A Cho pa Silalaŋ Ndaŋ Tolɔɔ Kɔɔli?

1. Yɛɛ Chiisu cho yɛ suŋ suŋ hunɔɔ tosa?

Ŋ CHO o teleŋ siŋgaŋnda bɛŋndaŋ la cho yɔŋnɔŋ tau wo niŋ. O bendu lɛ tiŋ te mi Chiisu huŋ kɔɔsa a wana o wana. Mi Chiisu chɔm naa nyɛ cho wa yɔŋnɔŋndo o chieeŋndo choo wo tuupa mbo huŋ kɔɔsa a waŋnda. Mbo chɔm buɛiyaa nduaa tamaseliiyo a hunɔɔ ndɔɔ okɔɔ, vɛlɛ a teleŋ mɛɛlula chieeŋndo hoo la fuuluu niŋndo. (Maa. 24:3) Huuloŋ muŋ cho ŋ poonyiaa o Maatiu bolle 24 a 25 niŋ, vɛlɛ a o Maki bolle 13 a Luku bolle 21 niŋ.

2. Yɛɛ naŋ cho yɛ yaasiaa o buŋgɛi hei niŋ, nduyɛ le yɛɛ hei cho yɛ naa mala?

² Mi Chiisu suaa a talelaŋ layaa okɔɔ, la mala naa miŋ wa a bɛɛndiaŋnda. Laŋ la cho ni, taloo a saa a chuiŋnda, waŋ laanduaa yufuaa nɔ taasioo a a nɔ taasi le wa, vɛlɛ a tale o dimi a talɛŋndoŋ okɔɔ wo. Talelaŋ ndaŋ, o kɛ kɛ cho naa mala miŋ bii bila mɛɛ kaa waŋndo piiliaŋ niŋ mɛɛ nda cho ndu kɔɔsa yɛ. Te ŋ wa pɛ laŋ yaasiaa, kindiŋ ma saaluŋ nyɛ ŋ pɛɛku o tale kɛ kɛ niŋndo, vɛlɛ a mɛɛ ŋ duau ndu o wali niŋ yɛ. Tale tase naŋ cho yaasiaa wo cho tale saa a chuiŋnda ni.

SAA A CHUIŊNDA

3. Teleŋ kuɛɛ Chiisu cho yɛ waŋnda kɔɔsa?

³ O tale Chiisu soo a saa a chuiŋnda okɔɔ wo niŋ, mbo tɛɛsiaa a mɛɛ o kɔɔsa niŋ wanaa sɔla fondaa le yooŋgu kɛndɔɔ chɛlɔɔ, nduyɛ ma toolu Kilisiɔŋaa pɔyaŋnda wa yɛ. (Maa. 25:​31-46) A teleŋ “nyɛpalaa bɛndoo,” o cho sina ni te saa ɔɔ chuiŋnda waŋnda haa cho ni tuupa mi Amakɛdɔŋ fuuluu. (Maa. 24:21) Mɛɛ wana mandaa lasaa piɔu nuaa saa a chuiŋnda tɛɛŋ yɛ, lende koni Chiisu cho wanaa toolu Kilisiɔŋaa pɔyaŋnda wa piɔu a wanaa kɛɛ le nda tooloo wa tɛɛŋ ni.

4. A mɛɛ Aisaya 11:​3, 4 dimi yɛ, le yɛɛ naŋ nɔ yɛ tiindaŋndo maa Chiisu cho hunɔɔ waŋnda kɔɔsa o nɛi sakpoo choo? (Tofa vɛlɛ o kɔɔ.)

⁴ Huuloŋ Baabuiyo chɔm ma Chɛhowa yulu Chiisu iso le waŋnda kɔɔsaa. Nduyɛ o cho nda kɔɔsa o nɛi sakpoo choo. (Nuawɔ Aisaya 11:​3, 4.) O cho sɔɔŋ nda tosa woŋ mɛɛndiaŋ, kaala ndalaŋ, mɛɛ nda suaa yɛ vɛlɛ a mɛɛ nda bii pɔmbuaa nduaa sɔla pɔyaa wa yɛ. (Maa. 12:​36, 37; 25:40) Chiisu cho sina wanaa toolu Kilisiɔŋaa pɔyaŋnda wa, nduyɛ a wali nda wa tosaa wo.a Nɛiyo opilɛ o wanaa cho maa ŋsaa wa toolu pɔmbuaa Chiisuaa wo cho nda malaa o wali dimiaa yooŋgu kɛndɔɔ niŋ ni. Chiisu cho dimi a wanaa toolu wallo hoo wa okɔɔ maa wanaa sakpuaa nda cho ni, nduyɛ ma wa o chieeŋndo choo lefafɛɛŋ. (Maa. 25:46; Sɔɔŋ. 7:​16, 17) Nuawɔ se fanda kɛndɛ le wanaa cho lo o laalaŋ ndaa choo wa! Nduyɛ, te waŋnda haa hiou pɛ lachi a loo o laalaŋ ndaa choo a teleŋ nyɛpalaa bɛndoo ɔɔ te o chuu pɛ, diola ndalaŋ la cho wa o yau yoomoo niŋ.—Sɔɔŋ. 20:15.

5. Yɛɛ naŋ pɛɛku yɛ o tale cho a saa vɛlɛ a chuiŋnda okɔɔ wo niŋ, nduyɛ le nɛɛ yaa kpeekpei o cho yɛ?

⁵ Chɔm maa o nɔ laalaŋndo nduyɛ a lo lechoo wo. A wanaa nɔ tiindaŋndo le loo o lɛŋndeŋ choo wa okɔɔ kpeekpei Chiisu dimi taloo a saa vɛlɛ a chuiŋnda okɔɔ ni. A chɔm ko laalaŋ ndaa sanaa a pɔmbuaa Chiisuaa tooloo o wali dimiaa yooŋgu kɛndɔɔ niŋ te, kɛ ma chɔm vɛlɛ lo lechoo wo a mɛɛ nda tol nɛila chɔmaala buɛi cho sakpo, nduyɛ mbo wa buɛi taasi wo laŋ kɔɔli yɛ, o Chiisu hɛli wo. (Maa. 24:45) Kɛ, wanaa cho kɔlaŋ o choo choo niŋnda bɛɛ nɔ ma dɔu silaa cho o taloo hoo niŋndo o wali niŋ. Le yɛɛ? Kanifuule mi Chiisu tofa kaala ndalaŋ, sɔɔŋ nda tosa woŋ vɛlɛ a mɛɛ nda suaa yɛ. Nda bɛɛ nɔ ma lo o laalaŋ ndaa choo. Nduyɛ pɛŋ, mi Chiisu suaa a talela tiɔɔŋnda cheleŋ okɔɔ, la nɔ silala Kilisiɔŋaa pɔyaŋnda nɔ ma kɛsi kɔllo choo laŋ. Ŋ saaluŋ vɛlɛ talelaŋ ndaŋ o Maatiu bolle 25 niŋ. Ŋ yaasiaŋndɔ niko tale chuaa laanduaa yufuaa nɔ taasioo a a nɔ taasi le wa.

CHUAA LAANDUAA YUFUAA NƆ TAASIOO WA A A NƆ TAASI LE WA

6. Vɛɛ chuaa laanduaa yufuaa ŋuɛɛnuaa chɔm yɛ maa ndaa nɔ taasioo? (Maatiu 25:​6-10)

⁶ O tale cho a chuaa laanduaa yufuaa okɔɔ wo niŋ, mi Chiisu suaa a chuaa laanduaa yufuaa tɔ wa kuɛ le wana wa lanɔɔ chuaa wo demullo. (Maa. 25:​1-4) Nda kpou ndaa nɔ yeemɛi le kɔlaŋ latulu a wana cho lanɔɔ chuaa wo le nyɛdiaa nɔ kɛsiaa dioo. Mi Chiisu dimi maa a ŋuɛɛnu ndaa nɔ taasioo, nduyɛ a ŋuɛɛnuaa piliaa ndaa nɔ taasi le. Chuaa laanduaa yufuaa ndaa nɔ taasioo wa wa a bɛɛndiaŋ, nduyɛ a wa lahɔl. A wa a bɛɛndiaŋ le wana wa lanɔɔ chuaa wo chumndo, o yɔŋ bɛɛ mi ndoo hiŋ a nyumndaŋ. Nduyɛ ma huŋ a chuɛima wana wou o lambuilaŋ niŋndaŋ le nda nyɛ teŋgaa kioo o nyumndaŋ niŋ. Ma huŋ vɛlɛ pɛŋ a chuɛima cheleŋ te ndoo yɔŋ pɛ mi wana wa lanɔɔ chuaa wo ndoo yala hunɔɔ le. Lelaŋ, a wa a bɛɛndiaŋ le mi lambuila ndalaŋ la hiou lachi a sandei. (Nuawɔ Maatiu 25:​6-10.) Mɛɛ wana wa lanɔɔ chuaa wo hiŋ, mi chuaa laanduaa yufuaa nɔ taasioo wa kua a ndu latulu le nyɛdiaa nɔ kɛsiaa dioo. O nɛi pilɛ koŋ choo, Kilisiɔŋaa pɔyaŋnda nɔ ma wa a bɛɛndiaŋ le loo lahɔl, nduyɛ ma lo o laalaŋ ndaa choo haaa mi Chiisu huŋ fanda nda o Masale ndɔleŋ niŋ choo choo.b (Sɔɔŋ. 7:​1-3) Kɛ yɛɛ yɔŋnuŋ yɛ chuaa laanduaa yufuaa ŋuɛɛnu nɔ taasi le wa?

7. Yɛɛ yɔŋnuŋ yɛ chuaa laanduaa yufuaa nɔ taasi le wa, nduyɛ le yɛɛ?

⁷ Mi che bɛɛ chuaa laanduaa yufuaa taasiaa wa a bɛɛndiaŋ, kɛ chuaa laanduaa yufuaa ŋuɛɛnuaa nɔ taasi le wa ve a bɛɛndiaŋ te mɛɛ wana wa lanɔɔ chuaa wo hiŋ. Lambuila ndalaŋ la wa niŋ nyumndo, nduyɛ ndaa nɔ vɛlɛ chuɛima cheleŋ o ba le wouwo o lambuila ndalaŋ niŋ te. Mɛɛ nda sina maa wana cho lanɔɔ chuaa wo wa suŋ hunɔɔ, ma kɛɛsiaa le kɔlaŋ chuɛiyaŋ piondɔɔ. Le hei, a ve lɛ loŋ a teleŋ wana cho lanɔɔ chuaa wo hiŋndo le. A teleŋndo hoo, “mi yufuaa wa a bɛɛndiaŋ nda luɛi a ndu latulu le nyɛdiaa nɔ kɛsiaa, okoŋ ma kinda dioo.” (Maa. 25:10) Okoŋ kɔɔli, mɛɛ yufuaa nɔ taasi le wa hiŋ, ma yeema le luɛiyɔɔ. Kɛ, mi wana wa lanɔɔ chuaa wo dimul nda aa: “I sina nya le.” (Maa. 25:​11, 12) Chuaa laanduaa yufuaa nɔ taasi le wa ve a bɛɛndiaŋ le wana wa lanɔɔ chuaa wo chumndo haaa a teleŋ ndoo nɔ le hunɔɔ wo le. Yɛɛ Kilisiɔŋaa pɔyaŋnda pɛɛku yɛ o hei niŋ?

8-9. Yɛɛ Kilisiɔŋaa pɔyaŋnda pɛɛku yɛ o tale cho a chuaa laanduaa yufuaa okɔɔ wo niŋ? (Tofa vɛlɛ fotueiyo.)

⁸ Chɔm maa a cho o bɛɛndiaŋ nduyɛ ma wa lahɔl. O cho dimi le Chiisu wa maa Kilisiɔŋaa pɔyaŋnda cho wa kundalaŋ la tiɔɔŋ te. Koŋ cho ni, kundaa opilɛ wa wa o bɛɛndiaŋ haaa mi mɛɛlula chieeŋndo hoo la fuuluu, nduyɛ opilɔɔ cho wa o bɛɛndiaŋ te le. Kɛ, tɛɛsiaa o wa nyɛ wa Kilisiɔŋaa pɔyaŋnda yɔŋnɔŋndo ni te ndaa ve a bɛɛndiaŋ le loo o laalaŋ ndaa choo haaa o mɛɛlulaŋ te. Te hei ndii yɔŋnuŋ pɛ, mɛɛ a ve fanda ndaa sɔla le. (Chɔŋ 14:​3, 4) Hei cho bɔɔ suɛi sɔvɛ. O yɔŋ bɛɛ aa, miŋ nɔ tiindaŋndo le kɔlaŋ o choo choo niŋ ɔɔ le loo o lɛŋndeŋ choo, naa kpou nɔ miŋ dɔu nyɛ naŋ pɛɛku o tale cho a chuaa laanduaa yufuaa okɔɔ wo o wali niŋ. Ŋ nɔ miŋ wa lahɔl, nduyɛ miŋ wa a bɛɛndiaŋ le biuwɔŋndo haaa o mɛɛlulaŋ.—Maa. 24:13.

⁹ Mɛɛ Chiisu dimi tale cho a chuaa laanduaa yufuaa okɔɔ, le naa malaa miŋ che sabu i cho suɛi sɔvɛ le miŋ wa a bɛɛndiaŋ, nduyɛ miŋ wa lahɔllo, mbo dimi vɛlɛ tale cho a talɛŋndoŋ okɔɔ wo. Taloo hoo chɔm le sabu naŋ nɔ miŋ wa wanaa tosa wallo kalaŋ nda.

TALƐŊNDOŊ

10. Vɛɛ buɛiyaa ŋiɔɔŋnda chɔm yɛ maa a cho sakpo? (Maatiu 25:​19-23)

¹⁰ O tale cho a talɛŋndoŋ okɔɔ wo niŋ, mi Chiisu suaa a buɛiya a ŋiɔɔŋ okɔɔ, a chɔm maa a cho sakpo o wana nda banaa lo, vɛlɛ a o kɛɛ sakpoyɛi chɔmndo wo. (Maa. 25:​14-18) Mi buɛiyaa ŋiɔɔŋnda chɔm maa a cho sakpo mɛɛ nda tosa wallo kalaŋ le tɔnɔɔ handɔɔ o kaniŋ masanɔ ndaa ke nda woŋ choo. Tuupa mbo kua kelaa mbo ke nda talɛŋndoŋ, nduyɛ nyɛsɔlaa pila wa hoo ni. Mi buɛiya a ŋiɔɔŋ chɔm maa a cho wanaa isiɛlɛi le, sanaa a kanii masanɔ ndaa ke nda ve soliŋndo kpeku nyɛkɛndɛi. Yɛɛ wa yɛ fulamakɔɔlioo? Mɛɛ masanɔ ndaa hiŋ ma handu kanii o ke nda ve bɛmbɔɔ lediiŋ lechoo. Mi masanɔ ndaa chandu nda tau. Mbo dimul nda aa, “[La] sɔɔŋguu niko miŋ dɔunuŋ nyaale latulu.” (Nuawɔ Maatiu 25:​19-23.) Kɛ ɔɔ niŋ buɛi yaa ndɔɔ? Yɛɛ o tosa yɛ a kanii masanɔ ndɔɔ ke ndu ve?

11. Yɛɛ yɔŋnuŋ yɛ a buɛi isiɛlɛi yo, nduyɛ le yɛɛ?

¹¹ Mi buɛi yaa ndɔɔ sɔla talɛŋnde ipilɛ, kɛ wana isiɛlɛi yo o wa ni. Wana ndɔ banaa ndoo yeema ndu mi ndoo soliŋ talɛŋnde hei kpeku nyɛkɛndɛi, kɛ mbo kɔ vioŋ ndi o puuloo bɛŋgu. Mɛɛ wana ndɔ banaa hiŋ, buɛiyo hoo ndoo nɔ nyɛ o nyɛ le handɔɔ lechoo le. Buɛiyo hoo ndoo chɔm kaa kɛndɛ kposoŋ te. Yɔŋii ndoo nyɔɔlu le mɛɛ o kɛɛ nyɛsɔlaa handɔɔ o kanii masanɔ ndɔɔ ke ndu ve choo yɛ, mbo nyiinduu masanɔ ndɔɔ choolaŋ choo maa suɛi nduɛi “kendu bɔɔ.” Le hei, buɛiyo hoo sɔla chandɔɔ masanɔ ndɔɔ o ba le. Nduyɛ pɛŋ, ma puu talɛŋ ipilɛ wa ndu o ba ve, okoŋ ma soli ndu o chiɛi masanɔ ndɔɔ niŋ po.—Maa. 25:​24, 26-30.

12. Le nɛɛ yaa buɛiyaa laalaŋaa ŋiɔɔŋaa chɔm lo lechoo wa sim yɛ?

¹² Buɛiyaa ŋiɔɔŋaa chɔm haa lo lechoo wo wa, sim le Kilisiɔŋaa pɔyaŋnda. Mi Masanɔ ndaa Chiisu dimul nda le ma ‘sɔɔŋguu niko ma dɔunuŋ nyaale nda ndaa latulu.’ A cho fandaa sɔla o choo choo niŋ maa wanaa tasiaa miiŋgu yoomu wa. (Maa. 25:​21, 23; Sɔɔŋ. 20:5b) O baa pilɔɔ choo, tamasi wɔɔŋ buɛi isiɛlɛi yo hoo sim maa sila le Kilisiɔŋaa pɔyaŋnda. O nɛi kuɛɛ choo?

13-14. Yɛɛ Kilisiɔŋaa pɔyaŋnda pɛɛku yɛ o tale dimiŋ a talɛŋndoŋ okɔɔ wo niŋ? (Tofa vɛlɛ fotueiyo.)

¹³ Chɔm maa a cho wana tosa wallo kalaŋndo. O talela soo a talɛŋndoŋ, vɛlɛ a chuaa laanduaa yufuaa okɔɔ wo niŋ, o cho dimi le Chiisu wa maa Kilisiɔŋaa pɔyaŋnda apum wa niŋ wanaa isiɛlɛi le. Kɛ, tɛɛsiaa o wa nyɛ yɔŋnuŋ niŋndo ni te sɛmbɛ ndaa ndoo tol pɛ toolo. A wa laalaŋ ndaa malɔɔ, nduyɛ mi dikeŋnaŋndo ndoo hɛluŋ nda le luɛiyɔɔ o Masale Mɛlɛkaleŋ niŋ o choo choo niŋ.—2 Pitɛ 1:10.

¹⁴ Mi talela Chiisu dimi a chuaa laanduaa yufuaa, vɛlɛ a talɛŋndoŋ okɔɔ laŋ, la chɔm kpendekele maa Kilisiɔŋaa pɔyaŋnda nɔ ma wa a bɛɛndiaŋ, ma wa lahɔl, nduyɛ ma tosa wallo kalaŋ. Baa mi Chiisu ndoo dimi pa nyɛ cheleŋ le nda silaa? Ei, mbo dimi. Ŋ saaluŋ silaa hoo o nyɛ o dimi o Maatiu 24:​40, 41 niŋndo.

NƐƐ YAA NDA CHO YƐ “CHUA”?

15-16. Vɛɛ Maatiu 24:​40, 41 chɔm yɛ maa Kilisiɔŋaa pɔyaŋnda nɔ ma wa lahɔl?

¹⁵ Tuupa mi Chiisu suaa a talela yaa laŋ ndaŋ okɔɔ, mbo suaa a kɔɔsa mɛɛlaa Kilisiɔŋaa pɔyaŋnda sɔla hɛlioo wa. Mbo suaa a puaa ŋiɔɔŋaa wa wallo o chiɛi niŋnda, vɛlɛ a waŋ laanduaa ŋiɔɔŋaa wa chuoo o chiei niŋnda. Wana che pɛ maa, puaa haa wali pilɔɔ nda wa tosaa ni, nduyɛ waŋ laanduaa bɛɛ. Mi Chiisu dimi maa a cho ‘opilɛ chua, kɛ ma mɛi opilɔɔ.’ (Nuawɔ Maatiu 24:​40, 41.) Lelaŋ, mbo dɛɛniaa buɛiyaa nduaa aa: “La wa lahɔl, kanifuule la sina paale Masanɔ nyaa cho hunɔɔ leŋ te.” (Maa. 24:42) Mi Chiisu dimi vɛlɛ nyɛ waa lende mɛɛ o dimi tale cho a chuaa laanduaa yufuaa okɔɔ wo. (Maa. 25:13) Baa diomnda o dimi laŋ ndaŋ a nyɛ pilɔɔ okɔɔ kpe la cho suɛi ni? Wana che maa lende i cho ni. Wanaa sɔla pɔyaŋndo wa, nduyɛ ma lo o laalaŋ ndaa choo wa kinɛi Chiisu cho chua ni, le ma wa a ndu latulu o Masaleŋ choo o choo choo niŋ.—Chɔŋ 14:3.

¹⁶ Chɔm maa a cho lahɔl. Kilisiɔŋnɔ pɔyaŋ kɛ kɛ kɛɛ pɛ le loo lahɔl, o ve niŋ wanaa sɔla hɛlioo wa tɛɛŋ te. (Maa. 24:31) Nduyɛ wanaa nɔ tiindaŋndo le waa yoomu o lɛŋndeŋ choo wa kpou nɔ ma che diomnda Chiisu laŋ maa silaa la cho le nda ni, le ma wa lahɔl, nduyɛ ma lo o laalaŋ ndaa choo.

17. Te Chɛhowa pɔya pɛ waŋnda o teleŋ naa hoo niŋ, le yɛɛ naŋ nɔ yɛ miŋ buulaŋ a ndi okɔɔ le?

¹⁷ Ŋ sina Chɛhowa nyɛkɛndɛi, lelaŋ ŋ laalaŋ maa o sakpoyɛi choo o tosa nyɛ o nyɛ ni. Te Chɛhowa pɔya pɛ wanaa laalaŋnda o teleŋ naa hoo niŋ pɛ, o cho nyɛ naŋ nɔ miŋ buulaŋ a ndi okɔɔ le.c Yiyaŋndɔ a nyɛ Chiisu dimi o tale ndɔɔ niŋndo, a waŋ walla hiŋ a lɔɔ 5 le wallo o kpeloo niŋnda. (Maa. 20:​1-16) Wanaa o mɛɛlu veelu le wallo o kpeloo niŋ a paale yɔŋgaŋndeŋ nda, paawa pilɔɔ kpe nda sɔla ni a wanaa pena hunɔɔ wa. O nɛi pilɛ koŋ choo, teleŋ o teleŋ Chɛhowa hɛli pɛ wanaa pɔyaŋnda, fanda pilɔɔ kpe nda cho sɔla ni le helɔɔ choo choo te a lo pɛ o laalaŋ ndaa choo.

YAŊ NILAŊ O SILAA

18-19. Yɛɛ naŋ pɛɛku yɛ o talelaŋ ndaŋ niŋ?

¹⁸ Yɛɛ naŋ pɛɛku yɛ? Le wanaa nɔ tiindaŋndo le waa yoomu lefafɛɛŋ o lɛŋndeŋ choo wa, tale Chiisu dimi a saa vɛlɛ a chuiŋnda okɔɔ wo, chɔm le sabu i cho suɛi sɔvɛ le ma lo o laalaŋ ndaa choo, nduyɛ ma chɔm lo lechoo wo o Chɛhowa lo wo. A nɔ ma tosa hei suŋ suŋ, vɛlɛ a teleŋ nyɛpalaa bɛndoo huŋ niŋndo. O chilaŋ niŋ, Chiisu cho yamɛi kiolɔɔ maa wanaa sakpuaa cho “yoomu fafɛɛŋndo sɔla” ni.—Maa. 25:46.

¹⁹ Miŋ yaasiaa vɛlɛ talelaŋ latiɔɔŋ, la cho ma sila le Kilisiɔŋaa pɔyaŋnda wo. O tale Chiisu dimi a chuaa laanduaa yufuaa nɔ taasioo a a nɔ taasi le wa okɔɔ wo, a ŋuɛɛnu nda tɛɛŋ nda nɔ taasioo ni. A wa a bɛɛndiaŋ, nduyɛ a wa lahɔl le chumndo wana cho lanɔɔ chuaa wo mɛɛ mɛɛ ndoo viou. Kɛ, a ndaa nɔ taasi le wa ve a bɛɛndiaŋ te. Lelaŋ, wana cho lanɔɔ chuaa wo chɛl nda le ma luɛi naa nda wa nɔ kɛsiaa tosaa wa le. Naa bɛɛ nɔ miŋ wa a bɛɛndiaŋ le chumndo mɛɛ mɛɛ teleŋndo viou tuupa mi Chiisu huŋ tɛɛmbuu chieeŋndo hoo. Okoŋ kɔɔli, a tale Chiisu dimi a talɛŋndoŋ okɔɔ wo niŋ, miŋ pɛɛku vɛlɛ a buɛiyaa laalaŋaa ŋiɔɔŋaa tosa wallo wa okɔɔ. Ma tosa wallo kalaŋ le masanɔ ndaa, nduyɛ mbo naŋ kɔl a nda. Kɛ mbo tuau buɛi ndoo nɔ siɛlɛiye wo. Yɛɛ hei pɛɛku yɛ naa? Ŋ nɔ miŋ wa a tuandaŋ o wali Chɛhowaa niŋ haaa o mɛɛlulaŋ. O mɛɛlulaŋ kpɔŋ, miŋ yaasiaa mɛɛ Kilisiɔŋaa pɔyaŋnda nɔ ma lo lahɔl haaa mi Chiisu chua nda le kɔlaŋ paawa ndaa sɔlaa o choo choo niŋ yɛ. Nduyɛ a cho a yeemɛi tau le teleŋ Chiisu chuuŋgiaa niŋ nda ndu ikɛi o choo choo niŋndo. Te chɔu Amakɛdɔŋndo chuu pɛ, a cho wa lanɔɔ Chiisu o nɔ kɛsiaa Saa Fɔŋndɔɔ niŋ.—2 Tɛsa. 2:1; Sɔɔŋ. 19:9.

20. Yɛɛ Chɛhowa cho yɛ tosa le wanaa bii silala ndɔlaŋ nda?

²⁰ Teleŋ Chiisu cho yamɛi kiolɔɔ wo cho niŋ kpɛɛluŋ, kɛ ŋ nɔ miŋ wa a isiooŋ te. Mi che bɛɛ “kpaaya naŋ nɔ wo cho kpaaya naa le,” kɛ te ŋ lo pɛ o laalaŋndo choo Finya naa o choo choo niŋ cho naa ndu ke le halikpeŋ miŋ sɔla kpaayaa miŋ “huŋ sim Po wana pɔnɔɔ o hɔl.” (2 Kɔliŋ. 4:7; Luku 21:36) O yɔŋ bɛɛ mi tiindaŋ naa wa le kɔlaŋ o choo choo niŋ, ɔɔ le waa o lɛŋndeŋ choo, ŋ cho Finya naa kɔllo nɛŋi te ŋ tol pɛ silala cho o talela Chiisu laŋ niŋndaŋ kɔɔli. Sanaa a kɛndɛi bɛnduii Chɛhowa ve, diola naalaŋ la cho wa “la poonyiaa o yau diola wanaa Mɛlɛkaa la cho la poonyiaa leniŋ ndaŋ.”—Daan. 12:1; Sɔɔŋ. 3:5.