Le Yɛɛ Ŋ Nɔ yɛ Ma Pɛɛku Baabuiyo?

A nyunaŋ niŋ pa nyunala waa naa? Te o wa lende pɛ, o cho ko numpilɛ le. Waŋnda chieeŋndo balɔɔ silɔ cho yiyaŋndo a nyunala bɛndaŋ o yoomoo niŋ. A nɔla pa ma saaluŋ mulilaŋ?

Mi waŋnda o miiliɔŋndaŋ niŋ muli aa, “Ei!” Le yɛɛ? Kanifuule, a saaluŋ mulila kɔl hiniaalaŋ o Baabuiyo niŋ le nyunala ndalaŋ. A yeema pa ma sina nyɛ Baabuiyo dimi wo? Mɛɛ a yeema ma sɔla tɔnɔɔ o pɛɛku ŋ yɔŋgu nyɛ le wo niŋ, o Seiyaa Chɛhowaa tosa a waŋnda wo.a

A tonya, te o hiŋ pɛ a tofaa o Baabuiyo niŋ, mi waŋnda apum dimi aa, “I nɔ ba le.” “O kendu bɔɔ.” “I tiuba le pɛɛkoo lɔɔlɔɔ le.” Kɛ mi apum nɔ yiyaŋ cheleŋ. Ma chɛl le pɛɛkoo nyɛ Baabuiyo pɛɛku wo. Ŋ yaasiaŋndɔ tamaseliilaŋ lapum.

• “I wa kɔlaŋ o kaŋnde Katolikiiya a Polotɛstaŋnda, toŋgo lepiɛi Sikiaa, a o Budisiiya. Nduyɛ mi pɛɛku o sukuu bɛndoo niŋ a piɛiye okɔɔ. Kɛ a koŋ kpou, I sɔla muli le nyunala nilaŋ a Mɛlɛka okɔɔ le. Mi Chɛhowɛinɔɔ huŋ paale pilɛ o ya lo bɛɛ. Mi nyɔɔ hɛnaŋ ya tau a mɛɛ o soliŋ Baabuiyo kpeku le nyunalaŋ mulioo yɛ. Okoŋ, mi chɛl le Baabuiyo pɛɛkoo.”—Kil, Iŋgilaŋ.

• “Yaa nɔ nyunalaŋ tau a yoomoo okɔɔ. Kɛ o kaŋnde nileŋ, I hini kɔl a mulila sim lachinɔ nuu ke ya laŋ te. Kɛ Baabuiyo kinɛi Chɛhowɛinɔ pilɛ soliŋ kpeku ni le nyunala nilaŋ mulioo. Mɛɛ o nyuna ya te I yeema pɛ mi chɔɔlu pɛɛku, mi chɛl a kɔlkɛndɛ.”—Kofi, Bɛniŋ.

• “Yaa yeema bɔɔ le sinaa nyɛ yɔŋnuŋ a waŋvilɛiya wo. Mi laalaŋ maa mi wanaa vi wa yɔŋul a cho yoomu wa. Kɛ yaa yeema le sinaa nyɛ Baabuiyo dimi wo. Okoŋ, mi kandu Baabuiyo pɛɛkoo naa chaaŋ ni Chɛhowɛinɔɔ.”—Choose, Bilasil.

• “Mi kindiŋ le diomndaŋ veeloo o Baabuiyo niŋ, kɛ I bii ndu bila le. Okoŋ, mi Seiyaa Chɛhowaa huŋ o ya lo bɛɛ, nduyɛ ma tɛɛsiaa sɔɔŋ Baabuiyo dimi le yɔŋnɔŋndo woŋ puɛɛ. Nduyɛ yaa yeema le pɛɛkoo sɔɔŋ cheleŋ.”—Dɛnisi, Mɛsiko.

• “Mi kɔndɔfillo bii ya te Mɛlɛka buulaŋ pɛ kpeekpei a ya. Okoŋ, mi kɛɛsiaa le mi piɛi o Mɛlɛka nɔ Baabuiyo wo lo. Diimandɔɔ, mi Chɛhowɛiya kundu dio nuu, nduyɛ mi chɛl le Baabuiyo pɛɛkoo.”—Aŋchu, Nɛpal.

Konalaŋ ndaŋ la loonuŋ naa a diomnda Chiisulaŋ ndaŋ, “Kɔlkɛndɔɔ cho le wanaa landuŋ kɔl le suɛi Mɛlɛkɛi ya.” (Maatiu 5:3, NW) Tonya, waŋchieeya toosiaŋ a yeemɛi le Mɛlɛka sinaa. Mɛlɛka koni peelu yeemɛi keŋ ni. Nduyɛ o cho Diom ndɔɔ, Baabuiyo soliŋndo kpeku le hei tosaa.

Kɛ yɛɛ yeemaŋ yɛ o pɛɛku Baabuiyo niŋ? Vɛɛ o ke yɛ num tɔnɔɔ? Buŋgɛi cho lachi ve cho nyunalaŋ ndaŋ muli.