“ Wana Sɔvɛ Sɔviɔɔ Ŋ Cho Ni”!

1-2. Yɛɛ mala yɛ naa le sinaa maa ŋ cho a sɔvɛ Chɛhowa o hɔl?

O WANAA cho Chɛhowa piɛiyo wa tɛɛŋ, apum yiyaŋ maa a cho a sɔvɛ le, naapum le mɛɛ waŋndo bii nda biyɔɔ wɔɔŋndo yɛ. Baa hei yɔŋnuŋ num niŋ pa? Te lende i cho ni, yɛɛ mala yɛ num le sinaa maa a cho o sɔvɛ Chɛhowa o hɔl?

² Nyɔɔ o pilɛ o mala numndo cho diomndaŋ veeloo o bundɔŋ Baabui chɔm mɛɛ Chɛhowa yeema miŋ bii acheleŋnda yɛ ni. Chiisu Po ndɔ ndoo nɔ bɛɛleŋ le waŋnda, nduyɛ mi ndoo bii nda nyɛkɛndɛi. Hei chɔm kpendekele maa Chiisu nda Finya ndɔ che wanaa yiyaŋ maa a cho wanaa sɔvɛ le wa a sɔvɛ. (Chɔŋ 5:19; Hibu. 1:3) O buŋgɛi hei niŋ, ŋ cho pɛɛku: (1) mɛɛ Chiisu mala waŋnda le ma bii bila maa a cho a sɔvɛ yɛ, nduyɛ (2) a mɛɛ naŋ nɔ miŋ che naapila maa ŋ cho a sɔvɛ Chɛhowa o hɔl lɛ.—Hakai 2:7.

VƐƐ CHIISU NDOO MALA YƐ WAŊNDA LE SINAA MAA A CHO A SƆVƐ?

3. Vɛɛ Chiisu ndoo bii yɛ wanaa wa Kalili ma huŋ naa ndu chua le malaa wa?

³ Teleŋ Chiisu wa yooŋgu kɛndɔɔ dimioo Kalili wo, mi wanaa bɔɔbɔɔ huŋ naa ndu chua le nilaŋ yaŋɔɔ, nduyɛ mbo siŋgi a wa a naalaŋ nda. Mi Chiisu dimi aa: “Mɛɛ saa wa nuaa a nɔ wana mandaa le yɛ, lende nda wa ni.” (Mat. 9:36; tofa sɔɔŋ kuluŋ nda tɛɛsiaa woŋ.) Mi simlachiaa le piɛiyaa ndaa, ndaa che nda maa a cho a sɔvɛ le, nduyɛ mi ndaa veelu nda pɛŋ maa, wanaa “sendioo cho nda choo.” (Chɔŋ 7:​47-49; sɔɔŋ kuluŋ nda tɛɛsiaa woŋ.) Kɛ mi Chiisu bii nda nyɛkɛndɛi sanaa a teleŋndo chuaa le nda pɛɛkoo, nduyɛ mbo siŋgi a wa a naalaŋ nda. (Mat. 9:35) Le handɔɔ lechoo, le halikpeŋ mbo tiuba le waŋnda tau malaa, mbo pɛɛku kiilaa nduaa le yooŋgu kɛndɔɔ dimioo, nduyɛ mbo ke nda kpaayaa le naala yɛ yɛlaŋ siŋgioo.—Mat. 10:​5-8.

4. Yɛɛ naŋ pɛɛku yɛ a mɛɛ Chiisu ndoo bii wanaa waŋnda ndaa chi a sɔvɛ le wa yɛ?

⁴ Le mɛɛ o chɔm bɛɛleŋ mbo wa wanaa wa ndu nilaŋ yaŋɔɔ wa biyɔɔ nyɛkɛndɛi yɛ, mi Chiisu nda Finya ndɔ chɔm kpendekele maa, a che wanaa waŋnda chi a sɔvɛ le wa a sɔvɛ. Te a wa pɛ Chɛhowa piɛiyo kɛ ma kiisaŋ maa a cho o sɔvɛ le, yiyaŋ a mɛɛ Chiisu ndoo bii wanaa ndaa yeema ma pɛɛku ndu o ba wa yɛ. Hei tosaa mala num ma sina maa a cho wana sɔvɛ Chɛhowa o hɔl.

5. Tɛɛsiaawɔ nyɛ ndoo yɔŋnuŋ a chua Chiisu ndoo komal Kalili wo.

⁵ O cho ko waŋnda faŋga bɛndoo le Chiisu ndoo pɛɛku le, kɛ mbo pɛɛku nda a pilɛŋ pilɛŋnda. Le tamaseliiyo, teleŋ Chiisu wa yooŋgu kɛndɔɔ dimioo o Kalili niŋndo, mbo komal chua ndoo wa saŋgaa a naa ŋwaŋ laandoo le wɔsilaŋ 12. (Maki 5:25) A mɛɛ Sawa ndoo dimi yɛ, o wa o nɔɔlɛi. Nduyɛ wana o wana ndoo pilaŋ ndu pɛ, ndu bɛɛ ndoo simnuŋ o nɔɔlɛi. Le saboo hoo, ndoo holiaŋ a waŋnda le. I hiou kpou ve, ndoo tiuba mi ndoo kuɛ o chiɛi Chuuwa ndaa piɛi Mɛlɛka wo niŋ a acheleŋnda latulu le. (Lɛv. 15:​19, 25) I cho kpendekele maa o cho ko naa le wa chuaa hoo saaŋgiaa le, kɛ mbo sinaŋ vɛlɛ maa o cho o sɔvɛ le.—Maki 5:26.

6. Vɛɛ chua wa hoo a naa ŋwaŋ laandoo wo looku yɛ sioŋgɔɔ sɔla?

⁶ Chua wa hoo saŋgaa a naa wo ndoo yeema mi Chiisu siŋgi ndu. Kɛ o kuɛ o ndu lo sakpo le. Le yɛɛ? Naapum siɔmbulaŋ la wa ndu le naa wa ndu wo. Mbo yiyaŋ maa Chiisu wa ndu touwɔɔ, kanifuule o ve o diandaa le mbo luɛi faŋgaa tɛɛŋ te. Lelaŋ mbo pilaŋ bɔɔle doma ndɔɔ a tiindaŋndo maa o cho sioŋgɔɔ. (Maki 5:​27, 28) Nduyɛ mbo sɔla sioŋgɔɔ le laalaŋ ndoo nɔ wo. Mɛɛ Chiisu nyuna le wana pilaŋ ndu wo, mbo sɔlɔlaŋ nyɛ o tosa wo. Vɛɛ Chiisu ndoo bii yɛ ndu?

7. Vɛɛ Chiisu ndoo bii yɛ chua wa hoo a kɔl tambɛiyo wo? (Maki 5:34)

⁷ Mi Chiisu bii chuaa hoo nyɛkɛndɛi nduyɛ mbo chɔm ndu bɛɛleŋ. Mbo bii bila maa o wa ‘nyiiyaa, nduyɛ siooŋnde wa ndu.’ (Maki 5:33) Le hei mbo suaa o ndu lo nyɛkɛndɛi okoŋ mbo dɛɛniaa ndu kɔllo. Mbo veelu ndu pɛŋ aa “chua nuu.” Mɛɛ Chiisu soliŋ diomndo hoo kpeku, o cho ko bɛɛleŋ te o chɔm chuaa hoo le, kɛ mbo chɔm ndu kaalaa a kɛndɛi. (Nuawɔ Maki 5:34.) O bolle Baabuileŋ ndeŋ niŋ kinɛi Chiisu veelu wana lanɔɔ ni aa: “Chua nuu.” Naapum mbo soliŋ diomndo hoo kpeku kanifuule mbo sina maa “siooŋnde” wa bɔɔ chuaa hoo. Vɛɛ ŋ yiyaŋ yɛ maa chuaa hoo wa sinaŋndo mɛɛ Chiisu soo naa ndu chua o nɛi waa nuaa niŋ? Te Chiisu ndoo suu o ndu lo o nɛi kaalaa waa nuaa niŋ te, mi che bɛɛ mbo siaŋgu, kɛ kɔllo wa ndu tambu tau. Kɛ mi Chiisu mala ndu le sinaa maa o wa bɔɔ chua kaalaa Chɛhowa o hɔl.

8. Simul kuɛɛ komallɛ ndepilɛnɔɔ o Bilasil niŋ?

⁸ Hau bɛɛ mi buɛiyaa Chɛhowaa apum, a nɔ kɛndiaa lepɛŋndo wa yiyaŋ maa a cho a sɔvɛ le. Kɔɔfanɔ lɔɔlɔɔ wo Maliaaa cho o Bilasil niŋ ni. Mɛɛ nda velu ndu, ndoo nɔ ŋpelu le, nduyɛ ndoo nɔ vɛlɛ ba mial te. Mbo dimi aa: “Mi chaaŋaa niaa o sukuu ndaa tɛɛmbuu ya kɔllo teleŋ o teleŋ le bahawɛi nuu. Nduyɛ mi ndaa veelu ya diola laa tɛɛmbuu ya kɔllo laŋ. Hali yuŋgu nuu bɛɛ, mi ndaa tosa mi sinaŋ maa I cho wana sɔvɛ le.”

9. Yɛɛ mala yɛ Maliaa le sinaa maa o cho o sɔvɛ Chɛhowa o hɔl?

⁹ Vɛɛ Maliaa ndoo sɔla yɛ malaa? Mɛɛ o simnuŋ Sei Chɛhowaa, mi chaaŋaa nduaa Kilisiɔŋnda mala ndu le mbo cheŋnuŋ ndupila mɛɛ Chɛhowa che ndu yɛ. Mbo dimi aa: “I tiuba mi poonyiaa diola puaapiliaa a ndepiliaa mala ya wa kpou o yau nuu niŋ te. I mel Chɛhowa balikaa a kɔl nuu kpou le mɛɛ o ke ya yuŋgu waa nuaa o ndu piɛiyo niŋ yɛ.” Mi puaapiliaa a ndepiliaa haa mala Maliaa le chɔɔ maa o cho wana sɔvɛ Mɛlɛka o hɔl.

10. Bahawɛi kala kala kuɛɛ Meele Madaliŋ ndoo nɔ yɛ, nduyɛ vɛɛ ndoo sinaŋ yɛ? (Tofa vɛlɛ fotueilaŋ.)

¹⁰ Ŋ yaasiaŋndɔ vɛlɛ mɛɛ Chiisu mala Meele Madaliŋ yɛ. Ndoo nɔ nyinaa wɔɔŋnda a ŋɔmmɛu. (Luku 8:2) Naapum mi ndoo tosa sɔɔŋ yalaka yalaka le mɛɛ o wa o kpaaya nyinaa wɔɔŋnda bɛŋgu yɛ. Le saboo hoo, mi wanaa bɔɔbɔɔ ndaa fafaŋ ndu. A teleŋ kala kalaa hoo o yoomu ndɔɔ niŋ, naapum mi siooŋnde ndii bii ndu, mbo yiyaŋ maa o nɔ wana malaa le, nduyɛ wana kaala ndu le. Mi Chiisu tuau ndu nyinaa wɔɔŋnda kɔɔli, okoŋ mbo simnuŋ buɛi ndɔɔ o pilɛ. O nɛi cheleŋ kuɛɛ niŋ Chiisu mala yɛ Meele Madaliŋ le mbo bii bila maa o cho o sɔvɛ Mɛlɛka o hɔl?

11. Vɛɛ Chiisu chɔm yɛ Meele Madaliŋ maa o wa wana sɔvɛ Mɛlɛka o hɔl? (Tofa vɛlɛ fotueilaŋ.)

¹¹ Mi Chiisu dimul Meele Madaliŋ le ma kuɛ yooŋgu kɛndɔɔ dimioo.b Le hei, mi ndoo sɔla tɔnɔɔ te Chiisu ndoo wa pɛ acheleŋnda pɛɛkoo. Paale Chiisu fula o sɛiyo niŋndeŋ, mbo chɔɔmuŋ vɛlɛ Meele. O buɛiyaa Chiisu wa tɛɛŋ, ndu wa wana tase Chiisu soo o ndulo wo ni. Mi Chiisu viam ndu le mbo dimul kiilaa nduaa maa o miiŋgu yoomu. Sɔɔŋ muŋ kpou chɔm maa Meele wa bɔɔ wana sɔvɛ Chɛhowa o hɔl.—Chɔŋ 20:​11-18.

12. Yɛɛ tosa yɛ mi Lidiaa sinaŋ maa o cho wana sɔvɛ le?

¹² Mɛɛ i wa a Meele Madaliŋ yɛ, hau bɛɛ mi wanaa bɔɔbɔɔ tambu kɔl le mɛɛ waŋnda chi nda wanaa sɔvɛ le yɛ. Mi ndepilɛnɔ pilɛ o Sipeŋ niŋ diolaŋ Lidiaa dimi maa, mɛɛ kala ndɔ chua foli ndɔɔ mbo kɛɛsiaa le ndu tɛɛmbuu wo. Mbo loonuŋ maa teleŋ o wa chuaambɔ wo bɛɛ, kala ndɔ ndoo buulaŋ a ndu le, nduyɛ mi ndoo dimul ndu diomnda wɔɔŋndaŋ. Mbo dimi aa: “Yaa yeema bɔɔ mi waŋnda ndaa kaala ya, nduyɛ mi simnuŋ chaaŋ nda. Kɛ mi yiyaŋ maa fɛɛŋ bɛɛ I sinaŋ niŋ kaala waa nuaa le, kanifuule mi kala nuu tosa mi yiyaŋ maa wana wɔɔŋndo ya cho ni.”

13. Yɛɛ mala yɛ Lidiaa le chɔɔ maa o cho o sɔvɛ Chɛhowa o hɔl?

¹³ Yɛɛ mala yɛ Lidiaa le sinaa maa o cho wana sɔvɛ Chɛhowa o hɔl? Piɛileŋ o Chɛhowa lo, diomndaŋ veeloo o Baabuiyo niŋ, vɛlɛ a diomnda kɛndɛla puaapiliaa a ndepiliaa ndaa dimilaŋ la mala ndu ni. Mbo dimi aa: “Teleŋnda bɔɔbɔɔ mi pɔnɔ nuu dimul la maa o kaala ya. Mbo dimul la vɛlɛ teleŋ o teleŋ maa I nɔ suliŋnda kɛndɛ laŋ. Nduyɛ chaaŋaa niaa cheleŋnda bɛɛ tosa niŋ nyɛpilɔɔ hoo kpe.” Baa a sina pa wana yeema malaa le chɔɔ mɛɛ kpɛ o cho o sɔvɛ Chɛhowa o hɔl lɛ?

VƐƐ NAŊ CHA YƐ NAAPILA MƐƐ CHƐHOWA CHE NAA YƐ?

14. Vɛɛ 1 Saamiɛɛ 16:7 mala yɛ naa le sinaa mɛɛ Chɛhowa che waŋnda yɛ? (Tofa vɛlɛ kɔfoo hoo “Le Yɛɛ Chɛhowa Che yɛ Wanaa Nduaa a Sɔvɛ?”)

¹⁴ Loonuŋ maa o cho mɛɛ chieeŋndo che num yɛ le Chɛhowa che num te. (Nuawɔ 1 Saamiɛɛ 16:7.) O cho le dɛnɛ sinaa, nyɛsɔlaa, ɔɔ mɛɛ ŋ cho yɛ le Chɛhowa che num o sɔvɛ le. (Aisa. 55:​8, 9) Lelaŋ, kindiŋ ma che numpila mɛɛ Chɛhowa che num yɛ, kɛ o cho mɛɛ chieeŋndo ndu che num yɛ le. A veelu diomndaŋ o Baabuiyo niŋ a wanaa ndaa nɔ kiisaŋndo maa a cho a sɔvɛ Chɛhowa o hɔl te wa mɛɛ Ilaacha, Nawomi, a Hana cho nuaa yɛ. A poonyiaa vɛlɛ sɔɔŋ yɔŋnuŋ num ŋ chɔm maa Chɛhowa che num wana sɔvɛ, nduyɛ maa o kaala num ndoŋ. Le handɔɔ lechoo, a pɛɛku vɛlɛ a buŋgaŋ soo a waa wana sɔvɛ woŋ okɔɔ o yaula naa laŋ niŋ.c

15. Le yɛɛ Chɛhowa che yɛ Daaniɛɛ maa ‘wana sɔvɛ sɔviɔɔ o cho ni’? (Daaniɛɛ 9:23)

¹⁵ Nɔ tiindaŋndo maa laalaŋ numndo siiŋguu num wana sɔvɛ Chɛhowa o hɔl ni. Teleŋ pilɛ naapum mɛɛ o wa o wɔsiŋ 90 niŋ, mi Daaniɛɛ wana ndoo suaa le Mɛlɛka wo tambu kɔl, nduyɛ o wa “o yɔkpɛi” yo. (Daa. 9:​20, 21) Vɛɛ Chɛhowa ndoo dɛɛniaa yɛ ndu kɔllo? Mi Mɛlɛka yɔŋ maalikɛinɔɔ diolaŋ Keebilɛɛ le mbo dimul Daaniɛɛ maa “wana sɔvɛ sɔviɔɔ” o cho ni. Nduyɛ maa Mɛlɛka tuei piɛile ndɔleŋ. (Nuawɔ Daaniɛɛ 9:23.) Yɛɛ siiŋguu yɛ Daaniɛɛ wana sɔvɛ sɔviɔɔ Mɛlɛka o hɔl? Le mɛɛ ndoo nɔ kaalaa vɛlɛ a sakpoyɛi yɛ. (Isi. 14:14) Mi Chɛhowa tosa ma poonyiaa a Daaniɛɛ okɔɔ o Baabuiyo niŋ le tɔnɔ naa. (Luom. 15:4) Mi Chɛhowa yaŋ piɛile numndeŋ nilaŋ, nduyɛ o che num o sɔvɛ le mɛɛ ŋ cho wallo tosaa le ndu vɛlɛ ma kaala sakpoyɛi yɛ.—Maika 6:​8, tofa tɛɛsiaa amatou; Hibu. 6:10.

16. Yɛɛ mala yɛ num le chɔɔ Chɛhowa maa Finya kaalaa?

¹⁶ Chɔ Chɛhowa maa Finya kaala numndo o cho ni. O nɔ yeemɛi le num malaa, kɛ o cho le num biondɔŋndaŋ nuaa o ŋdial te. (Sam 130:3; Mat. 7:11; Luku 12:​6, 7) Yiyaŋndo o hei choo mala niŋ wanaa bɔɔbɔɔ ndaa yiyaŋ maa a cho wanaa sɔvɛ le wa. Ŋ yaasiaŋndɔ tamasi ndepilɛnɔ pilɛ diolaŋ aa Makɛla. Mbo yiyaŋ maa o cho o sɔvɛ le, le mɛɛ pɔnɔ ndɔ wa ndu diomnda wɔɔŋndaŋ dimullo, nduyɛ a ndu biyɔɔ wɔɔŋndo le wɔsiŋ bɔɔbɔɔ yɛ. Mbo dimi aa: “Teleŋ o teleŋ ya sinaŋ pɛ maa I cho o sɔvɛ le, mi kindiŋ le yiyaŋndo a mɛɛ Chɛhowa cho kɔlaŋ a ya o choŋgu mbo wa ya mandaa, a ya kaala ndɔɔ chɔmndo yɛ.” (Sam 28:9) Mi ndepilɛnɔ pilɛ diolaŋ Lɔɔleŋ fulaa o Saut Afilika niŋ loonuŋ ndupila maa, “te Chɛhowa chɔm ya pɛ kaala ndɔɔ sanaa a ya naŋnɔŋndo ndu o ibuŋ le wɔsiŋ bɔɔbɔɔ niŋ, nduyɛ mbo soliŋ ya kpeku le acheleŋnda pɛɛkoo, mɛɛ hei kpeekpei chɔm ni maa o che ya wana sɔvɛ.”—Hoo. 11:4.

17. Yɛɛ kpeekpei ke yɛ num tiindaŋndo maa Chɛhowa hini kɔl a num? (Sam 5:12) (Tofa vɛlɛ fotueiyo.)

¹⁷ Nɔ tiindaŋndo maa Chɛhowa hini kɔl a num. (Nuawɔ Sam 5:12.) Mi Deeve tuu kɔl hiniaa Chɛhowaa a ‘boo chɔu bɛndu manda’ wanaa sakpuaa wo. Sinaa maa Chɛhowa hini kɔl a num nduyɛ maa o cho num toolu, tiuba mbo mala num le ma fafaŋ yiyaŋndo maa a cho wana sɔvɛ le. Vɛɛ ŋ looku yɛ sina maa Chɛhowa hini kɔl a num? A mɛɛ naŋ pɛɛku yɛ, mi Chɛhowa soliŋ Diom ndɔɔ kpeku le naa tiindaŋndo kioo maa ŋ cho a sɔvɛ. Le handɔɔ lechoo, mi Chɛhowa soliŋ bɛnduaa kundaa, chaaŋaa naa kpɛɛluŋnda, a acheleŋnda kpeku le naa loonɔŋndo maa ŋ cho a sɔvɛ ndu o hɔl. Yɛɛ naŋ nɔ yɛ miŋ tosa te acheleŋnda ke naa pɛ kɔl dɛɛniaa?

18. Le yɛɛ ŋ nɔ yɛ ma chɛl chandɔɔla acheleŋnda cho num ndaŋ?

¹⁸ Fɛɛŋ bɛɛ kɛɛ chandɔɔla wanaa sina num nduyɛ ma kaala num nda le. Kɛsiŋ o kɔl maa Chɛhowa cho nda soliŋndo kpeku ni le num malaa ma sina maa o hini kɔl a num. Mi Makɛla naŋ soo suŋ a ndu okɔɔ wo dimi aa: “I cho kindiŋndo o pɔm pɔmbɔ le chɛlɔɔ diomnda kɔl dɛɛniaala acheleŋnda dimul la laŋ. I cho bɛɛŋ bɛɛŋ te, kɛ I sina maa hei Chɛhowa yeema ya ni mi tosa.” Makɛla sɔla niŋ tɔnɔɔ tau o mala bɛnduaa kundaa cho ndu le sinaa maa Chɛhowa hini kɔl a ndu wo niŋ. O cho niŋ suŋ suŋ kɔɔfanɔ lɔɔ lɔɔ wo, nduyɛ mbo wa malaa yɔŋgoo o Bɛtɛl.

19. Le yɛɛ ŋ nɔ yɛ ma nɔ tiindaŋndo maa a cho wana sɔvɛ Mɛlɛka o hɔl?

¹⁹ Teleŋ o teleŋ mi Chiisu loonuŋ naa maa, ŋ cho bɔɔ a sɔvɛ Finya naa o choo choo niŋ o hɔl. (Luku 12:24) Lelaŋ ŋ nɔ miŋ nɔ tiindaŋndo maa Chɛhowa che naa a sɔvɛ. Maa fɛɛŋ bɛɛ ŋ puɛɛnuŋ a hei le! Nduyɛ ŋ hiounuŋ lachi a o naŋ tiuba wo tosaa, le acheleŋnda malaa ma che kɛsɛ maa a cho a sɔvɛ Mɛlɛka o hɔl.