Hiouwɔɔ Lachioo Tosaa o Wali Pollo Niŋ—Kindiŋ Ma Soo o Wanaa Kuuna Naa le Suɛi o Nda lo Wa

Le yɛɛ hei Bɛnda Yɛ? Yiyaŋ ndɔ maa kpundɛ bɛndoo cho hunɔɔ. Waŋndachieeya cho piɔmndo sɔla te o cho ma nyaanuŋ le yoomula nda laŋ te. Okoŋ, ma kua o wana nya chɛiliaŋ bɛɛlaŋndo lo le ndu dimullo a ndi okɔɔ. Kɛ mbo kɛɛ le nilaŋ yaŋɔɔ mbo dimi aa, ‘I cho wɔ wallo tosaa’. O wa bɛɛ lende, a kueŋnuŋ ma kɛɛ ndu dimul a suɛi hei okɔɔ le. Lende wanaa bɔɔ bɔɔ tosa o tanda naa niŋ ni. A chɛl le nilaŋ yaŋɔɔ o yooŋgu kɛndɛ naŋ dimul nda wo le. A sina kposoŋ maa yooŋgu kiindiaa yoomulaŋndo le naŋ dimul nda hoo le. Tonya icho ni maa teleŋ naŋ komal nda lepum ndo, ma wa wallo tosaa. (Mat. 24:37-39) Lepum, ma kɛɛ naa nilaŋ yaŋɔɔ le choola waŋnda dimi a naa okɔɔ laŋ. (Mat. 11:18, 19) Ma yiyaŋ naapum maa piɛiye kpou nyɛ pilɛ kpe icho ni. (Pitɛ Diiŋ Ndɔɔ 2:1, 2) Te wana ŋ cho suɛi o ndu lo wo keleŋa i yeema chɔm te, ŋ keleŋa pɛɛsiaa miŋ kuɛŋnuŋ te.

Vɛɛ Ŋ Tosa yɛ Hei?

Tuupa ma kuɛ o wali pollo niŋ, yiyaŋ fɛŋ a wanaa ŋ komal niŋ ma kuuna num le suɛi o nda lo wa okoŋ, ma kindiŋ mɛɛ ŋ suaa o nda lo yɛ.
Te wana ŋ cho suɛi o ndu lo wo dimi pɛ maa o yeema le, kindiŋ ma soo o ndu lo o nɛi lebɛɛ niŋ. Mɛɛ ŋ tosa hei yɛ cho ni, mel ndu fɛŋ balikaa le nyɛ o dimi wo. Le tamaseliiyo, te o dimi pɛ maa o nɔ kandeŋ le ndɔleŋ, a mulul ndu aa, “wana waa naa ya wa nuuviaa ni o nɔ yeemɛi le suɛi Mɛlɛkɛiyo.” Lepum, sinaa yeemɛi wana ŋ cho suɛi o ndu lo wo mala num ma hiou lachi a yooŋgu kɛndɔɔ dimioo. Le tamaseliiyo, te o dimi pɛ maa o cho wallo, a dimul ndu aa, “I sina. Kɛ tuupa mi kuɛ, I yeema mi mel num nyɛ.” A soliŋ vɛlɛ nyunaa kpeku. Te wana ŋ cho suɛi o ndu lo wo dimi pɛ maa o yeema le, a nyuna ndu aa, “Baa dimioo ŋ cho ni maa, a nɔ yeemɛi o nyɛ Baabuiyo dimi wo niŋ te ɔɔ suɛi Mɛlɛkɛi ŋ yeema kposoŋ te ni?”
A nɔ ma wa a taasi. Loonuŋ maa Chɛhowa beŋ wana o wana le ndu piɛi le. (Dut. 30:19, NW) Te o hiŋ o Mɛlɛka piɛiyo niŋ pɛ, wana o wana nɔ di mbo tosa chuaŋchuaa o yoomu ndɔɔ niŋ. (Kal. 6:5) Te wana ŋ cho suɛi o ndu lo wo tuulu pɛ kɔl mbo chua ndi a sɛɛŋgiaŋndo, mɛɛ ndu loŋ yɛlɛŋ ma kuɛŋnuŋ. Te ŋ chɔm pɛ bɛɛleŋ le yeemɛi nduɛi, koŋ tosa te wana cheleŋ hiŋ pɛ ndu yooŋgu kɛndɔɔ dimullo o chilaŋ niŋ, mbo yaŋ nilaŋ.—Pitɛ Tasoo 3:15.

Kindiŋ Ma Tosa hei o Paŋgei hei Niŋ,

Te a komal pɛ wana kuuna num le suɛi o ndu lo wo o wali pollo niŋ, te la faŋaŋ pɛ o ndu lo bɛɛ, nyuna wana nya kuɛ wo mɛɛ num aa nɔ ma mulul ndu nyɛkɛndɛi yɛ.