Laalaŋndo Luɛi o Tofaa Bɛŋgu

Mi Ebilaham pɛɛku Aase po ndɔ le mbo kaala Chɛhowa, nduyɛ mbo dɔu tiindaŋ ndɔɔ kpou o mɛɛla Chɛhowa laŋ niŋ. Mɛɛ Aase wa le wɔsilaŋ 25, mi Chɛhowa dimul Ebilaham le mbo tosa suɛi pum, nduyɛ suɛi keŋ ndii kendu bɔɔ le tosaa. Yɛɛ wa yɛ suɛi keŋ?

Mi Mɛlɛka dimul Ebilaham aa: ‘Yandii chua po num pilɔɔ hoo, ma kɔ soli ndu salaa o pembei choo o lɛŋnde Moliaa leŋ niŋ.’ Ebilaham ndoo sina le sabu o sabu Chɛhowa dimul ndu le keŋ tosaa wo le. Kɛ a koŋ kpou, mbo tuɛi Chɛhowa diom.

Paaleŋ siɔɔ diimandɔɔ puŋ, mi Ebilaham chua Aase a buɛiyaa nduaa nda ŋiɔɔŋ ma kua o lɛŋnde Moliaa leŋ niŋ. Mɛɛ nda kuɛ le palɛi i yaa, ma cha pembei nda lachi pɔɔli. Mi Ebilaham dimul buɛiyaa nduaa maa a chumndɔ nda loŋ, mi ndu nda Aase kɔ soli salaa. Mi Ebilaham ke Aase yɔmnde, okoŋ mi ndupila chua muɛi. Mi Aase nyuna finya ndɔ aa: ‘Kuɛɛnɛ visi naŋ cho laŋ salaa solioo wo cho yɛ?’ Mi Ebilaham mulul ndu aa: ‘Po nuu, Chɛhowa cho naa ndu ke.’

Mɛɛ nda fuuluu o pembei choo, ma taŋgul bandu luamaa salaa. Okoŋ, mi Ebilaham yii Aase balaŋ a peloŋ, mbo yambu ndu o bandu koŋ choo.

Mɛɛ Ebilaham chua muɛi le ndu diyɔɔ, mi maalikɛinɔ Chɛhowaa veelu aa: ‘Ebilaham! Yɔŋ poombɔɔ nyɛ o nyɛ le! I sina niŋ kɛsɛ maa a nɔ laalaŋ kala kalaa o Mɛlɛka niŋ. Kanifuule ma chɛl a kɔl numndo kpou le po numndo salaa solioo.’ Okoŋ, mi Ebilaham cha saa kondoo isisi yondoo niŋ a leelaŋ. Mi Ebilaham timbi Aase balaŋ a peloŋ chɔ chɔ, mbo soli saa koŋ salaa.

Chɔŋ paale leŋ kɔ kɛ, mi Chɛhowa veelu Ebilaham aa chaaŋ ndɔ. A sina le sabu koŋ? Mi Ebilaham tosa nyɛ o nyɛ Chɛhowa yeema ndu le tosaa, ndoo yɔŋ bɛɛ maa o bii bila le sabu Chɛhowa dimul ndu le keŋ tosaa wo le.

Mi Chɛhowa dimul vɛlɛ Ebilaham nyɛ ndoo dimul ndu niŋ paandu wo aa: ‘I cho num salaa dɔwɔɔ, nduyɛ mi tosa mi chuauwaa numnda a kui tau.’ Hei sim ni maa Chɛhowa cho wanaa tosa sɔɔŋ kɛndɔŋ nda kpou salaa dɔwɔɔ, sanaa o sabu Ebilahamndo niŋ.