SUƐI LEBOLII 11
Yɛɛ Ŋ Nɔ yɛ Ma Tosa le Ma Sɔla Tɔnɔɔ o Baabuiyo Niŋ?
Kani bɛɛ a tuu niŋ pa le wali bɛndoo o pum tosaa, ma yiyaŋ maa o kendu bɔɔ tosa? Le ma sɔla batiuwaa o wali waa ndoo niŋ, mɛɛ ma piɔu ndu a pɛltaŋ. Lende koni i cho a diomndaŋ veeloo o Baabuiyo niŋ ni. Naapum ma nyunaŋ dɔɔ aa: ‘Kuɛɛ ya nɔ yɛ mi kandu?’ O suɛi lebolle hei bɛŋgu, ŋ cho yaasiaa sɔɔŋ tiŋ ŋ nɔ ma tosa le ma tuei Baabuiyo pɛɛkoo yeela wo.
1. Le yɛɛ naŋ nɔ yɛ miŋ wa diomndaŋ veeloo o Baabuiyo niŋ lepaa o lepaa?
Te a wa pɛ diomndaŋ veeloo o Baabuiyo niŋ ɔɔ “sawala” Chɛhowalaŋ nuaa lepaa o lepaa, a nɔla ma wa a kɔl kɛndɛ. Nduyɛ, hei mala num ma sɔla batiuwaa o yoomoo niŋ. (Nuawɔ Sam 1:1-3.) Le kandɔɔ, chua teleŋ biŋgi lepaa o lepaa ma veelu diomndaŋ. Mɛɛ ŋ hiau lachi a Diom Mɛlɛkaa sinaa fau, lende koni nyɔɔ hɛnaŋ num le diomndaŋ veeloo leniŋ ni.
2. Yɛɛ mala yɛ naa miŋ sɔla tɔnɔɔ le diomndaŋ veeloo o Baabuiyo niŋ?
Le miŋ sɔla tɔnɔɔ tau le diomndaŋ veeloo o Baabuiyo niŋ, ŋ nɔ miŋ sim nduyɛ miŋ yiyaŋ o nyɛ naŋ veelu diomndaŋndo choo. (Sam 119:97) A wa diomndaŋ veeloo pɛ nyunaŋndɔ aa: ‘Yɛɛ hei pɛɛku yɛ ya a Chɛhowa okɔɔ? Vɛɛ ya duau yɛ ndi o wali niŋ o yoomu nuu niŋ? Vɛɛ ya soliŋ yɛ bolii Baabuiye hei kpeku le acheleŋnda malaa?’
3. Vɛɛ ŋ looku yɛ ma nuuviaa teleŋndo le diomndaŋ veeloo o Baabuiyo niŋ?
Baa ma che ndi pa ikala le teleŋndo sɔlaa ma veelu diomndaŋ o Baabuiyo niŋ? Naa a bɔɔbɔɔ mi hei yɔŋnuŋ naa. Kindiŋ ma “soliŋ teleŋ numndo kpeku nyɛkɛndɛi.” (Ɛfisiaŋnda 5:16) A tosa hei te a kɛsi pɛ teleŋndo le diomndaŋ veeloo o Baabuiyo niŋ lepaa o lepaa. Waŋnda apum idii puŋ nda veelu diomndaŋ o Baabuiyo niŋ ni. Apum ipala a teleŋ nda wa pɛŋgioo wo. Apum yɛ ichɔl tuupa ma hini. Teleŋ kuɛɛ bɛnda yɛ le num?
CHƆƆLU YAASIAA
Pɛɛku ma sina nyɛ ŋ nɔ ma tosa le ma tuei diomndaŋ veeloo o Baabuiyo niŋ yeela wo. Tofawɔ vɛlɛ mɛɛ ŋ bɛɛndiaŋ nyɛkɛndɛi le ma sɔla tɔnɔɔ tau o Baabuiyo pɛɛkoo niŋ yɛ.
Mɛɛ naŋ pɛɛku nuaa le nyɛdiaa teŋgeŋ teŋgeŋndo dioo mbo yelal naa yɛ, lende koni naŋ nɔ ni miŋ pɛɛku le diomndaŋ veeloo o Baabuiyo niŋ tueiyɔɔ yeela
4. Pɛɛku le ma tuei diomndaŋ veeloo o Baabuiyo niŋ yeela
Lepum o ve suɛi bɛɛŋ bɛɛŋ le kandɔɔ diomndaŋ veeloo o Baabuiyo niŋ te. Kɛ, ŋ nɔ miŋ “landuŋ kɔl” le hei tosaa. Mɛɛ waŋndo kandu nuaa nyɛdiaa o di wɔ paandu le wo dioo o pɔmpɔmbɔ haaa mbo yelal ndu yɛ, lende koni naa bɛɛ nɔ ni miŋ tosa. Nuawɔ 1 Pitɛ 2:2, okoŋ mi la suukaŋ o nyunaa hoo choo:
Te a wa pɛ diomndaŋ veeloo o Baabuiyo niŋ lepaa o lepaa, a yiyaŋ pa maa nyɔɔ cho num mɛɛlu hɛnaŋ, nduyɛ ma yeema le hiouwɔɔ lachi?
Handu VIDUEIYO ma che nyɛ mala waŋnda apum ma hɛnaŋ a diomndaŋ veeloo o Baabuiyo niŋndo. Okoŋ, mi la suukaŋ o nyunalaŋ ndaŋ choo:
Simulta kuɛɛ feleŋguaa naŋ che o vidueiyo hoo niŋnda ndaa chɔulaba yɛ?
Yɛɛ mala yɛ nda le loo o kɛɛsiaa nda tosa wo choo le diomndaŋ veeloo o Baabuiyo niŋ?
Yɛɛ ndaa tosa yɛ mi nyɔɔ chɔɔlu nda hɛnaŋ le diomndaŋ veeloo o Baabuiyo niŋ?
Sɔɔŋ mala num le ma kandu woŋ:
Hɛli Baabui nda chaa hivi nduyɛ mbo nɔ diomnda tɛtɛlɛ laŋ ndo. Te New World Translation wa pɛ o suɛi maŋgalɛi ŋ sina nyɛkɛndɛi ve niŋ, mɛɛ kandu a ndu.
Te a wa kandɔɔ pɛ, hɛli buŋgaŋ ŋ hɛnaŋ tau woŋ. Le ma sina buŋgaŋ muŋ, tofa kɔfoo hoo, “Kandu Diomndaŋ Veeloo o Baabuiyo Niŋ.”
Handu tamasioo naa ŋ mɛɛlu wa. Soliŋ kɔfoo hoo kpeku, “Handu Tamasioo Naa Ŋ Mɛɛlu a Diomndaŋ Veeloo o Baabuiyo Niŋnda.” O yauwo hoo niŋ o cho ni.
Soliŋ JW Library® app kpeku. Te a nɔ ndu pɛ o foŋ kua o intanɛtiiyo choo wo, ɔɔ nyɛ mapuulu cheleŋ, a nɔla ma yaŋ nilaŋ ɔɔ ma veelu diomndaŋ o Baabuiyo niŋ ba o ba ŋ wa pɛ.
Soliŋ yooŋgula chɔɔlaalaŋ kpeku o New World Translation niŋ. La nɔ lɛŋii nda tuula ve, kɔfulaŋ, a tɛɛsiaa le diomndaŋ o Baabuiyo niŋ, le num malaa ma tuei diomndaŋ veeloo yeela.
5. Bɛɛndiaŋ fɛŋ tuupa ma kandu Baabuiyo pɛɛkoo
Nuawɔ Sam 119:34, okoŋ mi la suukaŋ o nyunaa hoo choo:
Le yɛɛ o bɛnda yɛ ma piɛi fɛŋ tuupa ma kandu diomndaŋ veeloo o Baabuiyo niŋ, ɔɔ bɛɛndiaŋndo le ndu pɛɛkoo?
Yɛɛ ŋ nɔ yɛ ma tosa le ma sɔla tɔnɔɔ o pɛɛku kɛ kɛ niŋ? Te a wa pɛ bɛɛndiaŋndo o suɛi lebolii kɛ kɛ bɛŋgu o yauwo hoo niŋ, kindiŋ ma tol kɛɛsiaalaŋ ndaŋ kɔɔli:
Veelu diomndaŋ o pɛlta taselaŋ niŋ.
Veelu diomndaŋ o bolii Baabuiye niŋ, nduyɛ ma kindiŋ le sinaa mɛɛ i chɛlaŋ a nyɛ cho o yauwo niŋndo yɛ.
Kei kpɛkileŋ o sɔɔŋ kuluŋ muli nyuna kɛ kɛ wo bɛŋgu. Hei cho num mala mi la wa suukaŋndo vellaa velle nya wana cho num pɛɛkoo wo.
A sina pa?
Seiyaa Chɛhowaa soliŋ niŋ Baabuila yɛ yɛ la waŋnda hivi niŋndaŋ kpeku. Kɛ ŋ kaala bɔɔ New World Translation of the Holy Scriptures kanifuule, o nɔ biondɔŋ te, o cho tɛtɛlɛ le diomndaŋ veeloo, nduyɛ o nɔ diola Mɛlɛkalaŋ leniŋ.—Tofawɔ buŋgɛi hei o tɛɛŋgei choo, “Baa Seiyaa Chɛhowaa Nɔ Pa Baabuiyo o Ndaa?”
TE WAŊNDO DIMI PƐ AA: “Baabuiyo kendu bɔɔ pɛɛku, ya I nɔ teleŋ le keŋ te.”
Vɛɛ num yiyaŋ yɛ?
SƆƆŊ KULLOŊ
Le ma sɔla tɔnɔɔ o Baabuiyo niŋ, mɛɛ ma kɛsi teleŋndo le diomndaŋ veeloo leniŋ. Piɛi Mɛlɛka le mbo mala num ma bii nyɛ ŋ cho diomndaŋ veeloo wo bila. Nduyɛ, ma wa bɛɛndiaŋndo tuupa mi wana cho num pɛɛkoo wo hiŋ.
Nyunala miiŋgaa choo laŋ
Yɛɛ ŋ nɔ yɛ ma tosa le ma bii Baabuiyo bila nyɛkɛndɛi?
Teleŋ kuɛɛ bɛnda yɛ a num le diomndaŋ veeloo o Baabuiyo niŋ a bɛɛndiaŋndo?
Le yɛɛ ŋ nɔ yɛ ma bɛɛndiaŋ fɛŋ, tuupa mi wana cho num pɛɛkoo wo hiŋ?
CHƆƆLU SƆƆŊ PUM TOFA
Chɔɔlu yaasiaa sɔɔŋ mala num ma sɔla tɔnɔɔ tau le diomndaŋ veeloo o Baabuiyo niŋndo.
“Nyɛ Ŋ Nɔ Ma Tosa le Ma Sɔla Tɔnɔɔ Tau o Baabuiyo Niŋndo” (Bandu Mɛŋgɛlaa No. 1 2017)
Pɛɛku wɔ a nɛilaŋ la yaa okɔɔ, la mala num le diomndaŋ veeloo o Baabuiyo niŋndo.
“Vɛɛ Baabuiyo Mala yɛ Ya?”—Pɛl 1: “Kindiŋ Ma Sina Sɔɔŋ Cho o Baabuiyo Niŋndoŋ” (Kɔ o tɛɛŋgei choo)
Pɛɛku ma sina nyɛ mala num ma tuei diomndaŋ veeloo o Baabuiyo niŋ yeela wo.
Nuawɔ kɛɛsiaala wanaa viou niŋ diomndaŋ veeloo o Baabuiyo niŋnda yɔŋgu a pɛɛkoo okɔɔ wo.