La Ve niŋ “A Puɛiyaŋ Te”?

1, 2. (a) Yɛɛ Chiisu dimi yɛ a palɛi mɛɛlɛi okɔɔ? (b) Nduyɛ nyunala yɛɛ naŋ cho yɛ yaasiaa?

NDOO wa bɔɔ suɛi kɛndɛ bɛndu le challe a Chiisu latulu o pembii Ɔlifive choo ma wa nuaa toŋgo maaŋndo o Chulusalɛm niŋ, teleŋ o dimi suɛi kɛndɛ kɛndɛi ndii nɔ le peelɔŋndo ve. Mi pitɛ, Aŋdulu, Chemisi a Chɔŋ yaŋ nilaŋ nyɛkɛndɛi mɛɛ Chiisu che nyɛ nɔ le peelɔŋndo o chilaŋ niŋ pɔ wo. Mbo dimul nda sɔɔŋ puɛɛ a palɛi mɛɛlɛi chieeŋ dɛnɛwɔɔŋndo hoo okɔɔ. Nduyɛ a teleŋ koŋ o cho wa Masaa o Masale Mɛlɛkaleŋ choo ni. Mbo dimul nda maa a teleŋ mɛɛlaa koŋ, “buɛi cho sako, nduyɛ mbo va buɛi kɔl kalu wo” cho wa le ndu o lɛŋndeŋ choo, mbo wa buɛiyaa nduaa nyɛdiaa iMɛlɛkaya nda yeema wo kioo a teleŋndo.—Mat. 24:45-47.

² O suɛi nɔ hei le peelɔŋndo ve niŋ, mi Chiisu suaa a tale chuaa laanduaa yufuaa tɔ wa okɔɔ. (Nuawɔ Maatiu 25:1-13.) Ŋ muliŋ niko hɔlla o nyunalaŋ ndaŋ choo. (1) A yɛɛ okɔɔ kpeekpei taloo hoo cho yɛ suɛi? (2) Vɛɛ Kilisiɔŋaa pɔyaŋnda tollɛ sila cho o taloo hoo niŋndo kɔɔli, nduyɛ yɛɛ cho yɛ fulamakɔɔlioo? (3) Vɛɛ wana o wana sɔla yɛ tɔnɔɔ o tale Chiisoo hoo niŋ hau?

A YƐƐ OKƆƆ TALOO HOO CHO YƐ SUƐI?

3. O paandoo niŋ, vɛɛ yaula naalaŋ laa tɛɛsiaa yɛ tale chuaa laanduaa yufuaa tɔ wa, nduyɛ yɛɛ wa yɛ fulamakɔɔlioo?

³ O buŋgɛi naŋ hiou ve niŋ, ŋ che maa o wɔsila bɔɔbɔɔ hiou laŋ niŋ, buɛi cho sakpo wo cho lɛ ko kindila tau bolii Baabui tɛɛsiaa sɔɔŋ sim lewundu woŋ te, kɛ nyɛ naŋ nɔ miŋ pɛɛku o sɔɔŋ muŋ niŋndo. O paandoo niŋ, mi yaula naalaŋ la tɛɛsiaa nyɛ o nyɛ Chiisu dimi o tale chuaa laanduaa yufuaa tɔ wa niŋ. Ndu cho ni, lambuilaŋ, chuɛiyaŋ, sanilaŋ, a nyɛm cheleŋ. Kɛ ŋ nɔla pa miŋ dimi maa ŋ wa nɛiyo biondɔɔ le tɛɛsiaa yooŋgu choŋ choŋ cho a taloo hoo okɔɔ wo? Ŋ cho chɔ mɛɛ mulioo le nyunaa hoo cho nyɛ sɔvɛ bɛndu yɛ.

4. O taloo hoo niŋ, vɛɛ naŋ looku yɛ sina (a) wana cho lanɔɔ chuaa wo (b) yufuaa?

⁴ Ŋ muliŋ ndɔ niko hɔlla a nyɛ Chiisu soo a ndu okɔɔ o taloo hoo niŋndo. O tasoo, ŋ yaasiaŋndɔ a wanaa o wa suɛiya okɔɔ. Nɛɛ cho yɛ wana cho hunɔɔ lanɔɔ chuaa wo? I cho kpendekele maa Chiisu wa suɛi a ndupila okɔɔ. Teleŋndo opum, mbo dimi maa wana cho laanɔɔ chuaa wo o cho ni! (Luk. 5:34, 35) Chuaa laanduaa yufuaa yɛ? O taloo hoo niŋ, mi Chiisu dimi maa chuaa laanduaa yufuaa nɔ kuee ma wa a bɛɛndiaŋ a lambuila ndalaŋ la mɛɛndulaa le lɔɔ wana cho hunɔɔ lanɔɔ chua wo cho fuuluu wo. Mi Chiisu yɔŋgu sila pilɔɔ hoo kpe o ‘kunda ndɔ pɔmbɔ’ pɔyaŋndo lo aa, “La va a bɛɛndiaŋ . . . , la wounuŋ nyɛla waltaŋ, nduyɛ, mi lambuila nyalaŋ la va la mɛndulaa. La tosa maa buɛiya a masa ndaa kuɛ o bɔŋaŋndo va. Mɛɛ masa ndaa kuɛ, ma chal tofaa o nɛi le ndu maa te o hiŋ dɔɔ pɛ, mbo kundu dioo a kumbul ndu le pilɛ kpe.” (Luk. 12:32, 35, 36) Le handɔɔ lechoo, mi Pɔɔl bɛɛ poonyiaa a buɛiyaa pɔyaŋaa Kilitiaa okɔɔ, mbo tuu nda maa chuaa laanduaa yufuaa nɔ sɔŋ te wa nda cho ni. (Kɔl. Diiŋ Ndɔɔ 11:2) Ŋ che maa le buɛiyaa nduaa pɔyaŋnda silaa Chiisu dimi tale cho o Maatiu 25:1-13 niŋndo ni.

5. Vɛɛ Chiisu chɔm yɛ teleŋ taloo hoo cho peelɔŋndo?

⁵ O diiŋ ndɔɔ, ŋ tofaŋndɔ teleŋ taloo hoo nɔ le peelɔŋndo wo. A teleŋ kuɛɛ sila Chiisoo hoo peeluŋ yɛ? Chiisu yɔŋgu naa teleŋndo a nyɛ cho yɔŋnɔŋdo walaŋ o taloo hoo mɛɛlulaŋ. “Mi wana va laanɔɔ chuaa wo koma huŋ.” (Mat. 25:10, Naapila piimiaa ndu diki diki ni) A mɛɛ naŋ yaasiaa o Bandu Mɛŋgɛlaa, Suɛɛsɔɔ 15, 2013 ve niŋ yɛ, mi Chiisu soliŋ diom maKilikiiyo kpeku bɛmbɔɔ le ŋɔmaa a “hunɔɔ” ndɔɔ okɔɔ o Maatiu bolle 24 a 25 niŋ. Naa naa Chiisu soo a hunɔɔ ndɔɔ okɔɔ, a teleŋ nyɛpalaa bɛndoo okɔɔ o wa suɛi ni. A boondii keŋ o cho waŋnda kɔɔsa ni, okoŋ mbo tɛɛmbuu chieeŋ dɛnɛwɔɔŋdo hoo kpata kpata. Hoo chɔm maa taloo hoo cho suɛi a palɛi mɛɛlɛi okɔɔ, kɛ a boondii nyɛpalaa bɛndoo o cho mɛɛlu peelɔŋ ni.

6. A yɛɛ okɔɔ kpeekpei taloo hoo cho yɛ suɛi?

⁶ A yɛɛ okɔɔ kpeekpei taloo hoo cho yɛ suɛi? Loonuŋ nyɛ Chiisu cho suɛi a ndu okɔɔ wo. Chiisu soo fɛŋ a “buɛi cho sakpo, nduyɛ mbo va buɛi kɔl kalu wo” okɔɔ. Buɛi koŋ cho wa kunda pɔyaŋ pɔmbuiinaa cho wa chilaŋ chuaa buɛiyaa Chiisuaa tɛɛŋ o palɛi mɛɛlɛi niŋndo ni. Mbo sila nda maa, a nɔ ma lo o laalaŋ ndaa choo. Okoŋ, mbo nua vɛlɛ o chilaŋ niŋ mbo soliŋ taloo hoo kpeku le silaa buɛiyaa nduaa pɔyaŋnda kpou o palɛi mɛɛlɛi niŋ maa a “va a puɛyaŋ te” yɔŋi fanda nda sɔviɔɔ o hiɔluŋ nda. (Mat. 25:13) Ŋ yaasiaŋndɔ niko taloo hoo miŋ che mɛɛ wanaa pɔyaŋnda bii sila ndɔɔ yɛ.

VƐƐ KILISIƆŊAA PUƐYAŊNDA TOSA YƐ NYƐ DIMIŊ O TALOO HOO NIŊNDO?

7, 8. (a) Suiliŋnda tiɔɔŋ nda kuɛɛ chɔm yɛ maa chuaa laanduaa yufuaa kɔlkaluaa wa a bɛɛndiaŋ? (b) Vɛɛ Kilisiɔŋaa pɔyaŋnda chɔm yɛ maa a cho a bɛɛndiaŋ?

⁷ Mi tale Chiisoo kindila a chuaa laanduaa yufuaa kɔlkaluaa okɔɔ. Nda cho maa a diɔmnda le. Le yɛɛ? Le suiliŋndaŋ la tiɔɔŋ, bɛɛndiaŋndo a waa lahɔl. A wa a bɛɛndiaŋ le hunɔɔ wana cho lanɔɔ chuaa wo. Yufuaa wa haa chumndo o nyundaŋ niŋnda, ndaa nɔ ma lo lachɔl tei mi wana cho laanɔɔ chuaa wo hiŋ. Lambuila ndalaŋ laa nɔ mi la wa biyɔɔ tei mi teleŋ nyaaloo fuuluu. Yufuaa diɔmnda ve a bɛɛndiaŋ te. Kɛ a ŋuɛɛnuaa wa a bɛɛndiaŋ nyɛkɛndɛi, kanifuule ma huŋ a chuɛima cheleŋ o sanila ndalaŋ niŋ, a lambuila ndalaŋ. Baa Kilisiɔŋaa pɔyaŋnda bɛɛ cho pa a bɛɛndiaŋ?

⁸ Ei, a cho a bɛɛndiaŋ! O palɛi mɛɛlɛi hei niŋ, Kilisiɔŋaa pɔyaŋnda cho tosaa maa yufuaa kɔlkaluaa. A cho a bɛɛndiaŋ le wali nda ke nda wo tosaa tei mi mɛɛlulaŋ la hiŋ. A sina nyɛ yeemaŋ o wali sandaa niŋndoŋ. Chɔŋ a teleŋ nda kandu wali nda ke nda le tosaa wo, a sina maa a nɔ ma kɛɛ nyɛm bɔɔbɔɔ cho o chieeŋ Setanaa niŋndo. A yɔŋguŋ ndapila kpou o Chɛhowa lo le ndu piɛiyo. Nduyɛ a kɛsi teleŋ nda nɔ ma saŋga a ndu piɛiyo wo le, kɛ a nɔ kaalaa a lo lechoo wo le ndu a Po ndɔɔ. A kɛsi pimbi ndaa, ma kɛɛ kaa chieeŋ dɛnɛwɔɔŋndo, yeemɛi nyɛm kiɔɔŋ, kaa suundɛiyo, a kaayei. A cho a bɛɛndiaŋnda lɔɔlɔɔ, ma wa diondɔɔ maa nyɛ wawoŋ. Nduyɛ o yɔŋ bɛɛ mi wana cho laanɔɔ chuaa wo yala hunɔɔ le, a vi ŋdial te.—Fil. 2:15.

9. (a) Sila yɛɛ Chiisu yɔŋgu yɛ maa icho naa o koowaŋ niŋ le hiouwɔŋndo o luaaŋ? (b) Yɛɛ Kilisiɔŋaa pɔyaŋnda tosa yɛ mɛɛ nda tuei yoondaa aa, “Mi la che mɛɛ wana cho lanɔɔ chuaa wo hiŋ” yɛ? (Tofa tɛɛsiaa o peeleŋ ndeŋ bɛŋgu.)

⁹ Suiliŋ diiŋndɔ mala chuaa laanduaa yufuaa haa ma wa a bɛɛndiaŋnda wo cho waa lahɔl ni. Icho pa tonya maa mi luaŋ ma hɛlu Kilisiɔŋaa pɔyaŋnda apum a boondii manyum keŋ? Ei. Icho tonya. Loonuŋ maa mi Chiisu suaa a chuaa laanduaa tɔ wa okɔɔ maa, “nda kpede ma hiaunuŋ o luaaŋ” mɛɛ wana cho laanɔɔ chuaa wo viou le hunɔɔ. Chiisu ndoo sina maa mi wana nɔ yeemɛi le waa yekeŋndo bɛɛ vi ŋdial. Kilisiɔŋaa pɔyaŋnda tol sila koŋ kɔɔli ma wa wallo tosaa kekelee le ma wa yekeŋ, ma lo lachɔl. O taloo hoo niŋ, mi chuaa laanduaa yufuaa haa kpou tiandu mɛɛ nda tuei yoondaa a nyumndaŋ aa, “Mi la che mɛɛ wana cho lanɔɔ chuaa wo hiŋ” yɛ! Kɛ a wa lahɔlla kinɛi biunuŋ ni tei o mɛɛlulaŋ. (Mat. 25:5, 6; 26:41) Kɛ ɔɔ niŋ Kilisiɔŋaa pɔyaŋnda hau? A cho chɔmndo o palɛi mɛɛlɛi hei niŋ maa a cho lachɔl. O dimi niŋ, yondaa nda cho koŋ ni aa, “Mi la che mɛɛ wana cho lanɔɔ chuaa wo” cho o nɛi yɛ. A cho biunɔŋndo, ma wa a bɛɛndiaŋ le hunɔɔ Wana cho Laanɔɔ Chuaa wo.a Kɛ, mɛɛlula taloo hoo cho suɛi a teleŋ kpeekpeiyo opum okɔɔ. Vɛɛ naŋ sina yɛ hei?

FANDAA LE A KƆLKALUAA A NYƐPALAA LE A DIƆMNDA

10. Nyuna kɔndɔfili kuɛɛ cho yɛ a suukaŋ keeku chuaa laanduaa yufuaa kɔlkaluaa tɛɛŋ a a diɔmnda wo?

¹⁰ Kɛlɛŋgaa naa taloo hoo kendu bila biyɔɔ wa cho o mɛɛlulaŋ ni, naa a diɔmnda wa suukaŋndo a a kɔl kaluaa wa. (Nuawɔ Maatiu 25:8, 9.) Suukaŋ koŋ hiŋ a nyunaa hoo, “Teleŋ kuɛɛ wanaa dɔu tiindaŋndo o Mɛlɛkaa niŋnda cho yɛ kɛɛ le wanaa nyuna nda wa malaa?” Te ŋ yaasiaa pɛ mɛɛ o cho viouwɔɔ le hunɔɔ yɛ, ŋ cho mulioo sɔla le nyuna kɔndɔfillo hoo. Loonuŋ a tɛɛsiaa sɛnɛi naŋ sɔla wo maa Chiisu, Wana cho Lanɔɔ Chuaa wo cho hunɔɔ a mɛɛlula nyɛpalaa bɛndoo le yamɛi kiolɔɔ. Baa o cho a nyɛ yɔŋnuŋ niŋ tuupa mi mɛɛlulaŋ la fuuluu wo le taloo hoo cho suɛi le? Che maa lende icho wa ni. Kanifuule a teleŋ koŋ, Kilisiɔŋaa pɔyaŋnda cho niŋ di nda mɛɛlaa sɔla.

11. (a) Yɛɛ cho yɛ yɔŋnɔŋ tuupa mi nyɛpalaa bɛndoo kanduŋ? (b) Yɛɛ yufuaa kɔlkaluaa yiyaŋ yɛ, mɛɛ nda dimul a diɔmnda le ma kuɛ o wanaa pisiaa machuɛiya lo?

¹¹ Lelaŋ, tuupa mi paale nyɛpalaa bɛndoo kanduŋ, Kilisiɔŋaa pɔyaŋnda kpou o chieeŋndo choo, a cho lo o laalaŋ ndaa choo wa cho di mɛɛlaa sɔla le kɔlaŋ o choo choo niŋ. (Chɔɔmɔŋndo 7:1-4) Chɔŋ a teleŋ koŋ, di ndaa tembu lɛ le. Kɛ yiyaŋndɔ a wɔsiŋ cho hiouwɔɔ tuupa mi paale nyɛpalaa bɛndoo kanduŋ ndo. Yɛɛ cho yɛ yɔŋnɔŋ a Kilisiɔŋaa pɔyaŋaa kɛɛ loo lahɔlla, a tɛɛmbuu pimbi nda simiaa wa? Fanda ndaa le helɔɔ choo choo cho nda hiɔlɔŋ. A tonya, a nɔ niŋ di kposoŋ le kɔlaŋ o choo choo niŋ tuupa mi paale nyɛpalaa bɛndoo kanduŋ te. A teleŋ koŋ, wanaa laalaŋaa cheleŋ cho pɔyaŋndo sɔla ma miiŋgu o foofo wanaa tɛɛmbuu pimbi nda simiaa wa. Kɛ te nyɛpalaa bɛndoo kanduŋ pɛ, diɔmnda haa cho woolu wa le Babilɔŋ Tɔɔ Bɛndoo chɔɔ o tambei. Kɛlɛŋgaa a boondii keŋ kinɛi nda cho sina ni maa a ve a bɛɛndiaŋ le hunɔɔ Wana cho Lanɔɔ Chuaa wo le. A teleŋ koŋ, te a wa pɛ loko loko le nyunaa le nda malaa, yɛɛ cho yɛ yɔŋnɔŋ? Tale Chiisoo ke naa muli imɔnɔɔ. Mi yufuaa kɔlkaluaa kɛɛ le chuɛima ndaŋ yɔŋgoo o a diɔmnda lo. Ma dimul nda le ma kuɛ o wanaa pisiaa machuɛiya lo. Loonuŋ maa, “a ditɛɛŋndo kinɛi” hei yɔŋnuŋ ni. A saaluŋ niŋ pa wanaa pisiaa machuɛiya a boondii keŋ? Sako! Nyumndaŋ maa tol niŋ bɔɔ.

12. (a) A teleŋ nyɛpalaa bɛndoo, yɛɛ cho yɛ yɔŋnɔŋ a Kilisiɔŋaa wa paandu a pɔyaŋnda, kɛ ma kɛɛ loo o pimbi nda simiaa choo tuupa ma sɔla di mɛɛlaa? (b) Yɛɛ cho yɛ wa fulamakɔɔlioo le wanaa cho maa yufuaa diɔmnda wa?

¹² Nduyɛ a teleŋ nyɛpalaa bɛndoo bɛɛ, Kilisiɔŋaa pɔyaŋaa lo o laalaŋ ndaa choo wa nɔla ma mala wanaa faŋaŋ o laalaŋ ndaa choo wa le. Mala ve niŋ kposoŋ te. I wa niŋ ihiawaŋ lɔɔ. Falumakɔɔli yɛɛ waŋnda haa sɔla yɛ niŋ? Mi Chiisu tɛɛsiaa nyɛ yɔŋnuŋndo mɛɛ yufuaa diɔmnda haa kuɛ balɔŋ fondoo. Mbo dimi aa, “Mi wana va lanɔɔ chuaa wo koma huŋ. Mi chuaa laanduaa yufuaa va a bɛɛndiaŋ nda luɛi nda ndaa le nyɛ diaa nɔ kɛsiaa dioo. Ma kinda dioo.” Te Kiliti hiŋ pɛ o mɛɛlula nyɛpalaa bɛndoo, o cho Kilisiɔŋaa nduaa pɔyaŋ lo o laalaŋndo choo wa chuuŋgiaa naapilɛ o choo choo niŋ. (Mat. 24:31; 25:10; Chɔŋ 14:1-3; 1 Tɛs. 4:17) A tonya, o cho dioo kinda le a lo o laalaŋ choo le wa, a cho maa yufuaa diɔmnda wa. A cho wa chaŋndo kpeleŋ aa, “Fallo, fallo, kumbul naa dioo fɔ!” A teleŋ koŋ, o cho nda mulul mɛɛ o mulul niŋ wanaa cho maa ŋchuiŋnda yɛ aa, “Mi dimul nya, I sina nya le.” Nuawɔ mɔnɛi bɛndu se!—Mat. 7:21-23; 25:11, 12.

13. (a) Le yɛɛ ŋ nɔ miŋ dimi maa Kilisiɔŋaa pɔyaŋaa bɔɔbɔɔ cho lo o laalaŋndo choo le? (b) Le yɛɛ naŋ nɔ yɛ miŋ dimi maa a tiindaŋndo Chiisu yɔŋgu sila ndɔɔ ni? (Tofa fotueiyo o peele naŋ kandu leŋ choo.)

¹³ A mɛɛ naŋ yaasiaa yɛ, yɛɛ naŋ nɔ yɛ miŋ dimi? Baa dimioo Chiisu wa ni maa buɛiyaa nduaa pɔyaŋnda cho lo o laalaŋ ndaa choo le, okoŋ mi waŋndo miiŋgu o foofo ndaa? Ɛ ɛ. Loonuŋ maa, o sila fɛŋ “buɛi cho sakpo, nduyɛ mbo va buɛi kɔl kalu wo” maa kposoŋ bɛɛ o nɔ mbo simnuŋ buɛi dɛnɛwɔɔŋ te. Koŋ sim naa maa keŋ te o wa kɔl te. Kɛ taloo hoo nɔ sila kala kalaa. O yufuaa tɔ wa tɛɛŋ, a diɔmnda wa a ŋuuɛɛnu, mi a kɔlkaluaa wa a ŋuɛɛnu. Lende koni, Kilisiɔŋaa pɔyaŋnda o kɛ kɛ nɔ dioo le mbo bɛɛndiaŋ nduyɛ mbo wa lahɔl, ɔɔ mbo hɛli le kiɔɔ loo o laalaŋndo choo, ɔɔ mbo wa diɔm. Kiilanɔɔ Pɔɔl bɛɛ mi Mɛlɛka dimul ndu le mbo poonyiaa nyɛpilɔɔ hoo kpe o chaaŋaa nduaa Kilisiɔŋaa pɔyaŋnda lo. (Nuawɔ Hibuluiya 6:4-9; tuuwɔ Dutɔlɔnɔmi 30:19, NW.) Loonuŋ maa mi Pɔɔl sila nda o tuu kpɛi, kɛ mbo duau tiindaŋndo o nda niŋ, nduyɛ mbo dimul nda a kaalaa maa “pioŋɔɔ” cho o chilaŋ niŋ le chaaŋaa nduaa Kilisiɔŋnda. Lende koni, sila Chiisu yɔŋgu o tale ndɔɔ niŋndo, a tiindaŋndo o yɔŋgu ndu ni. Kiliti sina maa buɛiyaa nduaa pɔyaŋnda o kɛ kɛ cho lo o laalaŋ ndaa choo, nduyɛ mbo sɔla fanda kɔl kɛndɛ bɛndoo!

VƐƐ SAA CHELEŊAA KILITIAA SƆLA YƐ TƆNƆƆ?

14. O nɛila kuɛɛ choo “saa cheleŋ” nda bɛɛ cho yɛ tɔnɔɔ sɔla o tale chuaa laanduaa yufuaa tɔ wa niŋ?

¹⁴ Tale Chiisu dimi a yufuaa tɔ wa okɔɔ wo, le buɛiyaa nduaa pɔyaŋnda o yɔŋgu ndu ni. Baa hoo chɔm ni maa saa cheleŋaa Kilitiaa nɔ tɔnɔ leniŋ te? (Chɔŋ 10:16) Sako bɛɛ! Loonuŋ maa nyɛ taloo hoo dimi wo choŋnuŋ tɛtɛlɛ, “La va a puɛyaŋ te.” Baa le Kilisiɔŋaa pɔyanda koni silaa cho ni? Mi Chiisu dimi aa, “Nyɛ ya I dimul nya pɛ, I dimi ndu le wana o wana, ‘La va a puɛyaŋ te.’” (Mak. 13:37, Naapila piimiaa ndu diki diki ni) Chiisu yeema mi buɛiyaa nduaa kpou bɛɛndiaa kɔlta ndalaŋ le loo o laalaŋ ndaa choo nduyɛ ma komal kpeleŋnda pilɛ laŋ kpe le loo lahɔl. Lelaŋ Kilisiɔŋnda kpou nɔ ma tol nɛi chɔmaa Kilisiɔŋaa pɔyaŋnda kɔɔli, a tamasi ndaa. Nduyɛ ma kɛsi wali dimiaa yooŋgu kɛndɔɔ nyɛ tase peŋ o yoomu ndaa niŋ. Wana o wana nɔ mbo kɛsiŋ o kɔl maa mi yufuaa diɔmnda nyuna a kɔlkaluaa le ma ke nda chuɛima ndaŋ nyɛɛmbɔ. Piɛile ndale hɔlaa vesɛileŋ le loonuŋ naa maa wana o wana lo o laalaŋndo choo, o tonyaa niŋ, ɔɔ mbo lo lahɔl le naa le. Wana o wana cho isisi wana kialaa ŋyama cho sakpo wo lachi, o Chɛhowa yulu iso wo. Ŋ nɔ miŋ wa a bɛɛndiaŋ. Nduyɛ o cho hunɔɔ suŋ suŋ!

15. Le yɛɛ nɔ kɛsiaa cho tosaŋ Kiliti tɛɛŋ nda laandɔ wo cho yɛ suɛi kɔlkɛndɛ bɛndu le Kilisiɔŋaa tonyaa kpou?

¹⁵ Kilisiɔŋnda kpou nɔla ma sɔla tɔnɔɔ o sɔɔŋ kulloŋ o tale Chiisoo hoo niŋ. O fulawɔ o koŋ kɔɔli, nɛɛ cho yɛ o niŋ kɔl a paale nɔ kɛsiaa leleŋ te? Kilisiɔŋaa pɔyaŋnda cho wa o choo choo niŋ. Te chɔu Amakɛdɔŋndo hiou pɛ fokpi, a cho simnɔŋ laanɔɔ Kiliti. (Chɔɔmɔŋndo 19:7-9) Wana o wana cho o lɛŋndeŋ choo cho tɔnɔɔ sɔla o nɔ kɛsiaa koŋ o choo choo niŋ. Naa kpou nɔɔ hoo cho naa ke tiindaŋ masale kpeekpei leŋ. Ŋ nɔ tiindaŋ le waa lɛŋ naŋ, ɔɔ le kɔlaŋ o choo choo niŋ, maa ŋ kɛsiŋ kɔllo le pɛɛkoo nyɛ sɔvɛ cho o tale chuaa laanduaa yufuaa tɔ wa niŋndo. Ŋ hiounuŋ lachi a kɔlta naalaŋ bɛɛndiaa, miŋ sim o kala yi, nduyɛ miŋ lo lahɔl le halikpeŋ miŋ tuei yeela chila kɛndɛla Chɛhowa kɛsul naalaŋ!