Le Yɛɛ Naŋ Nɔ Yɛ Miŋ Nyuna le Silaa?

1. Vɛɛ naŋ tosa yɛ kɛɛsiaalaŋ a taasi, nduyɛ miŋ sɔla batiuwaa? (Polowaa 13:10; 15:22)

NAA kpou yeema le miŋ tosa kɛɛsiaalaŋ a taasi, nduyɛ miŋ sɔla batiuwaa. Diom Mɛlɛkaa dimul naa maa le miŋ tosa hei, ŋ nɔ miŋ nyuna le silaa.—Nuawɔ Polowaa 13:10; 15:22.

2. Yɛɛ Chɛhowa mɛi yɛ lediom le naa tosallo?

² A tonya, wana kpeekpei naŋ nɔ miŋ nyuna le taasioo a silaa wo cho Finya naa Chɛhowa ni. O mɛi lediom le naa malaa, mbo dimi aa: “I cho num sila, nduyɛ mi handu num hɔlteŋ choo.” (Sam 32:8) Diomndaŋ ndaŋ la chɔm kpendekele maa, o cho ko silaa le Chɛhowa ke naa le, kɛ mbo chɔm yeemɛi kpeekpeiye o naa niŋ, nduyɛ mbo mala naa le miŋ dɔu sila ndɔɔ o wali niŋ.

3. Yɛɛ naŋ cho yɛ yaasiaa o buŋgɛi hei niŋ?

³ O buŋgɛi hei niŋ, ŋ cho Diom Mɛlɛkaa soliŋ kpeku le naa malaa le nyunala hiɔɔlu laŋ ndaŋ mulioo: (1) Le mi sɔla tɔnɔɔ o sila kɛndɔɔ niŋ, suliŋnda kuɛɛ ya nɔ yɛ mi nɔ? (2) Nɛɛ ke yɛ ya sila kɛndɔɔ? (3) Vɛɛ ya chɔm yɛ kpeekpei maa I yeema silaa? (4) Le yɛɛ ya nɔ yɛ mi fafaŋ acheleŋnda nyunaa le ma tosal la kɛɛsiaalaŋ?

SULIŊNDA KUƐƐ YA NƆ YƐ MI NƆ?

4. Te ŋ yeema pɛ miŋ sɔla tɔnɔɔ o sila kɛndɔɔ niŋ, suliŋnda kuɛɛ naŋ nɔ yɛ miŋ nɔ?

⁴ Ŋ nɔ miŋ chɔm kaa tusiaŋndo nduyɛ miŋ sina kpeleŋ naa le miŋ sɔla tɔnɔɔ o sila kɛndɔɔ niŋ. Ŋ nɔ miŋ chɛl maa o cho teleŋ o teleŋ te naŋ nɔ kɔl kaloo ɔɔ taasioo le kɛɛsiaala kɛndɛlaŋ tosaa a ba naa le. Te ŋ ve wanaa tusiaŋ miŋ sina kpeleŋ naa le, Chɛhowa tiuba mbo mala naa le, nduyɛ ŋ veelu bɛɛ diomndaŋ o Baabuiyo niŋ, sila ndɔɔ chel naa o kɔl te. (Maika 6:8; 1 Pit. 5:5) Te ŋ wa pɛ wanaa tusiaŋ nduyɛ miŋ sina kpeleŋ naa, keŋ cho tosa miŋ wa chɔ chɔ le nyɛ naŋ cho pɛɛkoo o Baabuiyo niŋndo dɔwɔɔ o wali niŋ, nduyɛ miŋ sɔla tɔnɔɔ.

5. Batiuwaa yɛɛ Masaa Deeve sɔla yɛ, o ndoo tosa mi ndoo heeluŋ ndo?

⁵ Ŋ yaasiaŋndɔ nyɛ naŋ pɛɛku o tamasi Masaa Deeve wo niŋndo. Mi che bɛɛ mbo tosa sɔɔŋ kɛndɔŋ tau, kɛ o heeluŋ te. Tuupa mbo simnuŋ masaa, waŋnda ndaa sina ndu maa wana ndoo luaa nyɛchaa nyɛkɛndɛiyo o wa ni. Mi Masaa Sɔɔ dimul ndu pɛŋ le mbo loolul ndu nyɛchaa. (1 Sam. 16:​18, 19) Mɛɛ Chɛhowa hɛli Deeve le mbo simnuŋ masaa o chilaŋ niŋ, mbo ke ndu nyina ndɔ diandaa, nduyɛ mi hei tosa mbo simnuŋ wana kpaaya bɛndu. (1 Sam. 16:​11-13) Mi waŋnda saŋgala ndu le mɛɛ o diu yaamɔɔwaa ndaa yɛ, mɛɛ Koolaya kuubanɔ chɔu Filitiaŋnda cho nuaa yɛ. (1 Sam. 17:​37, 50; 18:7) Te Deeve ndoo wa pɛ wana heelaŋ, o wa yiyaŋ maa le mɛɛ o sɔla batiuwaa o sɔɔŋ bɔɔbɔɔ niŋ yɛ, o yeema lɛ sila wana cheleŋ o ba le. Kɛ wana tusiaŋndo Deeve wa ni.

6. Vɛɛ naŋ looku yɛ sina maa mi Deeve chɛl silaa? (Tofa vɛlɛ fotueiyo .)

⁶ Mɛɛ Deeve simnuŋ masaa, mbo hiau lachi a waa o chaŋyɛi kpɛɛluŋnde niŋ a wanaa ke ndu sila kɛndɔɔ wa. (1 Kolo. 27:​32-34) Hei bii naa kɔndɔfili le kanifuule, mi Deeve ndoo chɛl teleŋ o teleŋ le acheleŋnda nilaŋ yaŋɔɔ. O cho ko sila puaa le ndoo chɛl te, kɛ waŋ laanduaa bɛɛ mɛɛ Abikɛɛ cho nuaa yɛ. Pɔnɔ ndɔ ndoo nɔ diolaŋ ni aa Nabal. Wana heelaŋndo pila Nabal wa ni, ndoo nɔ balika melaa le, nduyɛ ndoo nɔ lebɛɛ le acheleŋnda le. Le mɛɛ Deeve wa wana tusiaŋ yɛ, mbo chɛl sila kɛndɛ Abikɛɛ ke ndu wo. Fulamakɔɔlioo wa ni, mi keŋ mala ndu o luei o kpundɛ niŋ te.—1 Sam. 25:​2, 3, 21-25, 32-34.

7. Sɔɔŋ kuɛɛ naŋ pɛɛku yɛ o tamasi Deeve wo niŋ? (Ikilisiaatii 4:13) (Tofa vɛlɛ fotueilaŋ.)

⁷ Ŋ pɛɛku sɔɔŋ pum o tamasi Deeve wo niŋ. Le tamaseliiyo, naapum miŋ chaa sɔɔŋ pum tosaa, ɔɔ miŋ nɔ dikeŋnaŋndo, o acheleŋnda nɔ le wo. A koŋ kpou, ŋ nɔ miŋ yiyaŋ maa ŋ sina nyɛ o nyɛ, ɔɔ ŋ yeema lɛ sila acheleŋnda o ba le le. Maa Deeve, naa bɛɛ nɔ miŋ wa a yɔŋgaŋ teleŋ o teleŋ le miŋ yaŋ nilaŋ o sila kɛndɛ nda ke naa wo, wana o wana o fula o ba pɛ. (Nuawɔ Ikilisiaatii 4:13.) Te ŋ tosa keŋ pɛ, ŋ cho fafaŋ biondɔŋnda tɛɛmbuu naa a acheleŋnda kɔllo laŋ.

NƐƐ KE YƐ YA SILA KƐNDƆƆ?

8. Le sabu yɛɛ Chonataŋ wa yɛ wana kɛndɛ le Deeve silaa kioo?

⁸ Ŋ chɔɔluŋ ndɔ suɛi ipilɛ yaasiaa i naŋ pɛɛku o tamasi Deeve wo niŋndo. Mi ndoo nyuna wanaa wa o chaŋyɛi kɛndɛi niŋ a Chɛhowa wa le silaa. Kɛ o cho ko keŋ te, waŋnda haa ndaa sina bahawɛi o wa niŋndo, nduyɛ maa o yeema malaa. Le tamaseliiyo, mɛɛ Deeve yeema sinaa te Masaa Sɔɔ yeema pɛ ma miiŋgu o kɔl nyulu niŋ, mbo yaŋ nilaŋ o sila Chonataŋ po Sɔɔ wo ke ndu wo. Yɛɛ mala yɛ Chonataŋ le Deeve sila kɛndɔɔ kioo? Kanifuule Chonataŋ wa o chaŋyɛi kɛndɛi niŋ a Chɛhowa, nduyɛ ndoo sina Sɔɔ nyɛkɛndɛi. (1 Sam. 20:​9-13) Vɛɛ naa bɛɛ duau yɛ hei o wali niŋ?

9. Chɔmndɔ tamaseliiyo le wana naŋ nɔ miŋ nyuna le silaa wo. (Polowaa 13:20)

⁹ Te ŋ yeema silaa pɛ, o wa bɔɔ suɛi kɛndɛ le miŋ nyuna wana cho o chaŋyɛi kɛndɛi niŋ a Chɛhowa nduyɛ mbo sina suɛi keŋ nyɛkɛndɛiyo le malaa.a (Nuawɔ Polowaa 13:20.) Le tamaseliiyo, ŋ tuuwɔ maa puaapilɛnɔ feleŋgɔnɔɔ cho wana nda cho ichali o nɔɔ niŋndo nuuviaa. Nɛɛ o nɔ yɛ mbo nyuna le mbo ke ndu sila kɛndɔɔ? Naapum mi chaŋndɔ cho o nɔ le wo ke ndu sila kɛndɔɔ, te o tɔlnuŋ pɛ o sawa mandaa Baabuiyo choo. Kɛ puaapilɛnɔɔ hoo tiuba mbo sɔla sila mala ndu wo, te o nyuna pɛ pɔnɔɔ a lanɔ sina ndu nyɛkɛndɛi nduyɛ ma wa niŋ Chɛhowa piɛiyo diompilɛ le teleŋ vilɛi yo. A cho ndu ko dimul mɛɛ o duau sawala mandaala cho o Baabuiyo niŋndaŋ o wali niŋ yɛ le, kɛ a cho ndu dimul nyɛ bii nda niŋ malaa o nɔ ndaa niŋndo.

10. Yɛɛ naŋ cho yɛ niko yaasiaa?

¹⁰ Ŋ yaasiaa suliŋndaŋ latiɔɔŋ la naŋ nɔ miŋ nɔ laŋ, vɛlɛ a wana ke naa sila kɛndɔɔ wo. Ŋ yaasiaŋndɔ niko miŋ che mɛɛ naŋ chɔm maa ŋ yeema mi acheleŋnda sila naa yɛ, nduyɛ te o bɛnda pɛ le nda nyunaa le ma tosa kɛɛsiaa le naa.

VƐƐ NAŊ CHƆM YƐ MAA Ŋ YEEMA SILAA?

11-12. (a) Teleŋndaŋ lapum, yɛɛ naŋ nɔ yɛ miŋ fafaŋ tosaa? (b) Yɛɛ Masaa Luihobowam ndoo tosa yɛ, mɛɛ o wa kɛɛsiaa sɔvɛ sɔviɔɔ tosaa?

¹¹ Teleŋndaŋ lapum, mi waŋndo nyuna acheleŋnda le kɛɛsiaa. Kɛ, te o yɔŋ pɛ maa o chii niŋ kɛɛsiaa le nyɛ o yeema wo tosaa, kindiŋndo koni o wa ni le sinaa te acheleŋnda chɛl pɛ kɛɛsiaa ndɔɔ. Te lende i cho ni, mɛɛ o cho sila le o yeema le. O nɔ mbo pɛɛku a nyɛ yɔŋnuŋ Masaa Luihobowam ndo okɔɔ.

¹² Mɛɛ Masaa Sɔlɔmɔŋ vi, mi Luihobowam po ndɔ simnuŋ masaa o foofo ndɔɔ o Isɔluɛi niŋ. Mɛɛ Luihobowam simnuŋ masaa, waŋnda ndaa nɔ nyɛm kɛndɔŋ tau, kɛ ma yiyaŋ maa Sɔlɔmɔŋ ndoo handu nda bɔɔ nyɛkindilaa choo. Okoŋ mi waŋnda huŋ o Luihobowam ndo ma nyɔɔlu ndu le mbo faŋa nda wolɔɔla lusulɛilaŋ choo. Mi Luihobowam dimul nda le ma ke ndu teleŋndo le mbo yiyaŋ a kɛɛsiaa o nɔ mbo tosa wo okɔɔ. Mbo kandu nyɛkɛndɛi. Mbo nyuna bɛnduaa yuuwa le silaa, a ndaa mala Sɔlɔmɔŋ nda. (1 Ma. 12:​2-7) Kɛ mbo kɛɛ sila bɛnduaa yuuwa haa ke ndu wo. Le yɛɛ o tosa yɛ keŋ? Baa kɛɛsiaa Luihobowam ndoo chii niŋ tosa ni, okoŋ mbo wa waŋnda nuuviaa le ma chɛl kɛɛsiaa ndɔɔ? Te lende I cho ni, mɛɛ mbo saaluŋ nyɛ o wa nuuviaa wo o sila chaaŋaa nduaa feleŋguaa kendu wo. (1 Ma. 12:​8-14) Mi Luihobowam dimul waŋnda nyɛ chaaŋaa nduaa dimul ndu wo. Fulamakɔɔlioo wa ni, mi masaleŋ le piɔuwaŋ tɛɛŋ. Nduyɛ chɔŋ niŋ a teleŋ koŋ, Luihobowam ve lɛ a kɔl kɛndɛ le.—1 Ma. 12:​16-19.

13. Vɛɛ naŋ chɔm yɛ kɛsɛ maa ŋ yeema silaa?

¹³ Yɛɛ naŋ pɛɛku yɛ o tamasi Luihobowam ndo niŋ? Ŋ nɔ miŋ tosa fɛlɛŋ kɛɛsiaa tuupa miŋ nyuna acheleŋnda le silaa le. Nduyɛ ŋ nɔ miŋ wa a bɛɛndiaŋ le sila ndaa chɛlɔɔ. Lelaŋ, ŋ nɔ miŋ nyunaŋ aa: ‘Baa mi kɛɛ pa sila nda ke ya wo te o chɛlaŋ a nyɛ ya yeema tueiyɔɔ wo le?’ Ŋ tofaŋndɔ tamaseliiyo.

14. Te a ke naa pɛ silaa, yɛɛ naŋ nɔ yɛ miŋ loonuŋ? Chɔmndɔ tamaseliiyo. (Tofa vɛlɛ fotueiyo.)

¹⁴ Yiyaŋndɔ maa puaapilɛnɔɔ sɔla wali nda paawa ndu tau wo. Tuupa mbo chɛl wali koŋ, mbo nyuna bɛndu kundaa le silaa. Mi puaapilɛnɔɔ dimi maa, wallo hoo cho ndu tosa mbo wa landaŋ a yuŋgu ndɔɔ le teleŋ vilɛi. Mi bɛndu kundaa yiyalaŋ puaapilɛnɔɔ hoo a sawa mandaa Baabui dimi maa ndu nɔ kalaŋndo ni le yuŋgu ndɔɔ malaa ma kendu o Mɛlɛka piɛiyo niŋ. (Ɛfi. 6:4; 1 Tim. 5:8) Kɛ te o yɔŋ yɛ mi puaapilɛnɔɔ hoo kiisaŋ a nyɛ bɛndu kundaa dimul ndu wo, okoŋ mbo kɔ nyuna acheleŋnda le ma dimul ndu nyɛ o yeema tueiyɔɔ wo? Baa silaa kpeekpei puaapilɛnɔɔ hoo yeema ni, ɔɔ o chii niŋ kɛɛsiaa tosa mbo wa waŋndo nuuviaa le mbo toolu kɛɛsiaa ndɔɔ? Ŋ nɔ miŋ loonuŋ maa kɔl wanachioo chuluka. (Chɛl. 17:9) Lepum ma ke naa sila naŋ hɛnaŋ te wo, kɛ sila koŋ kpeekpei naŋ yeema a teleŋ koŋ ni.

BAA I NƆ PA MI NYUNA ACHELEŊNDA LE MA TOSA KƐƐSIAALAŊ LE YA?

15. Yɛɛ naŋ nɔ yɛ miŋ fafaŋ tosaa, nduyɛ le yɛɛ?

¹⁵ Wana o wana nɔ kalaŋndo le mbo tosa kɛɛsiaalaŋ a ba ndɔ. (Kale. 6:​4, 5) A mɛɛ naŋ pɛɛku yɛ, mi wana nɔ taasioo wo yaasiaa o Diom Mɛlɛkaa niŋ, nduyɛ mbo nyuna Kilisiɔŋaa kendu o Mɛlɛka piɛiyo niŋnda le silaa tuupa mbo tosa kɛɛsiaa. A koŋ kpou, ŋ nɔ miŋ wa yekeŋ yɔŋii naŋ nyuna acheleŋnda le ma tosa kɛɛsiaalaŋ le naa. Apum ma tosa hei sanaa a wana nda nɔ bɛɛle ndɔleŋ ndo nyunaa aa: “Te ndoo yɔŋ pɛ aa num, yɛɛ ŋ wa yɛ tosa a suɛi hei?” Mi apum tol waŋndo kɔɔli le kɛɛsiaa pilɔɔ tosaa, kɛ a yiyaŋ a fulamakɔɔlioo le.

16. Kɛɛsiaa kuɛɛ Kilisiɔŋnda o kundaa Kɔliŋ niŋ ndaa nɔ ma tosa, te o hiŋ pɛ a visiŋ ndaa soli salaa o piɔmnda lo woŋ okɔɔ? (1 Kɔliŋtiaŋ 8:​7, 10:​25, 26)

¹⁶ Yiyaŋndɔ a kɛɛsiaa Kilisiɔŋnda o Kɔliŋ niŋ ndaa nɔ ma tosa le visiŋ ndaa soli salalaŋ o piɔmnda lo woŋ. Mi Pɔɔl poonyial Kilisiɔŋnda haa aa: “Ŋ sina maa piɔmnda cho nyɛ o nyɛ o chieeŋndo niŋ te. Nduyɛ ŋ sina maa Mɛlɛka ndupilɛ kpe cho ni.” (1 Kɔl. 8:4) Mi nyɛ Pɔɔl dimi hoo wo tosa, mi apum o kundaa niŋ kɛɛsiaa le visiŋ nda soli salaa o piɔmnda lo ma pisi muŋ o lɔɔ niŋndoŋ dioo. Mi waŋnda apum o kundaa niŋ kɛɛsiaa maa a cho visiŋ muŋ dio le kanifuule, hei ndii nɔla mi i paaliaŋ kɔl nda iyamaa. (Nuawɔ 1 Kɔliŋtiaŋ 8:​7, 10:​25, 26.) Wana o wana ndoo nɔ mbo tosa kɛɛsiaa a ba ndɔ. Pɔɔl ndoo sila Kɔliŋtiaŋnda kposoŋ le mi ndaa tosa kɛɛsiaalaŋ le acheleŋnda le. Kɛlɛŋgaa niŋ te, mbo dimul nda le ma tol nyɛ a cheleŋnda tosa wo kɔɔli le. Wana o wana wa hunɔɔ “kona dɔɔnɔŋ naa Mɛlɛka chua le ndupila.”—Luom. 14:​10-12.

17. Chɔmndo tamaseliiyo a nyɛ yɔŋnuŋndo te o yɔŋ pɛ miŋ tol kɛɛsiaala acheleŋnda tosalaŋ kɔɔli? (Tofa vɛlɛ fotueilaŋ.)

¹⁷ Vɛɛ suɛi waa nuaa yɔŋnuŋ yɛ hau? Ŋ yaasiaŋndɔ a nyɛm nda soli o koowaŋ niŋndoŋ okɔɔ. Kilisiɔŋnɔ kɛ kɛ nɔ mbo tosa kɛɛsiaa a ba ndɔ te o cho pɛ nyɛm nda soli o koowaŋ niŋndoŋ chɛlɔɔ ɔɔ mbo kɛɛ muŋ.b Naapum mi i wa ikala le ndi biyɔɔ bila nyɛkɛndɛi. Kɛ, ŋ nɔ miŋ tosa kɛɛsiaa a ba naa o suɛi waa nuaa choo. (Luom. 14:4) Te o yɔŋ pɛ miŋ tol kɛɛsiaa wana cheleŋ kɔɔli, ŋ nɔla miŋ simnuŋ wanaa taasi le. Le miŋ simnuŋ wanaa taasi, mɛɛ miŋ tosa kɛɛsiaala tɔlnuŋ o Baabuiyo choo laŋ a ba naa. (Hibu. 5:14) Mɛɛ teleŋ kuɛɛ naŋ nɔ yɛ miŋ nyuna Kilisiɔŋnɔ kendu o Mɛlɛka piɛiyo niŋndo le silaa? Ŋ nyuna le malaa te ŋ chii pɛ yaasiaa tosa miŋ biiyɔ bila mɛɛ naŋ duau silala Baabuiyo o wali niŋ yɛ le.

HIOU LACHI A NYUNAA LE SILAA

18. Yɛɛ Chɛhowa tosal lɛ naa?

¹⁸ Chɛhowa chɔm tiindaŋ kala kalaa o naa niŋ le naa chɛlɔɔ miŋ tosa kɛɛsiaalaŋ a ba naa. O ke naa Diom ndɔɔ Baabuiyo, mbo ke naa vɛlɛ wanaa nɔ taasioo miŋ wa o chaŋyɛi niŋ a nda wa, le naa malaa miŋ dɔu sawala mandaala Baabuiyo o wali niŋ. O nɛiyo hoo choo, Chɛhowa buulaŋ a naa maa Finya kaalaa. (Polo. 3:​21-23) Yɛɛ naŋ nɔ yɛ miŋ tosa le ndu balika melaa chɔmndo?

19. Yɛɛ naŋ nɔ yɛ miŋ hiou lachi a tosaa le mi Chɛhowa naŋ kɔl a naa?

¹⁹ Tofawɔ suɛi sɔvɛi hei: Kalaŋ chuauwa wa bɔɔ a kɔl kɛndɛ te a che pɛ chuauwaa ndaa hindɔɔ, okoŋ ma simnuŋ buɛiyaa taasiaa le Chɛhowa, nduyɛ ma mala acheleŋnda le ndu piɛiyo. O nɛi pilɛ koŋ choo, mi Chɛhowa wa a kɔl kɛndɛ tau te o che pɛ naa hiouwɔɔ lachioo tosaa o ndu piɛiyo niŋ, nyunaa le silaa, vɛlɛ a kɛɛsiaala ke ndu bɛɛleŋ ndaŋ tosaa.