Chɛhowa Vem Chɛluimaya le Yooŋgoo Dimioo

Mi Chɛhowa hɛli Chɛluimaya le mbo wa wana suaa le ndu wo le waŋnda Chuda. Mbo dimul ndu le mbo dimul waŋnda yooŋgu ndɔɔ, nduyɛ mbo sila nda le ma pɛŋgi sɔɔŋ wɔɔŋndoŋ tosaa. Mi Chɛluimaya dimi aa: ‘Chɛhowa, I chiee suɛi le, kanifuule poombɔɔ ya cho ni.’ Mi Chɛhowa dimul ndu aa: ‘Yɔŋ isiooŋ te. I cho num chɔm nyɛ ŋ nɔ le dimioo wo. I cho num mala.’

Mi Chɛhowa dimul Chɛluimaya le mbo chuuŋgiaa laŋgbaa kalla kpou, mbo pɛl nda kpɛɛnɛi puuluei o hɔl. Okoŋ mbo dimi aa: ‘Nuaa koni nda cho hunɔɔ Chulusalɛm piɔlɔɔ ni.’ Mɛɛ Chɛluimaya tosa nyɛ Chɛhowa dimul ndu wo, mi laŋgbaa kalla tuulu kɔl. Mi wana soliaa lasala pilɛ diolaŋ aa Paasiɔɔ luaa Chɛluimaya, okoŋ mbo wou ndu o kpiɔɔ. Ichɔl koŋ pii, Chɛluimaya ndoo kue ba o ba le. Diimandɔɔ, mi Paasiɔɔ soli ndu o kpiɔɔ. Mi Chɛluimaya dimi aa: ‘Hei ndi hiou ya mayoomu. I cho lɛ waŋnda yooŋgoo hoo dimul te.’ Kɛ baa ndoo vi pa ŋdial? Sako. Mɛɛ Chɛluimaya chɔɔlu yiyaŋ a ndi okɔɔ, mbo dimi aa: ‘Yooŋgu Chɛhowa wo cho ya niŋ maa leyiŋ. I nɔla mi pɛŋgi waŋnda ndu dimullo le.’ Mi Chɛluimaya hiau lachi a waŋnda silaa.

Mɛɛ wɔsilaŋ latiŋ la hiou, mi wana cheleŋ simnuŋ masaa le Chuda. Mi wanaa soliaa lasalaa, a wanaa lachoowaa dimi maa le Mɛlɛka nda suaa ni wa tul Chɛluimaya leyɛ le yooŋgu o wa dimioo wo. Ma dimul wanaa fula o yuŋgu lemasaa choo wa aa: ‘Laŋunɔɔ hoo nɔ mbo sɔla piɔmndo.’ Mi Chɛluimaya dimi aa: ‘Te la dii ya pɛ, la dii wana tɛɛmbuu isɔɔ o isɔɔ le wo. Nyɛ Chɛhowa vem ya dimioo wo ya cho dimioo ni, kɛ o cho yiyaŋ ni le.’ Mɛɛ nda tuei nyɛ o dimi wo, ma dimi aa: ‘Laŋunɔɔ hoo nɔ mbo sɔla piɔm te.’

Mi Chɛluimaya hiau lachi a yooŋgoo dimioo, nduyɛ mi waŋnda haa tuulu kɔl tau. Ma dimul masaa le mbo dii Chɛluimaya. Mi masaa dimul nda maa nyɛ o nyɛ nda yeema pɛ tosaa a Chɛluimaya, a tosa. Ma bii Chɛluimaya, ma wou ndu o sooŋ yiŋgilɛiyo niŋ. Nduyɛ loolioo wa o sooŋ koŋ niŋ. Ndaa yiyaŋ maa o cho lo loŋ mbo vi. Mi Chɛluimaya kandu mɔɔwaa o loolioo niŋ.

Mi masaa laŋgbaa nduaa kalla o pilɛ diolaŋ aa Ɛbɛdi-mɛlɛki, dimul masaa aa: ‘Wanaa fula o yuŋgu lemasaa choo wa wou Chɛluimaya o sooŋndo niŋ. Nduyɛ te o lo loŋ pɛ, o cho wu.’ Mi masaa dimul Ɛbɛdi-mɛlɛki le mbo chua puaa 30, ma kɔ soli ndu o sooŋndo niŋ. Nyɛ o nyɛ kuuna Chɛluimaya waŋnda yooŋgu Mɛlɛkaa dimullo le. Baa ŋ nɔ miŋ wa maa ndu le?