Mi Muuse Kɛɛsiaa le Chɛhowa Piɛiyo

Yuŋgu Chekɔpu wo ndaa veelu o Ichipi niŋ ni aa Isɔluɛiya. Mɛɛ Chekɔpu nda Choosɛ vi, mi Feloo cheleŋ simnuŋ masaa. Masaa hoo wa siooŋnde le mɛɛ Isɔluɛiya wa kuiyo ma hiau waŋnda Ichipi yɛ. Le hei, mi Feloo siiŋguu Isɔluɛiya chiaa. Mbo baŋ nda le kpilikioŋ lɔɔ, vɛlɛ a wallo tosaa kalaŋ o chiɔɔŋ ndaŋ niŋ. Kɛ mɛɛ waŋnda Ichipi baŋ Isɔluɛiya le wallo tosaa fau, lende koni nda hiau lachi a kuiyo ni. Feloo ndoo hɛnaŋ a keŋ kposoŋ te. Le hei, mbo duau sawaa maa te Isɔluɛiya velu pɛ wana pɔnɔɔ, a dii ndu. Yiyaŋndɔ mɛɛ kpɛ Isɔluɛiya wa a siooŋnde yɛ!

Wana lanɔ Isɔluɛinɔ pilɛ wa diolaŋ aa Chokɛbɛdi. Mbo vialu poombɔ kɛndɛ kɛndɔɔ. Le ndu chiindiaa, mbo wou ndu o kambɛiyo niŋ, okoŋ mbo kɔ vioŋ ndu o billo niŋ o Pioo Nail. Mi yemaa poombɔɔ hoo diolaŋ aa Meeliam, kɔ sim ikɛi le chɔɔ nyɛ cho ndu yɔŋnɔŋ ndo.

Mɛɛ chua Feloo wo hiŋ pulɔŋndo o pee koŋ, mbo cha kambɛi koŋ. Mɛɛ o nua leniŋ, mbo cha poombɔɔ chaŋndo. Mi mɔnɛi bii ndu le ndu. Mi Meeliam nyuna ndu aa: ‘I kɔ nuuvial num waŋndo mbo mandal num ndu?’ Mɛɛ chua Feloo wo chɛl, mi Meeliam kɔ huŋ a kala ndɔ Chokɛbɛdi. Mi chua Feloo wo dimul ndu aa: ‘Chua poombɔɔ hoo ma wuɛsil la ndu mi wa num paawaa.’

Mɛɛ poombɔɔ simnuŋ kpasu, mi Chokɛbɛdi kua a ndu naa chua Feloo wo chua. Mi chua Feloo wo ke ndu diolaŋ aa Muuse, nduyɛ mbo manda ndu maa po ndɔ. Mi Muuse hindu mbo simnuŋ po masaa. Nyɛ o nyɛ ndoo yeema pɛ, sɔlaa ndoo sɔla ni. Kɛ Muuse puɛɛnuŋ a Chɛhowa le. Mbo sina kɛsɛ maa Isɔluɛinɔɔ o wa ni, kɛ o ve Ichipiaŋnɔ le. Nduyɛ, mbo kɛɛsiaa le Chɛhowa piɛiyo.

Mɛɛ Muuse fuuluu wɔsilaŋ 40, mbo kɛɛsiaa le wanaa nduaa malaa. Paale pilɛ, mɛɛ Muuse che Ichipiaŋnɔɔ Isɔluɛinɔɔ lɔɔ, mbo luaa Ichipiaŋnɔ koŋ lɔɔ pila, nduyɛ mbo dii ndu. Mbo chua dialuŋ ndɔŋ, mbo kɔ vioŋ o siooŋnde niŋ. Mɛɛ Feloo tuei a hei okɔɔ, mbo yeema le Muuse diyɔɔ. Kɛ mi Muuse nyaanuŋ o lɛŋnde Midiaŋndeŋ niŋ. Naa Muuse nyaanuŋ nda bɛɛ, Chɛhowa wa a ndu latulu.