Pesiŋ Bɛɛ Chɛhowa Puɛɛnuŋ Choosɛ Le

Teleŋ Choosɛ wa o chiɛi manyumndo niŋndo, mi Feloo o wa masaa le Ichipi wo sɔl luaŋ, nduyɛ wana o wana ndoo nɔla maŋ tɛɛsiaa le. Mi wanaa nduaa walla o pilɛ dimul ndu maa Choosɛ nɔla mbo chɔm ndu nyɛ lɔma o sɔl laŋ ma sim ndo. Mi Feloo viam waŋnda chɔ chɔ le ma kɔ huŋ a Choosɛ.

Mi Feloo nyuna ndu aa: ‘A nɔla pa ma tɛɛsiaa lɔma ya sɔl laŋ?’ Mi Choosɛ dimul Feloo aa: ‘Nyɛdiaa cho wa Ichipi o hɔbɛi le wɔsilaŋ la ŋɔmmɛu. Okoŋ kɔɔli, mi yiaaŋ ma del vɛlɛ le wɔsilaŋ la ŋɔmmɛu. Lelaŋ, hɛli wana nɔ kɔl kaloo wo le mbo manda nyɛdiaa, yɔŋii wanaa numnda saŋga a yiaaŋ.’ Mi Feloo dimul ndu aa: ‘Num ya hɛli ni! Num cho wa wana kpaaya diiŋ ndɔɔ le Ichipi ni!’ Vɛɛ Choosɛ looku yɛ sina nyɛ lɔmasɔlaa ma Feloo waŋ ma sim ndo? Chɛhowa mala Choosɛ ni.

Le wɔsilaŋ la ŋɔmmɛu, Choosɛ wa nyɛdiaa mandaa. Okoŋ, mi yiaaŋ ma del ba o ba fee o chieeŋndo choo, a mɛɛ Choosɛ dimi yɛ. Waŋnda wa chɔnɔŋndo ba o ba fee le kɔlaŋ nyɛdiaa piondɔɔ Choosɛ o ba. Mɛɛ Chekɔpu finya ndɔ tuei maa nyɛdiaa cho Ichipi, mbo viam puaa nduaa tɔ le ma kɔ piondu nyɛdiaa o tiŋ.

Mɛɛ puaa Chekɔpu wa komal Choosɛ, mi ndu loonuŋ nda. Kɛ bɛndaa nduaa sina ndu le. Mi nda kpou beŋ ndu wulaŋ, a mɛɛ o sɔl luaŋ teleŋ o wa o pɔmbɔ wo yɛ. Choosɛ ndoo yeema sinaa te bɛndaa nduaa ndaa tul lɔ ndu pɛ leyɛ. Le hei, mbo dimul nda aa: ‘Suaŋ suaŋnda nya cho ni. Lɛŋnde naaleŋ nya hiŋ mɛɛndaŋndo ni.’ Ma dimi aa: ‘Ɛ ɛ! Puaa 12 finya naa velu ni. Nduyɛ, Kenaŋ naŋ fula ni. Pɔmbɔ naa pilɔɔ o vi. Nduyɛ, pɔmbɔ naa lumndo cho a finya naa latulu.’ Mi Choosɛ dimul nda aa: ‘La kɔ huŋ a pɔmbɔ nya lumndo naa ya chua, okoŋ mi laalaŋ nyɛ nya dimi wo.’ Okoŋ, ma miiŋgu naa finya nda chua.

Mɛɛ nyɛdiaa nda kuɛ wo chuu, mi Chekɔpu viam vɛlɛ puaa nduaa Ichipi. Kɛ mɛɛ nda wa niŋ kɔlaŋ, ma kua a pɔmbɔ nda lumndo kɔɔli, Bɛŋjamiŋ. Le sinaa te bɛndaa nduaa siŋgaŋ, mbo chua taala ndɔɔ mbo wou o bɔlɔ Bɛŋjamiŋ ndo niŋ. Okoŋ mbo dimul nda maa a chiimbuu taala ndɔɔ. Mɛɛ buɛiyaa Choosɛ wa saaluŋ taala ndɔɔ o bɔlɔ Bɛŋjamiŋ ndo niŋ, mi kɔndɔfillo bii bɛndaa nduaa. Ma nyɔɔlu Choosɛ maa o bii nda mbo tusi nda nyɛpalaa choo, kɛ mbo mal Bɛŋjamiŋ.

Mi Choosɛ sina niko maa bɛndaa nduaa siŋgaŋ. Choosɛ ndoo tiu lɛ kɔl ndɔɔ ba kposoŋ te. Mbo kandu chaŋndo. Mbo dimi aa: ‘Ya cho Choosɛ pɔmbɔ nya ni. Finya nuu cho wɔ yoomu?’ Mi kɔndɔfillo bii bɛndaa nduaa tau. Mbo dimul nda aa: ‘La tambu kɔl le nyɛ nya tosal la wo le. Mɛlɛka hiŋ a ya naŋ ni le yoomula nyalaŋ chiindiaa. La miiŋgu niko chɔ chɔ mi la kɔ huŋ a finya nuu.’

Ma miiŋgu le ma kɔ dimul finya nda yooŋgu kɛndɔɔ hoo, nduyɛ ma kuɛ a ndu Ichipi. Mi che bɛɛ mi wɔsilaŋ la hiau tau ndaa chiikaŋ te, kɛ mi Choosɛ nda finya ndɔ miiŋgu vɛlɛ naapilɛ o mɛɛlulaŋ.