Nuuviaa Malaa le Ma Bii Baabuiyo Bila

Yiyaŋndɔ a kɔla numnda taselaŋ o lɛŋnde ŋ kue wɔ kani bɛɛ leŋ niŋ. A cho komal waŋnda, naamulaŋ, nyɛdiaa, a kanii ŋ sina paale pilɛ bɛɛ le ve. A tonya, mi hei tɛɛmbuu num kɔllo.

Nyɛpilɔɔ kpe cho yɔŋnɔŋ ni te a veelu pɛ diomndaŋ o tase ndɔ o Baabuiyo niŋ. O cho ko mɛɛ ŋ kua naa o lɛŋii masindɛi ŋ sina paale pilɛ bɛɛ le ve niŋ yɛ. Nduyɛ ma komal wanaa nda veelu aa Filiitiaŋnda wa, naamula ŋ sina le laŋ, mɛɛ ‘nyɛlaŋ sɛɛsiaŋndo lekɔɔ’ cho naa yɛ. Ɔɔ ma komal nyɛdiaa nda veelu aa manɛiyo wo, a kanii kpalɛi nda veelu aa dulamasiiye ve. (Ɛsɔdɔɔ 16:​31; Chɔɔsuaa 13:​2; Saamiɛɛ Diiŋ Ndɔɔ 3:​31; Luku 15:​9) Mi nyɔɔŋ muŋ kpou lakasiaa num kɔllo. Te o wa pɛ ma kuɛ o lɛŋnde ŋ kue wɔ paale pilɛ bɛɛ leŋ niŋ, a niŋ kɔl le malaa sɔlaa wana nɔla mbo tɛɛsial num sɔɔŋ ndo o ba le?

MALAA O SINDƆƆ NIŊ

Chɔŋ a teleŋ Diom Mɛlɛkaa poonyiaŋ o tase ndɔ o wɔsiŋ 1,600 niŋ tuupa mi Chiisu vialuŋ ndo, malaa wa le mi waŋnda bii bila nyɛ wa o poonyiaa wo. Le tamaseliiyo, Muuse, simlachinɔ tasoo le lɛŋnde Isɔluɛi leŋ chua kalaŋndo le Isɔluɛiya “tɛɛsiallo” nyɛ wa o poonyiaa wo ni.—Ditɔnɔmii 1:​5.

Wanaa ndaa suiliŋ le Diom Mɛlɛkaa waŋnda pɛɛkoo wa wa wɔ o wɔsila waapilɛ la hiou laŋ kɔɔli tuupa mi Chiisu vialuŋ. O wɔsi 455 ve niŋ tuupa mi Chiisu vialuŋ, mi Chuuwa ndaa bɔɔŋiaŋ kunda bɛndoo nda chuauwaa ndaa o luŋ o Chulusɛlɛm niŋ le pɛɛku koŋ. Wanaa pɛɛkaa Baabuiya wa loŋ, nduyɛ mi ndaa “tɛɛsial waŋnda nyɛ o nyɛ [o yau diandaa pilɛ koŋ niŋ kpe] le ma sina ndu pɛŋgu walaŋ.”—Nɛhimaya 8:​1-8.

A wɔsiŋ 500 okoŋ kɔɔli, mi Chiisu Kiliti luei balaŋ o wali pɛɛkaa pilɛ koŋ tosaa niŋ. A tonya, ndaa sina ndu maa wana pɛɛkaa. (Chɔŋ 13:​13) Mi ndoo pɛɛku wanaa faŋga bɛnduaa, vɛlɛ a wanaa yɛyiaa cheleŋ. A boondii pum, mbo suaa o faŋga bɛndoo lo o Pembei choo. Nduyɛ, ‘mi kɔndɔfillo bii faŋgaa kpou a mɛɛ o pɛɛku waŋnda yɛ.’ (Maatiu 5:​1, 2; 7:​28) A paŋgii Nyaakuɛiyo o wɔsi 33 ve niŋ, mi Chiisu ndoo suaa o buɛiyaa nduaa a ŋiɔɔŋ lo mɛɛ nda wa kɔlaŋ o sɔndɔkɔlɔ wa Chulusɛlɛm ikɛiyo. Mbo “tɛɛsial niŋ nda nyɛ cho o poonyiaa o Yau Mɛlɛkaa niŋ” ndo.—Luku 24:​13-15, 27, 32.

Wanaa ndaa pɛɛku Diom Mɛlɛkaa wa buɛiyaa Chiisuaa bɛɛ wa ni. Teleŋ pilɛ, mi wana bɛndoo o lɛŋnde Itoopiaaleŋ niŋ wa diomndaŋ veeloo o fondaŋndo opum o Yau Mɛlɛkaa niŋ. Mi buɛi ndoo nɔ diolaŋ aa Filipi wo sɔɔŋguu ndu ikɛi, nduyɛ mbo nyuna ndu aa, “A cho pa nyɛ ŋ cho koŋ tofaa wo pɛŋgu sina?” Mi Itoopiaanɔɔ muli aa, “Mi vɛɛnɛ ya I sina yɛ ndu pɛŋgu? I nɔ wana tɛɛsial la ndu le.” Okoŋ, mi Filipi tɛɛsial ndu nyɛ diomnda o wa veeloo laŋ la simndo.—Walta Wanaa Chiisuaa 8:​27-35.

MALA CHO HAU WO

Maa wanaa ndaa pɛɛku waŋnda Baabuiyo o sindɔɔ niŋnda, Seiyaa Chɛhowaa bɛɛ cho wali pɛɛkaa Baabuiyo tosaa chieeŋndo balɔɔ silɔ o lɛŋnde 239 niŋ. (Maatiu 28:​19, 20) O lɔɔ o lɔɔ bɛŋgu, a cho waŋnda hiouwɔɔ miiliɔŋndaŋ la ŋɔmahiɔɔlu malaa le Baabuiyo biyɔɔ bila. Wanaa pɛɛkaa haa a bɔɔbɔɔ cho ŋKilisiɔŋ te. A paawa nyɛ o nyɛ le pɛɛkoo hoo le, nduyɛ o tosaŋ o bɛɛ waŋndo ɔɔ o fondaŋ cheleŋ bɛnda wo. Mi waŋnda apum tuei pɛŋ pɛɛku ndaa yeela a foŋndo ɔɔ vidueiyo, a o kɔmpitɛiyo (ɔdinatɛɛloo) choo.

A yandii, nyuna Chɛhowɛinɔ kɛ kɛ le num tɛɛsiallo mɛɛ ŋ looku tɔnɔɔ sɔla o kɛɛsiaa hoo niŋ yɛ. A cho chɔ maa o cho yau naŋ kɛɛ bila biyɔɔ le Baabuiyo cho le. Kɛ diomnda ndɔlaŋ la “nɔ malaa leniŋ. Kani fuule, la cho le waŋnda tonya cho a Mɛlɛka okɔɔ wo pɛɛkoo. La cho le pɛɛkula lachoowalaŋ chɔɔmuuwo, nduyɛ, la cho le waŋnda miŋgioo o nɛi. La cho vɛlɛ le waŋnda pɛɛkoo mɛɛ nda wa wanaa sakpo Mɛlɛka o hɔl lɛ.” Le halikpeŋ mi buɛi Mɛlɛkaa “wa o bɛndaa kpeekpei le wallo, nduyɛ, mbo wa o bɛɛndiaŋ le wali o wali kɛndɛ tosaa.”—Timoti Diiŋ Ndɔɔ 3:​16, 17.