A Dɔu Choosɛ o Chiɛi Manyumndo Niŋ

CHOOSƐ wa wɔsilaŋ 17 ma kua a ndu Ichipi. Loŋ nda kɔ pisi ndu vɛlɛ po pilɛ o ba ni diolaŋ aa Pɔtifa. Pɔtifa yɛ le masa bɛndoo Ichipi ndoo tosa wallo ni. Masaa hoo diolaŋ aa Felo.

Wallo pila Choosɛ ndoo tosa le Pɔtifa ni. Mɛɛ Choosɛ sul kaasoŋnɔ, mi Pɔtifa chua nyɛ o nyɛ cho o ndulo chiɛiniŋ mbo handu ndu chilaŋ. Kɛ le yɛɛ Choosɛ cho yɛ niko o chiɛi manyumndo hoo niŋ? Le lanɔɔ Pɔtifa.

Naŋɔɔ pila Choosɛ ndoo naŋ ni. Wanaa che ndu dɔɔ pɛ nyɔɔ ndoo hɛnaŋ num. Nduyɛ, lanɔɔ Pɔtifa ndoo yeema mi ndoo wa a ndu. Kɛ mi Choosɛ sina maa hei niŋ te. Okoŋ, mbo kɛɛ kpoŋ le waa nda ndu. Mi lanɔɔ Pɔtifa duaŋ tumbe tau. Le hei, mɛɛ pɔnɔ ndɔ hiŋ, mbo dounuŋ ndu kona mɛɛ nda kela yɛ. Nduyɛ mbo hɔŋ choolaŋ aa: ‘Choosɛ niŋ te. Mbo kindiŋ hau le ya kpuuwaa!’ Mi Pɔtifa laalaŋ bɛɛ laandɔ. Okoŋ, mbo tuulu kɔl tau a Choosɛ. Lelaŋ, mbo tosa ma duau Choosɛ o chiɛi manyumndo niŋ.

Mi wana cho chiɛi manyumndo bolleŋndo sina bɛɛ chɔ chɔ maa wana kɛndɔɔ Choosɛ cho ni. Le hei, mbo kɛsi ndu wanaa wa o chiɛi manyum koŋ niŋ nda kpou chilaŋ. Mɛɛ nyɔɔ viou kpɛɛ, mi Felo duaŋ tumbe a wana ndɔ talaa mamuɛiyo vɛlɛa wana ndɔ luamaa beediiyo. Mɛɛ mbo duau nda o chiɛi manyumndo niŋ. Nyumma pilɛ, mi puaa balaa Felo wa haa sɔl lɔma teŋgeŋ teŋgeŋndaŋ vellaa velle. Kɛ ndaa sina tɛɛsiaa lɔmasɔlaŋ te. Mɛɛ paaleŋ le sɛ idiiyo, mi Choosɛ dimul nda aa: ‘La dimul la lɔma nya sɔllaŋ.’ Mɛɛ nda dimul ndu maŋ, mi Mɛlɛka mala Choosɛ mbo tɛɛsial nda vɛ vɛ nyɛ ma simndo.

Mbo dimul wana talaa mamuɛiyo aa: ‘O palɛi yaa bɛŋgu, a cho num soli chiɛi manyumndo hoo niŋ. Nduyɛ, a cho vɛlɛ miiŋgu simnɔŋ wana talaa mamuɛi Felo wo.’ Mi Choosɛ dimul ndu vɛlɛ aa: ‘Te o yɔŋ pɛ ma fula, dimul Felo a ya okɔɔ. Nduyɛ, ma mala ya le mi fula o chiɛi manyumndo hoo niŋ.’ Mi Choosɛ muliŋ mbo dimul wana luamaa beediiyo aa: ‘O palɛi yaa bɛŋgu kpe, Felo cho num bolleŋ kiolɔɔ kpali.’

Mɛɛ palɛi yaa ve fuuluu, mi i yɔŋnuŋ mɛɛ mɛɛ Choosɛ ndoo dimi yɛ koni. Mi Felo kialu wana luamaa beediiyo bolleŋ kpali. Kɛ wana talaa mamuɛiyo ndu, mbo soli ndu o chiɛi manyumndo niŋ. Nduyɛ mbo kandu vɛlɛ wallo pila le masaa Felo. Kɛ mi wana talaa mamuɛiyo hoo puɛɛnuŋ pɔli a Choosɛ okɔɔ, o dimul Felo a ndu okɔɔ le. Lelaŋ Choosɛ cho wɔ naa o chiɛi manyumndo niŋ ni.