Soliŋ Vidueilaŋ Kpeku le Wanaa ŋ Cho Baabuiyo Pɛɛkoo Wa Pɛɛkoo

Te waŋndo wa wunduaŋ chɔɔ pɛ, mbo tosa mi kɔl ndɔɔ kpou o wa o yɔŋgaŋ, nduyɛ mbo mala ndu le mbo bii nyɛ o cho pɛɛkoo wo bila vɛlɛ mbo loonuŋ ndu. Mi Wana Naa Pɛɛkaa Bɛndoo, Chɛhowa bɛɛ soliŋ wunduaŋ kpeku le waŋnda sɔɔŋ sɔviɔŋ pɛɛkoo. (Chɛ 15:​5; Chɛlui 18:​1-6) Chiisu, Wana Ndoo Chaa Pɛɛkoo wo bɛɛ, mbo soliŋ wunduaŋ kpeku le pɛɛkoo. (Maa. 18:​2-6; 22:​19-21) Wunduma naŋ saaluŋ o wɔsiŋ laŋga hiou woŋ niŋ, nduyɛ mi ma nɔ tɔnɔɔ leniŋ tau wo cho vidueilaŋ ni. Baa a cho pa vidueilaŋ soliŋndo kpeku le wanaa ŋ cho Baabuiyo pɛɛkoo wa pɛɛkoo?

Vidueilaŋ la toosiaŋ niŋ tɔ le naa malaa le waŋnda buŋgaŋ pɛɛkoo o yau Yooŋgu Kɛndɛ Chɛŋ o Mɛlɛka lo Wo niŋ. O kpeekpei niŋ, viduei kɛ kɛ chiɛɛliaŋ a nyunala cho la poonyiaa diki diki o yauwo hoo niŋndaŋ. Yauwo hoo o nda handu o Intanɛtiiyo choo wo nɔ tɛɛŋgoŋ le chɔmndo teleŋ ŋ nɔ le vidueilaŋ ndaŋ chɔmndo wo. Le handɔɔ lechoo, vidueila cheleŋ la cho le malaa yaula pɛɛkaa naŋ nɔ o Kɔfu Nyɛm Waliŋ Naŋ Pɛɛku Waŋnda Woŋ niŋ.

A cho pa wana ŋ cho pɛɛkoo wo suɛi lebolii Baabui kendu bila biyɔɔ ve pɛɛkoo? Baa wana ŋ cho pɛɛkoo wo cho pa chɔulabaa a simullo opum? Yaasiaa vidueilaŋ o jw.org® a Tɛlivisiɔŋ Seiyaa Chɛhowaa le ma saaluŋ o mala ndu wo. Naapum la tofa vidueilaŋ ndaŋ opilɛ latulu a wana ŋ cho pɛɛkoo wo. Okoŋ mi la suukaŋ lechoo.

Ipaŋgu o ipaŋgu, vidueila sɛnɛilaŋ la cho fulaa. Te a wa laŋ tofaa pɛ, yiyaŋ mɛɛ ŋ soliŋ ndaŋ kpeku yɛ te a wa pɛ acheleŋnda pɛɛkoo.