A Nɔla Ma Tosa Mi Yuŋgu Numndo wa a Kɔl Kɛndɛ

Chɛhowa yeema mi yuŋgulaŋ la wa a kɔl kɛndɛ. (Sam 127:​3-5; Iki 9:​9; 11:​9) Kɛ, lepum mi kɔl kɛndɛ naa hɛluŋ naa te ŋ hiu pɛ buulaŋndo a sɔɔŋ cho o chieeŋndo niŋndoŋ okɔɔ, ɔɔ te wanaa cho o yuŋgoo niŋnda tosa pɛ biondɔŋndaŋ. Yɛɛ wana o wana nɔ yɛ mbo tosa le mi kɔl kɛndɔɔ wa o yuŋgoo niŋ?

Pɔnɔɔ nɔ mbo ke laa ndɔ bɛɛleŋ. (1Pi 3:​7) O nɔ mbo chua teleŋndo tau a ndu latulu. O nɔ mbo chɔm yeemɛi nduyɛ mbo chɔm balika melaa le nyɛ o nyɛ o cho tosaa le ndu, vɛlɛ a yuŋgu ndɔɔ. (Kol 3:​15) Mbo chɔm mɛɛ kpɛ o kaala ndu yɛ, nduyɛ mbo saŋgala ndu.—Pulɔ 31:​28, 31.

Mi lanɔɔ nuuviaa nɛila o toolu pɔnɔ ndɔlaŋ. (Pulɔ 31:​12) O nɔ mbo tusiŋ pɔnɔ ndɔ o ba bɛŋgu nduyɛ ma tosa wallo diompilɛ. (Kol 3:​18) Mbo soo o ndu lo a lebɛɛ nduyɛ mbo dimi sɔɔŋ kɛndɔŋ a ndu okɔɔ.—Pulɔ 31:​26.

Mi kalaŋ chuauwa chua teleŋndo a chuauwaa ndaa latulu. (Di 6:​6, 7) Ma dimul chuauwaa ndaa maa a kaalaa nda tau. (Mat 3:​17) Te a wa nda pɛ silaa ma chɔm kaalaa a sinapɛŋgoo.—Ɛfi 6:​4.

Mi chuauwa tusiŋ nduyɛ ma diikuŋ wanaa velu nda wa. (Pulɔ 23:​22) Ma dimul wanaa velu nda wa yiyaŋnda ndalaŋ vɛlɛ a mɛɛ nda cho sinaŋndo yɛ. Ma chɛl sila wanaa velu nda wa ke nda wo nduyɛ ma ke nda bɛɛleŋ.—Pulɔ 19:​20.

LA TOFA VIDUIƐYO HOO TOSA MI KƆL KƐNDƆƆ WA O YUŊGU NUMNDO NIŊ, OKOŊ MI LA MULI NYUNAA HOO:

Yɛɛ wana o wana ndoo tosa yɛ le mi kɔl kɛndɔɔ wa o yuŋgoo niŋ?