Te Ŋ Toolu pɛ Sila Chɛhowa Ke Waŋndo wo, Mɛɛ Kaalaa Naŋ wa Koŋ Chɔmndo Ni

Te wana kɛɛ le yɔŋ ndɔ wɔɔŋndo malɔɔ wo sɔla pɛ solioo, mi keŋ manda kundaa nduyɛ mii sila wana koŋ. (1Kɔl 5:​6, 11) Nduyɛ, te ŋ toolu pɛ sila Chɛhowa ke wana koŋ ndo, mɛɛ kaalaa naŋ wa koŋ chɔmndo ni. Kɛ, vɛɛ hei wa yɛ tonya? Ŋ sina maa te waŋndo sɔla solioo o kundaa niŋ pɛ, mi wanayaŋ ndɔŋ, bɛnduaa kialu yamɛiya, a wana o wana tambu kɔl.

O wa bɛɛ lende, mi toolu naŋ yɔŋgu koŋ ndo chɔm maa ŋ kaala sawa Chɛhowa dɔu a diondɔɔ okɔɔ wo, nduyɛ maa ŋ yeema mi tɔɔ wɔɔŋ wa o diola ndɔlaŋ choo le. (1Pitɛ 1:​14-16) Miŋ chɔm vɛlɛ maa ŋ kaala wana sɔla koŋ solioo wo. Mi che bɛɛ mi sila kala kala wana koŋ sɔla wo tɛɛmbuu ndu kɔllo, kɛ mi keŋ tosa mbo sɔla “kɔl nyuloo o wana sɔla sanaa a waa Mɛlɛka o hɔl sakpo wo.” (Hibu 12:​5, 6, 11) Te ŋ holnuŋ pɛ wana sɔla solioo wo, ɔɔ wana dimi maa o cho lɛ Sei Chɛhowa le wo, mɛɛ kuunaa naŋ wa koŋ Chɛhowa wana koŋ silaa ni. Nduyɛ ŋ nɔ miŋ loonuŋ maa te Chɛhowa wa pɛ wanaa nduaa silaa, ‘o nɛi kpeekpei o tosa ndi ni.’ (Chɛlui 30:​11) Ŋ nɔ tiindaŋndo maa wana sɔla koŋ solioo wo cho miiŋgu Finya naa inyiɛɛyo o ibuŋ. Kɛ tuupa mi keŋ yɔŋnuŋ, ŋ nɔ miŋ hiou lachi a sila Chɛhowa ke wana koŋ ndo tooloo, nduyɛ miŋ wa sɔɔŋ mala naa le loo o chaŋyɛi niŋ a Chɛhowa woŋ tosaa.—Ai 1:​16-18; 55:​7.

TOFA VIDUEIYO HOO CHƆM LOLECHOO WO A KƆLLO KPOU, OKOŊ MI LA MULI NYUNALAŊ NDAŊ:

• 

  Kɔl saŋgaa yɛɛ kalaŋ chuauwaa Kilisiɔŋnda sɔla yɛ, te chua ndaa mal pɛ Chɛhowa piɛiyo?

• 

  Vɛɛ kundaa toolu yɛ yuŋgu cho lechoo wo chɔmndo o Chɛhowa lo wo?

• 

  Bundɛi Baabui kuɛɛ chɔm yɛ maa o bɛnda miŋ chɔm lolechoo wo o Chɛhowa lo mbo hiou yuŋgu naa?

• 

  Vɛɛ naŋ chɔm yɛ lolechoo wo o Chɛhowa lo mbo hiou yuŋgu naa?