SUƐI LEBOLLE O KƆƆ | A YEEMA PA MA PƐƐKU BAABUIYO?

Kɛɛsiaa Le Pɛɛku Baabuiyo Le Wana O Wana

Waŋnda sina bɔɔ Seiyaa Chɛhowaa le yooŋgu kɛndɛ nda dimi wo. Kɛ a sina pa maa ŋ nɔ vɛlɛ kɛɛsiaa le Baabuiyo pɛɛkoo a waŋnda chieeŋndo balɔɔ silɔ?

O wɔsi 2014 niŋ, Seiyaa Chɛhowaa le 8,000,000 o lɛŋnde 240 niŋ, ma tosa pɛɛkula Baabuilaŋ hiouwɔɔ 9,500,000 ipaŋgu o paŋgu.a Wanaa cho Baabuiyo pɛɛkoo a naa wa hiou waŋnda o lɛŋnde 140 niŋ!

Le wali pɛɛkaa hoo tosaa, iwɔsi o wɔsi, Seiyaa Chɛhowaa cho Baabuilaŋ toosiaa, yaulaŋ, a nyɛm cheleŋ cho a Baabuiyo okɔɔ woŋ le biiliɔŋndo a tɛndaa tɛɛŋ o sɔɔŋ maŋgalaŋ 700 niŋ. Hoo cho tosaa mi waŋnda wa Baabuiyo pɛɛkoo o suɛi maŋgalɛi nda yeema ve niŋ.

“Kani bɛɛ yaa hɛnaŋ a pɛɛkoo o sukuu le, kɛ pɛɛkoo hoo ndu ndoo nɔ sɔɔŋ mamaŋ. Nduyɛ sɔɔŋ ya pɛɛku woŋ nɛŋi ya kɔllo!”—Katiliko, Afilika Batouwo.

“Mi pɛɛkoo hoo muli nyunala nilaŋ kpou a la cheleŋndaŋ.”—Bata, Mɛsiko.

“Pɛɛku Baabuiyo wa tosaŋndo o yalo bɛɛ a teleŋ bɛnda le ya wo. I yeema lɛ nyɛ cheleŋ o hoo kɔɔli le!”—Ɛsikiɛɛ, Bilasil.

“Lepum, mi naŋ tosa pɛɛkoo hoo le chemchemndaŋ 15 haaa 30. Teleŋndaŋ lapum mi ndoo hiou lende. Mɛɛ yaa nɔ teleŋndo yɛ koni.”—Viniaana, Ɔsiteeliaa.

“I ve nyɛ yɔŋgu le pɛɛkoo hoo le. O wa bɔɔ nyɛ kɛndɛ bɛndu!”—Emi, Bɛniŋ.

“Wana pɛɛku ya Baabuiyo wo ndoo biunuŋ bɔɔ, nduyɛ ndoo nɔ kɛndɛi. Miŋ tosa chayɛi kpɛɛluŋnde.”—Kɛliŋ, Aililaŋ Baluaŋndo.

Mi wanaa bɔɔbɔɔ pɛɛku Baabuiyo kɛ a simnuŋ ŋChɛhowɛi lelaŋ te.”—Dɛntiŋ, Iŋgilaŋ.

MULILAŊ LE NYUNALA WAŊNDA NYUNA LƆƆLƆƆ A PƐƐKU NAA BAABUIYO OKƆƆ LAŊ

Vɛɛ pɛɛkoo hoo tosaŋ yɛ?

Ŋ hɛli sɔɔŋ yɛ yɛ o Baabuiyo niŋ. Okoŋ, miŋ yaasiaa bolii Baabui soo a suɛi keŋ okɔɔ ve. Le tamaseliiyo, ŋ chua wɔ suɛi lebolle hei a Mɛlɛka okɔɔ. Baabuiyo muli nyunalaŋ mɛɛ laŋ la cho naa yɛ, ‘Nɛɛ cho yɛ Mɛlɛka? Vɛɛ o cho yɛ? O nɔ pa diolaŋ? Kuɛɛnɛ o cho yɛ? Ŋ nɔla pa miŋ sɔɔŋguu ndu ikɛi?’ I kendu ve cho ni, le sinaa naa ŋ saaluŋ mulioo o Baabuiyo niŋnda.

Le waŋnda malaa ma saaluŋ mulilaŋ, nyɛ naŋ soliŋ lɔɔlɔɔ kpeku wo cho yau nɔ hoo pei 224 wo ni, Yɛɛ Kpeekpei Baabuiyo Pɛɛku Yɛ?b Yauwo hoo toosiaŋ kɛsɛ le waŋnda malaa ma bii sɔɔŋ kulloŋ o Baabuiyo niŋ bila. Muŋ cho ni, sɔɔŋ a Mɛlɛka okɔɔ, Chiisu Kiliti, nyɛpalaa cho wanachioo choo wo, fulasɛiniŋndo, piɛileŋ, a ŋ cheleŋndoŋ puɛɛ.

Teleŋ kuɛɛ nduyɛ kuɛɛnɛ pɛɛkoo hoo tosaŋ yɛ?

Pɛɛkoo hoo tosaŋ o fonda ŋ yeema wo, a teleŋ ŋ nɔ ba wo.

Pɛɛkoo hoo chua pa teleŋndo tau?

Mi wanaa bɔɔbɔɔ chua lɛɛlɔɔ opilɛ ɔɔ hiouwɔɔ o koŋ choo o lɔɔ o lɔɔ bɛŋgu le Baabuiyo pɛɛkoo. Kɛ teleŋndo hoo siŋgaŋ. Mɛɛ ŋ nɔ teleŋndo yɛ naŋ tosa ndu ni. Apum le chemchemndaŋ 10 ɔɔ 15 nda chua o lɔɔ bɛŋgu ni.

Yɛɛ wana yɔŋgu yɛ le pɛɛkoo hoo?

A cho nyɛ o nyɛ yɔŋgu le pɛɛkoo hoo le, kɛlɛŋgaa niŋ te, le nyɛm ŋ cho soliŋ kpeku woŋ. Hoo cho o chɛlaŋ a nyɛ Chiisu dimul buɛiyaa nduaa wo, “Fondo nya sɔla ni, lelaŋ la yɔŋgu fondo.”—Maatiu 10:8, NW.

Vɛɛ kpɛ pɛɛkoo hoo nɔ yɛ mbo viou?

A hiau lachi a pɛɛkoo hoo mɛɛ mɛɛ ŋ yeema. Yauwo hoo Yɛɛ Kpeekpei Baabuiyo Pɛɛku Yɛ? nɔ sɔɔŋ lebolloŋ 19. A hɛli i kɛ kɛ le pɛɛkoo, te koŋ te a pɛɛku kpede a mɛɛ ŋ tiu ba yɛ.

I nɔ pa mi simnuŋ Chɛhowɛinɔɔ?

Ɛ ɛ. Ŋ nɔ bɛɛleŋ le wana o wana maa o nɔ dioo le mbo hɛli nyɛ o yeema mbo laalaŋ ndo. Wanaa sɔla kɔl kaloo a sɔɔŋ kulloŋ okɔɔ o Baabuiyo niŋnda tosa chuaŋ chuaa a ba nda.

Kuɛɛ ya chɔɔlu yɛ sɔɔŋ saalɔŋ?

Tɛɛŋgei hei, jw.org nɔ yooŋgula tonya laŋ, laalaŋ ndaŋ, vɛlɛ a walta Seiyaa Chɛhowaa okɔɔ.

Vɛɛ ya nyuna yɛ le pɛɛku Baabuiyo?

Nua o tɛɛŋgii nɛi www.pr418.com ma yɔŋgu diola numndaŋ.
A nua o peele diiŋndɔ leŋ choo o yauwo hoo niŋ ma poonyiaa o fonda cho num ikɛiyo.
A nyuna Seiyaa Chɛhowaa cho num ikɛiya.

a Ŋ tosa pɛɛkula Baabuilaŋ a waŋnda a pilɛŋ pilɛŋ, ɔɔ kunda.

b Seiyaa Chɛhowaa soli ndu ni. Yauwo hoo toosiaŋ niŋ hiouwɔɔ miiliɔŋndaŋ 230 o sɔɔŋ maŋgalaŋ niŋ hiouwɔɔ 260.

MALAA LE YUŊGULAŊ

“Mɛɛ laanuu kandu Baabuiyo pɛɛkoo, mi cha siŋgaŋnda sɔvɛlaŋ tau ndu o ŋdial. Mi sɔɔŋ kandu bɛndaa o yuŋgu naa niŋ. Mɛɛ ya yeema le sinaa nyɛ o cho pɛɛkoo wo, mi ya bɛɛ kandu pɛɛkoo. Mi nyɛ ya pɛɛku wo siiŋguu ya wana sɔviɔɔ.” Pɛɛku Baabuiyo tosa mi yuŋgule naaleŋ le huŋ diompilɛ. Ndu sim ni maa pɛɛku Baabuiyo tosa mi yuŋgu naa wa diompilɛ.”—Isikiɛɛ.

“Mɛɛ ya kandu Baabuiyo pɛɛkoo, mi mal kooma ya ve o yapila niŋ te waŋ chuaa, muɛiyaŋ kolɔɔ bɛɛtambɛiyo, a kɔl ni tuuwo baa tiuwo. Chiɛi nuu cho o diandaa fo. I chandu bɔɔ yuŋgu nuu tau nduyɛ mi tosa sɔɔŋ nɛŋi yuŋgu nuu kɔl loŋ. I cho bɔɔ a kɔl kɛndɛ.”—Kɛliŋ.

“Mi waŋnda apum pɛɛsa ya mɛɛ ya wa Baabuiyo pɛɛkoo. Kɛ mi fal nuu hini kɔl a kɛɛsiaa nuu. Mbo dimi aa, ‘I buulaŋ a nyɛ waŋnda cho dimioo wo le. Siŋgaŋ sɔvɛ ya cho num chɔɔ o ŋdiallo kinɛi ya nɔ makoo ni. Hiou lachi a nyɛ ŋ cho tosaa wo.’ Sɔɔŋ muŋ bɛnda paandu naa o yuŋgu naa niŋ te.”—Viniaana.