Mal Haki Fasɛi

NYƐ BAABUIYO DIMI WO: “Te o wa pɛ mi chaaŋ num yɔŋ num isɔɔ, mɛɛ mal ndu le suɛi wɔɔŋ o tosal num keŋ nde. La nɔ mi la malnaŋ vellaa velle mɛɛ Masanɔɔ Mɛlɛka mal nya le yɔŋnda nyala wɔɔŋndaŋ yɛ.”—Kolosiaŋnda 3:​13.

Yɛɛ hei sim yɛ? Baabuiyo tuu hakioo a kuoo, nduyɛ malɔɔ hakioo a mɛɛ ŋ mal waŋndo le kuee o bii num o ba wo yɛ. (Luku 11:​4) Mi yau pɛɛkaa ŋsɔɔ pila dimi maa, o Baabuiyo niŋ, diom maKilikiiyo le “malɔɔ hakioo” sim ni, “malɔɔ kuee waŋndo bii num o ba wo, a nyuna lɛ ndu le kuee koŋ te.” Lelaŋ, te ŋ hɛli pɛ le wana benduŋ a naa wo malɔɔ haki, ŋ nɔ miŋ puɛɛnuŋ a suɛi o tosal naa ve. Yeemɛi nɛi le hakioo malɔɔ chɔm naa maa ŋ chɛl suɛi wɔɔŋ wana koŋ tosal naa ve, ɔɔ ŋ hɛnaŋ kɔl i tuulu naa wo le. Kɛ kɛɛsiaa ko naŋ tosa le ndi kiɔɔ biyɔɔ o kɔl ni, mi che bɛɛ naa ŋ nɔ saboo le ‘suɛi wɔɔŋ o tosal naa keŋ nde’ kɛsiŋndo o kɔl.

Hei bɛnda pa hau? Mi naa wanaa lahakiaa kpou tosa hakioo. (Luomaŋnda 3:​23) Le hei, ŋ nɔ miŋ mal acheleŋnda haki. Kanifuule, siɔdii ni ɔɔ diɛŋ ni, ŋ yeema mi acheleŋnda mal naa haki. Le handɔɔ lechoo, tɔnɔɔ i wa le naa ni te ŋ mal pɛ acheleŋnda haki. Vɛɛ keŋ wa yɛ?

Te ŋ mɛ pɛ kuu a kɔl tuuwo, nduyɛ miŋ bii suɛi waŋndo o kɔl miŋ mel ndu haki le, mɛɛ yɔŋulɔŋndo naŋ cho koŋ naapila ni. Mi hei kuuna naa waa a kɔlkɛndɛ, ŋ ve lɛ fɛɛsɛŋ o yoomu naa niŋ te, nduyɛ miŋ simnuŋ wanaa fonduaa fuu. Mi hei luei vɛlɛ kɛndiaa naa o kpundɔɔ niŋ. Mi wana chiɔwaa diolaŋ Yowichi Chida, a wana pɛɛku a kaala waŋchieeya okɔɔ wo diolaŋ Aŋdulu Stɛpitoo duaunuŋ kona a yau nda veelu hoo o puuluei niŋ aa “Journal of the American College of Cardiology” wo niŋ. Ma dimi aa, “Ŋ laŋga saaluŋ maa chaŋyɛi kpundɛi cho kɔl tuuwo tɛɛŋ, heelɔŋndo, a naa kɔllo.”

Tofa tɔnɔla malɔɔ hakioo nɔlaŋ o nɛi kɛndɔɔ choo. Te ŋ mal pɛ acheleŋnda haki fasɛi, ŋ cho nɔ diompilɔɔ a nyaaloo, nduyɛ miŋ manda chaŋyaŋ naŋ. I sɔvɛi kpou cho ni, ŋ cho chɔm maa ŋ cho kaa Mɛlɛkaa tolɔɔ kɔɔli, o mal haki fasɛi wanaa mal yɔŋnda wɔɔŋndo wa. Nduyɛ o yeema mi naa bɛɛ tosa nyɛ pilɔɔ kpe.—Maki 11:​25; Ɛfisiaŋnda 4:​32; 5:​1.