Silaa, Nɛi Chɛhowa Chɔm Maa O Kaala Naa wo O Cho Ni

O kpeekpei niŋ, silaa cho ni, waŋndo nɛi chɔmaa kioo a ndu pɛɛkoo. Kɛ o wa vɛlɛ le waŋndo lɔɔ a ndu miŋgioo o nɛi. Mi Chɛhowa sila naa le halikpeŋ miŋ piɛi ndu o nɛi o yeema wo choo. (Luom 12:​1; Hibu 12:​10, 11) Teleŋndaŋ lapum, miŋ tambu kɔl te a sila naa pɛ. Kɛ te ŋ dɔu ndu pɛ o wali niŋ, mi keŋ tosa miŋ wa sakpo Mɛlɛka o hɔl, nduyɛ mbo dɔu naa sala. (Pulɔ 10:​7) Yɛɛ wanaa yɔŋgu silaa wa a wanaa nda ke silaa wa nɔ yɛ ma kɛsiŋ o kɔl?

Wana yɔŋgu silaa wo. Mi bɛnduaa kundaa, kalaŋ chuauwa, a wanaa cheleŋnda kindiŋ kpoke le taamasi Chɛhowaa tolɔɔ kɔɔli le silaa yɔŋgoo o nɛi kaalaa niŋ. (Chɛlui 46:​28) O yɔŋ bɛɛ aa sila kala kalaa naŋ cho waŋndo yɔŋgoo ni, o nɔ mbo chɛlaŋ a suɛi o tosa ve, nduyɛ miŋ tosa ndi o nɛi kaalaa niŋ.—Tai 1:​13.

Wana nda ke silaa wo. Mɛɛ o mɛɛ nda ke naa silaa pɛ, ŋ nɔ miŋ kɛɛ ndu le. Kɛ ŋ nɔ miŋ dɔu ndu o wali niŋ sakpo. (Pulɔ 3:​11, 12) Le mɛɛ naŋ cho wanaa lahakiaa yɛ, naa kpou yeema silaa, nduyɛ miŋ sɔla ndu o nɛila yɛ yɛ laŋ niŋ. Lepum, miŋ sɔla silaa o nyɛ naŋ veelu diomndaŋ o Baabuiyo niŋndo niŋ, a o nyɛ naŋ tuɛi o bɔŋaŋnda leKilisiɔŋndaŋ ndo niŋ. Ɔɔ lepum, miŋ waŋnda sɔla silaa bɛnduaa kialu yamaŋ o kundaa niŋ nda o ba. Te ŋ dɔu pɛ sila nda ke naa wo o wali niŋ, mi keŋ tosa miŋ hiou lachi a waa yoomu.—Pulɔ 10:​17.

TOFA VIDUEIYO HOO WANAA CHƐHOWA KAALA WA NDA O MIŊGI O NƐI NI, OKOŊ MI LA MULI NYUNALAŊ NDAŊ:

• 

  Vɛɛ yoomu Kanɔŋ ndo ndoo kanduŋ yɛ, nduyɛ vɛɛ o siŋgaŋ yɛ?

• 

  Vɛɛ Chɛhowa ndoo sila yɛ ndu o nɛi kaalaa niŋ?

• 

  Yɛɛ suɛi nduɛi yɔŋnaŋnde pɛɛku yɛ naa?