Felo Sɔl Luaŋ

WƆSILAŊ la tiɔɔŋ laa hiou niŋ, hoo kpou Choosɛ wa wɔ o chiɛi manyumndo niŋ. Wana talaa mamuɛi Feloo ndoo yiyaŋndɔ bɛɛ pɛŋ a ndu le. Mɛɛ nyumma pilɛ, mi Felo sɔl lɔma yɛ yɛaŋ sala tiɔɔŋ. Nduyɛ, mi kaamaa bii ndu a luaŋ maŋ. A cho pa ndu chɔɔ o luaŋ? Mɛɛ paaleŋ le sɛ idiiyo, mi Felo veelu wanaa nduaa kɔl kaluaa, mbo dimul nda a nyɛ o che o luaŋ niŋndo. Kɛ o pilɛ bɛɛ nɔla ndu maŋ tɛɛsial te.

Mɛɛ o mɛɛlulaŋ kpɔŋ, mi wana talaa mamuɛiyo yiyaŋ niko a Choosɛ okɔɔ. Mbo dimul Felo aa: ‘Boondii ya wa o chiɛi manyumnde niŋnde, po pilɛ wa loŋ mi ndoo tɛɛsiaa lɔmasɔlaŋ.’ Mi Felo tosa ma soli Choosɛ o chiɛi manyumndo niŋ chɔ chɔ bɛndoo pila.

Mi Felo dimul Choosɛ lɔma o sɔllaŋ aa: ‘Mi cha nauwa nda ŋɔmmɛu, a chelulɛi pimbiliŋ pimbiliŋ, naŋɔɔ pila ndaa naŋ ni. Okoŋ kɔɔli mi cha vɛlɛ nauwaa cheleŋ nda ŋɔmmɛu, kɛ a wa a nyavɛi sɛɛŋ sɛɛŋ. Kɛ nduyɛ mi nauwaa nyavɛiya haa a sɔɔŋguu ma dia nauwaa chelulɛiyaa ŋɔmmɛuva paku.’

‘O lɔma diiŋ ma ya sɔlaŋ niŋ, mi cha nyɔɔ maa bɛŋgu ŋchɔŋ ndu pilɛ. Yasalaŋ la wa o bɛŋgoo hoo choo laŋ ŋɔmmɛu. La wa la kuamaa nyɛ kɛndɛ lɔpi lɔpi bɛndu. Okoŋ kɔɔli, mi cha bɛŋgu cheleŋ vɛlɛ. Bɛŋgu koŋ bɛɛ, yasalaŋ la wa lechoo la ŋɔmmɛu. Kɛ la wa la foofiɛi. Okoŋ, mi yasala foofiɛilaŋ ndaŋ la misi misi bɛŋgu kuamaa kɛndɛ kɛndɛ yasala ŋɔmmɛu laŋ ndaŋ paku.’

Mi Choosɛ dimul Felo aa: ‘Lɔma sɔlaa ma sala tɔɔiŋndaŋ maŋ kpou, nyɔɔ pilɛ kpe ma sim ni. Nauwaa chelulɛiyaa ŋɔmmɛuva sim le wɔsilaŋ la ŋɔmmɛu. Bɛŋgu nɔ yasala ŋɔmmɛula kuamaala lɔpi lɔpi laŋndo bɛɛ sim le wɔsilaŋ la ŋɔmmɛu. Nduyɛ vɛlɛ, nauwaa nyavɛiyaa ŋɔmmɛuva sim le wɔsila ŋɔmmɛula cheleŋ. Bɛŋgu nɔ yasala ŋɔmmɛula foofiɛilaŋndo bɛɛ sim le wɔsilaŋ la ŋɔmmɛu. Le wɔsilaŋ la ŋɔmmɛu, nyɛdiaa cho hunɔɔ wa o hɔbɛi Ichipi naŋ. Kɛ te wɔsilaŋndaŋ la hiou pɛ, nyɛdiaa lepɛŋndo wa niŋ le wɔsilaŋ la ŋɔmmɛu.’

Mi Choosɛ dimul vɛlɛ Felo aa: ‘Hɛli wana taasioo le mbo chuuŋgiaa nyɛdiaa o wɔsila ŋɔmmɛula nyɛdiaa cho wa tau laŋ niŋ. Nduyɛ, ma handu ndu o nyɛdiaa kalaa chilaŋ. Te a tosa pɛ keŋ, waŋnda tembu niŋ labɛɛ a yiaŋ o wɔsila ŋɔmmɛula yiaŋ ma cho wa laŋ te.’

Mi kɛɛsiaa hoo hɛnaŋ Felo tau. Lelaŋ, mbo hɛli Choosɛ le mbo chuuŋgiaa nyɛdiaa. Okoŋ, mbo dovi dovi ndu o chieeŋ bɛndoŋ niŋ kpou. Choosɛ wa niŋ wana diiŋndɔɔ Felo ikɛi ni. Nduyɛ, mbo simnuŋ wana sɔwɛ bɛndoo pila Ichipi.

Mɛɛ wɔsilaŋ la hiou la ŋɔmaa, a boondii ma yiei kinɛi, mi Choosɛ cha waŋnda apum hunɔɔ. A sina pa wanaa wa kaŋ nda? Bɛndaa nduaa tɔa pisi ndu wa ni. Chekɔpu finya nda ndoo vem nda Ichipi ni, kanifuule nyɛdiaa ndoo dɔɔnaŋ nda o ba o ndalo kɔɔli di Kenaŋ. Choosɛ ndu mbo sina maa bɛndaa nduaa ni, kɛ nda sina ndu lapɛŋgu le. A sina le sabu koŋ? Kanifuule Choosɛ ndoo simnuŋ niŋ laŋgbanɔ kala bɛndu, nduyɛ o nyɛla lemasalaŋ niŋ o wa o doviaŋ ni.

Mi Choosɛ loonuŋ dɔɔ maa teleŋ o wa o pɔmbɔ wo, mbo sɔl luaŋ. O lɔma sɔlaa mamaŋ niŋ, mi bɛndaa nduaa huŋ beŋ ndu wulaŋ. A loonuŋ pa teleŋ ŋ pɛɛku a lɔmasɔlaŋ maŋ okɔɔ wo? Mɛɛ mi Choosɛ sina niko maa Mɛlɛka yɔŋ ndu Ichipi ni. Nduyɛ, le sabu kɛndɔɔ pila. Yɛɛnɛ Choosɛ ndoo tosallɛ niko bɛndaa nduaa? Ŋ tofaŋndɔ.