Lo o Dialuŋ Fulaŋ Numndoŋ Choo le Wali Pollo

WALI sɔviɔɔ pila wali dimiaa yooŋgu kɛndɛ cho tosaŋndo o chieeŋndo choo wo cho ni. Maa buɛi Chɛhowaa, ma che ndi bɛɛle bɛndu le waŋchieeya siiŋgoo buɛiyaa Chiisuaa. Kɛ, a nɔ kiisaŋ le chɛlɔɔ maa lepum, mi kɔɔfaa a wanaa dimiaa yooŋgu kɛndiaa sɔla simultaŋ le wali pollo tosaa a dialuŋ fulaa.

Mi wanaa dimiaa yooŋgu kɛndiaa apum che ndi ikala le waŋndo komallo ma suukaŋ a ndu te a wa pɛ yooŋgu kɛndɔɔ dimioo chiɛiyo a chiɛiyo. Lepum pɛŋ, waŋnda tau ve o chiɛila ndalaŋ te. Te ŋ komal pɛ waŋnda le nda yooŋgu kɛndɛ leMasaa dimullo, lepum a yeema le nilaŋ yaŋɔɔ le, ɔɔ ma simul naa pɛŋ a sɔŋgɔɔ. Mi wanaa dimiaa yooŋgu kɛndiaa apum yiyaŋ maa wallo hiou nda mayoomu. Kanifuule, tanda nda cho yooŋgu kɛndɔɔ dimioo wo cho tau, nduyɛ a cho fulamakɔɔli kɛndɔɔ sɔlaa. Nduyɛ ma buulaŋ maa te a nɔla niŋ pɛ ma bɔŋa tanda koŋ. Vɛlɛ, waŋnda apum o kundaa niŋ tosa niŋ wali pollo le wɔsiŋ bɔɔbɔɔ, ŋ nda ve bɛɛ kɔl maa a cho chua o ndu tosaa niŋ te woŋ. Mi hei tosa nda ma tambu kɔl.

Wanaa Chɛhowaa kpou cho simulta dɔɔniaa dialuŋ fulaŋ nda nɔ le wali pollo woŋ komallo. Baa kaamaa bii naa pa le hei? Sako bɛɛ. O fulawɔ okoŋ kɔɔli, Setana, “Masa Nyinaa Wɔɔŋnda” chieeŋndo hoo cho o ba bɛŋgu ni. Te o wa yɛ pɛ lende, ŋ nɔ pa miŋ che ndi suɛi tɛtɛlɛ le yooŋgu kɛndɛ Mɛlɛkaa, o piŋi yoomulaŋ ndo dimioo?—Chɔŋ Tasoo 5:19.

Simul kɛ kɛ ŋ komal pɛ o yooŋgu kɛndɔɔ dimioo niŋ, nɔ tiindaŋndo maa Chɛhowa nɔla mbo mala num le ma sɔla batiuwaa. Kɛ, yɛɛ ŋ nɔ yɛ kuee ma tosa le dialuŋ fulaŋ sɔlaa le wali leKilisiɔŋndo tosaa? Ŋ yaasiaŋndɔ sɔɔŋ ŋpum.

MALA WANAA NƆ WƆ TAASI BƆƆ LE WA

Iwɔsi o iwɔsi, waŋnda waalaŋ la sɔla yiŋɔɔ ni maa Seiyaa sɛnɛiya le Chɛhowa. Te o wa pɛ maa a laŋga yɔŋgu yoomu numndo o Mɛlɛka lo ma yiŋ, mɛɛ a cho tɔnɔɔ sɔla wanaa viou niŋ yooŋgu kɛndɔɔ dimioo wa o ba. Nduyɛ te o wa yɛ pɛ maa a viou niŋ yooŋgu kɛndɔɔ dimioo, baa i ve suɛi sɔvɛ le malaa a sɛnɛiya pɛɛkoo le?

Chiisu ndoo sina maa buɛiyaa nduaa ndaa yeema nɛi chɔmaa le waa wanaa dimiaa yooŋgu kɛndiaa, nduyɛ mbo chɔm nda mɛɛ wallo nɔ mbo tosaŋ yɛ. (Luku 8:1) Hau bɛɛ, bahawɛiyo cho le acheleŋnda pɛɛkoo le ma wa wanaa dimiaa yooŋgu kɛndɛ.

Te wana hiŋ sɛnɛi o tonyaa niŋndo wa pɛ kɔlaŋ o wali pollo niŋ, ŋ nɔ miŋ yiyaŋ maa o cho taasioo sɔla a bandɔ le waŋnda pɛɛkoo le. O yeema pɛɛkoo wana nɔ kɛndɛi a kaalaa wo o ba. Wanaa nɔ wɔ taasi bɔɔ le wa nɔ ma sɔla pɛɛkoo (1) mɛɛ nda nɔ ma soo o waŋnda lo yɛ, nduyɛ ma tosa tuulaa, (2) mɛɛ nda chiŋa wana chiɛiyo ɔɔ wana hiauwaŋndo balioo yɛ, (3) mɛɛ nda yɔŋgu yaulaŋ yɛ, (4) mɛɛ nda tosa miiŋgu makɔɔ o wanaa chɔm yeemɛiya lo yɛ, nduyɛ (5) mɛɛ nda kandu pɛɛku Baabuiyo yɛ. O kpeekpei niŋ, fulamakɔɔlila kɛndɛlaŋ la cho sɔlaŋ, te wana nda cho pɛɛkoo wo tofa pɛ mɛɛ wana ndɔ pɛɛkaa dimi yooŋgu kɛndɔɔ yɛ, nduyɛ mbo tuula mɛɛ o tosa yɛ. (Luk. 6:40) Wana sɛnɛiyo hoo naŋ bɔɔ kɔl te waŋndo kuɛ pɛ latulu a ndu le yooŋgu kɛndɔɔ dimioo, le mbo yaŋ ndu nilaŋ, nduyɛ mbo mala ndu te bahawɛiyo fula pɛ. Wana nɔ hoo taasi bɔɔ le yooŋgu kɛndɔɔ dimioo le wo sɔla vɛlɛ tɔnɔɔ te o wa pɛ chandɔɔ sɔlaa, a sɔɔŋ mala ndu woŋ ndu chɔmndo.—Ikil. 4:9, 10, NW.

DƆU BALTAŊ A WANA NYA CHO O WALI POLLO NIŊNDO

O fulawɔ o kindi kindiŋ numndo kɔɔli le baltaŋ dɔuwɔɔ a wanaa ŋ cho komalla, o palɛi pum choo, balta kɛndɛla ŋ duau o wali pollo niŋndaŋ la cho a wana nya kuɛ wo ni. Loonuŋ maa mi Chiisu viam buɛiyaa nduaa “a ŋiɔɔŋ ŋiɔɔŋnda” o wali pollo niŋ. (Luk. 10:1) Mɛɛ ndaa tosa wali pollo diompilɛ fau, lende koni ndaa lueiyaŋ yoomuaŋ vellaa velle ni. Lelaŋ, teleŋ naŋ chua o wali pollo niŋ a chaaŋ naa laalaŋndo wo cho bɔɔ o sɔvɛ. O mala naa le “mi ŋ maaliaŋ vellaa velle.”—Luom. 1:12.

O sɔɔŋ kuɛɛ choo nya nɔ yɛ mi la dɔu baltaŋ? Baa wana pilɛ nɔ suɛi kɔl dɛɛniaa laŋga yɔŋnuŋ ndu ve? Baa a saaluŋ niŋ pa suɛi ŋ tuei yeela o pɛɛkɔŋ ipilayaa, ɔɔ o leyuŋgoo niŋndo? Baa ma sɔla tɔnɔɔ o suɛi ŋ tuei o bɔŋaŋ naa leKilisiɔŋndo wo? Lepum, la kue lɔɔlɔɔ nya wana ŋ cho yooŋgu kɛndɔɔ dimioo latulu wo le. A sina pa mɛɛ o looku hunɔɔ o tonyaa niŋ yɛ? Yɛɛ tosa yɛ mbo laalaŋ kɛsɛ maa kɔɔna Chɛhowaa cho hoo ni? Dilakenaŋ kuɛɛ o sɔla yɛ, ɔɔ sɔɔŋ kuɛɛ komallɛ ndu niŋ? Kɛlɛŋgaa num bɛɛ a dimul ndu sɔɔŋ yɔŋnuŋ numndoŋ ŋpum. Mɛɛ mɛɛ nda bii num o wali pollo niŋ, kɔlaŋ nya waŋndo latulu tosa mi la ‘maaliaŋ vellaa velle.’—1 Tɛs. 5:11.

LO O PƐƐKU NUM KƐNDƐ Ŋ TOSA WO CHOO

Nyɛ sɔvɛ mala num le dialuŋ fulaŋ sɔlaa o wali pollo niŋndo cho pɛɛku kɛndɔɔ nɔɔ nduyɛ ma lo lechoo ni. “Buɛi cho sakpo, nduyɛ, mbo va buɛi kɔl kaloo wo” soo niŋ a sɔɔŋ okɔɔ tau o yaula naalaŋ niŋ. (Mat. 24:45) Lelaŋ, sɔɔŋ ŋ pɛɛku le sinaa a Mɛlɛka okɔɔ woŋ cho puɛɛ. Ŋ yaasiaŋndɔ nyunaa hoo miŋ che mɛɛ wana tosa pɛɛkɔŋ ipilayaa yɛ. Ndu cho ni, ‘Le yɛɛ wali dimiaa yooŋgu leMasaa cho yɛ nyɛ sɔvɛ bɛndu?’ Kɔfu tɛɛsiaa ŋsɔɔ o peele 28 choo chɔm sabulaŋ lapum.

Sɔɔŋ dimiŋ o kɔfu koŋ niŋndoŋ tolɔɔ kɔɔli mala num ma wa yooŋgu kɛndɔɔ dimioo a dialuŋ fulaa. Vɛ a soliŋ teleŋ num pɛɛkaa kpeku le ma nuuviaa sabula cheleŋ o laŋ kɔɔli le? Okoŋ kɔɔli, yiyaŋ yiŋgoloŋ o sabula laŋ choo, a bolii Baabui soo a laŋ okɔɔ ve. Te a tosa pɛ lende, o cho num mala le wali pollo tosaa a dialuŋ fulaa.

CHƐL SILALA NDA KE NUMNDAŊ A KƆLLO KPOU

Kɔɔna Chɛhowaa cho naa lɔɔlɔɔ sɔɔŋ mala naa miŋ tosa hiouwɔɔ lachioo o wali pollo niŋndoŋ kioo. O fula wɔ ko bɛɛ kɔlaŋ yooŋgu kɛndɔɔ dimioo chiɛiyo a chiɛiyo, nɛila cheleŋ la cho vɛlɛ. Le tamaseliiyo, ŋ poonyiaa yauwo, ŋ suaa o foŋndo choo, o bilioo choo ɔɔ fondala waŋnda wa tau laŋ, o baltaŋ niŋ, a fondaŋ leyulaa. Ŋ nɔla vɛlɛ miŋ tosa yɛlɛmiaalaŋ o walta naalaŋ niŋ le halikpeŋ miŋ kɔ dimi yooŋgu kɛndɔɔ o tanda o cho dimiŋ tau le wo niŋ.

Kɔl numndo cho pa o kumbiaŋ wakpa le sɔɔŋ muŋ tolɔɔ kɔɔli? A kindiŋ niŋ pa le ŋpum tosaa? Wanaa tol kɛɛsiaalaŋ ndaŋ kɔɔli wa a bɔɔbɔɔ sɔla nyaale hiuwaŋ mɛŋndo le fulamakɔɔlila nda sɔla laŋ. Ŋ yaasiaŋndɔ tamaseliilaŋ layaa.

Tamaselii tasoo cho ni, mɛɛ kɛɛsiaala cho o Yau Wali Naa leMasaa niŋ opilɛ wo mala naa le pɛɛku Baabuiyo kandɔɔ yɛ. Mi kɛɛsiaa hoo mala ndepilɛnɔɔ diolaŋ Epilil le pɛɛku Baabuiyo kandɔɔ a wanaa nda tosa wallo latulu wa a yaa. Mi kaamaa bii ndu, nduyɛ mbo naŋ kɔl tau le mɛɛ nda yaa kpou chɛl le Baabuiyo pɛɛkoo ma kandu kɔlaŋ o bɔŋaŋndaŋ o kundaa niŋ yɛ.

Tamaselii diiŋ ndɔɔ cho yaula naŋ yɔŋgu waŋnda laŋ ni. A dɛɛniaa naa le miŋ nuuviaa wanaa yeema sɔɔŋ lebolloŋ ŋpum kpeekpei o yaula naalaŋ niŋnda. Mi buɛi ibuŋgaa o lɛŋnde Amɛlikaleŋ niŋ duaunuŋ kona maa mbo yɔŋgu “Tiondoo!” o soo a peluŋ nyɛm nyaanaŋndoŋ okɔɔ wo, o wanaa lebolla lo o fondaŋ pum naa nda pisi peluŋ nyɛm nyaanaŋndoŋ nda. Mi ndu nda laandɔ yɔŋgu vɛlɛ o cheleŋ o soo a suɛi lebolle hei okɔɔ wo, “Sina Wana Num Chiɔuwaa Pɛŋgu.” Ma yɔŋgu ndu o fondala wanaa chiɔuwaa hiouwɔɔ kɛmɛ. Mbo dimi aa, “Waŋnda haa komallo mala naa bɔɔ le naapila chɔɔmɔŋndo a yaula naalaŋ. Mɛɛ naŋ tosa chaŋyɛi a waŋnda o fondalaŋ ndaŋ, miŋ cha ndi suɛi tɛtɛlɛ le chɔɔloo suukaŋndo a nda.”

Tamaselii yaa ndɔɔ cho yooŋgu kɛndɔɔ dimioo o foŋndo choo ni. Mi ndepilɛnɔɔ diolaŋ Chudi poonyial fondala lebolta Seiyaa Chɛhowaa o chieeŋndo choo le balikaa malɔɔ le dɛɛniaa o sɔla le yooŋgu kɛndɔɔ dimioo o foŋndo choo wo. Mbo duaunuŋ kona maa, kala ndɔ cho niŋ wɔsilaŋ 86, nduyɛ o nɔ bahawɛi kɛndiaa lepɛŋndo. Kɛ mɛɛ o tol kɛɛsiaa hoo kɔɔli le yooŋgu kɛndɔɔ dimioo o foŋndo choo lɔɔlɔɔ, mbo kandu pɛɛku Baabuiyo tosaa a wɛɛŋ nɔ wɔsilaŋ 92 ndo, nduyɛ mbo sɔla nyaaloo tau!

Kɛɛsiaala cho o yaula naalaŋ niŋ le yooŋgu kɛndɔɔ dimioo laŋ la cho wallo tosaa. Soliŋ ndaŋ kpeku! La mala num ma dɔunuŋ nyaale, nduyɛ ma nɔ dialuŋ fulaŋ le wali pollo tosaa.

KƐSI KPELEŊNDA Ŋ TIUBA MA KOMAL TAŊ

Ŋ tuu ba naa tiuwaa o wali pollo niŋ a mɛɛ kpɛ naŋ ke waŋnda yaulaŋ yɛ le, mɛɛ naŋ nɔ pɛɛkula Baabuilaŋ yɛ, ɔɔ mɛɛ naŋ mala waŋnda le simnɔŋndo buɛiyaa Chɛhowaa yɛ le. O fulawɔ o koŋ kɔɔli, vɛɛ kpɛ Nuuwaa ndoo mala yɛ waŋnda o yuŋgu ndɔɔ kɔɔli le ma huŋ piɛi Chɛhowa? Kɛ a koŋ kpou, mbo sɔla fulamakɔɔli kɛndɔɔ o wali pollo niŋ. Nyɛ yeemaŋndo cho Chɛhowa piɛiyo o laalaŋndo choo ni.—Kɔl. Tasoo 4:2.

Wanaa dimiaa yooŋgu kɛndiaa a bɔɔbɔɔ che maa, le ma chɔɔlu dialuŋ fulaŋ sɔla o wali pollo niŋ, mɛɛ ma kɛsi kpeleŋnda nda tiuba le komallo laŋ. Ɔɔ kpeleŋndaŋ ndaŋ lapum? A saaluŋ lapum o kɔfu cho o peeleŋ ndeŋ choo wo niŋ.

A mala Chɛhowaa, nuuviaa nɛilaŋ le mi wali num pollo chuu num nyaaloo a fulamakɔɔli kɛndɔɔ. Te a komal pɛ kpeleŋnda numndaŋ, a cho nyaaloo sɔla le keŋ tosaa, nduyɛ ma sɔla kɔl hiniaa le sinaa maa a cho kindiŋndo o nɛi o nɛi niŋ le yooŋgu kɛndɔɔ dimioo.

Tonya, yooŋgu kɛndɔɔ dimioo cho suɛi bɛɛŋ bɛɛŋ te. Kɛ sɔɔŋ cho, ŋ nɔ ma tosa woŋ, le yooŋgu kɛndɛ leMasaa dimioo a dialuŋ fulaa. Tuei dɛɛniaa nya yɔŋgaŋ vellaa velle nya wana ŋ cho o wali pollo niŋndo yeela. Kindiŋ ma nɔ pɛɛku kɛndɔɔ nduyɛ ma lo lechoo. Dɔu o wali niŋ sɔɔŋ buɛi cho sakpo, nduyɛ, mbo wa buɛi kɔl kaloo wo cho naa kioo woŋ. Nduyɛ kɛsi kpeleŋnda ŋ nɔla ma komal taŋ. I hiou kpou ve cho ni, loonuŋ maa Mɛlɛka ke num di bɛndoo le ma wa waŋndo opilɛ o Seiyaa nduaa tɛɛŋ le yooŋgu kɛndɔɔ dimioo. (Ais. 43:10, NW) Nuawɔ se mɛɛ ŋ sɔla niŋ tɔnɔɔ yɛ, te o wa pɛ ma hiou lachi a wali pollo tosaa a dialuŋ fulaa!