Baa Mɛlɛka Sila Fɛŋ Waŋchieeya le Teleŋ Vilɛi Malaŋ o Tusi Nda Nyɛpalaa Choo?

WANA pɛɛku a choo okɔɔ wo kuɛ le choo mɛɛndaŋndo o maasiiyo niŋ. Mɛɛ o mɛɛndaŋ, mbo cha maa hueiyii wɔɔŋ wɔɔŋnde cho hunɔɔ hɔŋndo o fondaŋ waŋnda cho tau wo. Kɛ le mɛɛ o buulaŋ a wanaa cho o tanda koŋ niŋnda okɔɔ yɛ, mbo saa nda niko dimullo le ma tosa nyɛ tuupa mii hiou lɔɔ.

O nɛi pilɛ koŋ choo, Chɛhowa cho hau waŋnda dimullo a ‘hueiyii bɛnduii’ cho hunɔɔ hɔŋndo ve okɔɔ. Nduyɛ, hueiye hei wɔu i hiou hueiyii kɛ kɛ wanaa pɛɛku a choo okɔɔ wa suaa okɔɔ ve poloŋ poloŋ. Vɛɛ o cho yɛ hei tosaa? Le yɛɛ naŋ laalaŋ yɛ maa Chɛhowa cho waŋchieeya teleŋndo kioo tau le ma yaŋ nilaŋ o sila ndɔɔ? Le mulioo sɔlaa le nyunalaŋ ndaŋ, ŋ yaasiaŋndɔ fɛŋ mɛɛ Chɛhowa sila niŋ waŋnda o paandoo niŋ yɛ.

TAAMASELIILA CHƆM MAA MI MƐLƐKA SILA FƐŊ WAŊCHIEEYA LE TELEŊ VILƐIYO

O sindɔɔ niŋ, mi Chɛhowa sila waŋnda a “hueiyii” bɛnduii teŋgeŋ teŋgeŋnde okɔɔ, ɔɔ nyɛpalaa ndoo tusi niŋ wanaa ndaa kɛɛ le sawala ndɔlaŋ diikɔŋndo a siɛlɛi fuu wa choo wo. (Pulɔ. 10:​25; Chɛlui. 30:​23) Mi ndoo sila fɛŋ wanaa kɛɛ kaŋ le ndu nilaŋ yaŋɔɔ wa le teleŋ vilɛi, nduyɛ mi ndoo chɔm nda nyɛ ndaa nɔ ma tosa le ndu diikɔŋndo wo. (2 Masaa. 17:​12-15; Nɛhi. 9:​29, 30) Mi ndoo soliŋ buɛiyaa nduaa laalaŋaa wa o lɛŋndeŋ choo wa kpeku le nda malaa ma tosa siŋgaŋnda yeemaŋ ndaŋ chɔ chɔ.—Emɔɔ. 3:​7.

Nuuwa wa waŋndo opilɛ o buɛiyaa laalaŋaa Mɛlɛkaa kaŋ tɛɛŋ. Le wɔsiŋ bɔɔbɔɔ, siooŋii ve Nuuwa le waŋnda dimullo a kaa nɔɔlɛi vɛlɛ a niilu la sɔŋgɔ nda wa niŋ o palɛi nduɛi niŋndo le. Nduyɛ, mbo dimul nda vɛlɛ a Mɛŋma Koŋgi Bɛnduaŋ okɔɔ. (Chɛ. 6:​9-13, 17) Mbo dimul nda pɛŋ nyɛ ndaa nɔ ma tosa le ma sɔla kindaa wo. Le saboo hoo, mi Nuuwa sɔla veelɔŋndo maa wana “dimul waŋnda diom Mɛlɛkaa a mɛɛ wana wa o nɛi sakpoo choo yɛ.”—2 Pitɛ 2:​5.

Mi che bɛɛ mi Nuuwa sila wanaa wa o palɛi nduɛi niŋnda le teleŋ vilɛi, kɛ a yeŋ lani o yooŋgu Mɛlɛka o wa nda dimullo wo le. Ma chɔm laalaŋ lepɛŋndo. Fulamakɔɔlioo wa ni, mi Mɛŋma Koŋgi Bɛnduaŋ “ma huŋ diu nda kpou.” (Maa. 24:​39; Hibu. 11:​7) Mɛɛ mɛɛlula ndalaŋ la fuuluu, waŋnda haa dimi naa maa lepilɛ bɛɛ Mɛlɛka sila nda a nyɛpalaa wa koŋ hunɔɔ okɔɔ wo le.

A teleŋnda cheleŋ, “hueiyii” nyɛpalaa Chɛhowɛi ndii wa niŋ kpɛɛluŋ malaŋ ndoo sila waŋnda. Kɛ a teleŋnda waa naa bɛɛ, mi ndoo tosa a sabu maa wanaa nyɛpalaa hoo cho komallo wa sɔla fɛŋ teleŋndo tau le ma bɛɛndiaŋ. Le taamaseliiyo, teleŋ o wa waŋnda Ichipi Kpundɛla Tɔlaŋ tusioo choo wo, mi ndoo sila nda fɛŋ le teleŋ vilɛi a kpundɛ kɛ kɛ okɔɔ. Taamasioo opilɛ cho a kpundɛ ŋɔmmɛu wo okɔɔ ni. Mi Chɛhowa viam Muuse nda Elɔŋ le ma kɔ dimul Felo a buɛiyaa nduaa a kpundɔɔ hoo okɔɔ, ndu cho ni, looŋ kpuŋgbaŋ tɛɛmbuu nyɔɔŋ tau wo. Mɛɛ looŋ kpuŋgbaŋ muŋ nɔ le kandɔŋndo maa siɔdii yɛ, baa Mɛlɛka ndoo ke nda pa teleŋndo tau le ma bɛɛndiaŋ okoŋ ma sɔla kindaa o hueiyii kpundɛi keŋ niŋ? Baabuiyo dɔɔŋ kona aa: “O koŋ kɔɔli, masa bɛndoo Ichipi, laŋgbaa nduaa kalla a tiŋ, mɛɛ nda tuei nyɛ Mɛlɛka Yaawɛɛ dimi wo, mi siooŋnde bii nda, ma kua ma kɔ huŋ a chiaa ndaa, a chɔluaa ndaa, ma luei nda chiɛilaŋ niŋ. Kɛ, wanaa yeŋ sila Mɛlɛka Yaawɛɛ wo lani le wa, nda ma mɛi chiaa ndaa, a chɔluaa ndaa o bɛɛ.” (Ɛsɔ. 9:​18-21) Ŋ che kpendekele maa, mi Chɛhowa sila nda a teleŋndo nduyɛ mi wanaa yaŋ nilaŋ nda tosa nyɛ yeemaŋndo chɔ chɔ, a sɔla lɛ saŋgaa maa wanaa kɛɛ le nilaŋ yaŋɔɔ wa le.

Mi Felo a buɛiyaa nduaa bɛɛ sɔla silaa tuupa mi kpundɛ tɔɔ tual nda choo. Kɛ, ma kɛɛ kpooŋ le nilaŋ yaŋɔɔ o sila koŋ o diɔmii bɛnduei niŋ. (Ɛsɔ. 4:​22, 23) Fulamakɔɔlioo wa ni, chua o chua wa chua nda tase, ma wu kpou. Keŋ wa bɔɔ suɛi kɔl tambɛi! (Ɛsɔ. 11:​4-10; 12:​29) Baa ndaa nɔ pa teleŋndo tau le mi ndaa bɛɛndiaŋ? Ei! Tamala bɛɛ Muuse tosa le Isɔluɛiya dimullo a kpundɛ tɔ wa koŋ hunɔɔ wo okɔɔ le. Nduyɛ, mbo chɔm nda nyɛ nda nɔ ma tosa le mi yuŋgula ndalaŋ la sɔla pioŋɔɔ wo. (Ɛsɔ. 12:​21-28) Vɛɛ kpɛ waŋnda ndaa yaŋ yɛ nilaŋ o sila koŋ? A mɛɛ yaasiaalaŋ lapum la tosaŋ yɛ, waŋnda miiliɔŋndaŋ la yaa ɔɔ hiouwɔɔ lechoo mal lɛŋnde Ichipileŋ ni ma sɔla pioŋɔɔ. O waŋnda haa tɛɛŋ, Isɔluɛiya wa, Ichipiaŋnda, a “wanaa ka ka cheleŋ.”—Ɛsɔ. 12:​38.

A mɛɛ naŋ che o taamaseliilaŋ ndaŋ niŋ yɛ, mi Chɛhowa ke lɔɔlɔɔ waŋnda teleŋndo tau le ma yaŋ nilaŋ o sila ndɔɔ. (Ditɔnɔ. 32:​4) Le yɛɛ Mɛlɛka ndoo ke yɛ waŋnda silaa lende le teleŋ vilɛi? Mi Pitɛ, wana Chiisu vem hɔlte ndɔ wo dimi maa “o hɛnaŋ mi wana o wana o huŋ wa o tɛɛmbaa le. O hɛnaŋ mi wana o wana o mal yɔŋnda ndɔla wɔɔŋndaŋ.” (2 Pitɛ 3:​9) A tonya, Mɛlɛka ndoo buulaŋ bɔɔ a wanaa kaŋ okɔɔ. Ndoo yeema nda ma mal yɔŋnda ndala wɔɔŋndaŋ okoŋ, ma tosa siŋgaŋnda yeemaŋ ndaŋ tuupa mi nyɛpalaa ndɔɔ ndoo hiŋ.—Aisaya 48:​17, 18; Luomaŋ. 2:​4.

HAU BƐƐ Ŋ NƆ MIŊ YAŊ NILAŊ O SILA MƐLƐKAA

Hau bɛɛ, wana o wana nɔ mbo yaŋ nilaŋ o yooŋgu choŋ choŋ cho dimiŋndo o chieeŋndo choo kpede wo. Teleŋ Chiisu wa o chieeŋndo hoo choo wo, mbo sila waŋnda maa chieeŋ naŋ cho hoo niŋndo nɔ le tambei sɔlaa a teleŋ “nyɛ palaa” bɛndoo. (Maa. 24:​21) Mbo tɛɛsial tol kɔɔliaa nduaa sɔɔŋ nɔ le yɔŋnɔŋndo woŋ, le sinaa maa teleŋ nyɛpalaa koŋ cho niŋ kpɛɛluŋ. A sɔɔŋ naŋ cho hau chɔɔ yɔŋnɔŋndo chieeŋndo balɔɔ silɔ woŋ okɔɔ Chiisu ndoo soo ni.—Maa. 24:​3-12; Luku 21:​10-13.

Tuupa mi nyɛ dimiŋ hoo wo yɔŋnuŋ, Chɛhowa cho wana o wana dimullo le mbo diikuŋ ndu. O yeema mi wanaa diikaŋnda tuei yoomu sɔviɔɔ yeela suŋ suŋ vɛlɛ a salala cho wa o chieeŋ sɛnɛiyo niŋndaŋ. (2 Pitɛ 3:​13) Chɛhowa kɛɛsiaa le mi “yooŋgu kɛndɔɔ” dimiŋ a masale ndɔleŋ okɔɔ le waŋnda malaa ma nɔ tiindaŋndo o sɔɔŋ o dimi le tosaa woŋ niŋ, okoŋ ma sɔla pioŋɔɔ. Nduyɛ, mi Chiisu dimi maa o cho dimiŋ “ba o ba fee o chieeŋndo choo, le mi waŋnda kpou a tuei.” (Maa. 24:​14) Mɛlɛka kɔɔna wanaa cho ndu piɛiyo o tonyaa choo wa le waŋnda ‘yooŋgoo’ hoo dimullo o lɛŋnde 240 niŋ. Chɛhowa yeema mi waŋnda tau yaŋ nilaŋ o sila ndɔɔ nduyɛ ma sɔla kindaa o “hueiyii” nyɛpalaa cho hunɔɔ ve niŋ.—Sɛfa. 1:​14, 15; 2:​2, 3.

Ŋ che niŋ kpendekele maa o cho lɛ nyunaa te Chɛhowa sila fɛŋ waŋchieeya le teleŋ vilɛi malaŋ o tusi nda nyɛpalaa choo le cho lɛ o sɔvɛ le. Taamaseliila naŋ yaasiaa laŋ la chɔm maa lɔɔlɔɔ mi Chɛhowa ke waŋchieeya teleŋndo tau. Kɛ, nyuna sɔviɔɔ cho niŋ hoo ni: Baa waŋchieeya cho pa nilaŋ yaŋɔɔ o sila Mɛlɛkaa tuma teleŋndo cho wɔ hoo wo? Naŋ cho waŋnda yooŋgu Mɛlɛkaa dimullo wa, maa ŋ hiounuŋ lachi a wanaa bɔɔbɔɔ malaa le ma sɔla pioŋɔɔ a mɛɛlula chieeŋndo hoo.