Sukuu Manda iMɛlɛkayaa le Wɔsi 2015 ve Mala Niŋ Naa Miŋ Tosa Hiouwɔɔ Lachioo o Pɛɛku Naa Niŋ

¹ Mi wana ŋchondoo Deeve poonyiaa aa, “O Chɛhowa, num cho pou kpoowa manda ya wo ni, wana ni piŋiaa, I cho piɛileŋ maa diomnda nilaŋ, a yiyaŋnda nilaŋ, la bɛnda num o hɔl fɔ.” (Chon. 19:14, NW) Naa bɛɛ ŋ yeema mi diomnda naalaŋ la nɛŋi Chɛhowa kɔl kanifuule, ŋ che laŋ nyɛ tɔɔma le tonyaa dimioo o kundaa niŋ vɛlɛ a o wali pollo niŋ. Sukuu Manda iMɛlɛkayaa cho nɛiyo o pilɛ o Chɛhowa pɛɛku naa le wali pollo wo ni. Pɛɛkoo hoo tosaŋ o lɔɔ o lɔɔ bɛŋgu o kundalaŋ niŋ hiouwɔɔ 111,000 chieeŋndo balɔɔ silɔ. O mala niŋ hau puaapilla a ndepilla suulaŋ yɛ yɛ chieeŋndo balɔɔ silɔ ma simnuŋ wanaa dimiaa yooŋgu kɛndɛ, o ke nda kɔlkalu nda pɛɛku waŋndo mbo biibila wo, taasioo, nduyɛ a kɔl sikpaa.—Walta Wanaa Chiisuaa 19:8; Kolosiaŋnda 4:6.

² Sɔɔŋ cho wa yɔŋgɔŋndo le sukuu cho wa tosaŋndo o wɔsi 2015 ve niŋndo cho wa fulaa o yaulaŋ ndaŋ niŋ. Yɛɛ Naŋ Pɛɛku yɛ o Diom Mɛlɛkaa Niŋ? a “Glossary of Bible Terms” o New World Translation niŋ, a Insight on the Scriptures (Étude perspicace des Écritures), a La Tour de Garde. Le handɔɔ lechoo, teleŋndo siŋgaŋ le Baabuiyo yaandiaa vɛlɛ a Suɛi 1. Siŋgaŋndaŋ ndaŋ kinɛi a silalaŋ mɛɛ sɔɔŋ wa niŋ yɔŋgɔŋndo o sukuuwo niŋ yɛ cho o tɛɛsiaŋ o pɛlta cho lachi laŋ niŋ.

³ Baabuiyo Yaandiaa, Puaapiliaa nda ke suɛi heiya nɔ chemchemndaŋ ma miɔɔŋ le ma yaasiaa suɛi kulle i pilɛ o bolii Baabui naŋ nɔ le pɛɛkoo o lɔɔ koŋ bɛŋgu ve. Te o wa pɛ ma bɛɛndiaa suɛi nda ke numnde nyɛkɛndɛi, a tiuba ma mala kundaa o teleŋ keŋnuŋ numndo niŋ. Te a chii pɛ, wanaa challa nɔ chemchemndaŋ ma ŋɔŋpum le ma chɔm chobe o biɔŋɔɔ 30 bɛŋgu nyɛ sɔvɛ nda pɛɛku o bolii Baabui naŋ nɔ le yaasiaa ve niŋ. Le chɔmndo nyɛ sɔvɛ ŋ pɛɛku wo o biɔŋɔɔ 30 bɛŋgu, mɛɛ ma bɛɛndiaŋ nyɛkɛndɛi nduyɛ, ma yiyaŋ a chaaŋaa cheleŋaa nɔ le suɛiya. Kɛ hei tosaa cho pɛɛku kɛndɛ le naa. Nduyɛ o ke chaaŋaa cheleŋnda teleŋndo mi nda bɛɛ chɔm nyɛ sɔvɛ nda pɛɛku o yaasiaa ndaa niŋndo.

⁴ Suɛi 1. Teleŋndo le diomndaŋ veeloo o Baabuiyo niŋ faŋaŋ lechoo mbo lo le chemchemndaŋ ma yaa. Nduyɛ wana nda ke suɛi heiyo nɔ mbo hiou chemchemndaŋ ma yaa le. Kanifuule, fondaŋ o veelu niŋ diomndaŋ o Baabuiyo niŋndo ve niŋ o bɔɔ le. Wanaa nda cho wa suɛi hei kioo wa nɔ ma lambaŋ pɛɛkoo le diomndaŋ veeloo choo choo nduyɛ ma sina le diomndaŋ veeloo nyɛkɛndɛi nduyɛ, ma veelu laŋ tulumasaa le mi waŋnda biibila nyɛkɛndɛi. Wanaa Chɛhowaa kpou nɔ ma kindiŋ le diomndaŋ veeloo nyɛkɛndɛi kanifuule, diomndaŋ veeloo la cho nyɛ sɔvɛ o Chɛhowa piɛiyo niŋ. Ŋ cho bɔɔ a nyaale le mɛɛ chuauwaa naa a bɔɔbɔɔ chaa diomndaŋ veeloo yɛ! Ŋ mel kalaŋ chuauwa balika bɛndoo le sɛmbɛ kaalaa nda chɔm chuauwaa ndaa ma mala nda ma chaa diomndaŋ veeloo wo.

⁵ Suɛi 2. Ndepilɛnɔɔ nɔ le suɛi hei yɔŋgoo ni le chemchemndaŋ ma ŋuɛɛnu. O soliŋ kpeku a suɛi lebol keŋnuŋ ndu ve. Te suɛi fula pɛ o New World Translation (Traduction du monde nouveau) niŋ, i nɔ mi i yɔŋguŋ a wali pollo okɔɔ i bɛnda o tanda nyaa niŋnde. Te suɛi wa pɛ a wana Baabuiyo soo okɔɔ wo a mɛɛ icho o Insight on the Scriptures (Étude perspicace des Écritures), niŋ yɛ, sukuunɔɔ pɛɛku yooŋgu cho a wana koŋ okɔɔ wo naa diola ndɔlaŋ la cho o Baabuiyo niŋnda. O hɛli bolii Baabui kpeekpei soo a suɛi keŋnde mbo soliŋ ndi kpeku nduyɛ, mbo chɔm tamaselii naŋ pɛɛku a wana koŋ okɔɔ wo. A soliŋ bolii Baabui cheleŋ chɛlaŋ a suɛi keŋnde kpeku. Wana cho sukuuwo chilaŋndo cho wana nɔ suɛiyo wana malaa ke o pilɛ.

⁶ Suɛi 3. Puaapilɛnɔɔ ɔɔ ndepilɛnɔɔ nɔ le suɛi hei yɔŋgoo ni le chemchemndaŋ ma ŋuɛɛnu. Te ndepilɛnɔɔ sɔla suɛi hei ni, o yɔŋgu ndi mɛɛ nda yɔŋgu Suɛi 2 yɛ. Te puaapilɛnɔɔ sɔla suɛi hei ni, nduyɛ mi i fula o yauwo hoo niŋ Insight (Étude perspicace), o sim mbo yɔŋgu ndi o kundaa lo. Wana nɔ le suɛi yɔŋgoo wo nɔ mbo bɛɛndiaa ndi nduyɛ, mbo hɛli bolii Baabui kpeekpei o cho kpeku soliŋnde. Okoŋ, o chɔm tamaselii naŋ pɛɛku a wana Baabuiyo soo koŋ okɔɔ wo.

⁷ Nɛi Sɛnɛi Cheleŋ mɛɛ Puaapilla Wa Niŋ Suɛi 3 Yɔŋgoo Yɛ, Te o New World Translation (Traduction du monde nouveau) niŋ suɛi hei fula ni, yɔŋgu ndi o nɛi tuulaa niŋ maa pɛɛku leyuŋgu ɔɔ o wali pollo niŋ. O kpeekpei niŋ, wana cho sukuuwo chilaŋndo nɔ mbo ke ndu wana malaa a mɛɛ o nɔ le suɛi nduɛi yɔŋgoo yɛ. Wana cho o yuŋgu ndɔɔ niŋndo ɔɔ puaapilnɔɔ o kundaa niŋ nɔ ni mbo wa wana ndɔ malaa. Naapum, a soliŋ bolii Baabui cheleŋ kpeku chɛlaŋ a suɛi lebolii keŋnde. Teleŋnda bɔɔbɔɔ, bɛndu kundaa sɔla niŋ suɛi hei ni le ndi yɔŋgoo. Bɛnduaa kundaa pila nɔ ni ma hɛli wana nda malaa vɛlɛ a mɛɛ nda nɔ le suɛi ndɛi yɔŋgoo yɛ ni. O cho suɛi kɔndɔfili bii naa le kanifuule, o wa niŋ suɛi kɔl dɛɛniaa le chɔɔ bɛnduaa kundaa suɛi hei yɔŋgoo le naa chɔmndo mɛɛ nda tosa pɛɛkoo a yuŋgu ndaa ɔɔ a wana cheleŋndo yɛ.

⁸ Silaa, Wana cho sukuuwo chilaŋndo soliŋ chemchemndaŋ ma miɔɔŋ kpeku mbo mel sukuunɔɔ balikaa te suɛi kɛ kɛ chuu pɛ. Nduyɛ o chɔm ndu sila mala ndu wo fulaa o yau “Sukuu Manda iMɛlɛkayaa” niŋ. Te wana cho sukuuwo chilaŋndo veelu pɛ sukuunɔɔ le suɛi nduɛi yɔŋgoo, o nɔ mbo chɔm sila o cho wallo choo wo le. Kɛ te sukuunɔɔ chii suɛi nduɛi yɔŋgu pɛ, wana cho sukuuwo chilaŋndo nɔ mbo chandu ndu nyɛkɛndɛi. Okoŋ, o chɔm niko sila sukuunɔɔ tosa wallo choo wo, nduyɛ mbo chɔm mɛɛ o tol sila koŋ kɔɔli yɛ. Ɔɔ tɛɛsial ndu le sabu o wa tɔnɔɔ le ndu mbo chɔɔlu wallo tosa o sila koŋ choo wo.

⁹ Silaa le wana cho suɛi yɔŋgoo o sukuuwo niŋndo cho o pei 79-81 o yau ndɔ “Sukuu Manda iMɛlɛkayaa” niŋ. Te sukuunɔɔ chii pɛ suɛi nduɛi yɔŋgu, wana cho sukuuwo chilaŋndo cho poonyiaa teleŋ o ke ndu sila o wa wallo choo wo vɛlɛ a teleŋ o chiiyo o yau ndɔ “Sukuu Manda iMɛlɛkayaa” niŋ, nduyɛ mbo nyuna ndu te o tosa pɛ nyɛ dimiŋ o sila koŋ mɛɛlulaŋndo. Te bɔŋaŋndo chuu pɛ ɔɔ a teleŋ cheleŋ, wana cho sukuuwo chilaŋndo mel wana yɔŋgu suɛiyo balikaa nduyɛ mbo chɔm ndu vɛlɛ kɛɛsiaala cheleŋ mala ndulaŋ. Mala kɛ kɛ sukuunɔɔ sɔla pɛ o sukuuwo hoo niŋ, o chua ndu maa nyɛ sɔvɛ tiuba mbo mala ndu le hiouwɔɔ lachioo tosaa wo.—Tim. Tasoo 4:15

¹⁰ Te teleŋndo chuu pɛ mi sukuunɔɔ wa wɔ suɛi kɛ, wana cho sukuuwo chilaŋndo ɔɔ wanandɔ malaa tosa nyɛ o nɛi chaa niŋ le ndu chɔmndo maa teleŋ ndɔɔ chuu. Te sukuunɔɔ che pɛ ɔɔ mbo tuei nyɛ chɔm maa teleŋ ndɔɔ chuu wo, o siou pulale o kanduleŋ mbo tol o biŋndo choo.—Tofa yau “Sukuu Manda iMɛlɛkayaa” o peeleŋ 282, pɛl 4.

¹¹ Wanaa komal suiliŋnda cho o Baabuiyo niŋndaŋ, a cho a dɛɛniaa le ma wou diolaŋ le Sukuu Manda iMɛlɛkayaa. (Tofa yau “Sukuu Manda iMɛlɛkayaa” o peeleŋ 282, pɛl 6.) Pɛɛku sukuuwo hoo nɔ wo mala niŋ hau wanaa Chɛhowaa le yooŋgu kɛndɛ leMasaa dimioo vɛlɛ a waŋnda pɛɛkoo a dialuŋfulaa, a lebɛɛ, nduyɛ a kaalaa. Chɛhowa cho a kɔl hiniaa le saŋgala wanaa cho tɔnɔɔ sɔlaa o pɛɛku iMɛlɛkayaa hoo niŋnda cho ndu wo.—Chon. 148:12, 13; Ais. 50:4, NW.