Buɛi Ndoo Tuei Mɛlɛka Diom Ndo

Choosɛ wa wana pilɛ o puaa Chekɔpu wa tɛɛŋ. Mi bɛndaa nduaa cha maa Choosɛ finya nda ndoo hiou kaala. O yiyaŋ numndo niŋ, vɛɛ kɔltaŋ la wa yɛ nda a keŋ okɔɔ? Ma kandu Choosɛ paŋalaa, nduyɛ ma tul ndu leyɛ. Mɛɛ Choosɛ sɔl luaŋ, mbo dimul bɛndaa nduaa a maŋ okɔɔ. Ma yiyaŋ maa lɔmasɔlaŋ maŋ ma sim ni maa, nda kpou cho ndu hunɔɔ wulaŋ beŋ. Le hei, ma chɔɔlu ndu yɛleŋ tul!

Paale pilɛ, Choosɛ bɛndaa nduaa wa saa finya nda wa ikɛi, o chiee bɛndu pum ikɛi diolaŋ Siɛkɛm. Okoŋ, mi Chekɔpu viam Choosɛ le mbo kɔ tofa bɛndaa nduaa. Choosɛ lo landaŋ ma cha ndu hunɔɔ. Ma dimulaŋ aa: ‘La nuawɔ poombɔ sɔl koŋ luaŋ ndo hunɔɔ! La ŋ diinuŋ ndu.’ Okoŋ ma bii ndu, ma wou ndu o sooŋ yiŋgilɛiyo niŋ. Kɛ mi bɛndaa nduaa o pilɛ diolaŋ Chuda dimi aa: ‘Ŋ diinuŋ ndu le! Ŋ pisiŋ ndu.’ Okoŋ, ma pisi ndu le kaniŋ humboŋ 20 Midianaitiiyaa leyulaa wa kɔlaŋ Ichipi wa o ba.

Mi bɛndaa nduaa dii chuiŋndo, ma chua doma ndɔɔ ma wou o kooma maŋ niŋ. Okoŋ, ma yoo finya nda. Ma nyuna ndu aa: ‘O cho doma po numndo le cho hoo le?’ Chekɔpu ndoo yiyaŋ ko maa visi biyaa dii Choosɛ ni. Mi hei tɛɛmbuu ndu kɔllo tau. Wana o wana ndoo nɔla ndu kɔllo dɛɛniaa le.

Mɛɛ nda fuuluu Ichipi, ma kɔ pisi Choosɛ wana bɛndu cheleŋ o ba diolaŋ aa Pɔtifa. Kɛ Chɛhowa wa a Choosɛ latulu. Mi Pɔtifa cha maa Choosɛ chaa bɔɔ waltaŋ tosaa, nduyɛ maa o nɔla mbo tiindaŋ ndu. Nyɔɔ viu bɛɛ le, mi Pɔtifa handu Choosɛ nyɛm ndɔŋ kpou chilaŋ.

Mi lanɔɔ Pɔtifa cha maa Choosɛ naŋ, nduyɛ o nɔ yoomuaŋ. Le hei, lepaa o lepaa o wa Choosɛ kɔɔli le mbo hini a ndu. Yɛɛ Choosɛ tosa yɛ? Mbo kɛɛ, nduyɛ mbo dimi aa: ‘Ɛ ɛ! Hei niŋ te. Wana ni banaa laalaŋ o ya niŋ. Nduyɛ, laa ndɔ ŋ cho ni. Te I hini pɛ a num, I tosa hakioo a Mɛlɛka.’

Paale pilɛ, mi lanɔɔ Pɔtifa bii Choosɛ a kaka le mbo hini a ndu. Mbo saa ndu domaa lekɔɔ, kɛ mi Choosɛ nyaanuŋ. Mɛɛ Pɔtifa hiŋ o bɛɛ, mi laa ndɔ dimul ndu maa Choosɛ kpuuwa ndu. Kɛ o cho tonya le o wa dimioo le. Mi Pɔtifa tuulu kɔllo tau. Le hei, mbo duau Choosɛ o chiɛi manyumndo niŋ. Kɛ Chɛhowa puɛɛnuŋ a Choosɛ le.