Puaapiliaa Feleŋguaa, La Tol Tamasi Maki Nda Timoti Wo Kɔɔli

1-2. Simulta kuɛɛ laa tiu yɛ ba mi laa kuuna Maki nda Timoti le yɔŋgɔŋndo tau le acheleŋnda malaa?

PUAAPILIAA feleŋguaa, baa la yeema pa mi la tosa tau o wali Chɛhowa wo niŋ, nduyɛ mi la mala acheleŋnda o kunda nyaa niŋ? A tonya, la nɔ yeemɛi keŋ. Nuawɔ se suɛi kɛndɛ bɛndu, le chɔɔ puaapiliaa feleŋguaa bɔɔbɔɔ nɔ yeemɛi le acheleŋnda malaa wa! (Sam 110:3) Naapum mi simultaŋ la komal num. Baa kiisaŋndo cho num pa le tosaa tau o wali dimiaa yooŋgu kɛndɔɔ niŋ, le mɛɛ ŋ sina mɛɛ sɔɔŋ wa niŋ a num o chilaŋ niŋ yɛ le yɛ? Baa a kɛɛ niŋ pa dikeŋnaŋndo opum le mɛɛ ŋ yiyaŋ maa a chiee niŋ ndu tosa le yɛ? Te lende i cho ni, mɛɛ a cho wana tase le yiyaŋ waa nuaa nɔɔ le.

² Mi simul waa nuaa komal Maki nda Timoti. Mi che bɛɛ ma yiyaŋ maa a suliŋ le dikeŋnaŋ ndaa sɔla wo le, ɔɔ a chiee niŋ ndu tosa le, kɛ keŋ kuuna nda yɔŋgɔŋndo le acheleŋnda malaa le. A teleŋ kiilanɔɔ Pɔɔl nda Banabaa veelu Maki le kɔlaŋ a nda latulu o balɔɔ nda lemisiɔnaluei tasoo niŋndo, naapum Maki waŋnuŋ latulu nda kala ndɔ o chiɛi kɛndɛ kɛndɔɔ niŋ. (Walta. 12:​12, 13, 25) Mi Maki mal fonda ndɔ kɛndɛ kɛndɛ koŋ le tosaa tau o wali dimiaa yooŋgu kɛndɔɔ niŋ. O tasela ndɔ, mbo kua Aŋtiɔɔ. Okoŋ kɔɔli, mbo liila Pɔɔl nda Banabaa o fondaŋnda levilta cheleŋ. (Walta. 13:​1-5) Naapum Timoti bɛɛ wa a wanaa velu ndu wa latulu, mi Pɔɔl veelu ndu le ma kuɛ yooŋgu kɛndɔɔ dimioo. Feleŋgɔnɔɔ Timoti bɛɛ wa ni nduyɛ ndoo nɔ taasi bɔɔ le. Hei ndii tosa mbo yiyaŋ maa, o suliŋ le ma kuɛ nda Pɔɔl latulu le. (Tuuwɔ 1 Kɔliŋtiaŋ 16:​10, 11 a 1 Timoti 4:12.) Kɛ a koŋ kpou, mbo chɛl le ma kuɛ nda Pɔɔl latulu, nduyɛ mbo mɛɛlu salalaŋ sɔla tau.—Walta. 16:​3-5.

3. (a) Vɛɛ kpɛ Pɔɔl chɔm yɛ balika melaa le Maki nda Timoti? (2 Timoti 4:​6, 9, 11) (Tofa vɛlɛ fotueilaŋ.) (b) Nyunala kuɛɛ naŋ cho yɛ yaasiaa o buŋgɛi hei niŋ?

³ Mi Maki nda Timoti pɛɛku le walta yɛ yɛlaŋ tosaa o kundaa niŋ teleŋ nda wa feleŋguaa wo. Pɔɔl ndoo nɔ balika melaa tau le puaapiliaa feleŋguaa haa. Nduyɛ mɛɛ o sina maa o nɔ le piɔmndo sɔlaa, mbo dimul nda le ma wa a ndu latulu. (Nuawɔ 2 Timoti 4:​6, 9, 11.) Suliŋnda kuɛɛ tosa yɛ mi Pɔɔl hɛnaŋ a Maki nda Timoti? Vɛɛ puaapiliaa feleŋguaa tuallɛ tamasi ndaa kɔɔli? Nduyɛ, vɛɛ nda sɔla yɛ tɔnɔɔ o sila Pɔɔl lo niŋ?

TOL TAMASI MAKI WO KƆƆLI LE YƆŊGƆŊNDO WULEE LE ACHELEŊNDA MALAA

4-5. Vɛɛ Maki ndoo chɔm yɛ maa ndoo yeema acheleŋnda malaa a kɔllo wulee?

⁴ A mɛɛ yau pilɛ dimi yɛ, yɔŋgɔŋndo le acheleŋnda malaa sim ni, wallo tosaa kalaŋ le nda malaa, nduyɛ miŋ hiou lachi a keŋ tosaa. Mi Maki kɛsi tamasi kɛndɛ kɛndɔɔ o hei niŋ. Mɛɛ Pɔɔl kɛɛ le kɔlaŋ a Maki o balɔɔ ndɔ leMisiɔnaluei diiŋ ndɔɔ, naapum mi suɛi pala ndu nduyɛ mbo tambu kɔl tau. (Walta. 15:​37, 38) Kɛ, keŋ tɛɛmbuu Maki kɔllo mbo kɛɛ le puaapiliaa a ndepiliaa nduaa malaa le.

⁵ Mi Maki kua nda wanayɛi nduɛi Banabaa, o fondaŋ cheleŋ le puaapiliaa a ndepiliaa ndaa malaa. Wɔsilaŋ 11 okoŋ kɔɔli, teleŋ Pɔɔl wa o biyɔɔ niŋ Luom ndo, Maki wa waŋndo o pilɛ o wanaa ndaa yɔŋguŋ le kiilanɔɔ Pɔɔl malaa wa tɛɛŋ. (Filim. 23, 24) A tonya, mi Pɔɔl chɔm balika melaa le mala Maki mala ndu wo. Lelaŋ pɛŋ o dimi a ndu okɔɔ ni aa: “A luei ya niŋ yoomuaŋ tau.”—Kolo. 4:​10, 11.

6. Tɔnɔ yɛɛ Maki sɔla yɛ le chaŋyɛi tosaa a Kilisiɔŋaa kendu o Mɛlɛka piɛiyo niŋnda? (Tofa tɛɛsiaa amatou.)

⁶ Mi Maki sɔla tɔnɔɔ tau le chaŋyɛi tosaa a Kilisiɔŋaa kendu o Mɛlɛka piɛiyo niŋnda. Mɛɛ Maki chua tiŋ teleŋndo a Pɔɔl latulu Luom, mbo kua Babilɔŋ naa kiilanɔɔ Pitɛ chua. Mi chaŋyɛi kpɛɛluŋnde luɛi nda tɛɛŋ. Le hei, mi Pitɛ veelu ndu aa: “Maki po ni.” (1 Pit. 5:13) Mɛɛ nda tosa wallo diompilɛ, naapum mi Pitɛ chɔm po feleŋgɔnɔɔ hoo sɔɔŋ bɔɔbɔɔ a yoomu Chiisu wo okɔɔ vɛlɛ a wali ndɔ pollo. O mɛɛlulaŋ, mi Maki poonyiaa sɔɔŋ muŋ o yau nɔ diola ndɔlaŋ o Baabuiyo niŋndo.a

7. Vɛɛ puaapilɛnɔ feleŋgɔnɔ pilɛ diolaŋ Siyɔŋ Wuu, tol lɛ tamasi Maki wo kɔɔli? (Tofa vɛlɛ fotueiyo.)

⁷ Maki wa kpɔndi kpɔndi o wali Mɛlɛkaa niŋ, nduyɛ mbo holnuŋ puaapiliaa kendu o Mɛlɛka piɛiyo niŋnda. Vɛɛ ŋ tuallɛ tamasi Maki wo kɔɔli? Naapum a yeema tosaa tau o wali Chɛhowa wo niŋ, le ma simnuŋ buɛi malalaŋndo ɔɔ bɛndu kundaa, kɛ a suliŋ ndɔ le dikeŋnaŋ koŋ te. Te lende i cho ni, mɛɛ tambu kɔl te. Hiou lachi a sɔɔŋ ŋ tiuba le tosaa le Chɛhowa, vɛlɛ a puaapiliaa a ndepiliaa numnda woŋ. Ŋ tofaŋndɔ tamasi Siyɔŋ Wuu, o cho niŋ bɛndu kundaa wo. Teleŋ o wa feleŋgɔnɔ wo, mi ndoo tuuŋgaŋ a puaapiliaa feleŋguaa cheleŋ. Mi apum sɔla dilakeŋnaŋndaŋ ndu tase. Mi hei tosa mbo chaŋnuŋ chɔdɔ, nduyɛ mbo suukaŋ a puaapiliaa kendu o Mɛlɛka piɛiyo niŋnda a ndi okɔɔ. Mi bɛndu kunda pilɛ dimul ndu maa, o tosa nyɛ o tiuba le acheleŋnda malaa wo, o yɔŋ bɛɛ mi acheleŋnda chi sɔɔŋ kɛndɛŋ o cho tosaa woŋ te. Mi silaa hoo mala Siyɔŋ Wuu mbo yɔŋguŋ le bɛnduaa yuuwa malaa, a wanaa yeema nyɛ nyaanaŋndo le kɔlaŋ o bɔŋaŋndaŋ nda. Mɛɛ o yiyaŋ o suɛi hei choo, mbo dimi aa: “Mi bii bila nyɛ o sim le acheleŋnda malaa wo. Mi sina maa, a nɔla ma wa a kɔl kɛndɛ tau te a yɔŋguŋ pɛ le acheleŋnda malaa.”

TOL TAMASI TIMOTI WO KƆƆLI LE ACHELEŊNDA KAALAA CHƆMNDO

8. Le yɛɛ Pɔɔl ndoo dimullɛ Timoti le ma kuɛ nda ndu latulu? (Filipiaŋnda 2:​19-22)

⁸ Pɔɔl ndoo yeema puaapiliaa nɔ kɔl simulaa wa, le ma kuɛ nda ndaa o chieeŋ bɛnduŋ o wa yooŋgu kɛndɔɔ dimioo ma tusi ndu nyɛpalaa choo woŋ niŋ. Wana tase o dimul le ndu liila wo wa Sailaa ni. Nduyɛ Kilisiɔŋnɔ kendu o Mɛlɛka piɛiyo niŋndo o wa ni. (Walta. 15:​22, 40) Okoŋ kɔɔli, mbo dimul Timoti le ma kuɛ latulu. Le yɛɛ Pɔɔl ndoo yeema yɛ kɔlaŋ a Timoti? Saboo o pilɛ wa ni, Timoti ndoo nɔ tamasi kɛndɔɔ tau. (Walta. 16:​1, 2) Ndoo kaalaa vɛlɛ waŋnda tau.—Nuawɔ Filipiaŋnda 2:​19-22.

9. Vɛɛ Timoti chɔm yɛ maa ndoo kaala puaapiliaa a ndepiliaa nduaa?

⁹ Chɔŋ a teleŋ Timoti kandu yooŋgu kɛndɔɔ dimioo nda Pɔɔl lo, mbo chɔm kɛsɛ maa o buulaŋ le acheleŋnda mbo hiau ndupila. Le saboo hoo, mi Pɔɔl mɛi ndu Bɛluiya kanifuule, mbo duau tiindaŋndo o ndu niŋ maa, o tiuba mbo bii puaapiliaa a ndepiliaa cho loŋ nda nyɛkɛndɛi. (Walta. 17:​13, 14) A teleŋ koŋ, mi Timoti sɔla vɛlɛ tɔnɔɔ tau o tamasi kɛndɛ Sailaa wo niŋ, teleŋ nda wa Bɛluiya wo. Okoŋ kɔɔli, mi Pɔɔl yɔŋ Timoti ndupilɛ kpe Tɛsalonaika, le puaapiliaa yoomuaŋ lueiyo. (1 Tɛsa. 3:2) Le wɔsilaŋ 15 ɔɔ hiouwɔɔ koŋ choo, mi Timoti “chaŋ a wanaa [wa] chaŋndo wa latulu,” nduyɛ mbo bii mɔnɛi le wanaa wa o saŋgaa niŋnda. (Luom. 12:15; 2 Tim. 1:4) Vɛɛ puaapiliaa feleŋguaa tuallɛ tamasi Timoti wo kɔɔli?

10. Vɛɛ puaapilɛnɔ pilɛ diolaŋ aa Wu Cha, pɛɛku yɛ le yeemɛi kpeekpeiye chɔmndo o acheleŋnda niŋ?

¹⁰ Mi puaapilɛnɔ pilɛ diolaŋ aa Wu Cha pɛɛku le yeemɛi kpeekpeiye chɔmndo o acheleŋnda niŋ. Teleŋ o wa feleŋgɔnɔ wo, mi ndoo che ndi ikala le baltaŋ dɔwɔɔ a puaapiliaa a ndepiliaa kaasoŋnda. Le hei, te ndoo yil nda dɔɔ pɛ o Toŋgo leMasaa, o kuɛŋnuŋ. Mi bɛndu kunda pilɛ dimul Wu Cha le mbo kandu baltaŋ dɔwɔɔ a puaapiliaa a ndepiliaa nduaa, sanaa a nda dimullo nyɛ o hɛnaŋ a nda okɔɔ wo. Mi bɛndu kundaa hiau lachi a ndu dimullo maa, o nɔ mbo yiyaŋ a yeemaŋ acheleŋnda. Mi Wu Cha duau sila bɛndu kundaa hoo ke ndu wo o wali niŋ, le suukaŋndo a acheleŋnda. Bɛndu kundaa Wu Cha cho niŋ hau ni. Nduyɛ mbo dimi aa: “I saaluŋ ndi niŋ tɛtɛlɛ le balta sɔvɛ laŋ dɔwɔɔ a wanaa yɛ yiaa. I cho bɔɔ a kɔl kɛndɛ le mɛɛ ya sina niŋ yeemaŋ acheleŋnda yɛ. Hei mala ya niŋ tau le chaaŋaa niaa laalaŋnda malaa.”

11. Vɛɛ puaapiliaa feleŋguaa chɔm yɛ yeemɛi kpeekpeiye le wanaa cho o kunda ndaa niŋnda? (Tofa vɛlɛ fotueiyo.)

¹¹ Nya puaapiliaa feleŋguaa bɛɛ nɔla mi la chɔm yeemɛi kpeekpeiye o acheleŋnda niŋ. Te la kuɛ pɛ o bɔŋaŋndaŋ, la kindiŋ le baltaŋ dɔwɔɔ a wanaa yɛ yiaa, hali a nya fula bɛɛ kɔɔlima pilɛ le wa. Nyuna nda mɛɛ nda cho sinaŋndo yɛ, nduyɛ ma yaŋ nda nilaŋ. O teleŋ biŋgi bɛŋgu, hei cho num mala ma sina mɛɛ ŋ nɔ ma mala nda yɛ. Naapum a cho saalɔŋ maa pɔnɔ a lanɔɔ cho niŋ a yuwɛi ya, yeema malaa le mɛɛ nda soliŋ JW Library^® app. kpeku yɛ. Ɔɔ a cho saalɔŋ maa, a nɔ wana nda kua yooŋgu kɛndɔɔ dimioo latulu wo le. Baa a mala pa wanaa waa nuaa a mɛɛ nda soliŋ nyɛm mapuuluŋ ndaŋ kpeku yɛ, ɔɔ ma tosa kɛɛsiaa le kɔlaŋ yooŋgu kɛndɔɔ dimioo a nda latulu? Te a mala pɛ puaapiliaa a ndepiliaa numnda o nɛi waa nuaa choo, a cho wa wana tamasi kɛndɛ o kunda leKilisiɔŋndo niŋ.

SILA PƆƆL LO TIUBA MBO MALA NUM

12. Vɛɛ puaapiliaa feleŋguaa sɔla yɛ tɔnɔɔ o sila Pɔɔl ke Timoti wo niŋ?

¹² Mi sila Pɔɔl ke Timoti wo mala ndu mbo sɔla batiuwaa o yoomu ndɔɔ niŋ a o wali dimiaa yooŋgu kɛndɔɔ niŋ. (1 Tim. 1:18; 2 Tim. 4:5) Nya puaapiliaa feleŋguaa bɛɛ tiuba mi la sɔla tɔnɔɔ o sila Pɔɔl lo niŋ. Vɛɛ hei yɔŋnuŋ yɛ? Veelu diomndaŋ o yaula tiɔɔŋnda Pɔɔl poonyial Timoti laŋ niŋ, okoŋ ma yiyaŋ maa o numndo o poonyiaa laŋ ni, le sinaa mɛɛ ŋ duau sila cho leniŋndo o wali niŋ yɛ. Ŋ yaasiaŋndɔ tamaseliilaŋ lapum.

13. Yɛɛ mala yɛ num ma chɔm lo lechoo wo o Chɛhowa lo?

¹³ “Kindi kindiŋ kpoke ma pɛɛku numpila le yɔŋgɔŋndo o Mɛlɛka lo.” (1 Tim. 4:7b) Yɛɛ cho yɛ yɔŋgɔŋndo le hɛnaŋ Mɛlɛkaa tosaa? Ndu cho ni, lo lechoo wo chɔmndo o Chɛhowa lo, nduyɛ ma tosa sɔɔŋ nɛŋi ndu kɔllo woŋ. Le mɛɛ naŋ viluŋ a suliŋndo hoo le yɛ, ŋ nɔ miŋ tosa wallo kalaŋ le ndu nɔɔ. Vɛɛ naŋ tosa yɛ keŋ? Diom maKilikii nda soliŋ kpeku le diomndo hoo “pɛɛku numpila” wo, mi ndaa soliŋ ndu kpeku teleŋnda bɔɔbɔɔ, le pɛɛku kala kala wanaa hiiluu dialloŋ nda tosa, le kɔlaŋ kilulaŋndo a acheleŋnda wo. Wanaa hiiluu haa dialloŋ nda nɔ ma dɔu ndapila o mandaa bɛŋgu. Naa bɛɛ nɔ miŋ dɔu naapila o mandaa bɛŋgu, le halikpeŋ miŋ nɔ kaala sɔɔŋguu naa Chɛhowa ikɛi kpɛɛluŋ ndaŋ.

14. Te ŋ wa pɛ diomndaŋ veeloo o Baabuiyo niŋ, yɛɛ nɔ yɛ mbo wa kpeleŋ naa? Chɔmndɔ tamaseliiyo.

¹⁴ Te a nɔ pɛ kaa le diomndaŋ veeloo o Baabuiyo niŋ, kpeleŋ ŋ nɔ ma kɛsiŋ o kɔllo cho le Chɛhowa sɔɔŋguuwo ikɛi kpɛɛluŋ ni. Le tamaseliiyo, te a veelu pɛ diomndaŋ o bundɛi cho a Chiisu vɛlɛ a po feleŋgɔnɔ sulaa ve niŋ, yɛɛ keŋ pɛɛku yɛ num a Chɛhowa okɔɔ? (Maki 10:​17-22) Mi po feleŋgɔnɔɔ hoo laalaŋ maa Chiisu wa Mɛsayanɔɔ ni, kɛ mbo kɛɛ tiindaŋndo dɔwɔɔ le ndu tolɔɔ kɔɔli. A koŋ kpou, Chiisu ndoo nɔ “kaalaa le ndu.” Baa a niŋ kɔl mɛɛ Chiisu soo o po feleŋgɔnɔɔ hoo lo yɛ le? A tonya, Chiisu ndoo yeema ndu mbo tosa kɛɛsiaa a taasi. Tamasi Chɛhowa wo Chiisu wa tolɔɔ kɔɔli ni, le po feleŋgɔnɔɔ hoo kaalaa chɔmndo. (Chɔŋ 14:9) Te a wa pɛ yiyaŋndo a bundɛi hei okɔɔ vɛlɛ a bahawɛila numndaŋ, nyunaŋndɔ aa: ‘Yɛɛ ya nɔ yɛ mi tosa le Chɛhowa sɔɔŋguuwo ikɛi kpɛɛluŋ, nduyɛ mi hiou lachi a acheleŋnda malaa?’

15. Le yɛɛ i cho yɛ suɛi sɔvɛ le mi puaapilɛnɔ feleŋgɔnɔɔ kɛsi tamasi kɛndɔɔ le acheleŋnda? Chɔmndɔ tamaseliiyo. (1 Timoti 4:​12, 13)

¹⁵ “Wa wana tamasi kɛndɛ le wanaa laalaŋnda.” (Nuawɔ 1 Timoti 4:​12, 13.) Mi Pɔɔl dimul Timoti le diomndaŋ veeloo nyɛkɛndɛi, nduyɛ mbo wa wana pɛɛkaa kɛndɛ. Ndoo yeema ndu vɛlɛ mbo nɔ suliŋnda kɛndɛlaŋ mɛɛ kaalaa, laalaŋndo, a waa o diandaa cho nuaa yɛ. Le sabu yɛɛ? Kanifuule, nyɛ waŋndo tosa wo hiou wa o sɔvɛ a nyɛ o dimi wo. Te o yɔŋ yɛ ma ke num pɛllo le solioo o bɔŋaŋndo a mɛɛ naŋ tosa tau o wali pollo niŋ yɛ? A cho pɛllo hoo soli a dialuŋ fulaa, te a wa pɛ tosaa tau o wali pollo niŋ. Nduyɛ wanaa cho num nilaŋ yaŋɔɔ wa cho wa a kɔl kɛndɛ le tamasi num kɛndɔɔ tolɔɔ kɔɔli.—1 Tim. 3:13.

16. (a) O nɛila ŋuɛɛnula kuɛɛ niŋ Kilisiɔŋaa feleŋguaa kɛsi yɛ tamasi kɛndɔɔ le acheleŋnda? (b) Vɛɛ puaapilɛnɔ feleŋgɔnɔɔ kɛsi yɛ tamasi kɛndɔɔ “a mɛɛ o suaa yɛ”?

¹⁶ A mɛɛ 1 Timoti 4:12 dimi yɛ, mi Pɔɔl suaa a nɛilaŋ la ŋuɛɛnu okɔɔ, la mala puaapiliaa feleŋguaa le ma kɛsi tamasi kɛndɔɔ laŋ. Te a wa pɛ pɛɛkɔŋ ipilayaa tosaa, chua teleŋndo le ma handu kɔllo o nɛilaŋ ndaŋ o kɛ kɛ choo. Le tamaseliiyo, ŋ dimi wɔ nuaa maa a yeema ma wa wana tamasi kɛndɛ “a mɛɛ ŋ suaa yɛ.” A nɔ ma yiyaŋ a mɛɛ ŋ soliŋ diomnda numndaŋ kpeku le acheleŋnda taŋgullo yɛ. Te o yɔŋ pɛ maa a cho wɔ a wanaa velu numnda latulu, baa a nɔ pa balika melaa le nyɛ nda cho tosaa le num teleŋ o teleŋ ndo? Te a mal pɛ bɔŋaŋndo, baa a yeema pa ma dimul wanaa soli pɛltaŋ o bɔŋaŋ koŋ nda, nyɛ ŋ pɛɛku o sɔɔŋ ndaŋ niŋndo? A kindiŋ vɛlɛ ma yɔŋgu mulilaŋ o bɔŋaŋnda naalaŋ a mɛɛ ŋ bii laŋ bila yɛ. Kindi kindiŋ numndo le tamasi kɛndɔɔ kɛsioo a mɛɛ ŋ suaa yɛ cho chɔm kpendekele maa, a cho hiouwɔɔ lachioo tosaa o Mɛlɛka piɛiyo niŋ.—1 Tim. 4:15.

17. Yɛɛ cho yɛ puaapilɛnɔ feleŋgɔnɔɔ mala, le mbo komal kpeleŋnda ndɔlaŋ o Mɛlɛka piɛiyo niŋ? (2 Timoti 2:22)

¹⁷ “Fafaŋ yeemaŋ ŋchua piaanduyaŋ. Kɛ kindiŋ ma wa sakpo.” (Nuawɔ 2 Timoti 2:22.) Mi Pɔɔl dimul Timoti le mbo fafaŋ nyɛ o nyɛ kuuna ndu tosaa tau o wali Chɛhowa wo niŋ, vɛlɛ a nyɛ tɛɛmbuu chaŋyɛi nduɛi a ndu wo. A nɔ ma sina vɛlɛ maa sɔɔŋ ŋpum wɔu le tosa le, kɛ miŋ chua teleŋ numndo tau, nduyɛ mi keŋ tosa a nɔ lɛ teleŋ bɔɔ le sɔɔŋ ŋMɛlɛkayaŋ tosaa le. Le tamaseliiyo, yiyaŋndɔ a teleŋ ŋ soliŋ kpeku le pisultaŋ, intanɛtiiyo soliŋndo kpeku, ɔɔ pisulta la vidueilaŋ. Baa a soliŋ pa teleŋ koŋ o tiŋ kpeku le sɔɔŋ ŋMɛlɛkayaŋ tosaa? Naapum a yɔŋguŋ le Toŋgo leMasaa dindioo, ɔɔ yooŋgu kɛndɔɔ dimioo naa waŋnda hiau tau wa a pɛŋgɛi. Te a yɔŋguŋ pɛ o sɔɔŋ muŋ tosaa niŋ, naapum a cho chaŋyaŋ sɛnɛiyoŋ sɔla, ŋ cho num mala ma kɛsi kpeleŋnda iMɛlɛkayalaŋ nduyɛ ma komaltaŋ ndo.

A CHO WA A KƆL KƐNDƐ TE A MALA ACHELEŊNDA PƐ

18. Le yɛɛ naŋ dimi yɛ maa mi Maki nda Timoti tuɛi yoomoo yeela?

¹⁸ Mi Maki nda Timoti yɔŋguŋ le acheleŋnda malaa, nduyɛ mi keŋ tosa ma tuɛi yoomu ndaa yeela. (Walta. 20:35) Mi Maki kua o fondaŋnda yɛ yɛlaŋ o chieeŋndo choo le chaaŋaa nduaa laalaŋnda malaa. Mbo poonyiaa vɛlɛ yooŋgu sɔvɛ sɔviɔɔ a yoomu Chiisu wo okɔɔ vɛlɛ a wali ndɔ pollo. Mi Timoti mala Pɔɔl le kundala sɛnɛilaŋ kilaa, nduyɛ mbo luei puaapiliaa a ndepiliaa yoomuaŋ. A tonya, mi Chɛhowa naŋ kɔl tau le kaa sala soliaŋ Maki nda Timoti chɔm ndo.

19. Te puaapiliaa feleŋguaa dɔu pɛ sila Pɔɔl ke Timoti wo o wali niŋ, yɛɛ cho yɛ wa fulamakɔɔlioo?

¹⁹ Miŋ che kaala Pɔɔl ndoo nɔ le Timoti wo kpendekele o yaula o poonyial ndu laŋ niŋ. Yaula Chɛhowa soliŋ ndaŋ Pɔɔl kpeku le mbo poonyiaa laŋ, la chɔm kpendekele maa, o kaala nya puaapiliaa feleŋguaa. O yeema nya mi la sɔla batiuwaa o ndu piɛiyo niŋ. Lelaŋ, tosa o ŋ tiuba wo le sila Pɔɔl lo dɔwɔɔ o wali niŋ, nduyɛ ma yɔŋguŋ tau le acheleŋnda malaa. Te a tosa lende pɛ, a cho nɔ yoomu sɔviɔɔ suŋ suŋ, nduyɛ “ma kila chiyii kala kalɛi le ma huŋ sɔla yoomu kpeekpeiyo o chilaŋ niŋ.”—1 Tim. 6:​18, 19.