Daaniɛɛ Cho o Sooŋ Kpɔkuŋnda Niŋ

Wana cheleŋ wa masaa le Babilɔŋ ndo wa Daaliɔɔ fula Mɛdi wo ni. Mi Daaliɔɔ saaluŋ maa Daaniɛɛ wa teŋgeŋ. Le hei, mbo handu ndu wanaa sɔviaa kpou o Babilɔŋ niŋ bolleŋ. Kɛ mi puaa haa tul Daaniɛɛ leyɛ, nduyɛ ndaa yeema pɛŋ ma dii ndu. Mɛɛ nda sina maa mi Daaniɛɛ ndoo piɛi le yaa o Chɛhowa lo o paaleŋ niŋ, ma dimul Daaliɔɔ aa: ‘Fallo masaa, ŋ nɔ miŋ dɔu sawaa maa wana o wana piɛi mɛlɛka o mɛlɛka cheleŋ te mɛɛ num pilɛ kpe. Wana o wana diikuŋ sawaa hoo le, ŋ wou ndu o sooŋ kpɔkuŋnda niŋ.’ Mi Daaliɔɔ naŋ kɔl a kɛɛsiaa hoo, okoŋ mbo pila suei.

Dimioo nuaa Daaniɛɛ tuei a sawa sɛnɛiyo hoo okɔɔ, mbo kua o chiɛi ndɔɔ. Mbo kɔ baŋ wulaŋ o wundɛi ndɔɔ, mbo wa piɛileŋ o Chɛhowa lo. Mi puaa tul ndu kaŋ leyɛ wa kɔ luɛi ndu choo, ma komal ndu piɛileŋ. Ma miiŋgu naa Daaliɔɔ chua a kiltaŋ, ma dimul ndu aa: ‘Daaniɛɛ diikuŋ sawa numndo le. Le yaa kpulukuu o piɛi Mɛlɛka ndɔɔ o paaleŋ niŋ ni.’ Kɛ Daaliɔɔ ndoo hɛnaŋ a Daaniɛɛ tau. Le hei, ndoo yeema mi Daaniɛɛ ndoo vi le. Lepaa o lepaa, o wa kindiŋndo le nyɛ o tosa le mbo chiindiaa Daaniɛɛ wo. Kɛ masaa bɛɛ ndoo nɔla lɛ sawa o pila hoo sueiyo siŋga le. Mbo dimul puaa kaŋ maa a bii Daaniɛɛ ma kɔ wou ndu o sooŋ kpɔkuŋnda niŋ.

Ichɔl koŋ pii, Daaliɔɔ nɔla luaŋ te. Kanifuule, o wa buulaŋndo a Daaniɛɛ okɔɔ. Idiiyo puŋ, mbo nyaanuŋ naa nda wou Daaniɛɛ o sooŋ kpɔkuŋnda niŋnda. Mbo kɔ nyuna ndu aa: ‘Baa mi Mɛlɛka numndo chiindiaa num pa?’

Okoŋ mi Daaliɔɔ tuɛi Daaniɛɛ suɛi. Mi Daaniɛɛ dimul ndu aa: ‘Chɛhowa yɔŋ maalikɛinɔɔ mbo kiindiaa kpɔkuŋnda sondolaŋ. A yɔŋ ya nyɛ o nyɛ le.’ Mi Daaliɔɔ naŋ kɔl tau! Mbo dimul waŋnda ma soli Daaniɛɛ o sooŋ kpɔkuŋnda niŋ. Nyɛ o nyɛ yɔŋnuŋ ndu le. Okoŋ, mi masaa dimul waŋnda aa: ‘Puaa tosa haa ma wou Daaniɛɛ o sooŋ kpɔkuŋnda niŋnda, la nyindu nda o sooŋ koŋ niŋ.’ Mɛɛ nda nyindu nda, mi kpɔkuŋnda sɛɛsiaa nda kpou.

Mi Daaliɔɔ duau sawaa, mbo dimul wanaa nduaa kpou aa: ‘Wana o wana nɔ mbo nɔ siooŋnde le Mɛlɛka Daaniɛɛ piɛiyo. Ndu chiindiaa ndu kpɔkuŋnda o sondo ni.’

Baa ma piɛi pa o Chɛhowa lo lepaa o lepaa maa Daaniɛɛ?