Chɛl mi Siɔwuŋ Acheleŋnda Paaliaŋ Num Te

1, 2. Vɛɛ Baabuiyo dimi yɛ a hiowɔɔ lachi Seiyaa Chɛhowaa cho wo?

CHIEEŊNDO balɔɔ silɔ, kɔɔna cho, o waŋchieeyaa kaala Chɛhowa nduyɛ ma yeema le ndu piɛiyo wa cho niŋndo. Wanaa kaŋ cho Seiyaa Chɛhowaa ni. Mi che bɛɛ a nɔ siɔuwoŋ nduyɛ ma tosa biondɔŋndaŋ, kɛ mi Chɛhowa ke wanaa nduaa nɛi chɔmaa a nyina ndɔ diandaa. Ŋ tofaŋndɔ nɛila o dɔu nda sala laŋ lapum.

² O wɔsi 1914 niŋ, waŋnda nyɛɛmbɔ koni wa Chɛhowa piɛiyo ni. Kɛ Chɛhowa dɔu wali dimiaa yooŋgu kɛndɔɔ sala. Mi Chɛhowa tɛɛsiaa hiouwɔɔ lachi wallo hoo aa, “Yuŋgu cho bɛɛ yuŋgu pɔmbuiinaa wo o yuŋgula numndaŋ tɛɛŋ ndo, I cho tosa mbo simnuŋ kaale bɛndu. Ya cho Mɛlɛka Yaawɛɛ ni. Te teleŋ koŋ o fuuluu pɛ, I cho tosa mi hei i yɔnuŋ o teleŋ biŋgi bɛŋgu.” (Aisaya 60:​22) Hau, ŋ cho chɔɔ kpendekele maa nyɛ dimiŋ hoo wo cho peelɔŋndo. Seiyaa Chɛhowaa cho machuaa maa kaale bɛndu bɛndu. Ŋ nɔ pɛŋ lɛŋnde tau chieeŋndo balɔɔ silɔ i nɔ waŋnda ma fuuluu maa Seiyaa Chɛhowaa le.

3. Vɛɛ buɛiyaa Mɛlɛkaa ndaa chɔm yɛ kaalaa?

³ O palɛi mɛɛlɛi hei niŋ, Chɛhowa mala niŋ wanaa nduaa le ma kindi kaala nda nɔ ndapila tɛɛŋ ndo. “Wana kaalaa Mɛlɛka cho ni” nduyɛ ma kindiŋ le taamasi ndɔɔ tolɔɔ kɔɔli. (Chɔŋ Tasoo 4:​8, NW) Mi Chiisu dimul buɛiyaa nduaa le ma “kaaliaŋ vellaa velle.” Mbo dimul vɛlɛ nda aa, “Te la kaaliaŋ vellaa velle pɛ, o koŋ, wana o wana sina dɔɔ maa buɛiyaa niaa nya cho ni.” (Chɔŋ 13:​34, 35) O teleŋ biŋgi hiou wo niŋ, mi Seiyaa Chɛhowaa chɔm kaalaa hoo le opilɛ a o cheleŋndo mi che bɛɛ waŋnda o lɛŋii cheleŋnde niŋ wa kɔlaŋ o chɔuwo. Le tamaseliiyo, o chɔu chieeŋ diiŋ ndɔɔ niŋ, waŋnda le miiliɔŋndaŋ 55 nda dii ni. Kɛ wanaa Chɛhowaa dii wana o wana o chɔu koŋ niŋ te. (Nuawɔ Makal 4:​1, 3.) Hoo mala ni a hendu nda “tɔɔyaŋ o tɔɔyaŋ” choo le wanaa vi wa le.—Walta Wanaa Chiisuaa 20:​26.

4. Le yɛɛ kui wanaa Chɛhowaa cho wo cho yɛ suɛi kɛndɛ bɛndu?

⁴ Mi che bɛɛ wanaa Mɛlɛkaa nɔ yaamɔɔnɔ kpaaya bɛndoo Setana, kɛ a cho tuŋ hiouwɔɔ lachi a kuiyo. Ndu cho “mɛlɛka le chieeŋ yɔŋ wɔɔŋndo hoo” ni. (Kɔliŋtiaŋ Diiŋ Ndɔɔ 4:​4) Kɔɔna sɔɔŋ lemasa chieeŋndo hoo ni, kɔɔna layooŋgoo ni, kpou Setana la cho o ba bɛŋgu ni. Nduyɛ nyɔɔŋ muŋ o soliŋ kpeku ni le mbo kindiŋ le wali dimiaa yooŋgu kɛndɔɔ kuunaa. Kɛ o nɔla wallo hoo kuuna le. Nduyɛ Setana sina maa teleŋ ndɔɔ lo lɛ o bɔɔ le. Lelaŋ o cho tuŋ kindiŋndo ni le naa kuunaa Chɛhowa piɛiyo.—Sɔɔŋ Chɔɔmaŋndoŋ 12:​12.

A CHO PA LO LECHOO WO CHƆM TE ACHELEŊNDA TOSA PƐ BIONDƆŊNDAŊ?

5. Le yɛɛ waŋnda pilaŋ yɛ naa tana teleŋndaŋ lapum? (Tofa fotueiyo o peele naŋ kandu leŋ choo.)

⁵ Buɛiyaa Mɛlɛkaa pɛɛku maa i cho bɔɔ suɛi sɔvɛ le ma kaala Mɛlɛka vɛlɛ a wanaa cheleŋnda. Mi Chiisu dimi aa, “‘Kaala Chɛhowa Mɛlɛka numndo a kɔl numndo, a yoomu numndo, a yiyaŋ numndo kpou.’ Sawa tasoo o hiou laŋ kpede wo ndu cho koŋ ni. Sawa diiŋ ndɔɔ cho machuaa mɛɛ o tasoo cho yɛ. Ndu cho ni, ‘Kaala chaaŋ num wanachioo mɛɛ ŋ kaala numpila yɛ.’” (Maatiu 22:​35-39, NW) Kɛ Baabuiyo dimi maa waŋchieeya kpou o hakioo niŋ nda veluŋ ni le mɛɛ Adama tosa hakioo yɛ. (Nuawɔ Luomaŋnda 5:​12, 19.) Lelaŋ, teleŋndaŋ lapum mi wanaa naŋ cho o kundaa niŋnda soo ɔɔ ma tosa suɛi nda pilaŋ naa tana ve. Te hei yɔŋnuŋ pɛ, yɛɛ naŋ cho yɛ tosa? Kaala naŋ nɔ le Chɛhowa wo cho pa lo o kala poŋ? Ŋ cho pa lo lechoo wo chɔm o ndulo vɛlɛ a wanaa nduaa? Baabuiyo dimul naa a waŋnda apum a dimi ɔɔ ma tosa suɛi tɛɛmbuu acheleŋnda kɔllo ve. Ŋ pɛɛkuŋndɔ nyɛ ndoo yɔŋnuŋ nda wo.

6. O nɛi kuɛɛ choo Ila ndoo kɛɛ yɛ le puaa nduaa silaa?

⁶ Le tamaseliiyo, Ila wa masa wanaa soliaa lasalaa le Isɔluɛi ni. Kɛ mi puaa nduaa ŋiɔɔŋnda kɛɛ sawala Chɛhowalaŋ diikɔŋndo. Baabuiyo dimi aa, “Kɛ puaa Ila wa wanaa dɛnɛ wɔɔŋnda nda wa ni. Ndaa nɔ isiooŋ le Mɛlɛka Yaawɛɛ le.” (Saamiɛɛ Tasoo 2:​12) Mi Ila sina maa puaa nduaa wa sɔɔŋ wɔɔŋ wɔɔŋndoŋ tosaa. Kɛ a koŋ kpou, mbo sila nda taalɛɛ. O teleŋ pum niŋ, mi Chɛhowa tuisi ndu a puaa nduaa ŋiɔɔŋnda nyɛpalaa choo. Okoŋ kɔɔli, o chɛllɛ mi waŋnda o yuŋgu Ila wo niŋ kinɛi wa masaa wanaa soliaa lasala le. (Saamiɛɛ Tasoo 3:​10-14) Te num oo wa pɛ o teleŋ Ila wo niŋ nduyɛ ma sina maa puaa nduaa tosa sɔɔŋ wɔɔŋndoŋ, a wa pa kɔllo tambu? Suɛi hei wa pa laalaŋ numndo o Chɛhowa niŋ diyɔɔ, okoŋ mi num oo mal Chɛhowa piɛiyo?

7. Haki wɔɔŋ wɔɔŋ yɛɛ Deeve ndoo tosa yɛ? Nduyɛ yɛɛ Mɛlɛka tosa yɛ a ndu?

⁷ Deeve ndoo nɔ bɔɔ suiliŋnda kɛndɛlaŋ, lelaŋ Chɛhowa ndoo kaala ndu tau ni. (Saamiɛɛ Tasoo 13:​13, 14; Walta Wanaa Chiisuaa 13:​22) Kɛ Deeve bɛɛ mbo tosa suɛi wɔɔŋ wɔɔŋnde. Mɛɛ Yulaya kuɛ o chɔuwo, mi Deeve hini a Baasiɛba, lanɔɔ Yulaya, okoŋ mbo chua folioo. Deeve ndoo yeema mi wana o wana sina nyɛ o tosa wo le. Le hei, mbo yɔŋ yooŋgoo le mi Yulaya hiŋ naa ndu cha. Okoŋ, mbo kindiŋ le ndu dɛɛniaa le mbo kɔ lɔl o ndulo chiɛiniŋ. Tuu Deeve wo wa ni, le mi Yulaya ndoo hini a Baasiɛba, le mi waŋnda ndaa yiyaŋ maa Yulaya ke Baasiɛba foli koŋ ni. Kɛ Yulaya kue o ndulo chiɛiniŋ te. Le hei, mi Deeve tosa kɛɛsiaa le ma dii Yulaya o chɔuwo. Le yɔŋ wɔɔŋ bɛndu Deeve tosa koŋndo, mi ndu a yuŋgu ndɔɔ sɔla nyɛpalaa tau. (Saamiɛɛ Diiŋ Ndɔɔ 12:​9-12) Kɛ mi Chɛhowa tuinuŋ ndu inyɛɛ nduyɛ mbo mal ndu haki. Mbo sina maa Deeve ndoo yeema le tosaa nyɛ cho o kɛndɔɔ wo. (Masaa Bɛnduaa Tasiaa 9:​4) Te num oo wa pɛ tuma koŋ, vɛɛ ŋ wa yɛ yiyaŋ a Deeve? A wa pa malɔɔ Chɛhowa piɛiyo?

8. (a) Vɛɛ kiilanɔɔ Pitɛ kɛɛ yɛ le loo o lediom? (b) Mɛɛ Pitɛ tosa biondɔŋndaŋ, le yɛɛ Chɛhowa hiou yɛ lachi a ndu kpekoo soliŋndo?

⁸ Tamaselii Baabui cheleŋ cho kiilanɔɔ Pitɛ ni. Mi Chiisu hɛli ndu le mbo wa kiilanɔ ndɔɔ. Kɛ a koŋ kpou, lepum, mi Pitɛ ndoo soo ɔɔ tosa suɛi bɛnda le ve. Le tamaseliiyo, mi Pitɛ dimi maa fɛɛŋ bɛɛ o mel Chiisu le, o yɔŋ bɛɛ mi acheleŋnda mal ndu. (Maki 14:​27-31, 50) Kɛ mɛɛ nda bii Chiisu, mi kiilaa nduaa, a Pitɛ kpou mal ndu ma nyaanuŋ. Okoŋ kɔɔli, bɛmbɔɔ le yaa mi Pitɛ viinuŋ maa o sina Chiisu le. (Maki 14:​53, 54, 66-72) Kɛ, mi Pitɛ tambu kɔllo tau le nyɛ o tosa wo. Le hei, mi Chɛhowa mal ndu haki nduyɛ mbo hiau lachi a ndu kpekoo soliŋndo. Te num oo wa pɛ a boondii keŋ nduyɛ ma sina nyɛ Pitɛ tosa wo, a wa pa hiouwɔɔ lachi a tiindaŋndo dɔuwɔɔ o Chɛhowa niŋ?

9. Le yɛɛ ŋ laalaŋ yɛ maa lɔɔlɔɔ nyɛ cho sakpo wo Chɛhowa tosa ni?

⁹ O tamaseliilaŋ ndaŋ niŋ kpou, ŋ che maa mi buɛiyaa Chɛhowaa apum tosa sɔɔŋ wɔɔŋndoŋ nduyɛ miŋ paaliaŋ acheleŋnda. Te hei yɔŋnuŋ pɛ hau, yɛɛ ŋ cho yɛ tosa? A cho pa kiolu kɔlaŋ o bɔŋaŋnda leKilisiɔŋndaŋ ɔɔ ma mal Chɛhowa a wanaa nduaa waŋ waŋ? Ɔɔ a cho pa yiyaŋ maa wana inyɛiyo Chɛhowa cho ni, nduyɛ maa chumndo o wa waŋndo ni le mbo mulul yɔŋ ndɔ wɔɔŋndo kɔɔ? Kɛ teleŋndaŋ, lapum mi waŋndo tosa yɔŋ wɔɔŋndo kɛ o kil suei le suɛi o tosa keŋ nde le. A cho pa tiindaŋndo dɔuwɔɔ o Chɛhowa niŋ maa o cho isɔɔ tosa a ndi okɔɔ teleŋ bɛnda wo? Lepum pɛŋ mbo soli wana koŋ po o kunda leKilisiɔŋndo niŋ. A laalaŋ pa maa lɔɔlɔɔ nyɛ cho sakpo wo Chɛhowa tosa ni?

HIOU LACHI A LO LECHOO WO CHƆMNDO

10. Sinapɛŋgu yɛɛ Chiisu ndoo nɔ yɛ a siɔwuŋ Pitɛ nda Chuda Isikaaliɔɔ woŋ?

¹⁰ O Baabuiyo niŋ, miŋ pɛɛku a wanaa bɔɔbɔɔ okɔɔ, a ndaa chɔm lo lechoo wo o Chɛhowa lo a wanaa nduaa wo, mi che bɛɛ mi wanaa nda wa diompilɛ wa tosa biondɔŋnda wɔɔŋ wɔɔŋndaŋ. Chiisu cho taamasi kɛndɛ kɛndɔɔ ni. Mɛɛ o lɔl piɛiyo o Finya ndɔ lo pii le mbo mala ndu, mbo hɛli kiilaa 12 nda. Kɛ mi opilɛ nda tɛɛŋ, ndu yɔŋnuŋ ni maa Chuda Isikaaliɔɔ, pisi ndu chi. Nduyɛ mi kiilanɔɔ Pitɛ bɛɛ viinuŋ maa o sina Chiisu le. (Luku 6:​12-16; 22:​2-6, 31, 32) Chiisu ndoo bii Chɛhowa tɔɔyaŋ ɔɔ buɛiyaa nduaa le, mi che bɛɛ naa mi buɛiyaa nduaa apum tɛɛmbuu ndu kɔl. Mi Chiisu lo Finya ndɔ ikɛi kpɛɛluŋ nduyɛ mbo hiau lachi a ndu piɛiyo. Yɛɛ wa yɛ fulamakɔɔlioo? Mi Chɛhowa fanda ndu. Koŋ cho ni, mbo soli ndu o sɛiyo niŋ, okoŋ, mbo siiŋguu ndu Masaa o choo choo niŋ.​—Maatiu 28:7, 18-20.

11. Yɛɛ Baabuiyo dimi yɛ a buɛiyaa Chɛhowaa okɔɔ o teleŋndo hoo niŋ?

¹¹ Taamasi Chiisoo pɛɛku naa le lo lechoo wo chɔmndo o Chɛhowa lo a wanaa nduaa. Nduyɛ ŋ nɔ sabu kɛndɔɔ le hei tosaa. Ŋ cho chɔɔ maa Chɛhowa cho buɛiyaa nduaa mandaa o teleŋ lamɛɛloo hoo niŋ. O cho nda malaa le yooŋgu kɛndɔɔ dimioo o chieeŋndo choo kpou, nduyɛ nda kinɛi cho wallo hoo tosaa ni. A cho vɛlɛ o diompilɔɔ niŋ nduyɛ ma wa a nyaale le nyɛ o nyɛ Chɛhowa cho nda pɛɛkoo. Mi Chɛhowa pila tɛɛsiaa hei aa, “Buɛiyaa niaa a wa niŋ chondoŋ a kɔl kɛndɛ nda nɔ niŋ ndo.”—Aisaya 65:​14.

12. Vɛɛ naŋ nɔ yɛ miŋ che siɔwuŋ acheleŋnda?

¹² Ŋ cho a kɔl kɛndɛ kpeekpei kanifuule, Chɛhowa cho naa nɛiyo chɔmndo nduyɛ mbo wa naa malaa le sɔɔŋ bɔɔbɔɔ tosaa. O baa opilɔɔ choo, wanaa cho o chieeŋ Setanaa niŋnda cho a kɔl kɛndɛ le nduyɛ a nɔ tiindaŋ kpeekpei le chilaŋ te. Nuawɔ se mɛɛ i vial diɔmnde yɛ le malɔɔ Chɛhowa a wanaa nduaa le mɛɛ waŋndo o kundaa niŋ tosa ɔɔ dimi suɛi wɔɔŋnde yɛ! Kɛ, ŋ nɔ miŋ chɔm lo lechoo wo o Chɛhowa lo nduyɛ miŋ tol nɛi ndɔ chɔmaa kɔɔli. Ŋ nɔ vɛlɛ miŋ pɛɛku mɛɛ naŋ nɔ miŋ che ɔɔ miŋ bii siɔwuŋ acheleŋnda yɛ.

YƐƐ Ŋ NƆ YƐ MA TOSA?

13, 14. (a) Le yɛɛ naŋ nɔ yɛ miŋ biuwaŋ vellaa velle? (b) Diomnde mɛyaale kuɛɛ naŋ nɔ yɛ miŋ loonuŋ?

¹³ Yɛɛ ŋ nɔ yɛ ma tosa te puaapilɛnɔ numndo dimi pɛ ɔɔ mbo tosal num suɛi pilaŋ num tana ve? Baabuiyo sila naa aa, “O bɛnda mi wana dɔunuŋ tumbe chɔ chɔ le, diɔmnda nda duaunuŋ tumbe ni nduyɛ ma kɛsiŋ sɔɔŋ o lakɔl.” (Ikilisiaatii 7:​9) Naa kpou wanaa lahakiaa naŋ cho ni nduyɛ miŋ tosa biondɔŋndaŋ. Lelaŋ, kɛsiŋ o kɔl maa o cho teleŋ o teleŋ te puaapiliaa naa dimi ɔɔ ma tosa nyɛ cho sakpo wo le. Nduyɛ o bɛnda vɛlɛ miŋ wa yiyaŋndo a biondɔŋnda ndalaŋ lɔɔlɔɔ le. Te ŋ tosa lende pɛ, mɛɛ ŋ ve niŋ a nyaale o Chɛhowa piɛiyo niŋ te. I hiou lewɔu kpou ve cho ni, mi tiindaŋ naa kandu yɔŋyɔlaa, nduyɛ miŋ kuɛ le fulaŋndo o kɔɔna Chɛhowaa niŋ. O hei ni, ŋ piɛi lɛ Chɛhowa le nduyɛ ŋ nɔ lɛ tiindaŋ le waa o chieeŋ sɛnɛiyo niŋ te.

¹⁴ Lelaŋ, yɛɛ mala yɛ num ma wa a nyaale o Chɛhowa piɛiyo niŋ te waŋnda tosal num pɛ suɛi tɛɛmbuu num kɔllo ve? Lɔɔlɔɔ loonuŋ a diomnde mɛyaale kɔl dɛɛniaa leŋ ndeŋ, “I cho fondaŋ nda sɛnɛilaŋ toosiaa o halaa niŋ choo choo, a chieeŋ sɛnɛiyo. Sɔɔŋ yɔnuŋ o paandoo niŋ ndoŋ kinɛi, waŋnda cho hunɔɔ puɛɛnɔŋ a muŋ okɔɔ, wana o wana yiyaŋ ndɛ niŋ a muŋ okɔɔ le.” (Aisaya 65:​17; Pitɛ Diiŋ Ndɔɔ 3:​13) Chɛhowa cho num salalaŋ ndaŋ dɔuwɔɔ te a chɔm pɛ lo lechoo wo o ndulo.

15. Yɛɛ Chiisu dimullɛ naa le tosaa te waŋndo benduŋ a naa pɛ?

¹⁵ Ŋ sina maa ŋ cho wɔ o chieeŋ sɛnɛiyo niŋ te. Lelaŋ te waŋndo pilaŋ naa pɛ tana, ŋ nɔ miŋ yiyaŋ o nyɛ Chɛhowa yeema naa miŋ tosa wo choo. Le tamaseliiyo, mi Chiisu dimi aa, “Te la mal waŋnda le sɔɔŋ wɔɔŋ nda tosal nya woŋ pɛ, Mɛlɛka Finya nya o cho o fondaŋ ndɔɔ wo, ndu bɛɛ o mal nya le yɔŋnda wɔɔŋnda nya tosa laŋ. Kɛ nduyɛ, te la kɛɛ le waŋnda malɔɔ le sɔɔŋ wɔɔŋ nda tosal nya woŋ pɛ, mɛɛ Mɛlɛka Finya nya o mel nya le yɔŋnda wɔɔŋnda nya tosa laŋ kposoŋ te.” Nduyɛ mɛɛ Pitɛ nyuna Chiisu te bɛmbɔɔ “le ŋɔmmɛu” naŋ nɔ ni miŋ mal wana tosal naa suɛi wɔɔŋnde wo, mi Chiisu muli aa, “Ɛ ɛ, o cho le ŋɔmmɛu koni le ŋ nɔ ma mal ndu le, a nɔ ma mal ndu mi nyɛ koŋ kuɛ bele ŋɔmmɛulaŋ sala ŋɔmmɛu (bɛmbɔɔ bele ŋɔmmɛu a le ŋɔmmɛu, NW).”​—Maatiu 6:14, 15; 18:​21, 22.

16. Taamasi kɛndɛ kuɛɛ Choosɛ kɛsullɛ naa?

¹⁶ Taamasi Choosiɔɔ pɛɛku naa mɛɛ naŋ nɔ miŋ tosa yɛ te waŋndo tɛɛmbuu naa pɛ kɔllo? Choosɛ nda pɔmbɔ ndɔ kinɛi Chekɔpu finya nda a Luechɛl kala nda velu ni. Chekɔpu ndoo nɔ puaa cheleŋ tɔ, kɛ Choosɛ ndoo hiou kaala. Mi hei tosa ma paŋala Choosɛ tau bɛndu. Mɛɛ nda tul ndu leyɛ tei ma pisi ndu o chɛleŋ niŋ Ichipi. Mɛɛ wɔsila bɔɔbɔɔ la hiou, mi masaa Ichipi siiŋguu Choosɛ wana kpaaya bɛndu diiŋ ndɔɔ le lɛŋnde leŋ kpou kanifuule, mi nyɔɔ hɛnaŋ ndu tau a wali kɛndɛ Choosɛ ndoo tosa wo. Mɛɛ nyɔɔ viou kpɛɛ, mi bɛndaa nduaa finya piliaa huŋ Ichipi le nyɛdiaa piondɔɔ kanifuule, yiaŋ ma wa o lɛŋnde ndaleŋ niŋ. Mɛɛ nda che Choosɛ, a sina ndu le, kɛ mi ndu sina nda. Mi che bɛɛ a chiee ndu biyɔɔ le, o tuisi nda nyɛpalaa choo le. Kɛ, mbo tofa nda te a siŋgaŋ pɛ kpeekpei. Mɛɛ Choosɛ sina maa a siŋgaŋ, mbo dimul nda maa pɔmbɔ nda o cho ni. Okoŋ, mbo dɛɛniaa nda aa, “Siooŋii o siooŋii i wa nya le. I cho hiouwɔɔ lachi a nyɛ o nyɛ fee tosaa le nya a chuauwaa nyaa.”​—Chɛnɛsee 50:​21.

17. Yɛɛ ŋ yeema yɛ le tosaa te acheleŋnda benduŋ pɛ a num?

¹⁷ Kɛsiŋ o kɔl maa naa kpou nɔ siɔuwoŋ. Le hei, num bɛɛ pilaŋ acheleŋnda tana. Lelaŋ, te a sina pɛ maa a benduŋ a waŋndo, tol sila Baabuiyo kɔɔli. Dimul wana koŋ mbo mal num haki, nduyɛ ma kindiŋ mi kɔl nyuloo miiŋgu nya tɛɛŋ. (Nuawɔ Maatiu 5:​23, 24.) Te waŋndo mal naa pɛ haki, miŋ naŋ kɔl. Lelaŋ, ŋ nɔ miŋ tosa nyɛ pilɔɔ kpe le nda. Kolosiaŋnda 3:​13 dimul naa aa, “La biuwaŋ vellaa velle. Nduyɛ, te o wa pɛ mi chaaŋ num yɔŋ num isɔɔ, mɛɛ mal ndu le suɛi wɔɔŋ o tosal num keŋ nde.” Te ŋ kaala pɛ puaapiliaa naa kɛsɛ kɛsɛ, ŋ kɛsiŋ suɛi nda tosal naa paandu ve o kɔl te. (Kɔliŋtiaŋ Tasoo 13:​5) Nduyɛ te ŋ mal acheleŋnda haki pɛ, Chɛhowa bɛɛ cho naa malɔɔ haki. Lelaŋ te acheleŋnda benduŋ naa pɛ, ŋ nɔ miŋ tuinuŋ nda inyɛɛ mɛɛ Finya naa Chɛhowa tuinuŋ naa inyɛɛ yɛ.​—Nuawɔ Sam 103:12-14.