yɛ Masale Mɛlɛkaleŋ ni, le chieeŋndo hoo wa niŋ o babɛŋgu leŋ. Nduyɛ o cho leŋ chɔ! Yiyaŋndɔ mɛɛ Ebilaham wa niŋ a kɔl kɛndɛ le waa achal o kpele hɛnɛkiɔɔ niŋ o chieeŋndo choo, nduyɛ le hiouwɔɔ lachi a chaŋyɛi nduɛi kindioo nda Mɛlɛka tɛɛŋ yɛ. Ebilaham cho wa a kɔl kɛndɛ le sinaa maa mi tamasi ndɔɔ le tiindaŋndo dɔuwɔɔ o Mɛlɛka niŋ mala buɛiyaa Mɛlɛkaa a bɔɔbɔɔ le wɔsilaŋ o waalaŋ niŋ! O cho hunɔɔ sina o Kpele Hɛnɛkiɔɔ niŋ maa sala o soli o Pembei Muliaa choo ve ndoo sim le nyɛ sɔvɛ bɛndu cheleŋ. (Hibuluiya 11:​19) Nduyɛ o cho sina mɛɛ mɔnɛi o bii teleŋ o wa Aisaki po ndɔ bɛɛndiaa le ndu salaa solioo wo mala niŋ waŋnda o miiliɔŋndaŋ niŋ a dɔu tiindaŋndo o Mɛlɛka niŋnda yɛ. Nduyɛ mi hei mala nda le sinaa mɔnɛi Chɛhowa bii teleŋ o soli Chiisu Kiliti Po ndɔ sala le waŋchieeya baŋaa wo. (Chɔŋ 3:​16) Tamaselii Ebilahamndo mala naa kpou le balika melaa chɔmndo le kaala sɔvɛ bɛndu Chɛhowa chɔm le naa baŋaa wo!

17. Yɛɛ ŋ kɛɛsiaa yɛ le tosaa, nduyɛ yɛɛ naŋ cho yɛ yaasiaa o buŋgɛi cho lachi ve niŋ?

¹⁷ Maa naa kpou nɔ kɔl sikpaa le tamasi Ebilahamndo tolɔɔ kɔɔli. Maa Ebilaham, naa bɛɛ yeema kɔl kaloo a sinapɛŋgoo. Te ŋ wa pɛ hiouwɔɔ lachi a pɛɛkoo a Chɛhowa okɔɔ nduyɛ miŋ wa ndu diikɔŋndo, ŋ cho chɔ mɛɛ o cho naa salaa dɔuwɔɔ mbo wa naa mandaa yɛ. (Nuawɔ Hibuluiya 6:​10-12.) Maa Chɛhowa wa chaaŋ naa lefafɛɛŋ fɔ! O buŋgɛi cho lachi ve niŋ, ŋ cho chɔɔlu tamaseliilaŋ yaasiaa layaa a wanaa ndaa dɔu tiindaŋndo o Mɛlɛka niŋ nduyɛ ma simnuŋ chaaŋaa nduaa kpɛɛluŋnda wa okɔɔ.