Chonataŋ Wa Wana Kɔl Simulaa a Wana Lo o Lediom Ndo

Chonataŋ wa po tase Masaa Sɔɔ wo ni. Nduyɛ wana chɔu ndoo nɔ kɔl simulaa wo o wa ni. Mi Deeve dimi maa Chonataŋ ndoo keleŋa ndoo hiou kowɔɔ, nduyɛ maa ndoo nɔ kpaayaa ndoo hiou kpɔkuŋndo. Paale pilɛ, mi Chonataŋ cha puaa chɔuwaa Filitiaŋnda 20 o pembei choo. Mbo dimul wana biilul ndu wolɔɔla chɔulaŋ ndo aa: ‘Te Chɛhowa chɔm naa pɛ nyɛ naŋ nɔ miŋ tosa wo, ŋ cho nda lakɔ chiŋalaŋ a sɔŋgɔɔ. Te Filitiaŋnda dimi pɛ maa naŋ kɔ le sɔŋgɔɔ, mɛɛ ŋ cho sina mɛɛ naŋ cho lakɔ nda chiŋalaŋ yɛ.’ Mi Filitiaŋnda deŋi choo choo aa: ‘La huŋ le sɔŋgɔɔ!’ Okoŋ, mi puaa ŋiɔɔŋnda haa hel pembei, ma kɔ tiu puaa chɔuwaa kaŋ ba.

Le mɛɛ Chonataŋ wa po tase Sɔɔ wo yɛ, ndu ndoo nɔ le simnɔŋndo masa diiŋ ndɔ le Isɔluɛi ni. Kɛ mi Chonataŋ sina maa Chɛhowa chii niŋ Deeve hɛli le mbo simnuŋ masa diiŋ ndɔɔ le Isɔluɛi. A koŋ kpou, o paŋala Deeve le. Mi Chonataŋ nda Deeve luɛi o chaŋyɛi kɛndɛ kɛndɛi niŋ. Ma chua buŋgɛi maa a cho wa maaliaŋndo vellaa velle. Le chɔmndo maa a cho o chaŋyɛi niŋ, mi Chonataŋ chua doma ndɔɔ, muɛi nduɛi faŋnde, chiɔuleŋ, a yaule ndɔleŋ, mbo ke Deeve.

Mɛɛ Deeve wa Sɔɔ nyaanɔŋndo, mi Chonataŋ kua naa Deeve chua mbo dimul ndu aa: ‘Nɔ kɔl simulaa. Yɔŋ isiooŋ te. Chɛhowa chii num hɛli le ma wa masaa. Finya nuu bɛɛ sina keŋ walaŋ.’ A yeema pa ma sɔla chaŋyɛi kɛndɛ kɛndɛi maa Chonataŋ?

Teleŋnda bɔɔbɔɔ, mi Chonataŋ ndoo luei yoomu ndɔɔ o kpundɔɔ niŋ le chaaŋ ndɔ malaa. Mbo sina maa Masaa Sɔɔ ndoo yeema mbo dii Deeve. Le hei, mbo dimul Sɔɔ finya ndɔ aa: ‘A cho hakioo tosa a Mɛlɛka te a dii Deeve pɛ. O tosa nyɛ o nyɛ wɔɔŋ te.’ Mi Sɔɔ tuulu kɔl a Chonataŋ. Mɛɛ wɔsilaŋ la hiou latiŋ, mi Sɔɔ nda Chonataŋ kɔ wu o chɔuwo.

Mɛɛ Chonataŋ vi, mi Deeve nuuviaa po Chonataŋ ndo diolaŋ aa Mɛfibosiɛɛ. Mɛɛ Deeve saaluŋ ndu, mbo dimul ndu aa: ‘Le mɛɛ finya num wa chaaŋ ni kɛndɛ yɛ, I cho num mala haaa a yoomu numndo mɛɛlulaŋ. A cho wa o chiɛi ni lemasa niŋ, nduyɛ ma wa nyɛdiaa dioo o tibii nuu choo.’ Le pilɛ bɛɛ Deeve puɛɛnuŋ a Chonataŋ chaaŋ ndɔ le.