Chonduŋ Sɛnɛiyoŋ le Chɛhowa Piɛiyo!
1 O bɔŋaŋ iwɔsi “Watch Tower Bible and Tract Society of Pennsylvania” bii a Saa 4 wɔsii 2014 ve wo, ma yonda maa kɛɛsiaalaŋ la tosaŋ le ma siŋga yau ŋchondu naŋ nɔ suŋ suŋndo. O wa bɔɔ suɛi nyaale le yooŋgoo hoo tueiyɔɔ! Ma yiyalaŋ wanaa wa o bɔŋaŋndo hoo wa kpou a foofo sɔvɛ chonduŋ naŋ soli le Chɛhowa piɛiyo wo ŋ nɔ woŋ.—Chon. 96:2, NW.
2 Mi kɔndɔfillo bii num dɔɔ ma nyuna aa, ‘Le yɛɛ nda cho yɛ yau ŋchondoo hoo siŋgaa?’ Sabulaŋ la cho tau. O tasoo peŋ, sinalapɛŋgu naa a Baabuiyo okɔɔ cho hiouwɔɔ lachi a siɛɛndɔŋndo nduyɛ, hei paaliaŋ diomndaŋ o choŋnduŋ naŋ niŋ. (Tal. 4:18, NW) Sabu cheleŋ le ndu siŋgaa cho ni, diomnda bɔɔbɔɔ naŋ soliŋ kpeku o yau ŋchondu naŋ nɔ suŋ suŋndo niŋndaŋ la fula o Baabui paandoo niŋ, New World Translation (Traduction du monde nouveau). Chondoŋ muŋ nɔ miŋ siŋgaŋ le mi diomndaŋ la chɛlaŋ a Baabui sɛnɛi naŋ nɔ wo. Le chondoŋ muŋ siŋgaa miŋ chɛlaŋ a Baabui sɛnɛiyo, wallo pila icho ni. Lelaŋ, kɛɛsiaa tosaŋ le chonduŋ sɛnɛiyoŋ chɔɔloo o chondoŋ muŋ choo.
3 Baa ŋ nɔ pa miŋ lo chumndo tei mi yau ŋchondu sɛnɛiyo hoo fula malaŋ naŋ kandu muŋ kpeku soliŋ? Ɛ ɛ. Ŋ cho a nyaale le nya dimullo maa o paŋguŋ cho lachi woŋ niŋ, chonduŋ sɛnɛiyoŋ muŋ cho wa o tɛɛŋgii nɛi, jw.org. Te chondii sɛnɛiye fula pɛ, kɛɛsiaa cho tosaŋ le ndi solioo o bɔŋaŋ wali pollo mɛɛlulaŋ. A cho wa chɔɔ o poonyiaa “chondii sɛnɛiye.”
4 Vɛɛ Naŋ Pɛɛku yɛ Niŋ Chonduŋ Sɛnɛiyoŋ Muŋ? O wa i kala le chondii sɛnɛiye pɛɛkoo. Kɛ o wa bɛɛ lende, ŋ nɔ miŋ wa maa wana poonyiaa ŋchondoo. Ŋ waŋnuŋ wanaa meyaa kposoŋ te kɛ, ŋ waŋnuŋ a yeemɛi le chondoŋ solioo o bɔŋaŋnda naŋ biilaŋ. (Chon. 30:12, NW) Le chondii sɛnɛiye pɛɛkoo, tol nɛila tɛtɛlɛlaŋ ndaŋ kɔɔli.
Yaŋ nilaŋ lediiŋ diiŋ o nyɛchaa nda chua diomnda chondii keŋ ma handu ndu o tɛɛŋgii nɛiyo. Mɛɛ ŋ yaŋ nilaŋ o nyɛchaa hoo fau, lende ko o mala num ni ma loonuŋ ndu.
Pɛɛku diomnda chondii kalɛi nduyɛ, ma kindiŋ le laŋ loonɔŋndo.
Soli niko chondii kalɛi a nyɛchaa latulu. Lambaŋ tosaa lende tei ma chaa ndi.
La soliŋ teleŋ pɛɛku nya leyuŋgoo o tiŋ kpeku le chonduŋ sɛnɛiyoŋ muŋ pɛɛkoo tei mi yuŋgu numndo chaa muŋ.
5 O paŋguŋ cho lachi woŋ niŋ, te kɛɛsiaa tosaŋ pɛ le chondii sɛnɛiye solioo o Bɔŋaŋ Wali Pollo mɛɛlulaŋ, kundaa nɔ fɛŋ mbo yaŋ nilaŋ le pilɛ o nyɛchaa nda chua diomnda chondii keŋndo. Te a yaŋ pɛ nilaŋ, a soli ndi niko a nyɛchaa latulu mɛɛ naŋ soli chonduŋ cheleŋndoŋ yɛ.
6 Te a yiyaŋ pɛ a ndi okɔɔ, a che maa chondoŋ solioo o bɔŋaŋnda naalaŋ ke naa nyaaloo le mɛɛ naa kpou wou diomndaŋ diompilɛ le Chɛhowa saŋgalaa yɛ. Lelaŋ, o bɛnda miŋ luɛi o kaa hoo niŋ kposoŋ le fondaŋ naa chalaa mɛiyo miŋ fulaŋ o bɛɛ le suɛi fondofuu ve teleŋ nda cho chondii naŋ nɔ le solioo ve chɔmndo wo le.
7 Nɛi cheleŋ cho vɛlɛ miŋ chɔm balika melaa le nyɛchaa walaŋndo hoo. O bɔŋaŋnda naala i buŋbulaŋ a o i palɛi yaawo, nyɛchaa handuŋ fɛŋ malaŋ pɛl o pɛl kanduŋ. Lediiŋ o wɔsioo niŋ, mi puaapiliaa a ndepiliaa laalaŋnda fula o lɛŋii yɛ yɛi niŋ ma kuɛ Patasiŋ Niu Yɔk, le halikpeŋ ma kɔ toosiaa chonduŋ kɛndɛŋ naŋ soliŋ muŋ kpeku le Chɛhowa piɛiyo wo. Nyɛ o nyɛ nda pisi le kɔlaŋndo, ndapila paawa ndu ni. Lelaŋ, te wana cho bɔŋaŋndo kumbioo wo dimul naa pɛ maa naŋ chal miŋ yaŋ nilaŋ o nyɛchaa kunda soliaa ŋchondoo hoo toosiaa wo, o bɛnda miŋ tosa lende. Hei tosaa bɛɛndiaa kɔlta naalaŋ nyɛkɛndɛi le sɔɔŋ cheleŋ cho kɔɔli woŋ.—Ɛsɛla 7:10, NW.
8 Ŋ cho bɔŋaŋ naa hau kinda a chondii sɛnɛiye. Suɛi nduɛi lebolle aa, “Masale Mɛlɛkaleŋ le Chua Fondaa—Le Huŋ Fɔ!” O bɔŋaŋ iwɔsi laŋga biinuŋndo chondii sɛnɛiye hei fula ni. Nduyɛ a toosiaa ndi le chɔmndo kɛsɛ maa wɔsilaŋ 100 Masaleŋ le chiiyɔ ni.
9 “Sɔɔŋ kɛndɛŋ” Chɛhowa ke naa woŋ cho vɛlɛ chonduŋ sɛnɛiyoŋ muŋ ni. (Mat. 12:35a) Maa naa kpou kindiŋ o nɛi o nɛi niŋ le chonduŋ sɛnɛiyoŋ muŋ pɛɛkoo nduyɛ, miŋ soli muŋ a kɔllo kpou le miŋ saŋgala Mɛlɛka naa mbo hini kɔl!—Chon. 147:1, NW.