Soli Chondoŋ a Kɔl Kɛndɛ!

1. Yɛɛ chondoŋ solioo mala yɛ naa le tosaa?

MI WANA nda sina le chondoŋ poonyiaa wo dimi aa, “Te a tuei pɛ diomndaŋ, mi la tosa ma yiyaŋ. Te a tuei pɛ nyɛchaa, ma sinaŋ nyɛkɛndɛi. Kɛ te a soli pɛ chondoŋ, miŋ pilaŋ num kɔllo nyɛkɛndɛi.” Mi chonduŋ naŋ yɔŋgu saŋgalaa nduyɛ miŋ chɔm kaalaa le Chɛhowa Finya naa o choo choo niŋ. Ŋ tosa naa miŋ sɔɔŋguu ndu ikɛi kpɛɛluŋ. I cho tɛtɛlɛ le sinaa le sabu naŋ soli chondoŋ o piɛile tonyaleŋ niŋndo. O wa aa naapilɛ cho solioo ni ɔɔ naa puaapiliaa a ndepiliaa.

2, 3. (a) Vɛɛ apum yiyaŋ yɛ lepum le chondoŋ solioo choo choo a kundaa latulu? (b) Nyunala kuɛɛ naŋ cho yɛ yaasiaa o buŋgɛi hei niŋ?

² Vɛɛ ŋ yiyaŋ yɛ le chondoŋ solioo choo choo a kundaa latulu? Baa mi siɔmbulaŋ la bii num? O naamulaŋ lapum niŋ, waŋpiaanduaa ve fɛɛsɛŋ le chondoŋ solioo acheleŋnda o hɔl te. Kaa hoo tosa mbo paaliaŋ kundaa kpede, taama taama te bɛnduaa kundaa kɛɛ pɛ le chondoŋ solioo ɔɔ ma wa walta cheleŋ tosaa a teleŋ naŋ soli chondoŋ ndo.—Sam 30:​12.

³ Chondoŋ solioo cho vɛlɛ nyɛ naŋ tosa le Chɛhowa piɛiyo wo ni. Lelaŋ, o bɛnda miŋ wa balɔɔ ɔɔ miŋ bendu pɛl koŋ o bɔŋaŋ naa le. Lelaŋ, naa kpou nɔ miŋ nyunaŋ aa, ‘Vɛɛ ya yiyaŋ yɛ le chondoŋ solioo o bɔŋaŋnda naalaŋ? Yɛɛ ya nɔ yɛ mi tosa te I kiisaŋ pɛ le chondoŋ solioo acheleŋnda o hɔl? Nduyɛ vɛɛ ya nɔla yɛ mi soli chondoŋ a kɔllo kpou?’

NYƐ SƆVIƆƆ PILA CHONDOŊ SOLIOO CHO LE PIƐILE TONYALEŊ NI

4, 5. Kɛɛsiaala yɛɛ wa yɛ sindɛ o Isɔluɛi niŋ le chondoŋ solioo o maaŋndo niŋ?

⁴ Chɔŋ o sindɔɔ niŋ, wanaa cho Chɛhowa piɛiyo wa cho nyɛchaa soliŋndo kpeku le ndu saŋgalaa. O kpeekpei niŋ, teleŋ Isɔluɛiya ndaa tiindaŋ o Chɛhowa niŋndo, chondoŋ solioo wa nyɛ sɔvɛ le piɛile nda leŋ. Le taamaseliiyo, mɛɛ Deeve tosa kɛɛsiaalaŋ le maaŋndo, mbo kɔɔna Livaiya 4,000 le Chɛhowa saŋgalaa a nyɛchaa. Le hei, ma pɛɛku waŋnda 288, nduyɛ wanaa ndaa “nɔ taasioo le nyɛ chaa lɔɔ” o Chɛhowa lo “wa nda wa ni.”—Koloniko Tasoo 23:​5; 25:​7.

⁵ Nyɛchaa a chondoŋ solioo wa nyɛ sɔvɛ a teleŋ nda wa maaŋndo kumbioo wo. Baabuiyo dimul naa aa, “Livaiya kinɛi, mi nda sim o maaŋndo ikɛi, kumbu paaleŋ le chaŋndo, a chɛŋchɛŋndoŋ o laba, a towalaŋ nduyɛ, a nyɛm chaa iyooŋ ŋ cheleŋ ndoŋ. . . . Chondoŋ ni, bululaŋ ni, chɛŋchɛŋndoŋ ni, a nyɛm chaaŋ ŋ pilɔŋ, nyɛ o nyɛ wa kɔlaŋ diomndo o pilɛ kpe le Mɛlɛka Yaawɛɛ saŋgalaa. . . . Mi yumbu yumbu ikpuŋgbaa, latulu a paŋgele chɔm maa Mɛlɛka Yaawɛɛ cho a nda latulu wo, o kumbu chiɛi Mɛlɛkaa kpu.” Yiyaŋndɔ mɛɛ chuuŋgiaŋndo hoo ndoo kindi tiindaŋ Isɔluɛiya yɛ!—Koloniko Diiŋ Ndɔɔ 5:​11-14; 7:​6.

6. Kɛɛsiaala yɛɛ Nɛhimaya ndoo tosa yɛ le nyɛchaa a chondoŋ solioo teleŋ o wa masa ibuŋgaa Chulusɛlɛmndo?

⁶ Mi Nɛhimaya ndoo kɔɔna Isɔluɛiya le saasaa Chulusɛlɛm miŋgioo taŋgullo wo bɛɛ chuuŋgiaa Livaiya le chondoŋ solioo a nyɛchaa lɔɔ. Mi nyɛ o nyɛ yɔŋnuŋ nyɛkɛndɛi le wali nda tosa teleŋ nda wa saasa chioo kumbioo wo. Mi Nɛhimaya hɛli “wanaa ŋchonduaa kundala bɛndulaŋ la tiɔɔŋ le Mɛlɛka balikaa mello o chondoŋ niŋ.” Wanaa ŋchonduaa wa balɔɔ o saasa balu chioo wo choo haaa ma huŋ bɔŋaŋ o fondaŋ maaŋndo wa isisi wo. Wanaa wa kɔɔli kɔɔli wa bɛɛ wa nda diomndaŋ tueiyɔɔ a chonduŋ nda wa solioo woŋ. (Nɛhimaya 12:​27-29, 31, 38, 40, 43) Ŋ nɔ laalaŋndo maa mi Chɛhowa hini kɔl mɛɛ o tuei wanaa nduaa ndu saŋgalaa o chondoŋ niŋ a dialuŋ fulaa.

7. Vɛɛ Chiisu chɔm yɛ maa chondoŋ solioo cho wa nyɛ sɔvɛ le Kilisiɔŋnda o Mɛlɛka piɛiyo niŋ?

⁷ O teleŋ Chiisu wo niŋ bɛɛ, nyɛchaa wa nyɛ sɔvɛ le piɛile tonyaleŋ. Yiyaŋndɔ a nyɛ ndoo yɔŋnuŋ o paale sɔvɛ sɔvɛ le bɛndeŋ choo wo. Mɛɛ Chiisu chii Nyɛdiaa Ichɔl Salamanɔɔ dio nda buɛiyaa nduaa, mi nda kpou soli chondoŋ le Chɛhowa saŋgalaa.—Nuawɔ Maatiu 26:​30.

8. Vɛɛ Kilisiɔŋaa tasiaa kɛsi yɛ taamasi kɛndɔɔ le Mɛlɛka saŋgalaa o chondoŋ niŋ?

⁸ Mi Kilisiɔŋaa tasiaa kɛsi taamasi kɛndɔɔ le Mɛlɛka saŋgalaa o chondoŋ niŋ. O maaŋndo niŋ Isɔluɛiya ndaa kua Chɛhowa piɛiyo ni. Kɛ Kilisiɔŋnda nda o chiɛila ndalaŋ ndaa chuuŋgiaŋ ni. Mi che bɛɛ chiɛilaŋ ndaŋ la ve la kɛndɛ maa maaŋndo le, kɛ mi puaapiliaa ndaa soli chondoŋ a dialuŋ fulaa. Mi Pɔɔl, wana Chiisu vem hɔlte ndɔ wo dimul puaapiliaa Kilisiɔŋnda aa, “La pɛɛkaŋ vellaa velle mi la siiliaŋ o nɛi o nɛi kɔl kalu niŋ. O koŋ kɔɔli, la soli chonduŋ cho o yau ŋchondu Mɛlɛkaa niŋ ndoŋ, . . . a chonduŋ nyina Mɛlɛkaa duau nya o lakɔl loŋ. La mel Mɛlɛka balikaa o chondoŋ niŋ a kɔlta nyalaŋ kpou.” (Kolosiaŋnda 3:​16) Ŋ nɔ miŋ soli chonduŋ cho o yau naa ŋchondoo niŋndo le miŋ “mel Mɛlɛka balikaa.” Chondoŋ cho o nyɛdiaa naŋ sɔla a teleŋ naŋ nɔ le nyɛdiaa dioo wo tɛɛŋ, o “buɛi cho sakpo, nduyɛ, mbo wa buɛi kɔl kalu wo” cho naa kioo wo.—Maatiu 24:​45.

VƐƐ Ŋ SOLI YƐ CHONDOŊ A KƆLLO KPOU?

9. (a) Le yɛɛ apum kiisaŋ yɛ le chondoŋ solioo a kɔl kɛndɛ o bɔŋaŋnda naalaŋ? (b) Vɛɛ naŋ nɔ yɛ miŋ soli chondoŋ o Chɛhowa lo, nduyɛ nɛɛ yaa nɔ yɛ ma chua chilaŋ? (Tofa fotueiyo o peele naŋ kandu leŋ choo.)

⁹ Ɔɔ sabulaŋ lapum la tosa naapum ma kiisaŋ le chondei solioo wo? Naapum la soli chondoŋ o yuŋgu nyaa ɔɔ o naamu nyaa niŋ te. Ɔɔ naapum ma yaŋ nilaŋ o wanaa chaa chondoŋ solioo tau wa o alaadioo ɔɔ tɛlivisiɔŋndo choo. Nduyɛ te a tuu pɛ numpila a mɛɛ waŋnda haa soli chondoŋ yɛ, mi siɔmbulaŋ la bii num ɔɔ ma tambu kɔl. Kɛ naa kpou nɔ kalaŋndo le chondoŋ solioo o Chɛhowa lo. Lelaŋ, bii yau num ŋchondoo ma heelu choo choo, ma heelu bolleŋ, nduyɛ ma soli chondoŋ a dialuŋ fulaa! (Ɛsilua 3:​11; nuawɔ Sam 147:​1.) Toŋgola leMasa bɔɔbɔɔ hau nɔ tɛlivisiɔŋndaŋ le chɔɔ diomnda chonduŋ naŋ kpendekele, nduyɛ hoo mala naa le miŋ soli chondoŋ. I cho vɛlɛ suɛi sɔvɛ le sinaa maa ŋ cho niŋ wa chonduŋ naŋ solioo o Sukuu Bɛnduaa Kundaa a Buɛiyaa Malalaŋnda. Hei chɔm ni kɛsɛ maa bɛnduaa nɔ ma chua chilaŋ le chondoŋ solioo o bɔŋaŋndaŋ o kundaa niŋ.

10. Yɛɛ naŋ nɔ yɛ miŋ loonuŋ te ŋ wa pɛ siooŋnde le chondoŋ solioo choo choo?

¹⁰ Mi wanaa bɔɔbɔɔ wa a siooŋnde le chondoŋ solioo choo choo kanifuule, ma yiyaŋ maa a cho deŋi ɔɔ a nɔ diom kɛndɛ le. Kɛ, yiyaŋndɔ a hei okɔɔ. “Naa kpou mi ŋ tosa biondɔŋ ndaŋ tau” te ŋ wa suɛi pɛ. Kɛ keŋ kuuna naa suɛi le. (Chemisi 3:​2) Lelaŋ, le yɛɛ mi diomnda naala hakilaŋ la kuuna naa chondoŋ solioo le Chɛhowa saŋgalaa?

11, 12. Vɛɛ naŋ tosa yɛ hiouwɔɔ lachioo o chondoŋ solioo niŋ?

¹¹ Naapum mi siooŋnde wa naa le chondoŋ solioo kanifuule, ŋ chiee le. Kɛ sɔɔŋ tɛtɛlɔŋ pum cho ŋ naŋ nɔ miŋ tosa le hiouwɔɔ lachioo tosaa o chondoŋ solioo niŋndo.a—Tofa tɛɛsiaa amatou.

¹² A tiuba ma soli chondoŋ choo choo nduyɛ a diomnde bɛndu leŋ te a pɛɛku pɛ le yoomuaŋ chuaa nyɛkɛndɛi. O cho ko mɛɛ nyɛ yɔŋgu yiŋnde chɛnɛwɛileŋ kpaayaa le mi nyɛ wawoŋndo wa wo cho naa yɛ, lende koni yoomuma numndaŋ ma yɔŋgu diom numndo kpaayaa le suɛi ɔɔ chondoŋ solioo ni. Wa chondoŋ solioo choo choo kpeleŋ mbo hiou mɛɛ ŋ suaa yɛ. Baabuiyo dimi pɛŋ maa teleŋndaŋ lapum, mi wanaa Chɛhowaa ndaa “deŋi choo choo a kɔl kɛndɔɔ” te ndaa wa pɛ chondoŋ solioo.—Sam 33:​1-3.

13. Tɛɛsiaawɔ mɛɛ naŋ soli chondoŋ a kɔllo kpou yɛ.

¹³ Teleŋ pɛɛku leyuŋgoo ɔɔ pɛɛkɔŋ ipilayaa, kindiŋ ma tol kɛɛsiaalaŋ ndaŋ kɔɔli. Hɛli chondii ŋ hɛnaŋ nde ipilɛ o yau naa ŋchondoo niŋ. Veelu fɛlɛŋ diomnda cho o chondii keŋ niŋnde choo choo o diomnde bɛndeŋ niŋ. Okoŋ kɔɔli, soliŋ vɛlɛ diomnde pilɛ le leŋ kpeku, ma veelu diomndaŋ o pulaleŋ niŋ kpou a siŋga yoomoo le. Soli niko pulale leŋ a diom pilɛ koŋ kpe. (Aisaya 24:​14) A cho diom kɛndɔɔ nɔ o chondoŋ solioo niŋ, nduyɛ keŋ bɛnda bɔɔ. Siooŋii wa num ɔɔ mi siɔmbula bii num le keŋ tosaa le!

14. (a) Vɛɛ sondoo kumbioo tau o chondoŋ solioo niŋ mala yɛ naa? (Tofa kɔfoo “Mɛɛ Ŋ Tosa Hiouwɔɔ Lachioo o Chondoŋ Solioo niŋ Yɛ.”) (b) Kɛɛsiaala kuɛɛ mala yɛ num le diom kɛndɔɔ nɔɔ?

¹⁴ Le miŋ nɔ diom kɛndɔɔ o chondoŋ solioo niŋ, ŋ nɔ miŋ soliŋ sondo naa kpeku nyɛkɛndɛi. Lelaŋ, te a wa pɛ chondoŋ solioo, kumbi sondo numndo tau mbo hiou mɛɛ ŋ kumbi sondoo le suɛi yɛ. Kɛ yɛɛ ŋ nɔ yɛ ma tosa te a sina pɛ maa a nɔ diom kɛndɛ le? Le ma nɔ diom kɛndɔɔ, a nɔ ma kindiŋ le suɛi walaŋ. A nɔ ma kindi dialloŋ te. Le hei tosaa, ŋ kandu kundaŋ tuupa mi chondei kanduŋ le mi diom naa wa nyɛkɛndɛi. Kɛ te o wa yɛ mi diom numndo wa pandakalaŋ? Le mi diom numndo wa nyɛkɛndɛi, kindi bololaŋ te.

SOLI CHONDOŊ A KƆLLO KPOU

15. (a) Yonda kuɛɛ ndoo yɔŋnuŋ yɛ o bɔŋaŋ i wɔsioo le wɔsi 2016? (b) Sabula kuɛɛ tosa yɛ ma kpɛlɛkiaa yau ŋchondoo?

¹⁵ Wana o wana ndoo kuɛ o bɔŋaŋ i wɔsioo le wɔsi 2016 nde wa bɔɔ a kɔl kɛndɛ mɛɛ nda che Ŋgɔɔ Stiiviŋ Lɛt o cho o Dialii Kuumbaŋ Choo Ve choo wo soli yau ŋchondu sɛnɛiyo a suɛi lebolle aa, “Soli Chonduŋ Kɔl Kɛndɔŋ Choo Choo” o Chɛhowa Lo. Mi Ŋgɔɔ Lɛt tɛɛsiaa maa, saboo opilɛ o naŋ yeema yau ŋchondu sɛnɛiyo wo wa ni, le mɛɛ New World Translation of the Holy Scriptures sɔla kpɛlɛkiaa yɛ. Ma siŋga diomnda naŋ seeluŋ ndɛ o New World Translation nda kpɛlɛkiaa wo niŋ te laŋ. Nduyɛ ma chɔɔlu chonduŋ sɛnɛi soo a wali dimiaa yooŋgu kɛndɔɔ okɔɔ vɛlɛ a sala baŋaa wo. Le handɔɔ lechoo, le mɛɛ chondoŋ solioo cho nyɛ sɔvɛ le naa o Mɛlɛka piɛiyo niŋ yɛ, lelaŋ Dialii Kuumbaŋ Choo Ve ndii yeema yau ŋchondu sɔvɛ sɔviɔɔ solioo ni. Kɔɔle pilɛ leŋ kpe yau ŋchondu sɛnɛiyo hoo nɔ a New World Translation ni.

16, 17. Ɔɔ siŋgaŋnda cheleŋndaŋ lapum o yau ŋchondu sɛnɛiyo niŋ?

¹⁶ Le yau ŋchondoo hoo soliŋndo kpeku o nɛi tɛtɛlɔɔ choo, chondoŋ cho ŋ hɛɛndaa a kundalaŋ o sɔɔŋ lebolloŋ bɛŋgu. Le taamaseliiyo, a Chɛhowa okɔɔ chonduŋ tase 12 ndoŋ soo ni. Nduyɛ a Chiisu okɔɔ vɛlɛ a sala baŋaa chonduŋ 8 cheleŋ soo ni, a sɔɔŋ cheleŋ. Sɔɔŋ lebolloŋ le chondoŋ muŋ kpou cho o lepula o yau ŋchondoo hoo kandɔŋndo. Hoo mala puaapilɛnɔɔ tau te o yeema pɛ chondei hɛlioo le suɛi luŋnde.

¹⁷ Le malaa wana o wana fee le chondoŋ solioo a kɔllo kpou, ma siŋga diomndaŋ lapum le mi chondoŋ wa walaŋ. Nduyɛ chondoŋ ŋpum bɛɛ ma siŋga muŋ le miŋ chɛlaŋ a bɔŋaŋnda naalaŋ vɛlɛ a wali pollo. Le taamaseliiyo, chondei hei “Hini Kɔl a Ke Mɛlɛkaa,” naŋ soliŋ ndi kpeku tau le. Lelaŋ, ma siŋga ndi a chondii nɔ suɛi lebolle aa, “Pɛɛku Waŋnda Diom Mɛlɛkaa.”

18. Le yɛɛ naŋ nɔ yɛ miŋ pɛɛku chondoŋ o yau naa ŋchondu sɛnɛiyo niŋ? (Tofa tɛɛsiaa amatou.)

¹⁸ Chonduŋ bɔɔbɔɔ o yau “Soli Chonduŋ Kɔl Kɛndɔŋ Choo Choo” o Chɛhowa Lo cho maa piɛileŋ o Chɛhowa lo. Chondoŋ muŋ mala num ma dimul Chɛhowa nyɛ cho yiyaŋ numndo wo. Chonduŋ cheleŋ mala le naa kpeeŋiaa le chɔmndo “kaalaa a sɔɔŋ kɛndɔŋ tosaa.” (Hibuluiya 10:​24) Ŋ nɔ miŋ sina chonduŋ naŋ nyɛkɛndɛi, mɛɛ naŋ nɔ miŋ soli muŋ yɛ, nduyɛ a diomnda cho leniŋ ndaŋ. Nɛiyo opilɛ o naŋ tosa heiyo cho nilaŋ yaŋɔɔ o diomnda puaapiliaa a ndepiliaa nda chua laŋ ni. Diomnda nda chua laŋ ndaŋ la cho o jw.org. Te a pɛɛku pɛ chondoŋ muŋ o numndo bɛɛ, a tiuba ma soli muŋ a dialuŋ fulaa nduyɛ a kɔllo kpou.b—Tofa tɛɛsiaa amatou.

19. Vɛɛnɛ waŋnda kpou o kundaa niŋ piɛi yɛ Chɛhowa?

¹⁹ Loonuŋ maa chondoŋ solioo cho bɔɔ nyɛ sɔvɛ le piɛile naaleŋ. Nɛi sɔviɔɔ pila cho hoo ni le Chɛhowa chɔmndo maa ŋ kaala ndu nduyɛ maa ŋ nɔ balika melaa le nyɛ o nyɛ o tosa le naa. (Nuawɔ Aisaya 12:​5.) Te a soli pɛ chondoŋ a dialluŋ fulaa, mɛɛ a ke acheleŋnda kɔl dɛɛniaa le mi nda bɛɛ tosa lende. Wana o wana o kundaa niŋ, wa feleŋgɔnɔ, kaasoŋnɔ, ɔɔ wana sɛnɛiyo o tonyaa niŋ, ŋ nɔla miŋ piɛi Chɛhowa o nɛiyo hoo choo. Lelaŋ, kiisaŋ wa num le chondoŋ solioo a kɔllo kpou le. Diikuŋ nɛi chɔmaa wana ŋchondu dimi aa, “La soli chondoŋ mi la saŋgala Mɛlɛka Yaawɛɛ!” A tonya, soli chondoŋ a kɔl kɛndɛ!—Sam 96:​1.